Read Ngiemboon Jâg 5 Bible Online

Jâg 5 - Ngiemboon bible

Jâg 5

¹Pi zẅí’te ńjú’, pi megàŋa mmó, pi lʉa tà ngyè gi kwɔ́’ɔ tÿǒ ńtí ngɔ́’ gie e ne ńtóo ná pi.

²Shúm sí sie é cÿɔ́g nkáb lʉ̌, shÿɔ́’ ngwɔ̌’ jÿǒ menzsǒ mí.

³Avɛkɔ́ɔn gwǒon tʉ ngɔ̂l gí mbɔɔ nkáb gi. Mé ge gÿo fó pɔ́ mǒ é gyá ngie pi gwě ntsaŋ, mbab nnɛ́ gi mag pá’ fʉ̀’ gie mé tǔɔ gẅi mmɔ̌g la. Pi ka cú’te shúm sie é cÿɔ́g nkáb ná mɔɔn melyɛ’ɛ́ lá’ mie ée menzsònzèm.

⁴Megàŋa fà’ ka lag shúm sí nká’, pi jÿó nkáb yɔb. Pi jú’ pá’ pɔ́ lʉa. Ngyè pʉ̀a pie pɔ́ laga shúm sí ńnáa ndá e kwɔ̌’ tà ńkúu letuŋó Ssé, yé Cʉ̀apʉ̀a gẅie à sá’a pàlÿɔ́’ ncù ntsèm pie ée tÿǒ.

⁵Pi ka ńnéŋe ndùmo ssé tsetsá’ ńgẅiin shúm meshùm, ńtsɔ́ɔn kɔ́ wɔ́ ńgẅiin, ḿpfɛ́ɛ mmó fáŋ pá’ menɔ̀ɔn pie é zẅí’te lyɛ̌’ gie mé ge gwaa wɔ́b la.

⁶Pi ka záb menò twó pà tèfʉa, ńzẅéte wɔ́b, pɔ́ ké tè tíɛ tsɔ́ tʉ̀ mvfò pi wɔ́.

⁷Mefɛ́ pɔ́ɔn, pú’u la pi lɔgɔ kwɔ́gɔ nnɛ́ ńzẅí’te tà ńkú fʉ̀’ gie Cʉ̀apʉ̀a ge tó. Pi gyá pá’ njʉ’ ngwóŋ kě ńdá’ ńdɔg pɔ́ kwɔ́gɔ nnɛ́ ńzẅí’te ngie tsetsá’ zém shúm mbòŋo, é zém, à káb ntwó, ńzẅí’te tà ńtáa ńgíŋe ńkáb nzèm.

⁸Mbɔɔ pi gí, pi lɔgɔ kwɔ́gɔ nnɛ́ ńzẅí’te, tà pi tsyɛte nnɛ́ á nue á cʉ́’ pɔ́ mejʉ’, Cʉ̀apʉ̀a tó.

⁹Mefɛ́ pɔ́ɔn, pi pɔ́ɔn légẅiin zẅɛ́te tsetsɛ̀ɛ pi, ńzsé ngie Ssé tè gÿo gɔɔn ngie pi gwě ntsaŋ wɔ́, à ntsɔ́’te mentsaŋ tǒ tà ńtyé ncwò ndá.

¹⁰Mefɛ́ pɔ́ɔn, pi gʉa nà leshÿɔgɔ ná ngɔ́’, mbɔɔ ná lelɔgɔ kwɔ́gɔ nnɛ́ ńzẅí’te mmó, ḿbí fʉ̀’ ná pàntsẅi nkʉ̀ Ssé pie é lɔ́ɔn ńgɔɔn nò ná lezíŋ Cʉ̀apʉ̀a.

¹¹Pi gyá pá’ pege tóŋo pʉ̀a pie é la tʉte tʉte lê pà shÿó mbòŋo. Pi la jú’ pá’ mé la la’te ntí gie Job la lɔg shÿɔg pú’u. Pi piŋ ńzsé mmó gie à la cʉ́’ʉ lézsote Cʉ̀apʉ̀a gÿo ná yé, á nue Cʉ̀apʉ̀a gẅiin pòŋo ntʉ́m tɛ’, ńtsɔ́ɔn mezìŋe pɔ́ pú’u.

¹²Mefɛ́ pɔ́ɔn, á lɔɔn ńgwɔ́ pɔ́ nò kɔ́ wɔ́, tà pi gɔɔn nò tà ńkʉa. Tà pi lɔg lepwó ńkʉa nò. Tà pi lɔgɔ tsetsá’ ńkʉa, tà pi zɔɔn fó ńkʉa nò kʉa. Á poŋ ngie gẅi oon à gwɔ́ pɔ́ oon, agẅi ngǎŋ à gwɔ́ pɔ́ ngǎŋ. À cʉa pú’u, tá Ssé le gÿo e ngie pi gwě ntsaŋ wɔ́.

¹³Nyìŋ gẅi lɔɔn ńne ńgyá ngɔ́’, á sẅíŋte Ssé, ńne ńkága á zɔb mezɔ́bɔ ntse ńdɔg ńgu’te Ssé.

¹⁴Nyìŋ gẅi ne ńguɔ, á tóŋ pàkẅé mvfò tsɛ̀ɛ cú’tè pʉ̀a Kristo, pɔ́ tó ńdɔg mèvɛ ńzɔ́’ɔ yé nà lezíŋ Cʉ̀apʉ̀a, éswíŋte Ssé.

¹⁵Asẅíŋte gie mé gwaa gÿo, ńzáb ntʉ́m nà Ssé, à gÿo, à zeŋe. Cʉ̀apʉ̀a pʉ’ʉ yé, ńgwɔ́ gie à ka fǒ ńgÿo pɔ́ nò tepòŋ, mbà Ssé ge lege menò tepòŋ mé náa mbwo yé.

¹⁶Pú’u la, pi zẅíŋ mefʉa tsetsɛ̀ɛ pi. Nyìŋ zẅíŋ mefʉa mbwo fɛ́ we, afɛ̌ we zẅíŋe mbwo yé. Nyìŋ gẅi sẅíŋte Ssé nà twó fɛ́ we. À cʉ́a pú’u, pi zeŋe. Asẅíŋte nyìŋ gẅie áa ndʉŋ ndʉŋ mvfò Ssé, á giŋ tɛ’.

¹⁷*Elîɛ la gwɔ́ pɔ́ nyìŋ mesoŋ pá’ pege, à la sẅíŋte Ssé lê ntʉ́m wé ntsèm ngie tà mbʉ̀ŋ lú, e Ssé gÿo mbʉ̀ŋ tè lú tà é gwɔ́ ngù’ tá nê mesaŋ ntɔgɔ́.

¹⁸Á gíŋe sẅíŋte Ssé, mbʉ̀ŋ lú, àtsetsá’ ná shúm léjÿó.

¹⁹Mefɛ́ pɔ́ɔn, nyìŋ gẅi lɔɔn fʉa mánzsè, ńnyé nò gie áa nénʉ́, mé piŋ ńtÿɔ́gte yé, tà á piŋ nzèm,

²⁰mbà nyìŋ gẅie à tÿɔgté yé tà á fóo ná mánzsè tepòŋ ńkẅɛ, ge gÿo à tsẅɛ́. À cʉa pú’u, e Ssé lege menò tepòŋ tà ńgyɔ́ɔn.