Read Ngiemboon 1 Piɛ 5 Bible Online

1 Piɛ 5 - Ngiemboon bible

1 Piɛ 5

¹Mèŋ n gɔɔn yɔɔn nò fʉ̀’ɔɔn lélɔg ńtÿɔ́gte pàkẅé mvfò pie ée tsɛ̀ɛ cú’tè gí, ńgwɔ́ yɔ́ɔn kẅè mvfò pá’ pɔ́b, mbà Kristo la gwɔ ne gyá ngɔ́’, mèŋ n tyé jʉ’ó. Mèŋ n ge gÿo gẅiin yɔ́ɔn jʉ’ tsɛ̀ɛ legú’ gẅie e Ssé ge gÿo gÿo à kẅɛ́.

²Mèŋ n gɔɔn mbwo pi pàkẅé mvfò ngie pi pféle nùɔ *njʉ̀njÿò Ssé gie à la cʉ́me mbwo pi, tà pi pféle pɔ́ pá’ fʉ̀’ gie mé gwǒon gẅi gwoon la, pi pféle lê ntʉ́m mbòŋo, pá’ Ssé ne ńkwoŋo. Tà pi gÿo pá’ fʉ̀’ gie pi fa’a nkáb la, pi lɔg pɔ́ nkwòŋe.

³Tà pi lɔg metʉ̀ sá’ pʉ̀a pie Ssé la cʉ́me mbwo pi, pi giŋ pɔ́ nà mbú gie pɔ́ ge pí fʉ̀’ ná pi.

⁴Pi lɔɔn ńgÿo pú’u, mbà á ge lá’a lyɛ̌’ gie mbyɛ̀b mvfó we lÿò tǒ, à tɔ’ ngú’ twó pi, é gie nzẅìŋ we téen ńdá’a ḿmaga wɔ́.

⁵Á gʉa ná pi gí pûɔ shùm, pi ná nnɛ́ ssé mvfò pàkẅé mvfò tsɛ̀ɛ cú’tè, ńgʉa ná pʉ̀a metsèm, tà pi ne ńgÿo tsɔ́ mmó, nyìŋ gẅi kwaŋ ngie à cʉa wetsɔ̌. Á nue ŋwà’ne Ssé gɔɔn ngie: E Ssé lʉ’ pàŋá’te nnɛ́ lʉ’, ńké ńdɔgɔ pòŋo ntʉ́m ńdíe pʉ̀a pie é sẅí’i mbùm yɔb ńnáa ssé.

⁶Pú’u la pi ná nnɛ́ gi ssé á mvfò Ssé gẅie à gẅiin metʉ̀, à cʉa pú’u, à gÿo ḿbʉ’ʉ gẅi nà fʉ̀’ gie à la záb.

⁷Pi pú ńnéŋe kɔ̀ɔkɔ́ɔ gie á ne ńcʉa gẅí, á nà mbwo Ssé, ńtí nue à ne ńdíe gẅí.

⁸Tà pi gwá’a lÿɔg, tà pi lyé. Angàŋ mbù gẅi, Sátà, à ne ńgwá ńzéme, éfa’a nyìŋ gẅie à ge gwoon yé, pá’ pú’ ntʉ̀ gẅie à ga’te éfa’a mmó gie à ge pfɛ́ la.

⁹Pú’u la, pi záb ntʉ́m gẅi nà Ssé, ńkẅi’i ńtʉte, ńdʉ’ʉ Sátà, ńne ńzsé ngie mefɛ́ pi ée tsɛ̀ɛ njÿó ńne ńgyá pɔ́ ntí ngɔ́’ gie pi gyá.

¹⁰Ngɔ́’ gi ge ná’a ńnéŋe pɔ́ méjʉ’, e Ssé gẅie à kɔ̀ɔkɔ́ɔ nò mbòŋo gwɔ́ fóo pɔ́ mbwo yé, yé gẅie à la cʉa ná Yěsô Kristo ńtóŋo gẅi pá’ pi ge gwɔ́ gí tsɛ̀ɛ legú’ we gẅie à pàa té wó wɔ́, à ge fó pú’u, é gÿo tsɔ́ mmó le gíŋe ńzága ná pi wɔ́, étsẅìŋ ndù gi, pi tʉte, mé le gíŋe ńku’u létsó gẅi tà ḿma’a ssé wɔ́.

¹¹Yé zɔ gẅiin lésá’ njÿó á nà mengù’u mengù’. *Amen

¹²Silase ka kẅéte wɔ̀ɔn léŋwe’e wɔɔn mûɔ méŋwà’ne. Àa mbwo mèŋ ńgwɔ́ fɛ́ gẅie à zsé yé pɔ́ ndà’ nò Yěsô. Mèŋ n náa yɔɔn ŋwà’ne mbwo pi lélɔg ńkẅiŋte gẅi mbɔɔ lélɔg ńnyɛte shwóŋó gẅi ntí gie e Ssé la lɔg menò mbòŋo ńcÿó gʉm yégè, kwà’ pá’ mèŋ n ŋwe’é lɔɔn. Pi tʉte nà menò ŋwɛ́ mboŋó.

¹³Acú’tè pʉ̀a Kristo gie áa Mbabilonia tsyɛ’té gẅí. E Ssé la tsɔ́’ɔ wɔ́b yɔ́b pá’ pi. Míŋ wɔ̀ɔn Malékuse tsyɛ’té gẅi yé.

¹⁴Pi tsyɛ’te mennɛ́ mí, ńcʉ́’ʉ létsyɛ’te ńtáŋte mennɛ́ mí nà ntí ye mefɛ́ mefɛ́ pie nkwòŋe ee tsetsɛ̀ɛ pɔ́b. Asẅétè ne ńgwɔ́ ntʉ́m pi pʉ̀a Kristo metsèm.