Read Ngiemboon 1 Piɛ 2 Bible Online

1 Piɛ 2 - Ngiemboon bible

1 Piɛ 2

¹Pú’u la, pi lêen ńké ńgwá’ menò tepòŋ ntsèm, tà pi gíŋe fʉte pʉ̀a, tà pi gíŋe ńgwɔ́ pà nkwòŋ menÿɔ́g, tà pi gíŋe ńgẅiin kègɔ́’ ná shúm pʉ̀a, tà pi gíŋe ńzẅɛ́te nzèm pʉ̀a.

²Pi lêen ńgwɔ́ pɔ́ pá’ púɔ mepÿɛ́ pie pɔ́ tsɔ́ɔn lepʉ́, ashwóŋè Ssé ée *lepʉ̌ té *lɔ̌’, pi ne ńnóŋo, ńzsé ngie pi ge gú’, e Ssé gÿo pi tsẅɛ́.

³Ŋwà’ne Ssé zɔɔn ńgɔɔn ngie: Pi kéen ńzẅí’ tà ńjú’ pá’ Cʉ̀apʉ̀a poŋ pú’u.

⁴Pi sẅɛ’te nnɛ́ ńtó nê lejʉ́ŋ yé, yé zɔ náa kwà’ le gwɔ́. À lɔgɔ ńgwɔ́ tóon gẅie ŋwà’ne Ssé gɔɔn ngie pʉ̀a mesoŋ la gwá’, tá’ e Ssé kaŋa yé, á gwɔ́ mmó tʉ̀ nzẅìŋ mbwo yé.

⁵Á poŋ ngie pi gí pie pi gẅiin kwà’ le gwɔ́, pi zẅíŋ, e Ssé lɔgɔ gẅi ńgÿo metóon, ńdɔg ńkwɛ́ ndá Zẅìge Ndʉalʉ̌a. Pi gwɔ́ tsɛ̀ɛ wó ńgwɔ́ pànuŋe pwɔ́’ pie Ssé la tsɔ́’, pie é ge cʉa nzèm Yěsô Kristo, é nuŋe pwɔ́’ gẅie é poŋ Ssé.

⁶Mé la ŋwe’e tsɛ̀ɛ ŋwà’ne Ssé ngie: Pi gyá, mèŋ n kǎ tóon lezẅé ndá, ńnuŋe tÿǒsoŋ Sioŋ, á gwɔ́ tóon ńgẅiin shÿó ḿbiŋ ńgwɔ́ tʉ̀ nzẅìŋ ńgwɔ́ gẅie nyìŋ lɔɔn ńzáb ntʉ́m ná yé, eshʉ́ le lá’ ńkúu ngàŋ wɔ́.

⁷Àa mbwo pi pàzáb ntʉ́m ná yé, ńgwɔ́ mmó mekù’. Tá ńgʉa ná pʉ̀a pie pɔ́ té ne ńzába ntʉ́m nà wɛ̌ tóon wɔ́, mbà mé la ŋwe’e ngie: Tóon gẅie pàpwóon ndá la gwá’ léen ńcʉ́’ʉ tóon lezẅé ndá.

⁸Ńgíŋe ńgwɔ́ tóon gẅie à ge gÿo mé gwe ssé, á máa tóon gẅie mé ge kwɔɔnte mǒ. Pɔ́ kwɔɔnte mǒ, mélà’mie pɔ́ lʉ’ʉ lé jú’u shwóŋè Ssé. Á ké ńgwɔ́ pɔ́ pá’ Ssé la záb ngie á ge lá’ gwɔ́ pɔ́ pú’u, ná pɔ́b.

⁹Tá ńgʉa ná pi, mbà pi ee ngẅɛ̀ pʉ̀a pie Ssé la kaŋ, ńgwɔ́ pànuŋe pwɔ́’ fùɔ ndÿò, ńgwɔ́ lá’ gie áa yé, ńgwɔ́ pʉ̀a pie à la cwoŋo wɔ́b é gwɔ́ pé, pá’ pɔ́ ge gʉa shwóŋ memáa menò mie à la gÿo, yé gẅie à la fó tsɛ̀ɛ nzěm ńkẅile gẅí, ńnéŋe gẅi nà jʉ’ʉ fɔ̌g gie kyɛ̀’ɛ mbòŋo yé áa wó.

¹⁰Pi pie pi laa tsɔ́ fʉ̀’, pi tè pʉ̀a Ssé wɔ́, pi kéen ńcʉ́’ pʉ̀a pé. Pi pie pi la tè tsɔ́ɔn mezìŋe Ssé zsé e Ssé kéen ńtsɔ́ɔn mezìŋe mí.

¹¹Meshǔ pɔ́ɔn pé tʉ nzẅìŋ, pi ee ndùmo ssé tsetsá’ jʉ’ɔɔn ńgwɔ́ pɔ́ pà ncʉ̀anzsè, ńgíŋe ńgwɔ́ pɔ́ megʉ̀. Áa mmó gie á gÿo mèŋ n ne shwóŋó gẅi ngie tà pi zẅí’te mbùm gí gie e ne ńtsó gẅi légÿo mmó gie e ne ńkwoŋo, á nue ee pú’u, ne ńdÿɔ́’ɔ ntʉ́m gẅi lê ncù.

