Read Ngiemboon Ŋwà’ne Ngyà jʉ’ 1 Bible Online

Ŋwà’ne Ngyà jʉ’ 1 - Ngiemboon bible

Ŋwà’ne Ngyà jʉ’ 1

¹Anò gie áa tsɛ̀ɛ yɔɔn ŋwà’ne áa gie á laa lelyěen, Yěsô Kristo gÿo ńgÿo mé zsé. Á gwaa gwɔ́, mbà Ssé tʉ̌ njÿó ńgÿo Yěsô zsé yɛ̌ nò légwɔ́ gie à ge la’te mbwo pʉ̀a pé mmó gie á ge tɔ́g tó. Kristo la túmo cÿɔ́’ we, á gʉa ńda’te yɛ̌ nò á mbwo Jâŋ gẅie aa ngàŋa fà’ Yěsô.

²Jâŋ ŋwɛ́ aa jʉ’ɔɔn ńne ńŋwe’e kɔ̀ɔkɔ́ɔ gie à ka gyǎ. Kwà’ yé ne ńgɔɔn ngie á fóo mbwo Ssé, ńgwɔ́ nò gie áa nénʉ́, mbà Yěsô Kristo ka gÿo mé zsé.

³Ashÿó mbòŋo aa nyìŋ gẅie à ge tóŋo yɔɔn ŋwà’ne. Pà shÿó mbòŋo gwɔ́ pʉ̀a pie pɔ́ ge jú’u yɔɔn shwóŋè gie á fóo mbwo Ssé, é gÿo mmó gie mé ŋwe’é tsoló. Á nue fʉ̀’ gie mɔɔn menò gee mbumté á tsoté tà ne ḿbɔ́ɔnte.

⁴Yɔɔn ŋwà’ne fóo mbwo mèŋ Jâŋ, mèŋ n ŋwe’e ńnáa mbwo mecú’tè pʉ̀a Kristo mie ée sɔɔn mbʉ́a, ńgwɔ́ tsɛ̀ɛ ngwòŋ Azia. E Ssé gẅie aa wó, mbà à laa wó, à piŋ ńne ńtóo, pâ mezẅìge sɔɔn mbʉ́a mie ée mvfò lʉŋe lefùɔ yé, pɔ́ ne ńgwɔ́ né pi, ńne ńnéŋe sẅétè ntʉ́m pi.

⁵Yěsô Kristo gẅie aa njÿò ńgyá we nénʉ́, ńgwɔ́ ndùŋ mvfò múɔ, ńgwɔ́ ndùŋ mvfò nyìŋ gẅie à la kwé ḿbiŋ ńzím, ńgwɔ́ Fùɔ cʉa mefùɔ pie ée ndùmo ssé tsetsá’, á gíŋe ńne ńgwɔ́ né pi, ńgíŋe ńne ńnéŋe sẅétè ntʉ́m pi. Yé Kristo kwoŋo wégè tɛ’, à la lɔg metse mé ńkyɛ́’ nkÿo menò tepòŋ ná pege.

⁶À la lɔgɔ wégè ńgÿo pʉ̀a pie ée tsɛ̀ɛ nò *lefùɔ Ssé, ńgíŋe ńdɔgɔ wégè ńgÿo pànuŋe pwɔ́’ pá’ pege ge fa’a mbwo Tá we Ssé. Legú’ mbɔɔ metʉ̀ e lá’a ńgwɔ́ pɔ́ mbwo yé Yěsô Kristo á nà ngù’ nkɔ́ɔn nê nkɔ̌ɔn. *Amen

⁷!Pi ké ńzsé ngie à ne ńtóo. À ge lá’ tó pɔ́ tsɛ̀ɛ melɔ́ɔn. Awɔ̌wɔ́ɔ ge lá’ záb lejÿɔ́g ná ye, tà mbɔɔ pʉ̀a pie pɔ́ la sɔbɔ gwǒŋo nnɛ́ yé. Epʉ̀a ngwòŋo ngwòŋ ndùmo ssé tsetsá’ ge lá’ zéme pwó, é kɔ́’ legwé tí yé. Oon á ge lá’ gwɔ́ pɔ́ pú’u, tà mmó le mǒ kúbe. *Amen.

⁸Cʉ̀apʉ̀a Ssé gẅie aa wó, mbà à laa wó, à piŋ ńne ńtóo, á yé ngàŋa tʉ̀ ntsèm, à ne ńgɔɔn ngie: Mèŋ n gee Alfa, ńgwɔ́ Omega.

⁹Àa mèŋ Jâŋ, fɛ́ gẅi, ńcʉa ná pá’ pege la nnɛ́ ná Yěsô. Pege pǔ ńne ńgyá ngɔ́’, ḿbú ńgwɔ́ tsɛ̀ɛ nò *lefùɔ Ssé, ḿbiŋ ńgíŋ ńne ńdɔgɔ kwɔ́gɔ nnɛ́ ńzẅí’te Yěsô. Mé la gʉa Patmos, á gwɔ́ lá’ gie ntse la kéle ńnéŋe soŋ, ńnyé wɔ̀ɔn, mélà’ mie mèŋ shwóŋó nò Ssé ḿbiŋ ńkú’te mmó gie Yěsô Kristo ka gÿo mé zsé.

