Read Ngiemboon Ŋwà’ne Ngyà jʉ’ 15 Bible Online

Ŋwà’ne Ngyà jʉ’ 15 - Ngiemboon bible

Ŋwà’ne Ngyà jʉ’ 15

¹M bɔ́ɔntè ńgyá tsɔ́ mmó gíŋe ńkẅɛɛ lefaŋ, ńgwɔ́ wó tɛ’, ńgwɔ́ gie á gÿo mé vege vege, é gwɔ́ *Mecÿɔ́’ Ssé sɔɔn mbʉ́a. Pɔ́ tyéte ńgẅiinte ngʉ̀ngʉ̀ mentí sɔɔn mbʉ́a mie é ge kúu ná pʉ̀a mesoŋ, é lɔgɔ ńgwɔ́ menzsònzèm mengʉ̀ngʉ̀, á nue lóŋ Ssé ge gÿo gwɔ pʉ́le, mbà mɛ̌ mengʉ̀ngʉ̀ tɔ̌g.

²N gíŋe ńgyá tsɔ̌ ntí tetʉ́a, ésaŋte pá’ ntse té pàa, ńne síi pɔ́ pá’ tsɔ̌ ntí tóon gie e gwɔ̌ pɔ́ pá’ gyà shÿó, mé tóŋ lê Kristal la. Á gwɔ́ pɔ́ pá’ fʉ̀’ gie mmɔ̌g ée tsoló ńne ńkyɛ’ɛ jʉ’ la. Epʉ̀a tyéte ndùm wó, ńgwɔ́ pʉ̀a pie pɔ́ mǎ’ ncù tà ńcʉa nkʉ̀’ʉ nɔ̀ɔn, é pʉ̀a pie pɔ́ kaa tútú we gu’te, ńké tè zẅíŋ mé ŋwe’e menómbà mie é la’te lezíŋ sé ná pɔ́b wɔ́. Megàŋ gẅiin tsɔ̌ ntí mekèkÿɛ̀ mbwó pɔ́b, é gwɔ́ mie e Ssé la ná né pɔ́b.

³Pɔ́ ne ńzɔbɔ mezɔ́bɔ ntse mie, Mǒsê, ngàŋa fà’ Ssé la zɔb, ńgíŋe ńne ńzɔbɔ mie Mûɔ *Njʉ̀njÿò la zɔb, ńne ńgɔɔn tsɛ̀ɛ mɛ̌ mezɔ́b ngie: Cʉ̀apʉ̀a Ssé Ngàŋa tʉ̀ ntsèm, mefà’ mú ée wó tɛ’, mé gyá ḿvege vege. Gù Fùɔ gẅie ɔ̀ sá’a ngwòŋo ngwòŋ. Ammó gie ɔ̀ ka’á légÿo áa ndʉŋ ndʉŋ, ńgwɔ́ nò gie áa nénʉ́.

⁴Cʉ̀apʉ̀a, ńgwɔ́ wɔ̌ nyé té pɔ́gɔ gú? Ńgwɔ́ wɔ̌ nyé té gu’te lezíŋ shú. Ndà’ gú zɔɔ ndʉalʉ̌a; Mengwòŋ ntsèm ge gÿo tó é kẅí’te mvfò gù á nue wɔ̌wɔ́ɔ kéen ńgyá mefà’ mú pá’ é tyé ndʉŋ ndʉŋ.

⁵N gyá sɔɔn shúm tà ńtsẅé jʉ’, e Ssé gíŋe ńnyɛ́’ nÿɔ́g mɔ́ɔn, n gyá jʉ’ yé, gie áa tÿǒ lepwó, á nyɛ́’ɛ ńtyé, ntàb gẅie é nyɛɛ ngie e Ssé ee nùɔ pʉ̀a pé, é tyé tsoló.

⁶*Mecÿɔ́’ Ssé sɔɔn mbʉ́a, pie pɔ́ la gẅiin ngʉ̀ngʉ̀ mentí sɔɔn mbʉ́a la, fó jʉ’e Ssé ńkẅɛ, ḿma’ metà’ shʉ̀a meféfɔ́gɔ nzsǒ, é ne ńŋwʉŋe. Mbà pɔ́ lɔgɔ́ tsɔ́ pɔ́ɔn mmó, ńtʉ́me kʉ́kʉ́b wɔb, á gwɔ́ gie mé la lɔgɔ tʉ̌ gɔ̂l ńnyɛte.

⁷Atsɔ̌ tà’ ná menɔ̀ɔn pá lekùa, á ná mentú’ sɔɔn mbʉ́a mbwo *mecÿɔ́’ Ssé pa sɔɔn mbʉ́a. Mentú’ ŋwɛ́ gwɔ́ mie mé la lɔgɔ tʉ̌ gɔ̂l ńnyɛte, agyáŋa lóŋ Ssé gẅie aa ńgwɔ́ pɔ́ wó nà ngù’ nkɔ́ɔn nê nkɔ̌ɔn gwɔ́ tsɛ̀ɛ mentú’ ŋwɛ́ tà ńdúe.

⁸Metʉ̀ Ssé pɔ́ legú’ we, pú ńgÿo ndyé kúu tsɛ̀ɛ jʉ’ yé tà ńdúe, tà tsɔ̌ nyìŋ tè ku’u lékúu tsoló wɔ́, tà ńdá’ ńkú fʉ̀’ gie mentí ngʉ̀ngʉ̀ ma sɔɔn mbʉ́a mie ée mbwo *mecÿɔ́’ Ssé sɔɔn mbʉ́a la, é tɔ̌g tà ḿmag.