Read Ngiemboon Ŋwà’ne Ngyà jʉ’ 22 Bible Online

Ŋwà’ne Ngyà jʉ’ 22 - Ngiemboon bible

Ŋwà’ne Ngyà jʉ’ 22

¹*Cÿɔ́’ Ssé pɔ́ɔnte ńnyɛɛ wɔ̀ɔn mí gẅie ntse gẅie e gÿo mé gwɔ́ wó, é ne síi pá’ ntí tɔgɔ́ tsyé gie mé tóŋo lê christal la, é ne fóo nà lʉŋe *lefùɔ Ssé pɔ́ Mûɔ *Njʉ̀njÿò ńkẅɛɛ.

²Metÿǒ mie é gÿo mé gwɔ́ wó é gwɔ́ soŋ lǎŋa lÿò gie áa tÿǒsoŋ, á nà mengʉ̀ŋe ntse mémbʉ́a, ńne ńzéme ngʉ̀a ntsɔ̀b pʉ́a, ngwòŋ mesaŋ ntsèm, mentɔ̌ɔn gwɔ́ pɔ́ tÿó. Mé piŋe ńdɔgɔ meffo mé ńzoŋo meguɔ ná pʉ̀a mesoŋ pie ée metúmo metúm.

³Etsɔ̌ ndòon tè gÿo gíŋe gwɔ́ wó wɔ́. Alʉŋe *lefùɔ Ssé pɔ́ Mûɔ *Njʉ̀njÿò ge gÿo gwɔ́ tsɛ̀ɛ tÿǒsoŋ. Pafa’a fà’ Ssé é ne ńgu’te yé.

⁴Pɔ́ ge gÿo ne lɔgɔ nÿɔ́g mɔ́b é gyá shÿó Ssé. À gwaa gwɔ́, mbà mé ŋwe’é lezíŋ sé nà zǐ yɔ́b.

⁵Letsẅɛ́’ těen ńge gÿo gíŋe gwɔ́ wó wɔ́. Pɔ́ té nge gÿo gíŋe tsɔ́ɔn kyɛ̀’ gie á fóo ná lâm wɔ́, é ké le ye nèm tsɔ́ɔn. Á nue Cʉ̀apʉ̀a Ssé ge gÿo lɔgɔ yé kyɛ̀’ é kyɛ’ɛ wɔ́b. Pâ pɔ̌ sá’ njÿó nà ngù’ nkɔ́ɔn nê nkɔ̌ɔn.

⁶*Cÿɔ́’ Ssé pɔ́ɔnte ńgɔɔn né mèŋ ngie: Menò mɔɔn é té mie à lɔɔn ńgwɔ́ nyìŋ jú’ mʉ́’te wɔ́, ée nénʉ́. Cʉ̀apʉ̀a Ssé gẅie yé zɔɔ ńdɔgɔ Zẅìge yé ńtúmo pà Ntsẅì nkʉ̀ pé, kwà’ yé zɔ tumó cÿɔ́’ we pá’ à ge nyɛɛ mbwo megàŋa fà’ pé, mmó gie á ge tɔ́g tó.

⁷Ayɔɔn, Yěsô kě ne ńgɔɔn ngie: Mèŋ n ge tɔ́g tó. Ashÿó mbòŋo aa nyìŋ gẅie à kú’te menò mie mé tsẅii tsɛ̀ɛ sɔɔn lepu’ú ŋwà’ne, é gwɔ́ mie é ge gÿo fʉ̀’ɔɔn mbɔɔ mie é ge lá’ tá gÿo.

⁸Mèŋ Jaŋ, n ka jú’ mɔɔn menò, ńgíŋe ńgyá. N ka jú’ mɔɔn menò ńgíŋe ńgyá pú’u, ńnuŋe mekwò *cÿɔ́’ Ssé légu’te yé, á *cÿɔ́’ Ssé gẅie à ka ne ńnyɛɛ wɔ̀ɔn mɛ̌ menò.

⁹Tá’ á gɔɔn né mèŋ ngie: Tè gÿo pɛ́’ɛ̀. Mèŋ n gíŋe ńgwɔ́ yɔ́ɔn pɔ́ tsɔ̌ *ngàŋa kwò gù nà fà’, mbɔɔ we mefɛ́ pú pà *ntsẅì nkʉ̀ Ssé, mbɔɔ we pʉ̀a pie pɔ́ kú’te menò mie ée tsɛ̀ɛ yɔɔn ŋwà’ne. Gu’te pɔ́ Ssé.

