Read Ngiemboon Jâg 1 Bible Online

Jâg 1 - Ngiemboon bible

Jâg 1

¹Àa mèŋ Jâg, mèŋ fa’a fà’ Ssé, mbɔɔ ye Cʉ̀apʉ̀a Yěsô Kristo. Mèŋ n náa yɔɔn ŋwà’ne á mbwo pi púɔ Ssé pie ée nà mengẅɛ̀ ndá pà Israel ntsɔ̀b pʉ́a nê legém, mbà pɔ́ léen sa jʉ’ ntsèm tsɛ̀ɛ mengwòŋ. Mèŋ n tsyɛ’té gẅí.

²Mefɛ́ pɔ́ɔn, ngʉ̀ngʉ̀ mentí mentí lɔɔn ńne ńkúu gẅí, pi lɔg pɔ́ kwà’ lekág ńkẅé.

³!Pi gÿo pú’u, nue pi ne ńzsé ngie, pi lɔɔn shÿɔg ngʉ̀ngʉ̀ gie e ne ńkúu gẅí, ḿbiŋ ńne ńkẅi’i ńzába ntʉ́m gẅi nà Ssé, mbà pi ge ne tʉte tʉte.

⁴Tá’, á poŋ ngie letʉte ŋwɛ́ à fa’a yé fà’ tà ńcʉ́me, ńzsé ngie pi ge cʉ́’ melÿò, é ku’ pʉ̀a Ssé, atsɔ́ mmó le zága ná pi wɔ́.

⁵Nyìŋ lɔɔn ńgwɔ́ tsetsɛ̀ɛ pi, ńtyé nà nò, azse nò zága yé, á lúɔ mbwo Ssé, mbà Ssé ge ná. Á nue e Ssé zɔɔn ńdɔg pɔ́ ntʉ́m mbòŋo ńnáa mmó mbwo wɔ̌wɔ́ɔ té zẅɛ́te.

⁶Tá ngàŋ ké ńcʉ́’ʉ lélúɔ, ńzáb ntʉ́m wé nà Ssé té ne ḿmʉ́’te, á nue nyìŋ gẅie à mʉ’té, à gwɔ́ pɔ́ pá’ kanú’ gie á tyé ndùm ntse, fefa ne ńdɔgɔ ḿbʉʉ, ńdɔgɔ ńcwóŋo la.

⁷Tà ntí nyìŋ pú’u, kwaŋ ngie Cʉ̀apʉ̀a ge náa tsɔ́ lága mmó né yé,

⁸mélà’ mie nyìŋ pú’u, tè gɔɔn tsɔ́ nò tà ńtÿɔ́gɔ kwò mǒ wɔ́. À kwaŋa lépʉ, ńgíŋ ńkwaŋa lécwóŋ pɔ́ fʉ̀’ó.

⁹Á poŋ ngie fɛ́ wege gẅie aa fÿɔg kág, á nue e Ssé ŋǎ’ nzẅìŋ wé.

¹⁰À gẅie aa ngàŋa mmó kág yé á nue e Ssé kéen sẅí’i nzẅìŋ wé, tà á zsé ngie à ge lá’ mag yé pɔ́ pá’ tootǒ maga nà legǐ la.

¹¹Nèm tʉ̌a tɛ’ ńtuɔ legǐ á pÿɛ́, tootǒ gwe, à we lepoŋ lɔgɔ ḿmaga, áa ndʉŋ ndʉŋ pá’ ngàŋa mmó ge gÿo gwá’ mefà’ mé é kwé.

¹²Ashÿó mbòŋo, aa nyìŋ gẅie ngʉ̀ngʉ̀ kúu yé á tʉte tʉte, á nue pá’ ngʉ̀ngʉ̀ lʉŋté yé á tʉte tʉte lá, e Ssé ge tɔ’ ngú’ twó yé. E lɔgɔ ńgwɔ́ le gwɔ́ tèmì gẅie à la ka’a mbwo wɔ̌ɔwɔ́ɔ gẅie à kwoŋo yé Ssé.

¹³Nkwà’te lɔɔn ńké ńtóo ná ngàŋ, tà á gɔɔn ngie nkwà’te yɔɔn fóo mbwo Ssé, á nue à lɔɔn ńgwɔ́ e Ssé le gẅiin kwàŋte légÿo nò tepòŋ wɔ́, kwà’ yé ké le tsóte nyìŋ ngie à gÿo nò tepòŋ wɔ́.

