Read Ngiemboon 2 Piɛ 2 Bible Online

2 Piɛ 2 - Ngiemboon bible

2 Piɛ 2

¹Pà *ntsẅì nkʉ̀ Ssé pe cÿɔ̌ nò laa tsɔ́ fʉ̀’ ńgwɔ́ tsetsɛ̀ɛ pʉ̀a Israel, áa ndʉŋ ndʉŋ pá’ pà zí’i pʉ̀a nò Ssé pe cÿɔ̌ nò ge gÿo kẅɛte tsetsɛ̀ɛ pi. Pɔ́ ge gÿo lɔg pɔ́ ndɔ́ɔn ndɔ́ɔn é zí’i pʉ̀a cÿɔ̌ nò, é gwɔ́ gẅie ńgwɔ́ é cʉ́ŋte letʉ́m pʉ̀a, é gwɔ́ gwɔ́ tà moŋe Ndè gẅie à la gÿo pɔ́ tsẅɛ́, é gÿo pú’u, lɔg shwoŋ ngʉ̀ngʉ̀ gie e ge pyága wɔ́b, e ké le líi létó wɔ́.

²Pʉ̀a tà ńgyɔɔn cʉ́me nzèm pɔ́b ńcʉ́’ʉ ńgÿo pɔ́ menò shʉ́. Mé cʉa ná pɔ́b, ńzoonte mánzsè nò gie áa nénʉ́.

³Pá’ pɔ́b kwoŋ nkáb tɛ’ la, pɔ́ ge lɔgɔ shwóŋè gie pɔ́ lʉ’té lʉ’te, é lɔg lÿɔgte gẅí, é kẅé shúm sí, ńke ńgÿo pú’u pɛ́’ɛ̀, mbà Ssé la lá’ ńzá’ ntsaŋ yɔb, tà á cʉ́’ pɔ́ méjʉ’ ngɔ́’ gwé ná pɔ́b.

⁴*Mecÿɔ́’ Ssé la zɔɔn fʉa nò, e Ssé tè wɔ́b nyé. À la tsó wɔ́b ḿma’a tsɛ̀ɛ pÿé té lǎŋ á jʉ’ʉ nzěm, pɔ́ ée ńgwɔ́ gwɔ́ tsɛ̀ɛ menkÿo, ńne ńzẅí’te lyɛ̌’ gie mé ge tsɔ́’te mentsaŋ.

⁵Tà mbɔɔ ngwòŋ we fʉ̀’ʉ mvfò gẅie pʉ̀a mesoŋ laa tsoló, ńgwɔ́ ngàŋ mefʉa e Ssé la tè nyé. À la gÿo ntse fó meshÿó meshÿó ńkwɔ́’, ńjÿó tsetsá’, mengàŋ mbù pé fÿɛ́ɛ tsoló. Á gÿo ndà’ Nóa, gẅie à la ne shwóŋó lá’ mmó gie e Ssé ne ńkwoŋo, lê pʉ̀a sɔɔn mbʉ́a zɔ̌ tsẅɛ́.

⁶E Ssé la gíŋe ńtém ngɔ́’ ná pʉ̀a tÿǒsoŋ Sodom lâ ná pʉ̀a tÿǒsoŋo Gomor ńdɔg mmɔ̌g ḿbyága wɔ́b, ńdɔgɔ ńnyɛɛ pʉ̀a tepòŋ fʉ̀’ mmó gie á ge gÿo tóo ná pɔ́b.

⁷À la fó wó ńkẅile Lod. Á gwɔ́ nyìŋ gẅie à lɔ̌ɔn ńgÿo pɔ́ mmó gie áa ndʉŋ ndʉŋ mvfò yé Ssé, tà ńgyá tsẅé tepòŋ, lâ menò shʉ́ mie pʉ̀a mɛ̌ metÿǒsoŋ lɔ́ɔn fʉ̀’ʉ tà sá’a sǎ’, é pú ḿbÿɔ́gɔ yé tɛ’.

