Read Ngiemboon 1 Jâŋ 4 Bible Online

1 Jâŋ 4 - Ngiemboon bible

1 Jâŋ 4

¹Meshǔ pɔ́ɔn pe tʉ̀ nzẅìŋ, tà pi jú’ nyìŋ gɔɔn ngie Zẅìge Ndʉalʉ̌a áa ná yé, pi gwóon ńzẅíŋ zẅíŋ, té cwoŋo ńdíe ka áa kwà’ Zẅìge Ssé wɔ́. Á nue pà *ntsẅì nkʉ̀ Ssé pe cÿɔ̌ nò pǔ ńgyɔ́ɔn tsɛ̀ɛ njÿó tɛ’.

²Ammó gie pi ge lɔg zsé Zẅìge gie á fóo mbwo Ssé à yɔɔn. Nyìŋ lɔɔn ńzẅíŋ ngie Yěsô Kristo la sele ńcʉ́’ʉ kwà’ nyìŋ mesoŋ, mbà ngàŋ gẅiin Zẅìge gie á fóo mbwo Ssé.

³Tá nyìŋ lɔɔn ńké ńdʉ’ʉ lézẅíŋ ngie Yěsô Kristo la tó ńgwɔ́ nyìŋ mesoŋ, mbà ngàŋ tè gẅiin Zẅìge gie á fóo mbwo Ssé wɔ́, ayé Zẅìge áa gie á fóo mbwo ngàŋ mbù Kristo gẅie pi la jú’ mé gɔɔn ngie à ne ńtóo. À kěen ńké ńdá’ ńtó tà ńgwɔ́ tsɛ̀ɛ njÿó.

⁴Pi penkʉ́ pɔ́ɔn, pi ee nà gwǒŋo yé Ssé. Pi kéen ńdÿɔ́’ tà ńcʉa pà *ntsẅì nkʉ̀ Ssé pe cÿɔ̌ nò, mélà’mie a Zẅìge Ssé gie áa ná pi á pú ńtʉ ńcʉa ngàŋ mbù Kristo gẅie aa tsɛ̀ɛ njÿó.

⁵Pà *ntsẅì nkʉ̀ Ssé pe cÿɔ̌ nò, ée nà gwǒŋo ye pʉ̀a njÿó. Áa mmó gie á gÿo pɔ́ zí’i shúm é gwɔ́ pɔ́ se tsɛ̀ɛ njÿó, epʉ̀a tsɛ̀ɛ njÿó piŋ ńzẅí’te yɔ́b nò.

⁶Á gʉa ná pege, mbà pege ee nà gwǒŋo ye Ssé. Nyìŋ gẅie à ne ńzsé Ssé à ne ńzẅí’te nò gie pege gɔɔn. Nyìŋ gẅie à tè ná gwǒŋo ye Ssé wɔ́, à tè yégè nò zẅí’te. Pege fó pɔ́ pú’u, tá ńzsé nò nénʉ́, ńzsé cÿɔ̌ nò.

⁷Meshǔ pɔ́ɔn pe tʉ̀ nzẅìŋ, !pege gẅiin nkwòŋe tsetsɛ̀ɛ pege, á nue nkwòŋe fóo mbwo Ssé. Nyìŋ gẅie à gẅiin nkwòŋe aa míŋ Ssé, ńne ńzsé Ssé

⁸Nyìŋ lɔɔn tè nyìŋ mesoŋ kwoŋ, mbà à nyě tè zsě Ssé, á nue e Ssé gẅiin pɔ́ nkwòŋe.

⁹Anò gie Ssé la lɔg ńnyɛɛ wégè ngie à kwoŋo wégè à yɔɔn: À la túm ndà’ Míŋ we wémɔ’ɔ́ tsɛ̀ɛ njÿó ngie pege cʉa nzèm yé ńgwɔ́ wó.

¹⁰Nkwòŋe léen ńgwɔ́ pɔ́ pá’ɔɔn, pege zɔ la tè kwoŋ Ssé wɔ́, yé zɔ la kwoŋo wégè. À la kwoŋo wégè kwoŋ tà ńtúmo Míŋ we, á tó ńdɔgɔ twó yé ńnuŋe pwɔ́’ ńtí wégè, áa mmo gie á gÿo Ssé lege menò tepòŋ mégè.

