Read Ngiemboon Heber 12 Bible Online

Heber 12 - Ngiemboon bible

Heber 12

¹Á gʉa ná pege, pʉ̀a ŋwɛ́ métsèm tÿɔ́’ɔ wégè ńnéŋe soŋ, ńne ńnyɛɛ wégè mánzsè. Pú’u la, pege tsó kɔ̀ɔkɔ́ɔ gie á ne ńtáte wégè ńgwá’, té lege menò tepòŋ, é kú’te wégè, ḿbiŋ ńdúe ńcʉ́’ʉ mà. Pege gwá’, ńtɔ́ɔnte yégè ndʉ̌ gẅie e Ssé gɔɔn ngie à lɔɔn ńgwɔ́ pege kÿo. Pege gwɔ́ tà ńne ńkÿo tà pege kʉ́a.

²Pege ne ńtÿɔ́gɔ menÿɔ́g pɔ́ ná Yěsô gẅie à la zí’i wégè lézáb ntʉ́m nà Ssé, yé zɔɔ nyìŋ gẅie à ge lá’ ńnéŋe wégè ná mbwó Ssé ndà’ ndà’. À la nyé lekág gẅie à laa we, mé kíme yé nà tÿǒ nkǐ á shÿɔg shÿɔg, à tè lɔg shʉ́ gẅie ée nà lekwě pú’u, ńtóŋo tsɔ́ nò wɔ́. Aa fʉ̀’ɔɔn ńnéŋe ngʉ̀ŋe lʉŋe lefùɔ ye Ssé, á nà gwǒŋo pwó Ssé ye tʉ̀.

³Pi zɔɔn ńnéŋe ńkwaŋte pɔ́ Yěsô, megàŋ mefʉa lɔ́ɔn ḿbʉa yé, ńgege yé, á ké shÿɔgɔ shÿɔg. Pi gÿo pú’u, ńzsé ngie ntʉ́m gẅi té pÿɛ́ pi kʉ́a wɔ́.

⁴Pi zɔ́ɔn fó ńnyé pɔ́ tè lɔg pá’ pi ne ńdʉ’ʉ nò tepòŋ, ḿbyɛ́b ncù tà mé pfɛte metse mí.

⁵Tsye pi legé pá’ e Ssé ne ńkẅiŋte gẅi pɔ́ pá’ nyìŋ kẅiŋte gubé yé ka? Áa tsɛ̀ɛ ŋwà’ne Ssé mé gɔɔn ngie: Míŋ wɔ̀ɔn Cʉ̀apʉ̀a lɔɔn ne ńkaga gú, Ɔ̀ pɔ́ɔn légwága nò mǒ, À lɔɔn ńcÿɔ́gɔ gú ɔ̀ pɔ́ɔn létsyɛte nnɛ́

⁶Á nue Cʉ̀apʉ̀a kag pɔ́ nyìŋ gẅie yé Cʉ̀apʉ̀a ne ńkwoŋo yé Á lɔgɔ tsemé mmó ńcúa wɔ̌wɔ́ɔ gwie yé Ssé zsě ngie aa míŋ we.

⁷Pi lɔɔn ńne ńgyá ngɔ́’ pi shÿɔg shÿɔg, á nue Ssé lɔgɔ ńkaga gẅi kag ńtí pá’ pi ee gubé yé, ńgwɔ́ mé gyá múɔ gẅie tá we tè yé kag á nzɔ̌?

⁸E Ssé lɔɔn tè kaga gẅi pá’ à kaga penkʉ́ pé wɔ́, mbà pi lɔgɔ ńgwɔ́ pɔ́ púɔ gÿɛ́, pi tè kwà’ púɔ pé wɔ́.

⁹Pá’ metá pégè pe ndùmo ssé tsetsá’ ka ne ńkaga wégè, pege jú’u ncwò wɔ́b la, tà ngʉ̀a shÿɔ́’ɔ pá’ pege ge ná nnɛ́ ssé mvfò Tá wege gẅie aa tÿǒ lepwó, à náa le gwɔ́ wó mbwo pege.

¹⁰Metá pégè pe ndùmo ssé tsetsá’ kɔ́ɔn ńzɔɔn ńkaga wégè ná yɔb ntí, á ka kě ńgwɔ́ pɔ́ ná mûɔ méfʉ̀’. Tá ńgʉa nà Ssé, mbà à kaga wégè, ńdɔgɔ ńgÿo pɔ́ kwà’ nò mbòŋo ná pege, légwɔ́ gie pege ge gwɔ́ té *lɔ̌’ pá’ yé.

