Read Ngiemboon Ŋwà’ne Ngyà jʉ’ 10 Bible Online

Ŋwà’ne Ngyà jʉ’ 10 - Ngiemboon bible

Ŋwà’ne Ngyà jʉ’ 10

¹E Ssé gíŋe ńnyɛ́’ nÿɔ́g mɔ́ɔn, n gyá tsɔ̌ *cÿɔ́’ Ssé gẅie à gẅiin metʉ̀, á ne fóo lepwó sẅɛ́’ɛ, etsɔ̌ ntí melɔ́ɔn pwoon mbùm ye pá’ nzsǒ pwoon mbùm nyìŋ la. Nkwòŋ nnù ngém zéme twó yé. Eshÿó wé gwɔ́ pá’ lejÿɔ́g nèm la. Mentɔ́ɔn mé gwɔ́ pá’ melʉ́me mmɔ̌g mie é pʉ’ʉ́ nnɛ́ ńtyé tyé la.

²À la gẅiin tsɔ̌ mûɔ méŋwà’ne mbwó yé, á gwɔ́ we nkyɛ’té, ńzé’e kwò yé ye tʉ̀ ńtÿɔ́gɔ ndùm ntse té pàa, ńtÿɔ́gɔ ye kyɛ̀bɛ á ndùmo ssé tsetsá’,

³ńdeen ńké ńga’te lê ngyè tetʉ́ʉ pá’ pú’ ntʉ̀ gẅie à ne ńcu’u la, ńga’te pú’u, mé jú’ lefaŋ vɛ́te vɛtě ngʉ̀a sɔɔn mbʉ́a.

⁴Lefaŋ la vɛ́te ngʉ̀a sɔɔn mbʉ́a pú’u, tà mèŋ n ne fa’a léŋwe’e mmó gie lefaŋ gɔ̌ɔn, ńjú’ ngyè nyìŋ fóo lefaŋ ńgɔɔn né mèŋ ngie: Lÿoon nò gie lefaŋ vɛtě ngʉ̀a sɔɔn mbʉ́a ńgɔɔn. Tè ŋwe’e.

⁵*Cÿɔ́’ Ssé gẅie mèŋ n ne ńgyá yé á tyé ńtÿɔ́gɔ kwò yé ndùm ntsè té pàa, yetsɔ́ gwɔ́ ndùmo tsetsá’ la, á ka’a pwó yé ye tʉ̀ ńnáa tÿǒ ńne ńkʉa,

⁶ńdɔgɔ lezíŋ nyìŋ gẅie aa ńgwɔ́ pɔ́ wó á nà ngù’ nkɔ́ɔn nê nkɔ̌ɔn, yé gẅie à la nyɛte lefaŋ mbɔɔ kɔ̀ɔkɔ́ɔ gie áa tsoló, yé gẅie à la nyɛte tsetsá’ mbɔɔ kɔ̀ɔkɔ́ɔ gie áa ndùmo, yé gẅie à la nyɛte ntse té pàa mbɔɔ kɔ̀ɔkɔ́ɔ gie áa tsoló, ńkʉa, ńgɔɔn ngie atsɔ̌ légíŋe ńzẅí’te à tè nyé ńgwɔ́ wó wɔ́.

⁷Tá’, á ge gÿo gwɔ́ fʉ̀’ gie *cÿɔ́’ Ssé we mbɔ́ɔntè sɔɔn mbʉ́a zyě létoŋ wé ntaŋ, ammó gie e Ssé la záb, á gwɔ́ lelyěen, à pumte ndʉŋ ndʉŋ pá’ à la tʉ́ njÿó ńgɔɔn mbwo pà ntsẅì nkʉ̀ pé pá’ pɔ́ fa’a mbwo yé.

⁸Ńgɔɔn pú’u, ngyè nyìŋ gie mèŋ n ně ńzɔɔn ńjú’ éfó tÿǒ lepwó ńgɔɔn nò la, é gíŋe ńgɔɔn né mèŋ tsɔ́ legʉ̀a ngie: Gʉa, éfó mbwo *cÿɔ́’ Ssé gẅie à tyě ńtÿɔ́gɔ kwò ndùm ntse té pàa, yetsɔ́ gwɔ́ ndùmo ssé tsetsá’ lɛ, ńkẅé mûɔ méŋwà’ne gie mé kyɛ’té.

⁹Mèŋ n gʉa lejʉ́ŋ *cÿɔ́’ Ssé ŋwɛ́, ésẅíŋte yé ngie à náa mûɔ méŋwà’ne ŋwɛ́ né mèŋ. Á gɔɔn né mèŋ ngie: Kɔ̀, ḿpfɛ́. Á ge ké kúu lepfòm gù é lẅe lẅe, tá’, é ké gwɔ́ ncwò gù é lʉm pá’ lwò nŋwá’.

¹⁰Mèŋ fó mbwo *cÿɔ́’ Ssé, ńkẅé mûɔ méŋwà’ne ŋwɛ́, ḿpfɛ́. Á gwɔ́ ncwò mèŋ ńdʉme pá’ nŋwá’ la. Tá mèŋ n gwɔ́ tà mi, á kúu lepfòm mèŋ ńcʉ́’ʉ ńdẅe lẅe.

¹¹Mé pɔ́ɔnte ńgɔɔn né mèŋ ngie: Á ne ńzɛ́te ngie ɔ̀ gíŋe ńgʉa ńtsẅi nkʉ̀ Ssé mbwo pʉ̀a ntí ntí, á mbwo ngwòŋo ngwòŋ, á mbwo pʉ̀a pie é shwóŋó meshwóŋè mentí mentí, mbɔɔ mbwo mefùɔ tà ńgyɔ́ɔn.