¹⁰Á gÿo ńgwɔ́ lyɛ’ɛ́ lá’ Cʉ̀apʉ̀a, a Zẅìge Ssé jʉʉ wɔ̀ɔn. N jú’ tsɔ̌ ngyè tetʉ́ʉ gwɔ́ nzèm mèŋ, ńne ńcʉ́me pá’ ngyè ntàŋ la,

¹¹ńne ńgɔɔn ngie: Cú’te kɔ̀ɔkɔ́ɔ gie ɔ̀ ne ńgyá, ńŋwe’e tsɛ̀ɛ lepu’ú ŋwà’ne, ńtúm ńnáa mbwo mecú’tè pʉ̀a Kristo mie ée sɔɔn mbʉ́a, ńgwɔ́ tsɛ̀ɛ metÿǒsoŋ mɔɔn: Efeso, Smirne, Pɛrgame, Tiatire, Sardɛ̀s, Filadelfia, Laodisé.

¹²N jú’ pú’u, ésele nnɛ́ lé gyá nyìŋ gẅie à gɔɔn nò mbwo mèŋ, ésele nnɛ́ pú’u, ńgyá melâm sɔɔn mbʉ́a mie mé la lɔgɔ tʉ̌ gɔ̂l ńnyɛte.

¹³N gyá tsɔ̌ nyìŋ á tyé tsetsɛ̀ɛ melâm ápɛ̌, ńgwɔ́ pɔ́ pá’ *Míŋ Nyìŋ mesoŋ la, ḿma’a tsɔ̌ tà’ shʉ̀a nzsǒ á cwóŋ tà ńtyé mekwò yé, á lɔgɔ tsɔ́ pɔ́ɔn mmó ńtʉ́me kʉ́kʉ́b we, á gwɔ́ gie mé la lɔgɔ tʉ̌ gɔ̂l ńnyɛte.

¹⁴Menòŋo twó mé fɔ́gɔ lê tɔ́d, pɔ́ pá’ megẅì la. Nÿɔ́g mé kyɛ’ jʉ’ pá’ lʉ́me mmɔ̌g la.

¹⁵Mekwò mé la ne ńŋwʉŋe pá’ tʉ̌ nʉ̀ gie mé nyé ńtsíbe mmɔ̌g la. Ngyè ye ne ńzẅɛɛ pá’ lepí sie é zyɛ́’ɛ la.

¹⁶Á kú’te mecÿɔ́’ saŋ sɔɔn mbʉ́a nà lɔ̌ɔn pwó yé ye tʉ̀. Etsɔ̌ nně ncù gie à twó sẅíte, é gẅiin mengʉ́ŋ mémbʉ́a ne fóo ncwò yé ńkẅɛɛ. Eshÿó wé ŋwʉŋe pɔ́ pá’ lejÿɔ́g nèm á tsɛ̀ɛ zsǒ la.

¹⁷N gyá yé pú’u, ésẅɛ́’ ńnuŋe mekwò yé, ńcʉ́’ ńnuŋe jʉ’ó, ńcʉ́’ ńgwɔ́ pɔ́ pá’ mpfó. Á lêen ńké ńzába pwó yé ye tʉ̀ ná mèŋ, ńgɔɔn ngie: Tè gíŋe ńcÿɔ’, mèŋ n gee Ndùŋ mvfò, ńgwɔ́ nzsònzèm

¹⁸Mèŋ n gee nyìŋ gẅie à gÿo mé gwɔ́ wó. N da kwé, tá mèŋ n gee fʉ̀’ɔɔn ńgwɔ́ wó, é ké lá’a gwɔ́ pɔ́ wó. Mèŋ n gẅiin metsɔ́’ɔ kí, mie é náa wɔ̀ɔn metʉ̀ lélɔg ńjÿɔ́’ɔ jʉ’ gie mepfó ée wó, kà pɔ́ lélɔg ńtsɔ́’ éfó wó ńkẅile pʉ̀a wɔ́.

¹⁹Pú’u la, pú ŋwe’e kɔ̀ɔkɔ́ɔ gie ɔ̀ gyǎ, á gie ɔ̀ ne ńgyá fʉ̀’ɔɔn mbɔɔ gie ɔ̀ ge piŋ tá gyá.

²⁰Á gʉa nà lezsě mmó gie mecÿɔ́’ saŋ sɔɔn mbʉ́a mie ɔ̀ gyǎ mèŋ n gẅiin ná pwó yɔ́ɔn ye tʉ̀, mbɔɔ ná melâm sɔɔn mbʉ́a mie mé la lɔgɔ tʉ̌ gɔ̂l ńnyɛte, mbà mèŋ n ge shwóŋó gú ngie: Mecÿɔ́’ saŋ sɔɔn mbʉ́a lɔgɔ ńgwɔ́ *mecÿɔ́’ Ssé pie é pyɛ́bɛ mecú’tè pʉ̀a Kristo ŋwɛ́ sɔɔn mbʉ́a. Melâm sɔɔn mbʉ́a lɔgɔ ńgwɔ́ mecú’tè pʉ̀a Kristo ŋwɛ́ sɔɔn mbʉ́a.