¹²!Pi gẅiin tsẅé mbòŋo tsetsɛ̀ɛ pà tèzsé nò Ssé, tà ńgwɔ́ gie pɔ́ lɔɔn ne shwóŋte té poŋ ná lezíŋ sí, pɔ́ gyá menò mbòŋo mie pi ne ńgÿo, ńgu’te lezíŋ Ssé fʉ̀’ gie Ssé ge gÿo tó gɔɔn nò né pɔ́b.

¹³!Pi cʉa nà lezíŋ Cʉ̀apʉ̀a ńjú’ ncwò pàsá’a lá’ métsèm. Pi jú’ ncwò Kasa gẅie à tyé mvfó pàsá’a lá’ métsèm,

¹⁴ńgíŋ ńjú’ ncwò meŋwâ lá’ pé. Á nue à fùɔ túmo wɔ́b légʉa ńnyɛ pàgÿo menò tepòŋ ngɔ́’, ḿbiŋ ńná ngɔ́ɔnte pʉ̀a pie é ne ńgÿo nò mbòŋo.

¹⁵Áa mmó gie e Ssé kwoŋ ngie pi gÿo, ńzsé ngie pi ge lɔgɔ légÿo nò mbòŋo, é jÿɔ́’ ncwò megʉ̀gʉ̀ pie pɔ́ lʉ’ʉ nò Ssé, pɔ́ le gíŋe shwóŋte ná pi wɔ́.

¹⁶Pi lɔgɔ mà gẅi ńgwɔ́ pá’ pʉ̀a pie mé ka kẅile wɔ́b ndá nkwɔɔn. Tá’, tà wɛ̌ légwɔ́ ké ńcʉ́’ʉ mbwo pi ńgwɔ́ nkǔɔ gie pi ge lɔg lÿoon menò tepòŋ. Pi lɔgɔ mà gẅi ńgwɔ́ pɔ́ menkwɔɔn pe yé Ssé.

¹⁷Pi ná mekù’ mânyìŋ ntsèm, ńkwoŋ mefɛ́ pi pʉ̀a Kristo, ḿbɔ́g Ssé, ńná mekù’ fùɔ.

¹⁸Pi pie pi fa’a mbwo pʉ̀a, ńgwɔ́ penkʉ́ pɔ́b, pi sẅí’i mbùm gi ńnáa ssé á mvfò metá pi nà kɔ̀ɔkɔ́ɔ, pi le sẅí’i pɔ́ ndà’ mvfò pie pɔ́ gẅiin pòŋo ntʉ́m, ḿbíŋ ḿbʉ́le pʉ́le wɔ́, pi gíŋ sẅí’i mbɔɔ mvfò pie e cÿɔ́g cÿɔ̌g.

¹⁹Pi zsé ngie pi lɔɔn ńdɔg pá’ pi ne ńkwoŋo léké ńzsé pɔ́ Ssé ndà’, éshÿɔg ngɔ́’ gie é kúu gẅi ńtíi mmó gie pi kaa gÿo, mbà aa nò mbòŋo.

²⁰Pi zɔɔn ńcʉ́’ʉ leshÿɔg ngɔ́’, éshÿɔg gie e kúu gẅi ńtí nò tepòŋ gie pi gÿǒ, mbà mé ge ná mekù’ mí nà kɔ́? Tá pi ké ńgÿo nò mbòŋo, mé náa gẅi ngɔ́’, pi shÿɔg, mbà wɛ̌ léshÿɔg aa mvfò Ssé ńgwɔ́ nò mbòŋo.

²¹E Ssé la gwaa tóŋo gẅí, ńne fa’a ngie pi gÿo pɔ́ pú’u. Kristo la gyá yé ngɔ́’ ńtí gẅí, ńdɔgɔ ńnáa gẅi fʉ̀’, ngie pi giŋ pá’ yé.

²²Yé Kristo la tè tsɔ́ nò tepòŋ gÿo, ńké tè shwóŋ cÿɔ̌ nò wɔ́.

²³Mé la zoonte yé, à tè nzòonte tsɔ́’. À la ne ńgyá ngɔ́’, ńké tè nyìŋ vege, ḿbú ńnyé yé nò ntsèm pɔ́ nà mbwo nyìŋ gẅie à zá’ ntsaŋ ndʉŋ ndʉŋ.

²⁴Kwà’ yé Kristo la kaa menò tepòŋ mégè ńnéŋe soŋ nnɛ́ yé, á fʉ̀’ gie mé la kime yé nà tÿǒ nkǐ. À la gÿo pú’u, légwɔ́ gie pege ge cʉ́’ gwɔ́ mbwo nò tepòŋ, é gwɔ́ pɔ́ mepfó, é lêen ké ku’u légÿo mmó gie áa ndʉŋ ndʉŋ mvfò Ssé. Pi la zẅɛ́’ pɔ́ mefʉ̌ŋ mé tá ńzeŋe.

²⁵Á gwɔ́ ngie pi laa tsɔ́ fʉ̀’ ńgwáa ḿbúu pá’ *menjʉ̀njÿò mie é fʉ̌a mánzsè. Tá’ pi kéen ńké ḿbiŋ nzèm, ńcʉ́me nzèm nyìŋ gẅie à ne ńdíe gẅí, yé zɔ̌ ne ḿbyɛ́bɛ gẅí.