Read Ngiemboon 1 Jâŋ 5 Bible Online

1 Jâŋ 5 - Ngiemboon bible

1 Jâŋ 5

¹Nyìŋ gẅie à zẅǐŋ ngie Yěsô aa *Nzà’nkÿo, aa míŋ Ssé. Nyìŋ gẅie à kwoŋ Ssé Tá, à giŋé ńkwoŋ mbɔɔ púɔ Ssé.

²Ammó gie pege ge fó mǒ ńzsé ngie pege ne ńkwoŋo púɔ Ssé, áa pá’ pege kwoŋ Ssé, ńgíŋe ńtÿɔ́gɔ kwò ná mbʉ̌ mé.

³Á nue lekwoŋ Ssé aa pege létÿɔ́gɔ kwò ná mbʉ̌ mé, mbʉ̌ mé piŋ ńké tè tʉ ńcʉa wégè wɔ́.

⁴Á nue wɔ̌wɔ́ɔ gẅie aa míŋ Ssé, à tʉ̌ ńcʉa kɔ̀ɔkɔ́ɔ gie á táte yé tsɛ̀ɛ njÿó. Ammó gie á gÿo pege tʉ ńcʉa njÿó, áa pá’ pege záb ntʉ́m ná Yěsô Kristo.

⁵Ńgwɔ́ wɔ̌ zɔɔn ńtʉ ńcʉa njÿó? À gwɔ̌ pɔ́ ndà’ nyìŋ gẅie à zẅǐŋ ngie Yěsô aa Míŋ Ssé?

⁶Mé gɔɔn Yěsô Kristo gẅie à la tó, mé nú’u yé tsɛ̀ɛ ntse, á gÿo ḿpfɛte metse mé, mé la tè nú’u yé pɔ́ ndà’ tsɛ̀ɛ ntse wɔ́, mé la nú’u yé tsɛ̀ɛ ntse, á gíŋe ḿpfɛte metse mé. A Zẅìge Ssé áa mǒ ńgwɔ́ jÿò ńgyá ngie áa nò nénʉ́. A Zẅìge Ssé zɔɔn ńgwɔ́ pɔ́ nénʉ́,

⁷é lɔgɔ ńgwɔ́ menò méntá mie é la’te wégè nò ná Yěsô.

⁸Yɔɔn áa Zẅìge Ssé, wɔɔn gwɔ́ ntse, ńgÿo metse, pɔ́b métá ne ńda’te tà’a nò wémɔ’ɔ́.

⁹Epʉ̀a mesoŋ gɔɔn mmó gie pɔ́ zsé nà nò, pege jú’ ńzẅíŋ ńgie áa nò. Ammó gie e Ssé gɔɔn nà nò á piŋ ńcʉa gie pʉ̀a mesoŋ gɔɔn. À lɔg menò méntá mɛ̌, ńgɔɔn nò ná nò Míŋ we.

¹⁰Nyìŋ lɔɔn ńzáb ntʉ́m wé ná Míŋ Ssé, mbà mɔɔn menò méntá ge ne fa’a ntʉ́m ye. Nyìŋ gẅie à kaa zẅíŋe nò gie e Ssé gɔ̌ɔn wɔ́, angàŋ lɔgɔ Ssé ńgÿo ngàŋa cÿɔ̌ nò, mélà’mie à kaa záb ntʉ́m nà nò gie e Ssé gɔ̌ɔn ńtí mmó gie yé Ssé zsé nà nò Míŋ we wɔ́.

¹¹Ammó gie e Ssé la gɔɔn nà nò Míŋ we, à yɔɔn ńgwɔ́ ngie: Yé Ssé la náa le gwɔ́ tèmì mbwo pege, wɛ̌ le gwɔ́ á fóo ná Míŋ we.

¹²Nyìŋ lɔɔn ńzáb ntʉ́m wé ná Míŋ Ssé, mbà ngàŋ àa gẅiin wɛ̌ le gwɔ́ ŋwɛ́, tá nyìŋ gẅie à ké tè záb à tè gẅiin.

¹³Mèŋ n ŋwe’e mɔɔn menò ńdɔgɔ shwóŋó gẅi pie pi záb ntʉ́m ná Míŋ Ssé ngie: Pi gẅiin le gwɔ́ tèmì.

¹⁴Ammó gie á gÿo pege tyé mvfò Ssé ntʉ́m wégè té vɛ, á gwɔ́ pɔ́ ngie: Pege ne ńzsé ngie, pege lɔɔn ńdúɔ mmó mbwo yé, á gwɔ́ gie à ne ńkwoŋo, mbà à ge jú’.

¹⁵Pá’ pege ne ńzsé ngie e Ssé ne ńjú’u nò yégè la, pege giŋé ńne ńzsé ngie pege lɔɔn ńdúɔ pɔ́ kɔ́ mbwo yé wɔ́, mbà à ge náa mmó gie pege luɔ né pege.

¹⁶Nyìŋ lɔɔn ńgyá à fɛ́ we ne ńgÿo nò tepòŋ, á ké tè nò tepòŋ gie ngàŋ ge fó mǒ é kwé kwé wɔ́, á sẅíŋte Ssé nà twó ngàŋ, mbà Ssé ge gÿo ngàŋ gwɔ́ wó, pá’ á lɔɔn ńkwa’ ńgwɔ́ nò tepòŋ gie à tè fó mǒ kwé kwé wɔ́. Tá’, atsɔ́ nò tepòŋ áa wó gie nyìŋ gÿo, éfó mǒ ńkwé kwé, n tě ńgɔɔn ngie mé sẅíŋte Ssé ná yɛ̌ ntí wɔ́.

¹⁷Kɔ̀ɔkɔ́ɔ gie nyìŋ gÿo, tà á gwɔ́ gie Ssé tè ne ńkwoŋo wɔ́, áa nò tepòŋ, ta’ nyìŋ tè gÿo pɔ́ menò tepòŋ ntsèm, éfó mǒ ńkwé kwé wɔ́.

¹⁸Pege ne ńzsé ngie nyìŋ gwɔ̌ tà ńcʉ́’ʉ míŋ Ssé, à tè gíŋe ńnéŋe fʉa nò fʉa wɔ́, á nue Míŋ Ssé ne ńtÿɔ́’te yé, nyìŋ tepòŋ tè gẅiin shÿó lézába pwó ná yé wɔ́.

¹⁹Pege ne ńzsé ngie pege ee púɔ Ssé, tá’ ngwòŋ njÿó ntsèm pǔ ńjú’u pɔ́ mbwo nyìŋ tepòŋ.

²⁰Pege ne ńzsé ngie Míŋ Ssé la tó ńnáa wégè legyè pá’ pege ge lɔg zsé kwà’ Ssé ye nénʉ́, peg la zẅɛ́’ pɔ́ yé Yěsô Kristo tá pega Ssé ye nénʉ́ cʉ́’ ńnéŋe, mbà pega pɔ́ léen ńtemte.

²¹Penkʉ́ pɔ́ɔn, pi laga twó gí nà shúm sie pʉ̀a gu’te ngie ee Ssé.