Read Ngiemboon 2 Piɛ 1 Bible Online

2 Piɛ 1 - Ngiemboon bible

2 Piɛ 1

¹Aa mèŋ Símo Piɛ, nyìŋ gẅie à fa’a fà’ Yěsô Kristo, ńgíŋ ńgwɔ́ ngàŋ ntúm we. Mèŋ n náa yɔɔn ŋwà’ne mbwo pi pie pi la záb ntʉ́m ná Yěsô Kristo pá’ peg yég. Lezǎb ntʉ́m ná Yěsô Kristo áa mmó tʉ̀ nzẅìŋ mbwo pi mbɔɔ mbwo peg yég. Yěsô Kristo yé maŋwɛ́ zɔ la gÿo pú’u, né pege, á nue à gÿo mmó nà wɔ̌ɔwɔɔ pɔ́ ndʉŋ ndʉŋ. Aa Ssé yege, ńgwɔ́ nyìŋ gẅie á gÿo pege tsẅɛ́ɛ.

²E Ssé ne ńgwɔ́ né pi, ńne ńnéŋe sẅétè ntʉ́m pi mboŋó, éfó ná pá’ pi zsé yé Ssé, ńgíŋ ńzsé Cʉ̀apʉ̀a wege Yěsô.

³E Ssé léen ńdɔg metʉ̀ mé, ḿbú náa wégè kɔ̀ɔkɔ́ɔ gie á ne ńzɛ́te ngie pege gẅiin tá ńdɔg ńnéŋe, ńne ńdáa nnɛ́ pɔ́ ndà’ ná yé. À la zɔɔn ńgÿo pege zsé yé Ssé gẅie à la tóŋo wégè pá’ paga pɔ̌ ge pú gwɔ́ tsɛ̀ɛ legú’ we, é jÿó pì póŋo ntʉ́m yé.

⁴Á la fó pú’u, á ná shúm tʉ̀ nzẅìŋ á mbwo pege, é gwɔ́ sie é kẅéte wégè tɛ’, ńgwɔ́ sie à la ka’, ńnáa pú’u, légwɔ́ gie pege ge cʉa ná sɛ̌ shúm, é ku’u lékÿo menò ncÿǒ mie ée tsɛ̀ɛ yɔɔn njÿó, éfóo ná shúm sie mbùm yege tsóte wégè légÿo, é kÿo pú’u, é cʉ́’ ńgẅiin pɔ́ tsẅé ye yé Ssé.

⁵Pú’u, pi kag tʉ̀, ńkẅi’i mà mbòŋo ná gẅi lézáb ntʉ́m nà Ssé, ḿbiŋ ńgʉa ná mà mbòŋo ńkẅi’i lézsé mmó gie Ssé ne ńkwoŋo,

⁶ńgʉa ná le zsé mmó gie Ssé ne ńkwoŋo, ńkẅi’i pá’ pi ge gwoonte mbùm gí, ńgʉa ná legwoonte mbùm ńkẅi’i létʉte tʉte, ńgʉa ná letʉte tʉte, ńkẅi’i lé zsé pɔ́ ndà’ Ssé,

⁷ńgʉa ná lezsě pɔ́ ndà’ Ssé, ńkẅi’i pá’ à nò mefɛ́ pí ge poŋo gẅí, ńgʉa ná pá’ nò mefɛ́ pí ne ḿboŋo gẅí, ńkẅí’i nkwòŋe.

⁸Á nue pi lɔɔn ne ńgÿo menò mie mé tʉté lɔɔn, ńne ńdɔgɔ ńgee né mvfò, mbà é ge gÿo mbùm gi zeŋe légÿo mmó gie e Ssé kwoŋ, é gíŋe gÿo pi ne ńkẅi’i ńzsé nyìŋ gẅie Cʉ̀apʉ̀a wege Yěsô Kristo aa yé

⁹Tá ńgwɔ́ gie nyìŋ lɔɔn tè ne ńgÿo mɔɔn menò wɔ́, mbà à tè ne ńgyá jʉ’ mboŋó wɔ́, à gwɔ́ pɔ́ pá’ fʉ̀ menÿɔ́g la. Mbà à legé ngie mé léen sɔg yɛ̌ ntí menò tepòŋ mie à lɔ̌ɔn ńgÿo.

¹⁰Mefɛ́ pɔ́ɔn, pá’ áa pú’u la, pi kẅi’i ńkag tʉ̀, légwɔ́ gie pi ge gÿo mé zsé mboŋó ngie Ssé la tóŋo gẅí, ńtsɔ́’ɔ gẅí. Pi lɔɔn ńnéŋe ná yɛ̌ ntí, mbà pi těen ńdá’a ńgwe nà nò tepòŋ wɔ́.

