Read Ngiemboon Heber 8 Bible Online

Heber 8 - Ngiemboon bible

Heber 8

¹Kwà’ nò gie peg ne fa’a lé shwóŋó gẅi á yɔɔn ńgwɔ́ ngie pege kwá’ ńgẅiin yɔɔn ntí *nùŋe pwɔ́’ we lÿò. À kéen ńnéŋe nà lʉŋe lefùɔ, á nà gwǒŋo pwó Ssé ye tʉ̀, á yé gẅie à pǔ fáŋ ńcʉa wɔ̌wɔ́ɔ.

²À fa’a fà’ *nùŋe pwɔ́’ we lÿò á kwa’ jʉ’ gie e Ssé ee wó, á tsɛ̀ɛ kwà’ ntàb[4] Ssé. Wɛ̌ ntàb gwɔ́ gẅie Cʉ̀apʉ̀a zɔ la lɔg kwà’ mbwo mé ńnÿɔg tà nyìŋ mesoŋ zɔ tè nÿɔg.

³Mé zɔɔn ńzába *nùŋe pwɔ́’ we lÿò pɔ́ légwɔ́ gie à ge lɔg shúm tóo mvfò Ssé nyɛɛ yé mbɔɔ pá’ à ge nùŋe pwɔ́’ mvfò Ssé. Áa mmó gie á gÿo á ne ńzɛ́te ngie wege *nùŋe pwɔ́’ we lÿò à gíŋe ńgẅiin yé mmó gie à ge náa mbwo Ssé.

⁴Kristo la gwé’e ńgwɔ́ ndùmo ssé tsetsá’, mbà à zɔɔn fó tè nùŋe pwɔ́’ wɔ́, á nue pànuŋe pwɔ́’ ná pá’ *lepʉ̌ Mǒsê ne ńzɛ́te, é léen ńdá’ ńgwɔ́ wó.

⁵Afà’ gie pɛ̌ pànuŋe pwɔ́’ fa’a, á lɔgɔ ńgwɔ́ pɔ́ fʉ̀’, ńdɔgɔ ńgwɔ́ pɔ́ jʉ́jʉ́ŋ ná kwà’ nò gie áa tÿǒ lepwó. Á lɔgɔ pú’u, ńgwɔ́ pá’ e Ssé la nyɛɛ Mǒsê pá’ à ge gÿo á fʉ̀’ gie á lɔ̌ɔn ńge nÿɔg ntàb Ssé, e Ssé la gɔɔn né yé ngie: «Lʉŋte pɔ́ ná gie mèŋ n da nyɛɛ gú ndùm lekwɛ́ la».

⁶Tá áa fʉ̀’ɔɔn, mbà Kristo kéen ńgẅiin yé fà’ á cʉa ye pànuŋe pwɔ́’ ŋwɛ́ tɛ’, ńtí nue à zɔɔn ńgwɔ́ màmekěm nà nò *kʉ̀a gie á poŋ cʉa ye mvfò, e Ssé la ne ńgwaa yɔɔn *kʉ̀a, ńka’ menò mbwo pege, é gwɔ́ mbòŋ tà ńcʉa.

⁷Ammó laa pé’e ńzɔɔn tè zága ná ndùŋ mvfò *kʉ̀a wɔ́, mbà mé la tè gíŋe ńgÿo tsɔ́ *kʉ̀a ńdɔg ńkúbe yɛ̌ wɔ́.

⁸Mé la gẅiin lékúbe, á nue e Ssé la kag pʉ̀a pé ńgɔɔn ngie: Á ké yɔɔn, atsɔ́ fʉ̀’ ne ńtóo, mèŋ Cʉ̀apʉ̀a zɔ gɔɔn ńgwɔ́ fʉ̀’ gie mèŋ n ge gÿo gwa *kʉ̀a sẅé á tsetsɛ̀ɛ pega pʉ̀a Israel lâ pʉ̀a Jẅida.

⁹Á té ge gÿo gwɔ́ pá’ *kʉ̀a gie n da gwaa tsetsɛ̀ɛ pega pà mangʉa njʉ’ pɔ́b, á nà lyɛ̌’ gie n da kíbe pwó yɔ́b, ńgÿo pɔ́ fó tsɛ̀ɛ ngwòŋ Egipto ńkẅɛ wɔ́. Pɔ́ la tè zsé pɔ́ ndà’ *lepʉ̌ *kʉ̀a gie n da gwaa tsetsɛ̀ɛ pega pɔ̌ wɔ́. Mèŋ yɔ́ɔn, n da tè gíŋe sáŋa wɔ́b nà tsɔ́ nò wɔ́, mèŋ Cʉ̀apʉ̀a zɔ gɔɔn.

¹⁰Tá *akʉ̀a gie mèŋ n ge gwaa tsetsɛ̀ɛ pega pʉ̀a Israel á yɔɔn. Yɛ̌ fʉ̀’ ge gÿo gwɔ́ tà tɔ́g, mèŋ Cʉ̀apʉ̀a zɔ gɔɔn Mèŋ n gÿo legyè sɔ́b ńnéŋe ńtyé pɔ́ nà mbʉ̌ mɔ́ɔn mbɔɔ ntʉ́m wɔ́b tyé pɔ́ mǒ Mèŋ n gwɔ́ Ssé yɔb pɔ́ gwɔ́ pʉ̀a pɔ́ɔn

¹¹À gwɔ́ fʉ̀’ó, atsɔ̌ nyìŋ le gíŋe ńzí’i nyìŋ lá’ gwɔb mmó zí’i wɔ́ nyìŋ ké le gíŋe ńzí’i fɛ́ we zí’i ngie: Zsé jú nò Cʉ̀apʉ̀a wɔ́. Á nue mânyìŋ ntsèm ge lá’ gwɔ́ fʉ̀’ó ne zsé wɔ̀ɔn. Á léfóo ná mûɔ mémúɔ gẅie aa tsetsɛ̀ɛ pɔ́b, ńgʉa ńkúu ná nzẅìŋe ndÿò.

¹²Mèŋ n zɔɔn ńge gÿo lege mefʉa mɔ́b náa mbwo pɔ́b. N te gÿo gíŋe kímte menò tepòŋ mɔ́b wɔ́.

¹³E Ssé la lɔg pá’ à toŋó yɔɔn *kʉ̀a lê *kʉ̀a sẅé, ńdɔg ńda’te ngie ndùŋ mvfò zẅǐŋ. Pege piŋ ńzsé ngie ammó gie á zẅǐŋ, tà ne ńkwote áa gie á cʉ́’ʉ ńgee pɔ́ ḿmagá.