¹¹Áa nénʉ́ ngie á gʉa fʉ̀’ gie mé ne ńkaga nyìŋ, anò té ngàŋ fʉ̀’ó poŋ, anò pÿɔ́gɔ yé pÿɔ́g. Tá tsɔ́ fʉ̀’ gÿo ńgwɔ́, pʉ̀a pie é la fó mǒ ńzí’i mmó, gÿo mmó gie áa ndʉŋ ndʉŋ mvfo Ssé, ḿbiŋ ńnéŋe lê mbʉ́lè.

¹²Pú’u la, pi siŋ mbwó mí mie é kʉ̌a, ésiŋ mekẅi’té mí mie é ne ńzóŋe.

¹³Pi giŋe ná mánzsè gẅie à tyé ndʉŋ ndʉŋ, légwɔ́ gie lejÿɔgɔ́ kwò nyìŋ gẅie à ne ńnyí’i té mege pwɔ́’ɔ wɔ́, tà ńcʉ́’ pú’u, ésẅéte sẅeté.

¹⁴Pi fa’ pá’ pia mânyìŋ ntsèm ge ńnéŋe lê mbʉ́lè. Pi fa’ mbɔɔ pá’ pi ge gÿo mmó gie Ssé tè gyá *lɔ̌’ mǒ wɔ́. Á nue nyìŋ lɔɔn ńgÿo mmó gie e Ssé ge gyá *lɔ̌’ mǒ, ngaŋ lelá’ ńgyá Cʉ̀apʉ̀a wɔ́.

¹⁵Pi pɔ́ɔn pá’ à lɔɔn ńgwɔ́ nyìŋ tém nzèm Ssé gẅie à ne ńdɔgɔ lékwoŋo wégè ńcÿó gʉm yégè, ḿbɔ́ɔn nyìŋ gẅi lésele, tà ngÿǒ menò mé cʉ́’ lelaŋ tepòŋ, mbà à ge nɔ́g petsɔ́ pʉ̀a tsɛ̀ɛ cú’tè gí, pʉ̀a tà ńgyɔ́ɔn gÿo pá’ ye.

¹⁶Pi pɔ́ɔn pá’ à lɔɔn ńgwɔ́ nyìŋ gẅi pumo wɔ̌wɔ́ɔ pɔ́ yé nuŋe nuŋe, ḿbɔ́ɔn pá’ à lɔɔn ńgwɔ́ nyìŋ nyé té néŋ mekù’ ná shúm sie ée se Ssé, ndʉŋ ndʉŋ pá’ Esaẅi gẅie à la sẅiŋe nò mûɔ ndÿò gẅie à laa wɛ̌, mé lɔgɔ tà’a káŋa mmó léjÿó ńjú.

¹⁷Pi cwoŋo ńne ńzsé ngie afʉ̀’ gie tá we lɔ̌ɔn ńge ńnéŋ mbʉ́lè ná yé la gÿo ńku’, tá we cʉ́’ ḿbe’e yé pe’e. Á lɔgɔ lélʉa, éfa’ shÿó pá’ tá we ge kúbe nkwaŋá wé, á tè mǒ ku’.

¹⁸Á gʉa nà gi ntí lelɔg sẅɛ’te nnɛ́ nê lejʉ́ŋ Ssé, mbà e tè pá’ ye pà Israel á ngʉ̀ŋe lekwɔ’ɔ́ Sinay gie e gwɔ́ pɔ́ ye ndùmo ssé tsetsá’ wɔ́. Pɔ́ la gyá mmɔ̌g mǒ pá’ é kÿo, ńgyá e jʉ’ síŋ, nzěm gwe, ńjú’ afóm cʉ’,

¹⁹ńjú’ mé tóŋ ntàŋ, ńjú’ tsɔ̌ máamáa ngyè ne ńgɔɔn nò, ńzẅɛ tà pʉ̀a pie pɔ́ la ne ńjú’u, té gíŋe ńkwoŋ ngie e gíŋe ńkẅi’i ńgɔɔn tsɔ́ nò né pɔ́b wɔ́,

²⁰á nue pɔ́ la jú’ mé záb ngie: Nyìŋ mesoŋ kà pɔ́ nɔ̀ɔn wɔ́ lɔɔn ńkíbe lekwɔ’ɔ́ ŋwɛ́ mé lɔg metóon ńtémte yé ńzẅé, pɔ́ jú’ á gege wɔ́b tɛ’.

