Read Ngiemboon Heber 1 Bible Online

Heber 1 - Ngiemboon bible

Heber 1

¹Á laa tsɔ́ fʉ̀’, e Ssé gɔɔn nò mbwo pà mangʉa njʉ̀’ pégè, á nà mekwò tà ńgyɔ́ɔn, mbɔɔ ná mentí tà ńgyɔ́ɔn. Pú’u, ńcʉa ná pàntsẅì nkʉ̀ pé.

²Á kéen ńgwɔ́ nà yégè kème njÿó yɔɔn gie á cʉ́’ ńgwɔ́ pɔ́ ye lɔg ńzsote, á gɔɔn nò né pege, ńgwɔ gɔɔn, ńcʉa pɔ́ ná Míŋ we. Á gwɔ́ yé gẅie à la cʉa ná yé, ńnyɛte njÿó ntsèm, ḿbiŋ ńgíŋ ńzába yé pá’ kɔ̀ɔkɔ́ɔ ge lá’ gwɔ́ pɔ́ yé.

³Mé fó pɔ́ ná múɔ wɔ̀ɔn tá ńgyá pá’ legú’ Ssé aa tè laa yé pú’u. Á lɔɔn ńgwɔ́ gie e Ssé aa lêkɔ́ wɔ́, mbà míŋ we giŋé ńgwɔ́ yé kwà’ pú’u. Á yé gẅie à lɔg pɔ́ metʉ̀ mie ée nà shwóŋè yé, ńtóonte kɔ̀ɔkɔ́ɔ gie áa tsɛ̀ɛ njÿó ntsèm. À la gwɔ́ tà ńgÿo mmó gie e Ssé ne fóo mǒ ńdege menò tepòŋ pʉ̀a mesoŋ tà á mag, á gʉa nê tÿǒ lepwó, ńnéŋe nà gwoŋó pwó Ssé ye tʉ̀, yé Ssé gẅie à pǔ sá’a kɔ̀ɔkɔ́ɔ.

⁴Á la cʉa pú’u, múɔ cʉa *mecÿɔ́’ Ssé, tà Ssé ná lezíŋ sé, é nyɛ ngie à fǎŋ ńcʉa wɔ́b.

⁵E Ssé laa zɔɔn ńgɔɔn mbwo tsɔ̌ cÿɔ́’ we ngie: Ɔ̀ɔ míŋ wɔ̀ɔn tà fó lyɛ̌’ɔɔn n gwɔ́ tá gù wɔ́. À ké laa zɔɔn ńgɔɔn mbɔɔ ná tsɔ̌ ngie: Mèŋ n ge gÿo gwɔ́ mbwo yé é gwɔ́ tá we à gwɔ́ mbwo mèŋ ńgwɔ́ míŋ wɔ̀ɔn mɔ́.

⁶Tá á la ké ńgʉa fʉ̀’ gie e Ssé lɔ̌ɔn ńge gÿo Míŋ we gẅie yé zɔɔ twó mvfò nà kɔ̀ɔkɔ́ɔ à tóo tsɛ̀ɛ njÿó, yé Ssé gɔɔn ngie: Á poŋ ngie mecÿɔ́’ pé, yé Ssé, métsèm gu’te yé,

⁷ńgʉa nà mecÿɔ́’ pé ńgɔɔn ngie: À gÿo mecÿɔ́’ pé gwɔ́ pɔ́ pá’ fefà la ńgíŋe ńgÿo megàŋa fà’ pé ŋwɛ́ gwɔ́ pɔ́ pá’ melʉ́me mmɔ̌g la.

⁸Tá ńké ńgʉa ná míŋ we, á gɔɔn ngie: Gù Ssé, à lʉŋe lefùɔ jú áa lá’a gwɔ́ pɔ́ wó. MÀbɔ́ɔnte ngie: Ntí gie ɔ̀ ne ńdɔgɔ sá’a lá’ jú ee ndʉŋ ndʉŋ.

⁹Ɔ̀ kwoŋo nò gie á tyé ndʉŋ ndʉŋ, ḿbʉa gie á té tyé. Áa mmó gie á gÿo me Ssé, mèŋ Ssé jù la zɔ́’ɔ gú ńdɔgɔ gú ńgÿo mmó, mbùm jù poŋo mǒ tɛ’ Mèŋ n da cÿó gʉme jú ńcʉa ye *ngàŋa kwò jú.

¹⁰Ńgíŋe ńgɔɔn ngie: Aa gù Cʉ̀apʉ̀a gẅie ɔ̀ laa nzyeté, ńnyɛte tsetsá’. Lepwó gíŋe ńgwɔ́ pɔ́ mefà’ mú.

¹¹Sɛ̌ shúm ge gÿo mag, tá ńgʉa ná gù, ɔ̀ gwɔ́ pɔ́ wó. Sɛ̌ shúm ge gÿo zẅìŋ pá’ nzsǒ la

¹²Ɔ̀ ge gÿo káte wɔ́b pá’ mé káte nzsǒ fÿɔ́g la Mé ge gÿo kúbe wɔ́b pá’ mé kúbe nzsǒ la Tá ńgʉa ná gù, mbà ɔ̀ ge lá’a gwɔ́ pɔ́ pá’ ɔ̀ gwɔ̌, agù le gwɔ́ wó à tě ńdá’a ḿmaga wɔ́

¹³E Ssé laa zɔɔn ńgɔɔn nê tsɔ̌ cÿɔ́’ we ngie: Tóo ńnéŋe nà gwoŋó pwó yɔ́ɔn ye tʉ̀ ńzẅí’te mèŋ n dɔg megàŋ mbù pú, ńgÿo ntÿɔgɔ́ mekwò mú wɔ́?

¹⁴Anò *mecÿɔ́’ Ssé zɔɔn pá’a ńgwɔ́ kɔ́? Pɔ́ gwɔ́ pɔ́ mezẅìge mie é fa’a mbwo Ssé, á ne ńtúmo wɔ́b ngie pɔ́ gʉa fa’a fà’ gie á ge kẅéte pʉ̀a pie yé Ssé ge tâ gÿo pɔ́ tsẅɛ́.