¹¹À gwɔ́ pú’u, mé lá’ shʉa shʉa ńtsɔ́’ nzsè gie e gee ńkúu tsɛ̀ɛ lefùɔ tèmì se Yěsô Kristo, ńná né pi. Aa Cʉ̀apʉ̀a wege, ńgwɔ́ nyìŋ gẅie à gÿo pege tsẅɛ́ɛ.

¹²Áa mmó gie á gÿo n ge lá’a zɔ́gɔ kímte gẅi mɔɔn menò kimté tà mbɔɔ pá’ pi ne ńzsé, ḿbiŋ ne ńgiŋe pɔ́ nà nò gie áa nénʉ́ gie mé la shwóŋó gẅí.

¹³Tá’ mèŋ n kwǎŋ ngie à fʉ̀’ gie mèŋ n nyé ntentʉ́ lɔɔn, mèŋ n ge ké ne kímte gẅi mɔɔn menò kimté, é lɔgɔ zyeen gẅí.

¹⁴Á nue mèŋ n zsě ngie, à fʉ̀’ gie mèŋ n gee ńkwé cʉ́’ʉ ńku’u ku’. Cʉ̀apʉ̀a wege Yěsô Kristo ka gÿo mèŋ n zsé.

¹⁵Mèŋ n kě ńne ńnyɛ́te ńcwoŋte nà ntí gie mèŋ n ge gwɔ́ tà kwé, pi tyé mbɔɔ ná yɛ̌ nò wɔ́, ńkímte mmó gie n da zí’i gẅí.

¹⁶Peg ka tè gwɔ shwóŋó gẅi pá’ Yěsô Kristo, Ndè wege ge gÿo tó, lê shʉ́shÿɔ́g, éfó pɔ́ ná menò pú’kwɔ́b mie peg neŋé ssé ńdɔg legyè ńdʉ’te wɔ́. Peg ka fó ná pá’ peg lɔ̌g nÿɔ́g még ńgyá legú’ we.

¹⁷Á fʉ̀’ gie Ssé Tá la ná legú’ mbɔɔ mekù’ á mbwo yé, mé jú’ ngyè Ssé gẅie à gẅiin metʉ̀, á gɔɔn ngie: Wɔɔn aa Míŋ wɔ̀ɔn, mèŋ n kwoŋo yé tɛ’, aa wɔ̀ɔn lekág.

¹⁸Kwà’ peg nê twó yég la jú’ yɛ̌ ngyè, peg la jú’ pá’ e fóo tÿǒ lépwó á fʉ̀’ gie pega Yěsô laa ndùm lekwɛ́ Ndʉalʉ̌a.

¹⁹Á té ndà’ pú’u wɔ́ pege giŋé ńgẅiin shwóŋè pà *ntsẅì nkʉ̀ Ssé gie à lɔɔn ńgwɔ́ mé le jú’ ḿmʉ’te wɔ́. Á póŋ ngie pi cwòŋo ńjú’u yɛ̌ shwóŋè. Áa pá’ lâm gẅie à kyɛ’ɛ jʉ’ gie á ne síŋe. Pi cwoŋo ne ńjú’u ńdɔg ńzẅí’te lyɛ̌’ gie Yěsô ge lá’ gíŋ tó. Pá’ cÿɔ́’ saŋ gẅie à kwɔ̌’, njÿó gwóon ńdʉ́a. À ge tó kyɛ’ jʉ’ mbwo mentʉ́m mi.

²⁰Ammó gie pi gẅiin lévɔg ńzsé á gwɔ́ ngie: Á tsɔ́ shwóŋè *ntsẅì nkʉ̀ Ssé gie áa tsɛ̀ɛ ŋwà’ne Ssé, ńgwɔ́ gie à lɔɔn ńgwɔ́ nyìŋ lɔg legyè sé gílé yé ńkyagte á té wó wɔ́[1]

²¹Á nue kɔ̀ɔkɔ́ɔ gie pà *ntsẅì nkʉ̀ Ssé lǎ tsẅi, pɔ́ laa gwaa tsẅi, a fóo pɔ́ nà legyè nyìŋ mesoŋ wɔ́. Pɔ́ gwaa gɔɔn nò gie Ssé ne ńkwoŋo ngie pɔ́ gɔɔn, à Zẅìge Ndʉalʉ̌a zɔ̌ tsóte wɔ́b tá pɔ́ gɔɔn.