Read Ngiemboon Heber 9 Bible Online

Heber 9 - Ngiemboon bible

Heber 9

¹Nndùŋ mvfò *kʉ̀a la gẅiin ye ntí mendendá’ gie mé lɔ́ɔn ńgiŋe mǒ tá ńnuŋe pwɔ́’. Mé la gíŋ ńgẅiin jʉ’ gie mé nuŋe pwɔ́’ Ssé wó, á gwɔ́ pɔ́ ndùmo ssé tsetsá’.

²Mbà mé la jwoŋo máamáa ntàb, ńdɔgɔ mmó nzsǒ ńzá’ nzsè pʉ́a, ńtóŋo lúm we pǐ ngie tsɛ̀ɛ jʉ’ gie e Ssé ee wo, tsɔ̌ ntí máamáa túlukáŋ gwɔ́ jʉ’ó, ńgẅiin mentyɛ’ɛ́ sɔɔn mbʉ́a, tápele gíŋ ńgwɔ́ jʉ’ó, mbelég gie mé nǎ mbwo Ssé gwɔ́ ndùmo.

³Lúm we tsoló gẅie aa nzèm mmó nzsǒ yɛ̌ gwɔ́ kwà’ jʉ’e Ssé.

⁴Á gwɔ́ tsɛ̀ɛ wɛ̌ lúm, lekyè mmɔ̌g tyé tsoló, mbà mé la lɔgɔ tʉ̌ gɔ̂l ńnyɛte, mé tuɔ shúm gyě ndùmo, àkʉ̀be *kʉ̀a gie e Ssé pâ pʉ̀a la gwa tyé yé tsoló, mbà mé la pú ńdɔg pɔ́ tʉ̌ gɔ̂l ńdɔg shʉŋ menzèm ntsèm, atsɔ̌ mûɔ méngwʉ̌ŋ gẅie mé la gíŋe ńdɔg pɔ́ tʉ̌ gɔ̂l ńnyɛte á tyé tsɛ̀ɛ yɛ̌ kʉ̀b lé mána tsoló, atÿǒ Aroŋ gie metootǒ la lá’ ńkẅɛte mǒ gíŋe ńnùŋe tsoló, metǎfelé tóon mie mé la ŋwe’e nò *kʉ̀a gie e Ssé pâ pʉ̀a pé la gwa gíŋ ńgwɔ́ tsoló.

⁵Á gwɔ́ ndùmo kʉ̀be *kʉ̀a, mbà mé la tÿɔ́g metútú *mecÿɔ́’ Ssé, é ne ńnyɛɛ ngie e Ssé ee jʉ’ó, jʉ́jʉ́ŋ mbabá mɔ́b kábte jʉ’ gie mé pfɛte metse menɔ̀ɔn wó, ḿpfɛte légwɔ́ gie e Ssé ge lege menò tepòŋ pʉ̀a mesoŋ. Tá’, yɔɔn té fʉ̀’ gie pege ge gɔɔn nò ná menò mɔɔn ntsèm tà tyɛ’te wɔ́.

⁶Me pú ńtáŋte pá’ɔɔn, pànuŋe pwɔ́’ kúu tsɛ̀ɛ lûm we pǐ é lyɛ̌’ ntsèm éfa’a fà’ yɔ́b.

⁷Tá ńgʉa ná lûm we tsoló, *anùŋe pwɔ́’ we lÿò gílé yé zɔ̌ kúu jʉ’ó tà’ legʉ̀a ná ngù’u lá’, ńké těen ńkúu jʉ’ó té gẅiin metse mie à lɔgɔ ńtóo mvfò Ssé ńnyɛɛ ńtí menò tepòŋ mé yé, mbɔɔ me petsɔ́ pʉ̀a wɔ́.

⁸A Zẅìge Ndʉalʉ̌a lɔ́ɔn ńdɔgɔ pú’u, ńnyɛɛ ngie wɔɔn ndùŋ mvfò ntàb lɔɔn ńké ńdá’ ńnyé ńgwɔ́ pɔ́ wó, mbà mánzsè létɔ́g tà ńkúu ná kwà’ jʉ’ gie e Ssé ee wó, à tè tsɔ́’ɔ wɔ́.

⁹Áa mbwo pege ná fʉ̀’ɔɔn ńgwɔ́ liŋé gie mé lɔgɔ ńnyɛɛ wégè nò. Yɛ̌ nò gwɔ́ ngie: Ammó gie mé náa mbwo Ssé lâ pwɔ́’ gẅie mé nuŋe mvfò yé, ńgwɔ́ é le gÿo tà ntʉ́m nyìŋ gẅie à gu’te Ssé ná yɛ̌ ntí, é nyé té ké ne ńŋaga yé ŋag wɔ́.

