Read Ngiemboon Heber 3 Bible Online

Heber 3 - Ngiemboon bible

Heber 3

¹Pú’u la, mbà mefɛ́ pɔ́ɔn pʉ̀a kristo, e Ssé yé máŋwɛ́ zɔ ka tóŋo gẅi nà nò yé, àwɔ̌ɔwɔɔ tóo ná yé mmó. Pi sáŋa nò ná nyìŋ gẅie Yěsô aa wɛ̌, aa yé gẅie e Ssé la túmo yé ngie à gwɔ́ wege *nùŋe pwɔ́’ we lÿò ná nò Ssé gie pege tyé mǒ.

²À la gÿo kɔ̀ɔkɔ́ɔ gie e Ssé la tsɔ́’ɔ yé légwɔ́ gie à ge gÿo, ndʉŋ ndʉŋ pá’ Mǒsê la gíŋe ńgÿo yé pú’u, á nà fʉ̀’ gie à la ne ńdíe pʉ̀a Ssé.

³Á zɔɔn ńgwaa gwɔ́ we legú’ gẅie mé la ná tɔ́gɔ we Mǒsê, á nue nyìŋ kwɛ́ ndá mé gɔ’te ngàŋ ńtɔ́g ndá gie à kwɛ̌.

⁴Yɛ̌ ndá wɔ́ zɔɔn ńgẅiin nyìŋ gẅie à la kwɛ́, tá nyìŋ gẅie à la gÿo shúm ntsèm aa Ssé.

⁵Á ké ńgʉa ná Mǒsê, mbà á laa fʉ̀’ gie à la ne ńdíe pʉ̀a Ssé, ńzsé yé pɔ́ ndà’ mmó gie e Ssé la gɔɔn ngie à gÿo, ńgwɔ́ pɔ́ ngàŋa fà’, àkɔ́ɔkɔ́ɔ gie à lɔ̌ɔn ńgÿo nyɛɛ mmó nà menò mie e Ssé lɔ̌ɔn ńge lá’ gÿo e kẅɛ.

⁶Tá á gʉa ná Kristo, á gwɔ zsé yé pɔ́ ndà’ mmó gie e Ssé la gɔɔn ngie à gÿo wɔ́, ńgwɔ́ múɔ ndá, gẅie mé la tÿɔ́gɔ yé pá’ à ge sá’ pʉ̀a Ssé. Epʉ̀a Ssé lɔgɔ ńgwɔ́ pɔ́ wégè, pá’ pege lɔɔn ńkú’te mmó gie pege la zẅíŋ tà pege tè mʉ́’te, ńgíŋ ńnéŋe ńne ńdɔgɔ pɔ́ ka’te ńzẅí’te mmó gie e Ssé la ka’a mbwo pege.

⁷Áa mmó gie á gÿo a Zẅìge Ndʉalʉ̌a gɔɔn ngie: Pi lɔɔn ńjú’ ngyè Ssé lyɛ̌’ɔɔn

⁸Tà pi ziŋe metuŋó mí pá’ pà mangʉa njʉ’ pi la ziŋe nà lyɛ̌’ gie pɔ́ la ne ńtʉʉ twó mbwo yé Á lyɛ̌’ gie pɔ́ la tsóte yé nkwòŋo tsẅɛ̀ ngie à gÿo mmó né pɔ́b

⁹E Ssé gɔɔn ngie: Pà mangʉa njʉ’ pi la tsóte wɔ̀ɔn nkwòŋo tsẅɛ̀, ńgie mèŋ n gÿo mmó né pɔ́b ńdɔgɔ fa’a légyá pá’ mèŋ n ge gÿo, ńtsóte wɔ̀ɔn pá’ɔɔn tà mbɔɔ pá’ pɔ́ gyǎ mmǒ gie mèŋ n gÿǒ gyá ngù’u lá’ móm lekùa.

