Read Ngiemboon Ŋwà’ne Ngyà jʉ’ 12 Bible Online

Ŋwà’ne Ngyà jʉ’ 12 - Ngiemboon bible

Ŋwà’ne Ngyà jʉ’ 12

¹Etsɔ̌ nkʉ̀’ʉ pà mmó kẅɛɛ lefaŋ ńgwɔ́ tsɔ̌ mánzwě, á ma’ ye nzsǒ, é gwɔ́ pɔ́ lejÿɔ́g nèm, ńtÿɔ́g mekwò mé ná saŋ, ńtɔ’ɔ cÿɔ́’ɔ lefùɔ, mecÿɔ́’ saŋ gwɔ́ mǒ ntsɔ̀b pʉ́a lê legém.

²À laa mánzwě shwoŋ, ńne ńga’te nue múɔ la ne ńdúmo yé, á ne ńgee ńzyé.

³Atsɔ́ mmó gíŋe ńkẅɛɛ lefaŋ, ńgwɔ́ tsɔ̌ ntí máamáa nnù ngém ya, ḿbaŋa pá’ mmɔ̌g la, metwó mé gwɔ́ sɔɔn mbʉ́a, mendóŋ mé gwɔ́ legém, acÿɔ́’ɔ lefùɔ gwɔ́ ná metwó mé sɔɔn mbʉ́a ntsèm.

⁴À la ne ńdɔgɔ nku wé ńjÿɔgɔ tà’ nzsè ná Mecÿɔ́’ saŋ nzsè tá, ḿbÿɛɛ ndùmo ssé tsetsá’, ńtyé mvfò manzwě wá, ńne ḿbyɛ́bɛ pá’ à ge zyé à gwóon ńkaa múɔ ḿmi.

⁵Manzwě ŋwɛ́ zyé mûɔ mbàŋa. Á gwɔ́ gẅie mé la tÿɔ́gɔ yé, á tyé ńku’ pá’ à ge lá’ lɔgɔ tÿǒ tʉ̌, ésá’ ngwòŋo ngwòŋ. Mé sa’a múɔ ŋwɛ́ ńdɔg ńkwɔ́’ né lejʉ́ŋ Ssé, né jʉ’ gie lʉŋe *lefùɔ Ssé áa wó.

⁶Manzwě wa lêen ńké ńkÿo ńgʉa né nkwòŋo tsẅɛ, á nà jʉ’ gie Ssé la nyɛte pá’ à ge ńnéŋe wó, ńzsé ngie mé ge nyɛte jÿɔ́gɔ yé jÿɔ́g nà melyɛ̌’ lá’ ntsá’ lê nkÿo pʉ́a lê móm ntɔgɔ́ (1.260).

⁷Ncù lêen ńké ńgwe tÿǒ lepwó, Méshÿɛɛ, tándá *mecÿɔ́’ Ssé, lɔg *mecÿɔ́’ Ssé pie ée nzèm yé, ḿma’ ntí máamáa nnù ngém ya lê ncù. Máamáa nnù ngém ŋwɛ́ lɔg mecÿɔ́’ pé, ńdÿɔ́’ɔ Méshÿɛɛ lê ncù.

⁸Tá máamáa nnù ngém wa ké tè ncù jÿó. Ayɔ́b jʉ’ té gíŋe ńgwɔ́ tÿǒ lepwó wɔ́

⁹Mé lêen ńké ńtsó máa nnù ngém ya, pâ pé mecÿɔ́’, ḿbÿɛɛ ndùmo ssé tsetsá’. Áa yé ńgwɔ́ nnú yá gie e la fó tàa fʉ̀’e mvfò la, mé tóŋo yé lé ndebele, ńgíŋe ńtóŋo yé le Sátà, aa yé gẅie à fʉte pʉ̀a mesoŋ ntsèm ndùmo ssé tsetsá’