¹⁰Yɛ̌ ntí legu’te Ssé ee ntí gie e lǐe pɔ́ mbùm nyìŋ, á gwɔ́ nò ńdíe shúm léjÿó, ńdíe melù’, ńdíe lésɔg *melɔ̌’. Metʉ̀ mɛ̌ mbʉ̌ la gẅiin légwɔ́ wó tà ńdá’ ńkú pɔ́ fʉ̀’ gie e Ssé lɔ̌ɔn ńge gíŋe gÿo kɔ̀ɔkɔ́ɔ pɔ́ sẅe sẅé.

¹¹Á ké ńgwɔ́ nà fʉ̀’ɔɔn, mbà Kristo léen ńtó ńgwɔ́ *nùŋe pwɔ́’ we lÿò ná shúm mbòŋo sie é ne ńtóo. À ka gwaa tó, ńzyɛ́’ɛ tsɛ̀ɛ tsɔ́ ntàb, é gwɔ́ gẅie é pú fáŋ ńcʉa wetsɔ́ wɛ̌, atsɔ́ mmó piŋ tè ne ńzága mǒ wɔ́, é té gẅie pʉ̀a la lɔg mbwo mɔ́b ńnyɛte wɔ́, á lɔgɔ ńgwɔ́ ngie wɛ̌ ntàb é té tsɛ̀ɛ yɔɔn njÿó gie mé la nyɛte nyɛte wɔ́.

¹²Kristo la kúu kwà’ tsɛ̀ɛ jʉ’ gie e Ssé ee wó. À la kú pɔ́ tà’ legʉ̀a á ku’. Á la gwɔ kú, à tè gẅiin metse mbÿɔ́b, kà me púɔ fòŋ lényɛɛ mbwo Ssé wɔ́. À la lɔg pɔ́ kwà’ metse mé ńkú. Wɔɔn aa pá’ à la kẅile wégè ndá tsǎŋ pú’u, pɔ́ ndà’.

¹³Á laa tsɔ́ fʉ̀’, mé pfɛte metse mbÿɔ́b, kà me melúm mefòŋ, kà pfó gie á fóo ná mûɔ fòŋ gẅie mé tǔɔ wɔ́, ḿpfɛte sɛ̌ shúm ná pʉ̀a pie ncÿǒ nò tepòŋ ée ná pɔ́b, é gÿo *alɔ̌’ maga ná mbùm yɔb tà pɔ́ ku’u légíŋ ńgu’te Ssé.

¹⁴Á lɔɔn ńgwɔ́ gie á laa pú’u, mbà ngʉ̀a shÿɔ́’ɔ ná pá’ metse Kristo ge gwɔ́? Á Kristo gẅie Zẅìge tèmì la gÿo, á lɔgɔ twó yé ńnuŋe pwɔ́’ gẅie *lɔ̌’ té mǒ wɔ́, á mvfò Ssé. Metse mé ge lá’ sɔg ncÿǒ mefà’ mie é náa pɔ́ legwé gẅie ée ná pege tà ntʉ́m wégè é le gíŋe ńŋaga wégè wɔ́, légwɔ́ gie pege ge fa’a mbwo Ssé gẅie aa ńgwɔ́ pɔ́ wó.

¹⁵Yɔɔn áa mmó gie á gÿo Kristo gwɔ́ ná nò tsɔ́ *kʉ̀a gie áa ye sẅé, á gie á gíŋe ńdɔgɔ ńgwɔ́ pá’ ŋwà’ne lɔg ńtÿɔ́g legwé, ńgwɔ́ màmekěm. À la kwé á gwɔ́ lélɔg pú’u, éfóo ndá tsǎŋ gie menò tepòŋ pʉ̀a mesoŋ la ńnéŋe wɔ́b wó, á fʉ̀’ gie mé la nyé ńgwɔ́ nà nò ndùŋ mvfò *kʉ̀a, ńkẅile wɔ́b. Á lêen ńké fó pú’u, pʉ̀a pie mé la tsɔ́’ɔ wɔ́b, é ku’u lékẅé shúm mbòŋo sie à la pÿé, é gwɔ́ sie é ge lá’a gwɔ́ pɔ́ wó.

¹⁶Ńgwɔ́ mé le zɔɔn ńtóŋo ŋwà’ne gie nyìŋ ka lɔg ńtÿɔ́g legwé sé té gwɔ́ gie ngàŋ kwě tà mé gyá wɔ́.

¹⁷Nyìŋ zɔɔn ńgwɔ́ tà ńkwé tá ŋwà’ne gie á lɔgɔ ńtÿɔ́gɔ legwé sé á kẅɛ, mé lɔg ńtóŋo tsɔ́ nò. À lɔɔn nyé ńgwɔ́ pɔ́ ntèntʉ́, yɛ̌ ŋwà’ne kẅɛ, mé le lɔg ńtóŋo tsɔ́ nò wɔ́.

¹⁸Áa mmó gie á la gÿo mé té nuŋe mbɔɔ ndùŋ mvfò *kʉ̀a té pfɛte metse wɔ́.

