Read Ngiemboon Heber 6 Bible Online

Heber 6 - Ngiemboon bible

Heber 6

¹Áa mmó gie á gÿo á ne ńzɛ́te ngie tà pege zso ndà’ ná mendùŋ mvfò menò mie pege la zye mǒ lézsé nò kristo. Pege kag tʉ̀ ńzí’i menò mé mie mé zí’i pʉ̀a pie é cÿɔgté nà nò yé, tà pege é le lá’a ńzɔ́gɔ ńnuŋe pɔ́ cÿɔ̌ ndá wɔ́. Mé gɔɔn légíŋe ḿbiŋe nà menò pá’ letěm nzèm mefà’ mie é náa pɔ́ legwé, pá’ lezǎb ntʉ́m nà Ssé,

²pá’ lezi’í nò nà mekẅé ntse, pá’ lezi’í nò ná lezǎb mbwó twó pʉ̀a, pá’ lezi’í nò ná *lezimé nà legwé mbɔɔ ná pá’ e Ssé ge lá’ tsɔ́’te mentsaŋ é lɔg zsote.

³Pege nyé mɔɔn menò, ńzyɛ́’ ńgʉa lê mvfò, pá’ Ssé lɔɔn ńzẅíŋ.

⁴Mé gẅiin lényé nue pʉ̀a pie e Ssé gÿo, pɔ́ gyá jʉ’ʉ fɔ̌g, ńgÿo ńtém nzèm Ssé, á tʉ pá’ à lɔɔn ńgwɔ́ nyìŋ shwóŋó wɔ́b nò tà pɔ́ gíŋe ḿbiŋe mbwo Ssé. Mé gɔɔn pʉ̀a pá’ pie pɔ́ la zẅí’i mmó gie e Ssé fǒ tÿǒ lepwó ńná pɔ́ sẅɛ̀ɛ sẅɛ̀ɛ. E Ssé náa Zẅìge Ndʉalʉ̌a né pɔ́b, pɔ́ zẅí’i shwóŋè Ssé tà ńjú’ pá’ á poŋ pú’u, ńgíŋ ńzsé mbɔɔ pá’ metʉ̀ mie é ge lá’ tá tó ée pú’u. Pɔ́ lɔɔn ńkÿo Ssé, mbà á tʉ pá’ à lɔɔn ńgwɔ́ mé gÿo tà pɔ́ gíŋe ḿbiŋe mbwo Ssé, mélà’mie pɔ́ lɔgɔ légÿo pú’u, ńgíŋe ńkíme Míŋ Ssé nà tÿǒ nkǐ, ńtsɔ́’ɔ yé ńtÿɔ́g mé zoonte yé.

⁷Pege zɔɔn ńzsé ngie, mbʉ̀ŋ lɔɔn ńdúu nà tsetsá’ kwà’ mboŋó, eshúm sie é ge kẅéte pʉ̀a pie pɔ́ gÿǒ mé jʉ́’ʉ yɛ̌ tsetsá’ é kwɔ́’, mbà Ssé ge néŋ mbʉ́lè ná yɛ̌ jʉ’e tsetsá’.

⁸Tá ńgwɔ́ gie kɔ́ɔn *ngùb pɔ́ nyɛ́’ ŋu’ zɔ̌ lɔɔn ńkwɔ́’ɔ nà yɛ̌ jʉ’ʉ tsetsá’, mbà á té kẅéte nà tsɔ́ mmó wɔ́, mbà Ssé ge néŋ ndòon mǒ, mé gwá’, ńgÿo ńcʉ́’ʉ ńgwá ńtuɔ tuɔ.

⁹Mefɛ́ pég pe ntʉ̀ nzẅìŋ, peg ké ńgɔɔn pá’ɔɔn ńne ńzsé kwà’ mboŋó ngie pi ee ná mánzsè we mbòŋo á gwɔ́ gẅie mé pfó mǒ ńtsẅɛ́.

¹⁰E Ssé tè gÿo nò gie á té tyé wɔ́. À lɔɔn ńgwɔ́ á le lege mmó gie pi ka gÿo wɔ́, pá’ pi ka kẅéte mefɛ́ pi pʉ̀a Kristo, pi kě ńnyé ńkẅéte wɔ́b kẅéte, á lɔgɔ ńnyɛɛ ngie pi kwoŋ Ssé.