¹¹Meshǔ pɔ́ɔn pe tʉ̀ nzẅìŋ, à lɔɔn ńgwɔ́ gie e Ssé la kwoŋo wégè pá’ɔɔn, mbà á ne ńzɛ́te ngie pege yégè gẅiin nkwòŋe tsetsɛ̀ɛ pege.

¹²Atsɔ̌ nyìŋ gẅie à lǎ záb lejÿɔ́g nà Ssé à tè wó wɔ́. Tá ńgwɔ́ gie pege lɔɔn ńgẅiin nkwòŋe tsetsɛ̀ɛ pege, mbà pega Ssé lɔgɔ ńgwɔ́, nkwòŋe ye lɔgɔ ńcwoŋo ńgwɔ́ ná pege tà mmó té zága mǒ wɔ́.

¹³Ammó gie á gÿo pege zsé ngie pege la nnɛ́ nà Ssé, e Ssé la nnɛ́ ná pege áa pá’ à la náa Zẅìge yé né pege.

¹⁴Peg la lɔg nÿɔ́g még ńgyá tà ńgwɔ́ gɔɔn pá’ɔɔn, ńgwɔ́ pànjÿò ńgyá ná pá’ à la túmo Míŋ we, pá’ à ge gʉa gwɔ́ nyìŋ gẅie à ge gʉa gÿo pʉ̀a tsɛ̀ɛ njÿó tsẅɛ́.

¹⁵Nyìŋ lɔɔn ńzẅíŋ ngie Yěsô aa Míŋ Ssé, mbà Ssé lǎ nnɛ́ nà ngàŋ, angàŋ gíŋe ńda yé nnɛ́ nà Ssé.

¹⁶Á gʉa ná peg, mbà pɔ́ ne ńzsé pá’ Ssé kwoŋo wég pú’u, peg ka gyá yɛ̌ ntí nkwòŋe tà ńzẅíŋ. E Ssé gẅiin pɔ́ nkwòŋe, nyìŋ lɔɔn ńne ńkwoŋo pʉ̀a mesoŋ, mbà ngàŋ la nnɛ́ nà Ssé, e Ssé la nnɛ́ ná yé.

¹⁷Pege lɔɔn ńgẅiin nkwòŋe ntʉ́m pege tà tsɔ́ mmó té mǒ zág, pege é le kwaŋte lyɛ’ɛ́ létsɔ́’te mentsaŋ ntʉ́m wégè vɛ wɔ́. Pú’u, mélà’mie wege leńnéŋe tsɛ̀ɛ njÿó yɔɔn aa pá’ we Yěsô Kristo.

¹⁸Nkwòŋe vɔg tà ńgwɔ́ ssé, ecÿɔ’ mag. Nkwòŋe lɔɔn ńgwɔ́ tà tsɔ́ mmó té mǒ zág, é pyága lecÿɔ’, nyìŋ gwaa cÿɔ̀’, mbà à fʉ̌a nò tà ne ḿbɔ́gɔ. Pú’u la, nyìŋ lɔɔn ńcÿɔ’, mbà á lɔgɔ ńgwɔ́ ngie ammó nyé ńzága ná nkwòŋe gie à gẅiin.

¹⁹Á gʉa ná peg, peg kwoŋo nyìŋ mesoŋ, á gwɔ́, mélà’mie e Ssé la vɔg ńkwoŋo wég.

²⁰Nyìŋ lɔɔn ńgɔɔn ngie à ne ńkwoŋo Ssé, ńgwɔ́ gɔɔn pú’u, ńne ḿbʉa fɛ́ we, mbà aa ngàŋa cÿɔ̌ nò. Á nue nyìŋ lɔɔn tè kwoŋo fɛ́ we gẅie à ne ńgyá yé wɔ́, á le ku’u lékwoŋ Ssé gẅie à tè ne ńgyá yé wɔ́ wɔ́.

²¹*Lepʉ̌ sie Kristo la ná né pege, e sɔɔn. Nyìŋ lɔɔn ńkwoŋ Ssé, á gíŋe ńkwoŋo fɛ́ we nyìŋ mesoŋ.