¹⁰Mèŋ n deen ńké ńjú’ tsɔ̌ nyìŋ lɔg ngyè tetʉ́ʉ, éfó tÿǒ lepwó ńne ńgɔɔn ngie: Á yɔɔn, mbà fʉ̀’ gie mé ge tsẅɛ́ á kǔ’. Á yɔɔn, mbà fʉ̀’ gie e Ssé yege ge nyɛ metʉ̀ mé, yé zɔ cʉ́’ʉ sá’a pʉ̀a á kǔ’. Á yɔɔn, mbà fʉ̀’ gie *Nzà’nkÿo we gẅie à la tsɔ́’ gee ńnyɛ mé metʉ̀ á kǔ’. Á nue mé tsǒ nyìŋ gẅie à kɔ̌ɔn ńzɔ́gɔ ńtyé mvfò Ssé yege fʉ̀’e zsó pɔ́ tsẅɛ́’, ésẅiŋe mefɛ́ pege. Mé tsǒ yé ḿma’a ndùmo ssé tsetsá’.

¹¹Mefɛ́ pégè ka zẅɛ́’ metse mûɔ *Njʉ̀njÿò, ńgíŋe ńzẅɛ́’ mbɔɔ shwóŋè gie pɔ́ ka ne ńgɔɔn ńdɔgɔ ńda’te mmó gie pɔ́ zsé ná mûɔ *Njʉ̀njÿò, ńjÿó wɛ̌ nyìŋ. Pɔ́ ka tè lɔg twó sɔ́b ńtóŋo tsɔ́ mmó tà ḿbɔ́g pá’ ńgwɔ́ mé zẅé wɔ́b gwɔ́.

¹²Pú’u la, atÿǒ lepwó lâ pʉ̀a pie pɔ́ ńnéŋe wó, pi kág. Tá ńgʉa nà ndùmo ssé tsetsá’ mbɔɔ ntse té pàa, anò yɛ gie á kě ńgÿo gẅi lɛ. Á nue ndebele sẅɛ̌’ ńtó ńtsɛ́ɛ gẅí, lóŋ we ne ńgyáŋa tɛ’. Á ne ńzsé ngie à tè gíŋe fa’a yé fà’ tà ntyě sag wɔ́.

¹³Máamáa nnù ngém yá, gwɔ́ tà ńgyá pá’ mé tsǒ yé ḿma’a ndùmo ssé tsetsá’, ńzyɛ́’ ńcʉ́me nzèm manzwě wa gẅie à ně ńzyé mûɔ mbàŋa la, ńzye lénɔ́ɔn yé.

¹⁴Mé lêen ńké ńná mémbabá mémbʉ́a, é me máamáa gúm ndóŋ wɛ̌ né manzwě ŋwɛ́ pá’ à ge lɔg zie gee nkwòŋo tsẅɛ, á nà yé jʉ’, á jʉ’ gie máamáa nnù ngém wa à tè gíŋe gyá yé wɔ́. Á jʉ’ gie mé la nyɛte léjÿɔ́gɔ manzwě ŋwɛ́ wó, á nà ngù’ tá ńgÿo mesaŋ ntɔgɔ́.

¹⁵Máamáa nnù ngém ya zé’e ntse, é kẅɛ ńcwóŋo nzèm manzwě wa pá’ mí légwɔ́ gie é ge kaa yé.

¹⁶Tá tsetsá’ kẅéte manzwě wá, ńŋá’ ncwò wé, ḿbú ńnú ntse gẅie máamáa nnù ngém wá ze’é la.

¹⁷Lóŋ máamáa nnù ngém wá pú ńgyáŋ ńtí manzwě wá tɛ’. Nnù ngém gʉa ńdɔg ncù ńcʉ́’ ńdÿɔ́’ pɔ́ pfwɔ́’ɔ ngẅɛ̀ manzwě wa, epʉ̀a pie pɔ́ ne ńkú’te mbʉ̌ Ssé, ḿbiŋ ńne ńkímte nò nénʉ́ gie Yěsô la gɔɔn.

¹⁸Máamáa nnù ngém pɔ́ɔnte ḿbʉ’ʉ nnɛ́ ńtyé ndùm sàŋasáŋa ngʉ̀ŋe ntse.