¹¹Ammó gie peg ké ne ńtsɔ́ɔn gwɔ́ pɔ́ ngie àwɔ̌wɔ́ɔ tsetsɛ̀ɛ pi wɔ́, à ké ne ńkaga tʉ̀ pɔ́ pú’u, ńdɔgɔ ńgee lê mvfò, tà ńdá’ ńkúu nzsoté légwɔ́ gie kɔ̀ɔkɔ́ɔ gie à ne ńzẅí’te mbwo Ssé, á ge gÿo pumte.

¹²Tà pi cʉ́’ melǒŋ. Tà ńcʉ́’ pú’u, pi pí fʉ̀’ ná pʉ̀a pie pɔ́ lɔgɔ lézáb ntʉ́m nà Ssé mbɔɔ lé zẅí’te té kʉ́a, ńkẅé mmó gie e Ssé la ka’a lénáa mbwo pɔ́b.

¹³Pi zɔ̌ɔn ńzsé ngie e Ssé la ka’a mmó mbwo Ábalam. Pá’ tsɔ́ nyìŋ gẅie à fǎŋ ńtɔ́gɔ yé Ssé, tà à lɔɔn ńgwɔ́ á lɔgɔ yé ńkʉa tè wó wɔ́ la, yé Ssé lɔgɔ kwà’ twó mbùm yé ńkʉa,

¹⁴ńgɔɔn ngie: «Mèŋ n gɔɔn tà shwóŋó nò, mèŋ n ge gÿo néŋ mbʉ́lè ná gù tɛ’, é gÿo ngẅɛ̀ jù pú ńgyɔ́ɔn tɛ’».

¹⁵Ábalam jú’, ńzẅí’te té kʉ́a, á cʉa pú’u, á lá’ ńgẅiin mmó gie Ssé la ka’a mbwo yé.

¹⁶Epʉ̀a mesoŋ zɔɔn ńcʉ́’ʉ lékʉa nò, ńdɔg lezíŋ nyìŋ gẅie à fǎŋ ńcʉa wɔ́b ńkʉa, ńgwaa kʉa pú’u, ńdɔgɔ ńnyɛɛ ngie áa nò, ńgíŋe ńdɔg ńjÿɔ́’ ncwò pàzoŋo yɛ̌ nò.

¹⁷Áa mmó gie e Ssé la gÿo, à la gɔɔn nò tà ńkʉa, á nue à la ne fa’a lé cwoŋe ńnyɛɛ mbwo pʉ̀a pie à la ka’a mmó mbwo pɔ́b ngie, ammó gie à la záb áa gie à téen ńdá’a ńkúbe wɔ́.

¹⁸Pú’u la, eshúm ée wó sépʉ́a sie à lɔɔn ńgwɔ́ é le kúbe, pá’ e Ssé la ka’a nò mbɔɔ pá’ à la kʉa, é gwɔ́ menò mie á tʉ tà Ssé gɔɔn mé fa’ kékáŋ. Wɛ̌ le gwɔ́ kẅiŋte wég tɛ’, á wég gẅie peg léen ńnyé kɔ̀ɔkɔ́ɔ, nkwaŋá wég cʉ́’ ńtyé pɔ́ nà mmó gie peg zẅí’te mbwo yé.

¹⁹Legwɔ́ gẅie pege ne ńzẅí’te mmó pɔ́ mbwo Ssé gÿo ntʉ́m wégè pʉ́le ńnéŋe té vɛ. Pege ne ńkwa’a ńzsé ngie pege ge lá’ shúu sẅɛ́, é kúu jʉ’ gie e Ssé ee wó.

²⁰Á nue Yěsô la vɔg ńkúu wó ńtí wégè. À piŋ ńgwɔ́ wó fʉ̀’ɔɔn, ńgwɔ́ nùŋe pwɔ́’ wege we lÿò, á nà ngù’u nkɔ́ɔn nê nkɔ̌ɔn, á nà ntí ye Melekisedeg.