²¹Àammó gie mé la ne ńgyá, á vege pʉ̀a vege, tà Mǒsê gɔɔn ngie à pǔ ńcÿɔ’ cÿɔ’ tà ńcʉ́’ʉ ḿvɛɛ vɛ.

²²Tá á ké ńgʉa ná pi, mbà pi ka sẅɛ’te nnɛ́ ńtóo lekwɔ’ɔ́ Sioŋ, á lɔgɔ ńgwɔ́ tÿǒsoŋo ye Ssé gẅie aa ńgwɔ́ pɔ́ wó, á Yerósalem gẅie aa tÿǒ lepwó, á jʉ’ gie *mecÿɔ́’ Ssé tè sǎŋ ńzsé nzẅìŋ cú’te wó tsɛ̀ɛ lekág.

²³Pi ka sẅɛ’te nnɛ́ ńtóo tsɛ̀ɛ cú’tè pʉ̀a pie Ssé la lɔgɔ wɔ́b ńgÿo púɔ pé pie ée twó mvfò, pɔ́ gwɔ́ tsɛ̀ɛ lekág, mezíŋ mɔ́b gwɔ́ me ŋwe’e á tÿǒ lepwó. Pi ka sẅɛ’te nnɛ́ ńtó nê kwà’ lejʉ́ŋ Ssé, ée ndà’ yé, ńgwɔ́ ŋàg pʉ̀a mesoŋ métsèm. Pi ka tǒ nê jʉ’ gie mezẅìge pʉ̀a mesoŋ pie pɔ́ ée ndʉŋ ndʉŋ mvfò Ssé ée wó. Pɔ́ ée fʉ̀’ɔɔn ńgwɔ́ pʉ̀a Ssé pɔ́ ndà’ ndà’.

²⁴Pi ka sẅɛ’te nnɛ́ ńtó nê lejʉ́ŋ Yěsô gẅie à la pfɛte metse mé lélɔg sɔgɔ *lɔ̌’ ná pege, aa mamekěm nà *kʉ̀a gie áa ye sẅé, metse mé gẅiin nò gie é gɔɔn mbwo pege, á cʉ́e ńcʉa nò gie metse Abe gɔɔn.

²⁵Pú’u la, pi pɔ́ɔn le lʉ’ʉ lézẅí’te nò gie á kẅɛɛ ncwò nyìŋ gẅie à ne ńgɔɔn nò mbwo pi, á nue á lɔɔn ńgwɔ́ gie mé la néŋ ntsaŋ twó pʉ̀a pie pɔ́ la lʉ’ʉ lé jú’u nò gie Mǒsê laa ndùmo ssé tsetsá’ ńne ńkága tuŋó yɔ́b mǒ, mbà pege lɔɔn ńtém nzèm Ssé gẅie aa tÿǒ lepwó, ńne shwóŋó wégè nò, mbà á ge gǎ tá pege e le kú pɔ́ ngɔ́’ gie e tɔ́g yɛ̌ wɔ́.

²⁶E Ssé gẅie à la lá’ ńgwɔ́ tsɔ́ fʉ̀’ ńgɔɔn nò, ngyè ye gÿo tsetsá’ cʉ’ʉ la, aa nà lyɛ̌’ɔɔn, mbà à ka ka’a mbwo pege ngie: Á ge lá’ gíŋ gwɔ́ tsɔ́ fʉ̀’, á le gÿo tsetsá’ ndà’ zɔ̌ cʉ’ʉ wɔ́, à gÿo mbɔɔ tÿǒ lepwó cʉ’ʉ.

²⁷Yɔɔn nò lɔgɔ ńgɔɔn ngie: Á ge lá’a tsɔ́ fʉ̀’ mé pe’e shúm sie à lɔɔn ńnʉ’te é zóŋe, ńnáa nzèm é mag, á nue ée shúm sie mé la nyɛte nyɛte, é gÿo pú’u, é zsé ngie shúm sie mé nʉ’te é té zóŋe, zɔ̌ ge cʉ́’ gwɔ́ wó.

²⁸Pá’ pege ge lá’ gwɔ́ tsɛ̀ɛ nò lefùɔ sie à lɔɔn ńgwɔ́ tsɔ́ mmó le nʉ’te é zóŋe wɔ́ la, pege síe Ssé, éfa’a mbwo yé nà ntí gie à ne ńkwoŋo, ńná nnɛ́ ssé, ḿbɔ́gɔ yé.

²⁹Á nue e Ssé yege, ée mmɔ̌g gẅie é tuɔ shúm ntsèm sie ée mbwo yé ńgwɔ́ se tepòŋ.