Read Ngiemboon Ŋwà’ne Ngyà jʉ’ 19 Bible Online

Ŋwà’ne Ngyà jʉ’ 19 - Ngiemboon bible

Ŋwà’ne Ngyà jʉ’ 19

¹N gyá sɔɔn shúm tà ńtsẅé jʉ’, ńjú’ tsɔ̌ ngyè tetʉ́ʉ é gwɔ́ pɔ́ pá’ ngyè máamáa nùɔ lá’ la, é gwɔ́ tÿǒ lepwó ńne ńgɔɔn ngie: Alelúyà[4], letsẅɛ́ ńgÿo legú’ mbɔɔ metʉ̀ ée mbwo Ssé yege,

²á nue awe létsɔ́’te ntsaŋ aa nénʉ́ ḿbiŋ ńgwɔ́ ndʉŋ ndʉŋ. À kéen ńtsɔ́’te ntsaŋ máamáa ngàŋ mpfwɔ́’ manzwě gẅie à kɔ̌ɔn ńdɔgɔ nò mpfwɔ́’ yé, ńtága jʉ’ ndùmo ssé tsetsá’. À tsɔ’ɔ́ piŋé nò metse megàŋa fà’ pé pie ngàŋ mpfwɔ́’ ŋwɛ́ la pfɛte. À tsɔ̌’ pɔ́ kwà’ ná yé.

³Anùɔ lá’ gíŋe ńgɔɔn ngie: Alelúyà! Ndyé gẅie é fóo nà tÿǒsoŋ gie á shÿǒ, é ge lá’a kwɔ́’ɔ kwɔ̌’ nà ngù’ nkɔ́ɔn nê nkɔ̌ɔn.

⁴Melÿò pá ntsɔ̀b lekùa lê móm mbʉ́a, mbɔɔ menɔ̀ɔn pá lekùa kẅí’te ssé, ńgu’te Ssé gẅie à ńnéŋe nà lʉŋe lefùɔ, ńne ńgu’te yé, ńgɔɔn ngie: *Amen! Alelúyà!

⁵Etsɔ̌ ngyè nyìŋ lêen ńké fó jʉ’ʉ lʉŋe lefùɔ ńgɔɔn ngie: Pi gu’te Ssé yege, pi megàŋa fà’ pé tà maga gẅí, pi penkʉ́ mbɔɔ melÿò pie pi pɔ́gɔ yé.

⁶N jú’ ngyè nùɔ lá’ zẅɛ̂ pá’ lepí sie é zyɛ́’ɛ la, ḿbiŋ ńgwɔ́ pá’ ntʉ̀ lefaŋ sie é vɛ́te la, ńne ńgɔɔn ngie: Alelúyà. Á nue Cʉ̀apʉ̀a Ssé yege, ńgwɔ́ Ngàŋa tʉ̀ ntsèm, á nuŋé lefùɔ sé.

⁷Pege kág, ńnáa gugẅî, ńnáa legú’ mbwo yé. Á nue eshúm léjÿó línɔ́ɔn lɔ́ɔn ndá mûɔ *Njʉ̀njÿò é sɔ́ɔn. Anzwě ngʉ̀ we, kẅǐŋ mbùm ye tà ne ńzẅí’te.

⁸Mé ka gÿo nà ntí gie à ge ma’ mefɔ́gɔ nzsǒ mie é ŋwʉŋe ńgwɔ́ té *lɔ̌’. Á nue mefɔ́gɔ nzsǒ lɔgɔ ńgwɔ́ mefà’ pʉ̀a Ssé mie é tyé ndʉŋ ndʉŋ.

⁹Atsɔ̌ *cÿɔ́’ Ssé gɔɔn né mèŋ ngie: Ŋwe’e tsɛ̀ɛ ŋwà’ne ngie pàshÿó mbòŋo ée pʉ̀a pie mé toŋó wɔ́b á jʉ’ʉ línɔ́ɔn lɔ́ɔn ndá mûɔ *Njʉ̀njÿò, ńgíŋe ńgɔɔn né mèŋ ngie: Áa shwóŋè gie á kẅɛ̌ kwà’ ncwò Ssé.

¹⁰N jú’ pú’u, ńnuŋe mekwò yé légu’te yé. Tá’ á gɔɔn né mèŋ ngie: Tè gÿo pɛ́’ɛ̀. Mèŋ n gíŋe ńgwɔ́ yɔ́ɔn pɔ́ tsɔ̌ nyìŋ nà kwò fà’ gí, lâ petsɔ́ mefɛ́ pú pie, pia pɔ̌ kú’te mmó gie Yěsô Kristo ka gÿo mé zsé. Legÿo pú’u, áa mmó gie á tsóte pà *ntsẅì nkʉ̀ Ssé pɔ́ tsẅii nkʉ̀ gẅie é fóo mbwo Ssé. Pú’u la, gu’te pɔ́ Ssé.

¹¹M biŋ ńgyá ncwò lepwó nyɛ́’ɛ ńtyé, fɔ́gɔ lÿóon kẅɛ ńtyé. Nyìŋ gẅie à ńnéŋe ná wɛ̌ lÿóon, mé tóŋo yé lê tèkubé shwóŋè, mbɔɔ lê nyìŋ gẅie à gÿo pɔ́ mmó gie áa ndʉŋ ndʉŋ. À tsɔ́’te ntsaŋ pɔ́ ndʉŋ ndʉŋ, ńdÿɔ́’ pɔ́ ncù gẅie ée ndʉŋ ndʉŋ.