¹⁹Mǒsê la tóŋ mbʉ̌ mie e Ssé la tsẅi á ŋwe’e tsɛ̀ɛ ŋwà’ne *lepʉ̌, ńtóŋo mvfò lá’a ntsèm tà mɛ̌ mbʉ̌ mag, á kaa metse púɔ fòŋ, ńtemte ná me mbÿɔ́b, ńnéŋ ntse mǒ, ḿbíi tsǎŋa légí gẅie mé tóŋo lê hysope, ńkáte menoŋ *njʉ̀njÿò mie é paŋ paŋ á nà twó, ńcÿɔ’ɔ mǒ, ńzɛɛ ná kwà’ ŋwà’ne, ńgíŋ ńzɛɛ ná mânyìŋ ntsèm, ńgwɔ́ zɛ ńne ńgɔɔn ngie:

²⁰Mɔɔn ée metse *kʉ̀a gie e Ssé gɔ̌ɔn ngie tà pi lá’ ńdɔg ḿma’a kwàŋ,

²¹ńgíŋe ńzɛ metse ná ntàb mbɔɔ ná shúm ntsèm sie pànuŋe pwɔ́’ lɔgɔ fa’a.

²²Mé lɔɔn ńdíe nà ntí ye *lepʉ̌ Mǒsê, mbà ńgwɔ́ mé gɔɔn ngie mé lɔg metse menɔ̀ɔn, ésɔgɔ *lɔ̌’ ná lelÿò shúm. Mé piŋ ńzsé ngie: Mé lɔɔn ńké tè pfɛte metse wɔ́, e Ssé ké le mefʉa pʉ̀a mesoŋ lege.

²³Á lɔɔn ńgwɔ́ gie à la ne ńzɛ́te ngie me lɔg ntí gie mé la’te la, ńkẅile *lɔ̌’ ná shúm sie mé kǐm, é gwɔ́ sie mé lɔ́ɔn ńdɔgɔ fʉ’te sie ée tÿǒ lepwó fʉ’te, mbà á gʉa ná kwà’ sɛ̌ shúm sie ée tÿǒ lepwó, á zɛ́te ngie mé nuŋe pwɔ́’ gẅie é poŋ ńcʉa wɛ̌.

²⁴Kristo la zɔɔn tè kúu tsɛ̀ɛ jʉ’ gie mé nuŋe pwɔ́’ wó, á gwɔ́ gie pʉ̀a mesoŋ la lɔg mbwó mɔ́b ńnyɛte ńdɔgɔ fʉ’ʉ kwà’ yɛ̌ gie áa tÿǒ lepwó wɔ́. À la kú pɔ́ kwà’ tÿǒ lepwó, tà aa fʉ̀’ɔɔn ńdɔgɔ yégè nò ńgwɔ́ lejʉ́ŋ Ssé.

²⁵À la tè kúu wó pá’ à ge lɔgɔ twó yé nuŋe pwɔ́’ mengʉ̀a tà ńgyɔ́ɔn, pá’ *nùŋe pwɔ́’ we lÿò lɔ̌ɔn ńkúu tsɛ̀ɛ kwà’ jʉ’e Ssé, é mengù’u mengù’, ńdɔgɔ metse nɔ̀ɔn ńnuŋe pwɔ́’ wɔ́.

²⁶Á nue á laa pé’e ńgwɔ́ pú’u, mbà tà fó pá’ e Ssé la nyɛte njÿó, Kristo la gẅiin léńnéŋe ńgyá ngɔ́’, ńkwé ḿbiŋe ńkwé. Tá pege zsé ngie afʉ̀’ la gwɔ́ tà ńku’, á kẅɛ pɔ́ tà’ legʉ̀a, á ku’ pú’u, á lɔgɔ twó mbùm yé ńnuŋe pwɔ́’ lélɔg ḿbyága nò tepòŋ.

²⁷Pá’ e Ssé la záb ngie wɛ̌ nyìŋ mesoŋ wɔ́ ge ké kwé pɔ́ tà’ legʉ̀a, é kwé pú’u, à cʉ́’ pɔ́ pá’ yé Ssé ge tsɔ́’te ntsaŋ ngàŋ la,

²⁸áa ndʉŋ ndʉŋ pá’ à la gÿo Kristo lɔgɔ twó mbùm ye, ńnuŋe pwɔ́’ pɔ́ tà’ legʉ̀a, lélɔg ńzyɛ́b menò tepòŋ pʉ̀a tà ńgyɔ́ɔn. À ge gÿo gíŋe kẅɛɛ ná mbɔ́ɔntè yépʉ́a. Á le gíŋe ńtóo fʉ̀’ó lézyɛ́b menò tepòŋ pʉ̀a mesoŋ wɔ́. À tóo pú’u, légÿo pʉ̀a pie pɔ́ ne ńzẅí’te yé tsẅɛ́.