⁸Yé nyìŋ ndʉŋ ndʉŋ mvfò Ssé, lɔ̌ɔn ńnéŋe nùɔ pʉ̀a ŋwɛ́, ńgyá ntí gie pɔ́ lɔgɔ ńnéŋe, ńjú’u menò mie pɔ́ gɔɔn. Pá’ letʉ́m sé la tyé pɔ́ nà mmó gie áa ndʉŋ ndʉŋ la, mɛ̌ menò gege yé gege lyɛ̌’ ntsèm.

⁹Mé fó ná mɔɔn menò ńgyá ngie Cʉ̀apʉ̀a kwoŋo léfóo tsɛ̀ɛ ngɔ́’ ńkẅile pʉ̀a pie é zsé pɔ́ ndà’ yé, é cʉ́’ pʉ̀a tepòŋ á nyé wɔ́b ngie pɔ́ zẅí’te ngɔ́’ lyɛ’ɛ́ létsɔ́’te mentsaŋ.

¹⁰À gwɔ́ lyɛ’ó, à tʉʉ lelÿò ńzáb ngɔ́’ twó pʉ̀a pie pɔ́ ńnéŋe ńgÿo mmó gie mbùm yɔ́b tsóte wɔ́b légÿo, ńnéŋe ńtsɔ́ɔn menò ncÿǒ. E Ssé gɔɔn nò pɔ́ gwág gwág. Pà zí’i pʉ̀a cÿɔ̌ nò, pɔ́ tsẅiŋe kʉ́kʉ́b wɔ́b tɛ’, ńzẅíŋe móm tà pɔ́ té pɔ́gɔ lézoonte mezẅìge mie é gẅíin legú’ wɔ́.

¹¹Pɔ́ zoonte wɔ́b pú’u, tá mbà mbɔɔ *mecÿɔ́’ Ssé ké tè *lɔ̌’ mɛ̌ mezẅìge tú, ḿbiŋ ńké tè sẅiŋe wɔ́b mbwo Cʉ̀apʉ̀a wɔ́. Tá ńké ńgẅiin metʉ̀ ńcʉa pɛ̌ pà zí’i pʉ̀a cÿɔ̌ nò.

¹²Pɛ̌ pʉ̀a gwɔ́ pɔ́ pà tè legyè pá’ menɔ̀ɔn, é pie é la fó jʉ’ó ńgwɔ́ pɔ́ mmó gie mé ge lʉ’ lejÿɔ̀’ lɔg gwoon é zẅé. Pɔ́ zoonte mmó té ne ńzsé pá’ á gwɔ́, mé gÿo ńzẅé wɔ́b pá’ menɔ̀ɔn ŋwɛ́.

¹³Pɔ́ lɔg pú’u, ńkẅé ntsɔ’ɔ́ fà’ menò tepòŋ mie pɔ́ la fʉ̀’. Anò poŋo wɔ́b tɛ’ légÿo shúm tepòŋ sie membùm mɔ́b ne ńtsɔ́ɔn, tà pá’ á lɔɔn ńgwɔ́ pɔ́ fʉ̀’ʉ zsǒ. Pia pɔ́ pǔ ńnéŋe ssé ḿpfɛ́ɛ shúm tá wɛ̌ légwɔ́ gwɔ́ nò shʉ́, ḿbú ḿbÿɔ́g tɛ’, á nue á ne ḿbóŋo wɔ́b pá’ pɔ́ ne fʉte gẅí.

¹⁴Sɔ́b legyè tyé pɔ́ ná pànzwě. Pɔ́ té kʉa légÿo nò tepòŋ wɔ́. Pɔ́ lÿɔgte pʉ̀a pie é pÿɛ́ pÿɛ́. Letʉ́m sɔ́b ée fʉ̀’ ntsèm ńtyé pɔ́ nà pì gie ńgwɔ́ pɔ́ jÿó. Ndoon ee twó pɔ́b.

