Read Ngiemboon Jâg 3 Bible Online

Jâg 3 - Ngiemboon bible

Jâg 3

¹Mefɛ́ pɔ́ɔn, tà pi metsèm tsɔ́ɔn légwɔ́ pàzí’i pʉ̀a mmó, pi ne ńzsé mboŋó ngie, peg pie peg zí’i pʉ̀a mmó, ntí gie mé ge lá’ lɔg ŋaga wég, e ge lá’ tʉ cʉa ye petsɔ́ pʉ̀a.

²Pege pǔ fʉate menò ntí ntí pɔ́ tè vʉ’ʉ nyìŋ. Nyìŋ lɔɔn ńgwɔ́ nyìŋ gẅie à laa tóo ńgɔɔn nò é fʉa wɔ́, mbà aa nyìŋ té *lɔ̌’, ńku’u légwoonte mbùm ye ntsèm.

³Pi líe melÿóon tá ńgyá, pege ńnéŋe kwáŋ ncwò pɔ́b lélɔg ńgÿo ngie pɔ́ jú’ ncwò wégè. Pege lêen ńké ńdɔgɔ wɔ́b ńgʉa jʉ’ gie pege ne ńkwoŋo.

⁴Pi líe mbɔɔ setíma tá ńgyá, á fáŋ pɔ́ lêkɔ́ wɔ́, fefa gẅie à tsó yé tʉ pɔ́ lêkɔ́ wɔ́, mbà stiya gie nyìŋ gẅie à ne shwoŋo lɔgɔ shwoŋo yé ńnáa ná jʉ’ gie à ne ńkwoŋo gwɔ̌ pɔ́ múɔ méntsẅilé.

⁵Á gíŋe ńgwɔ́ pɔ́ ndʉŋ ndʉŋ pá’ lʉ́me nyìŋ, áa nà mekèm mbùm mé ńgwɔ́ pɔ́ múɔ métsẅilé, tá ńgwɔ́ á ŋá’te tɛ’. Pi giŋé ńne ńzsé pá’ múɔ mésesà’ mmɔ̌g lɔɔn ńgwɔ́ á tuɔ máamáa mbím.

⁶Alʉ́m gíŋe ńgwɔ́ yé pɔ́ mmɔ̌g, ńgwɔ́ jʉ’ gie menò tepòŋ fó wó. Alʉ́m áa nà mekèm mbùm nyìŋ, ńgwɔ́ kèm gie á néŋ ncÿǒ nà mbùm nnɛ́ ntsèm. Á gʉa lepÿé mmɔ̌g, ḿbí mmɔ̌g, ńtó ńdɔg ńtuɔ léneŋe we nyìŋ pɔ́ ntsèm.

⁷Nyìŋ mesoŋ ku’u lékúe menɔ̀ɔn tsẅɛ mentí mentí, ńku’u lékúe meshʉ́ŋ, ńku’u lékúe menɔ̀ɔn mie é shwoŋo lepfòm sɔ́b pɔ́ ssé, lékúe messó.

⁸Tá ńgʉa nà lʉ́m, mbà tsɔ̌ nyìŋ tè ku’u lékúe wɔ́. Á tág jʉ’ té zẅite. Á gẅiin sesiŋ gie á kúu ná nyìŋ ńzẅé yé zẅé.

⁹Pege lɔg pɔ́ lʉ́m ńdɔg ńgu’te Cʉ̀apʉ̀a Tá wege, ńgíŋe ńdɔg pɔ́ yɛ̌ ńnéŋ ndòon twó pʉ̀a mesoŋ pie Ssé la pwóon ńgÿo pɔ́ sẅé yé.

¹⁰Mbʉ́lè mbɔɔ ndòon pǔ ńkẅɛɛ pɔ́ tsɛ̀ɛ tà’ ncwò wémɔ’ɔ́. Mefɛ́ pɔ́ɔn, á kɔ’ɔ́ tè poŋ ngie à gwɔ́ pú’u wɔ́.

¹¹À lɔɔn ńgwɔ́ tsɔ́ lesa’á ntse le ne fóo nà jʉ’ ńnáa ntse nǔ, ńgíŋe fó pɔ́ jʉ’ó ńnáa ntse gẅie é ne ńdẅe wɔ́.

¹²Mefɛ́ pɔ́ɔn tà à lɔɔn ńgwɔ́ mé kába zoon ná tÿǒ mbÿě? Ńké ńkáb lepfò ná tÿǒ zoon? Áa ndʉŋ ndʉŋ pá’ lesa’á ntse gẅie é ne ńnáa ntse gẅie é gẅiin ngwáŋ, ńgwɔ́ é le ná ntse nnǔ wɔ́.

¹³Nyìŋ lɔɔn ńgwɔ́ tsetsɛ̀ɛ pi, ńne ńkwaŋa ngie à gẅiin zse nò, ḿbiŋ ńgẅiin legyè, á lɔgɔ tsẅé mbòŋo yé ńnyɛ, ńgíŋ ńdɔg mefà’ mie é nyɛɛ ngie aa nyìŋ mbʉ́le pʉlé ńgwɔ́ nzsè nò, ńnyɛ.

¹⁴Tá ńké ńgwɔ́ gie pi lɔɔn ńgẅiin kègɔ́’ gẅie à léen ńgá’ mbɔɔ lʉŋte nnɛ́ tsɛ̀ɛ ntʉ́m pi, tà pi gíŋ ńŋá’te ngie pi ee pàzsé nò, tà pi lɔg cÿɔ̌ nò, ḿbyága nò nénʉ́.

¹⁵Yɛ̌ ntí zse nò tě fóo tÿǒ lepwó wɔ́. Á gwɔ́ pɔ́ ye ndùmo ssé tsetsá’ yɔɔn, ńgwɔ́ pɔ́ ye pʉ̀a mesoŋ, éfóo mbwo *messé tepòŋ.

¹⁶Alʉŋte nnɛ́ mbɔɔ kègɔ́’ vɔg tà ńgwɔ́ jʉ’, atág mbɔɔ mefà’ tepòŋ mentí mentí gwɔ́ wó.

¹⁷Tá nyìŋ gẅie à gẅiin zse nò gie á fóo tÿǒ lepwó, à zɔɔn ḿvɔg ńgwɔ́ nyìŋ gẅie tsɔ́ *lɔ̌’ té nà ngÿǒ menò mé wɔ́, ḿbɔ́ɔnte ńgiŋe pɔ́ lê mbʉ́lè, ḿbɔ́ɔnte ńgwɔ́ nyìŋ mbʉ́le pʉlé, ńgÿo nò á ku’ ku’, ńzsé létsɔ́ɔn mezìŋe tɛ’, éfa’ mefà’ mbòŋo pɔ́ pú’u. À tè tyɛ̀’te gÿo, ńké tè nkwòŋ menÿɔ́g wɔ́.

¹⁸Pʉ̀a pie pɔ́ lɔgɔ pɔ́ mbʉ́lè ńnéŋe tsetsɛ̀ɛ pʉ̀a mesoŋ, pɔ́ ne ḿbye mmó lê mbʉ́lè. Mentɔ̌ɔn mie pɔ́ káb á gwɔ́ léńnéŋe pá’ Ssé ne ńkwoŋo.