¹⁰Áa mmó gie á la gÿo anò yɛ̌ kwò pʉ̀a mesoŋ pÿɔ́gɔ wɔ̀ɔn. Tà mèŋ n gɔɔn ngie: Pɔ́ ée fʉ̀’ ntsèm ntʉ́m wɔ́b fó ná mèŋ ńzyɛ́bɛ zyɛ́bɛ. Pɔ́ la lá’ tè lɔgɔ tsɔ̌ tà’ ná menò mie n da ne ńtsẅii mbwo pɔ́b, ńtóŋo tsɔ́ nò wɔ́.

¹¹Áa mmó gie á la gÿo n dɔgɔ lóŋ ńkʉa ngie: Pɔ́ téen ńdá’a ńkúu tsɛ̀ɛ sẅétè gie n da ka’a mbwo pɔ́b wɔ́.

¹²Pú’u la, mbà mefɛ́ pɔ́ɔn, pi laga twó gí, tà ntʉ́m tsɔ̌ nyìŋ gẅi é le tiŋ ndʉ̀’ á fó ná Ssé gẅie aa ńgwɔ́ pɔ́ wó ńzyɛ́b ntʉ́m wé wɔ́.

¹³Tá’, pi ne ńkẅiŋte mennɛ́ mí pi né pi kẅiŋte, pú’u ńzsé ngie nò tepòŋ té ge fʉte tsɔ̌ nyìŋ gẅi, letʉ́m sé tʉ, á le gíŋe ńjú’ ngyè Ssé wɔ́ wɔ́. Pi gÿo pú’u, lyɛ̌’ ntsèm, á nue yɔɔn áa lyɛ̌’ gie mé ée tsɛ̀ɛ ŋwà’ne Ssé ńtóŋ ngie à lyɛ̌’ɔɔn. Yɔɔn zɔɔ lyɛ̌’ gie ńgwɔ́ mé jú’ ngyè Ssé.

¹⁴Pega Kristo zɔɔn ńcʉ́’ ḿbú ńgwɔ́ pɔ́ ná tà’a nò, tá’ á ne ńzɛ́te tà’a mmó wémɔ’ɔ́, á gwɔ́ lékú’te mmó gie mé la shwóŋó wégè tá pege záb ntʉ́m nà Ssé, ńkú’te kú’te tà ńdá’ ńkúu nà lyɛ’ɛ́ nzsoté.

¹⁵Pá’ ŋwà’ne Ssé gɔɔn ngie: Pi lɔɔn ńjú’ ngyè Ssé lyɛ̌’ɔɔn, tà pi ziŋe metuŋó mí pá’ pi la ziŋe nà lyɛ̌’ gie pi la ne ńtʉʉ twó mbwo ye.

¹⁶Pʉ̀a pie la zɔɔn ńjú’ ngyè Ssé, ńtʉʉ twó mbwo yé é laa pà wɔ̌? É laa pʉ̀a metsèm pie Mǒsê la lɔgɔ wɔ́b éfó tsɛ̀ɛ ngwòŋ Egipto ńkẅɛ.

¹⁷Anò pà wɔ̌ piŋ ńdá’ ḿbÿɔ́g Ssé pÿɔ́g ngù’ móm lekùa? Á laa nò pʉ̀a pie pɔ́ la fʉate menò, tà ńgwete nkwòŋo tsẅɛ̀ ńkwéte, mepfó mɔ́b sa jʉ’.

¹⁸Á piŋ ńkʉa nà nò pà wɔ̌ ńgɔɔn ngie pɔ́ téen ńdá’a ńkúu tsɛ̀ɛ sẅétè gie à la ka’a mbwo pɔ́b wɔ́? Á laa ná nò pʉ̀a pie pɔ́ la tʉʉ twó mbwo yé.

¹⁹Pege lɔgɔ ńgyá ngie pɔ́ la tè kúu tsɛ̀ɛ sẅétè gie e Ssé la ka’a mbwo pɔ́b wɔ́, mélà’mie pɔ́ la tè jú’u nò gie à gɔ̌ɔn, ńzẅíŋ wɔ́.