¹²Enÿɔ́g mé kyɛ’ jʉ’ pá’ lʉ́me mmɔ̌g la, á tɔ́’ mecÿɔ́’ɔ lefùɔ tà é gyɔ́ɔn gyɔ̌ɔn, mbà mé ŋwe’é tsɔ́ lezíŋ ná yé, ésie tsɔ̌ nyìŋ tè zsé mmó gie é lɔgɔ ńgɔɔn wɔ́ tà ndí ndà’ yé.

¹³Á ma’ tsɔ̌ nzsǒ fÿɔ́g, mbà mé la nu’u tsɛ̀ɛ metse. Mé tóŋo yé lê shwóŋè Ssé.

¹⁴Menùɔ ncù mie ée tÿǒ lepwó gwɔ́ nzèm yé, ńnéŋte ná mefɔ́gɔ lÿóon, ḿma’ mefɔ́gɔ nzsǒ mie tsɔ́ pǎb té mǒ wɔ́.

¹⁵Etsɔ̌ nně ncù ne fóo ncwò nyìŋ ŋwɛ́ gẅie à ńnéŋe ndùm fɔ́gɔ lÿóon ńkẅɛɛ. Esẅíte sẅité, ńgwɔ́ gie à ge lɔg kɔ́’ pʉ̀a pie ée tsɛ̀ɛ mengwòŋo mengwòŋ. Á gwɔ́ nyìŋ gẅie à ge lɔgɔ tÿǒ tʉ̌ ésá’ pʉ̀a mésoŋ, ńgwɔ́ nyìŋ gẅie à ge tsẅɛ́’ mentɔ̌ɔn mie mé lɔgɔ ńnyɛte melù’ tsɛ̀ɛ gÿǒon mélù’ mie é la’te ngie e Ssé ngàŋa tʉ̀ ntsèm ne ńgyáŋa lóŋ tɛ’.

¹⁶Mbà mé ŋwe’é tsɔ́ lezíŋ nà nzsǒ fÿɔ́g ye, mbɔɔ nà ntɔ́ɔn wé, é gwɔ́ lê: Fùɔ ncʉ̀a mefùɔ, mbɔɔ lê Cʉ̀apʉ̀a mecʉ̀apʉ̀a.

¹⁷M bɔ́ɔntè ńgyá atsɔ̌ *cÿɔ́’ Ssé tyé nà lejÿɔ́g nèm, ńdɔg ngyè tetʉ̀ ńtsẅii mbwo meshʉ́ŋ ntsèm pie é ne ńziete tàa tÿǒ lefaŋ ngie: Pi tó. Pi cú’tè léjÿó máamáa línɔ́ɔn Ssé,

¹⁸lépfɛ́ mbab nnɛ́ mefùɔ. Lépfɛ́ mbab nnɛ́ mentándá ncù. Lépfɛ́ mbab nnɛ́ mentʉ̀ pʉ̀a. Lépfɛ́ mbab melÿóon, mbɔɔ mbab nnɛ́ pʉ̀a mesoŋ pie é néŋte ndumó. Lépfɛ́ mbàb nnɛ́ pʉ̀a mesoŋ metsèm. E pà ńnéŋe ńgwɔ́ mendù nnɛ́ kà pà ńnéŋe ńgwɔ́ menkwɔɔn wɔ́, é penkʉ́ mbɔɔ melÿò.

¹⁹Mèŋ n gyá nkʉ̀’ʉ nɔ̀ɔn wa, ńgyá mefùɔ ndùmo ssé tsetsá’ mbɔɔ menùɔ ncù mɔ́b. Mbà pɔ́ cu’té léma’a nyìŋ gẅie à ńnéŋe ná lÿóon pâ wé nùɔ ncù lê ncù.

²⁰Mé jÿo nkʉ̀’ʉ nɔ̀ɔn wa, ńgwoon yé, ńgíŋe ńgwoon mbɔɔ *ntsẅì nkʉ̀ Ssé we cÿɔ̌ nò gẅie, à la tyé mvfò yé, ńgÿo menò mmɔɔn mmɔɔn ńdɔg fʉte pʉ̀a pie pɔ́ la zẅíŋ mé cÿɔ’ɔ liŋé nkʉ̀’ʉ nɔ̀ɔn ŋwɛ́ ná pɔ́b, pɔ́ gíŋ ńgu’te tútú nɔ̀ɔn ŋwɛ́ la. Mé gwoon wɔ́b pú’u, ńzé’e wɔ́b mépʉ́a pɔ́ ntentʉ́, ḿma’a tsɛ̀ɛ gÿǒon mmɔ̌g *mekʉ̀a.

²¹Á gʉa na petsɔ́ pʉ̀a, nně ncù gie e la ne fóo ncwò nyìŋ gẅie à ńnéŋe ná lÿóon ńkẅɛɛ la, é zẅéte wɔ́b. Ngwòŋ meshʉ́ŋ ntsèm pfɛ́ mbab yɔb tà ńzẅɛ́.