¹⁴Ye ntí letsɔ̌ɔn shúm zɔ shwoŋte yé, á gwe ná lejÿɔ̀’.

¹⁵Letsɔ̌ɔn shúm ŋwɛ́ gwɔ́ tà ńgá’, ńkẅɛɛ nò tepòŋ, anò tepòŋ gá’ ńkẅɛɛ legwé.

¹⁶Mefɛ́ pɔ́ɔn pe ntʉ̀ nzẅìŋ, tà nkwaŋá gẅi fʉte gẅí.

¹⁷Afù’ gie á poŋ tɛ’, mbɔɔ ntsɔ’ɔ́ fà’ we mbòŋo pú fóo pɔ́ tÿǒ lepwó, á mbwo Ssé gẅie à la nyɛte nèm lâ mecÿɔ́’ saŋ á lefaŋ. À tè kúbe, ńké tè nzěm gẅiin.

¹⁸Yé zɔ la kwoŋ, ńdɔgɔ shwóŋe gie áa nénʉ́, ńgÿo pege tsẅɛ́, légwɔ́ gie pege ge gwɔ́ mbwo yé, é gwɔ́ ntwó mmó ná ngwòŋ kɔ̀ɔkɔ́ɔ gie à la gÿo.

¹⁹Mefɛ́ pɔ́ɔn pe ntʉ̀ nzẅìŋ, pi zsé ngie áa mbòŋ mbwo nyìŋ lézsé lézẅí’te nò gie mé gɔɔn, ḿbiŋ ńgɔɔn yé nò á ku’ ku’, é ké le lwo ńgyáŋa lóŋ wɔ́,

²⁰mélà’mie nyìŋ lɔɔn ńgyáŋa lóŋ, mbà à tě ńdɔgɔ ńgÿo mmó gie áa ndʉŋ ndʉŋ mvfò Ssé wɔ́.

²¹Pú’u la, pi gwá’ menò ncÿǒ ntsèm, ńgwá’a mà gẅie à fóo nà lecÿɔ́g cÿɔ́g. Pi nuŋe ssé mvfò Ssé, ńzẅíŋe shwóŋè gie á ka pye tsɛ̀ɛ ntʉ́m pi. Á nue à ku’u légÿo pi tsẅɛ́.

²²Tà pi gwɔ́ pàjú’u shwóŋè Ssé jú’ ndà’, pi gÿo mmó gie shwóŋè ŋwɛ́ gɔɔn ngie pi gÿo. Tà á té pú’u wɔ́, mbà pi sele fʉte mennɛ́ mí.

²³Á nue nyìŋ lɔɔn ńjú’u shwóŋè Ssé, ḿbiŋ ńké tè gÿo pá’ á ne ńzɛ́te wɔ́, mbà ngàŋ gwɔ̌ pɔ́ pá’ nyìŋ gẅie à líe shÿó wé tsɛ̀ɛ gyà shÿó, ńgyá pá’ à gwɔ̌.

²⁴À lǐe tà ńtsẅé jʉ’, tà fó jʉ’ó ńgʉa, ḿbú ńdege pá’ à gwɔ̌.

²⁵Tá nyìŋ gẅie à nyɛte ńtuu nò á ná *lepʉ̌ sie tsɔ́ mmó té mǒ zág, ésie é gÿo nyìŋ gwɔ́ ndù nnɛ́, ńzáb ntʉ́m wé mǒ té kʉ́a tà à tè gwɔ́ pɔ́ jù’u ńdege wɔ́, ńgwɔ́ jù’u ńgÿo, mbà à ge gwɔ́ shÿó mbòŋo ná kɔ̀ɔkɔ́ɔ gie à gÿo.

²⁶Nyìŋ lɔɔn ńne ńkwaŋa ngie aa nà nò Ssé, ncwò wé piŋ tè poŋ, mbà à fʉte twó mbùm yé. À we légwɔ́ ná nò Ssé gwɔ́ pɔ́ sẅɛ̀ɛ.

²⁷Nyìŋ gẅie e Ssé líe yé á gwɔ́ kwà’ ná nò yé Ssé, tà mmó té ná yé zág, aa nyìŋ gẅie à líe púɔ métsé mbɔɔ mepfɔ̌g tsɛ̀ɛ ngɔ́’ yɔb, ńgwɔ́ nyìŋ gẅie à pɔ́ɔn mbùm ye, ḿbɔ́g menò njÿó lécʉŋte yé.