¹⁵Pɔ́ lěen ńgwá’a mánzsè gẅie à tyé ndʉŋ ndʉŋ, ḿbyé, ńcʉ́’ ńgiŋe pɔ́ ná we Mbalam, míŋ Bozor. Mbà mé la ná nkáb mbwo yé, ńdɔg ńjúu yé pá’ à ge gÿo nò tepòŋ. Á líe nkáb é póŋo yé, á zẅíŋ.

¹⁶Tá’ e Ssé kàga yé ńtsẅi nkʉ̀ we nà nò gie à fʉ̌a. Á jú’ nzikássèe gie ee tě shwóŋó wɔ́ gɔɔn nò pá’ nyìŋ mesoŋ la, ńdɔg ńjɔ́’ɔ mánzsè mbwo yé ná yɛ̌ gʉ̀gʉ̀ nò gie à lɔ̌ɔn ńgee ńgÿó.

¹⁷Pà zí’i pʉ̀a nò Ssé pé cÿɔ̌ nò ŋwɛ́ gwɔ́ pɔ́ pà’ jʉ’ gie ntse kɔ́ɔn ńkẅɛ’ɛ wò, é kěen ńjúm la, pɔ́ gwɔ́ pɔ́ pá’ mbʉ̀ŋ gie é kwɔ̌’, à fóm kaa ńdɔg ńgʉa. E Ssé lěen ńnyɛte jʉ’ʉ yɔ́b ńtÿɔ́gɔ tsɛ̀ɛ ssé nzěm.

¹⁸Pɔ́ lɔgɔ mmó gie pɔ́ zí’i pʉ̀a ńŋá’te, tá é gwɔ́ pɔ́ fÿɔ́g sẅɛ̀ɛ gie é zẅɛɛ. Pɔ́ gɔɔn mbwo pʉ̀a ngie ńgwɔ́ nyìŋ gÿo kɔ̀ɔkɔ́ɔ gie mbùm nyìŋ mesoŋ tsɔ́ɔn, tá á gwɔ́ nò shʉ́. Pɔ́ lɔg pú’u, éshwoŋte pʉ̀a pie pɔ́ ka nyé ńkẅɛɛ tsetsɛ̀ɛ pʉ̀a pie ée nà mánzsè tepòŋ,

¹⁹ńgíŋ ne shwóŋó wɔ́b ngie pɔ́ ge gÿo pɔ́ le gíŋe ńgwɔ́ menkwɔɔn wɔ́, tá kwà’ pɔ́b yɔ́b gwɔ́ menkwɔɔn mbwo shúm sie pɔ́ tsɔ́ɔn, é piŋ ńne ḿbyága wɔ́b. Ammó lɔɔn ńzɔɔn ńjÿó ntʉ́m nyìŋ, à ngàŋ cʉ́’ ńgwɔ́ pɔ́ kwɔɔn mbwo yɛ̌ mmó.

²⁰E pʉ̀a lɔɔn ńzɔɔn ńdɔg pá’ pɔ́ zsé Cʉ̀apʉ̀a Yěsô Kristo gẅie à gÿo pege tsẅɛ́ɛ, éfó nà ncÿǒ gẅie ée tsɛ̀ɛ njÿó ńkẅɛ, ńgÿo ńgíŋ ḿbiŋe tsoló, ńzẅíŋ sɛ̌ shúm pú ńjÿó wɔ́b, mbà pɔ́ ge pÿɔ́g tà cʉa pá’ pɔ́ ka zɔɔn ńgwɔ́.

²¹Mvfò kaa pá’ à lɔɔn ńgwɔ́ pɔ́ le zsé mánzsè ndʉŋ ndʉŋ wɔ́, ńcʉa pá’ pɔ́ ge zsé mbʉ̌ Ssé mie mé ka zí’i wɔ́b e piŋ gwa’.

²²Mbà mmó gie á gÿǒ wɔ́b, á lɔgɔ ḿbúmte pá’ sag lekid la gɔɔn ngie: «Mengwe zé’e ḿbíŋ ńjÿó ze’é yé. Mé sɔgɔ kúnɔ́ɔn tà ńgwaa tsẅé jʉ’ à gʉa ńkele tsɛ̀ɛ tetɔ́b».