¹⁰MÀbɔ́ɔnte ńgɔɔn né mèŋ ngie: Tè lÿoon menò mie mé tsẅǐ tsɛ̀ɛ yɔɔn ŋwà’ne, ée menò mie é ge gÿo, mbɔɔ mie e ge lá’ tá gÿo. Tè lÿoon, á nue afʉ̀’ gie mɔɔn menò gee mbumté á tsoté tà ne ḿbɔ́ɔnte.

¹¹Pú’u la, nyìŋ lɔɔn ńgwɔ́ gie à tè ne ńgÿo mmó gie áa ndʉŋ ndʉŋ mvfò Ssé wɔ́, á ké ńgÿo pɔ́ pú’u, ńdɔg ńgʉa lé mvfò. Nyìŋ gẅie ncÿǒ ée ná yé, à gíŋ ńkẅi’i ńnéŋ ncÿǒ ná yé. Tá nyìŋ gẅie à ne ńgÿo mmó gie áa ndʉŋ ndʉŋ mvfò Ssé, á ke ńgíŋe ńkẅi’i ne ńgÿo pɔ́ mmó gie áa ndʉŋ ndʉŋ. Nyìŋ gẅie aa nyìŋ Ssé, à ké ńgíŋe ńkẅi’i ńgwɔ́ pɔ́ wɛ̌.

¹²Ayɔɔn, Yěsô ké ně ńgɔɔn ngie: Mèŋ n ge tɔ́g tó, n gẅiin mmó gie n ge lɔg tsɔ́’ɔ fà’a pʉ̀a, á le ná ye wɔ̌wɔ́ɔ pɔ́ pá’ mefà’ mé ée pú’u.

¹³Mèŋ n gee Alfa, ńgwɔ́ Omega, ńgwɔ́ ndùŋ mvfò, ńgwɔ́ nzsònzèm, ńgwɔ́ nzyeté, ńgwɔ́ nzsoté.

¹⁴Pàshÿó mbòŋo ée pʉ̀a pie pɔ́ sɔgɔ menzsǒ mɔ́b tà é lʉ́a, légwɔ́ gie pɔ́ ge ku’ léfó nà mencwò nká’, ńkúu tÿǒsoŋ, ńjÿó ntɔ̌ɔn tÿó ya gie á gÿo mé kwa’ ńgwɔ́ wó.

¹⁵Tá ńké ńgʉa ná pàgÿo menò pá’ ngwé, é pàgẅiin mekàŋ, é pàgÿo menò mpfwɔ́’, é pàzẅéte pʉ̀a, é pàgu’te shúm ngie ee messé, mbɔɔ wɔ̌wɔ́ɔ gẅie à kwoŋ cÿɔ̌ nò, tà shwóŋó yé pɔ́ cÿɔ̌ nò, megàŋ zso nzème pǐ.

¹⁶Yěsô ne ńgɔɔn ngie: Mèŋ n tumó cÿɔ́’ wɔ̀ɔn ngie à gʉa ńtsẅi mɔɔn menò mie ée nénʉ́ mbwo pi, ńzsé ngie mé ge gɔɔn mbwo mecú’tè pʉ̀a pɔ́ɔn. Mèŋ n gee lejÿɔ́g mmó sie é fóo nà leŋaŋ fùɔ Ndavíd, ńgwɔ́ cÿɔ́’ sàŋ gẅie à kwɔ̌’ ńjÿó gwóon ńdʉ́a.

¹⁷A Zẅìge Ndʉalʉ̌a pɔ́ nzwě ngʉ̀ ne ńgɔɔn ngie tóo. Á poŋ ngie nyìŋ gẅie à jú’u yɔɔn nò à gɔɔn yé ngie tóo. Nyìŋ gẅie nzyè ntse ne ńgyáŋa yé à tó. Nyìŋ gẅie à kwǒŋ à nú ntse gẅie é gÿo mé kwa’ ńgwɔ́ wó, ńnú pɔ́ tè náa tsɔ́ mmó.

¹⁸Mèŋ Jaŋ n gɔɔn yɔɔn nò pá’ɔɔn á mbwo wɛ̌ nyìŋ wɔ́ gẅie à ge jú’ menò mie mé gɔ̌ɔn tsɛ̀ɛ yɔɔn ŋwà’ne, é gwɔ́ menò mie é ge gÿo mbɔɔ mie ge lá’ tá gÿo. Nyìŋ kẅi’i mmó mǒ, mbà Ssé ge gÿo gʉa nà yé nò, é kẅi’i mengʉ̀ngʉ̀ mie mé la’té tsɛ̀ɛ yɔɔn ŋwà’ne lɔɔn.

¹⁹Nyìŋ ké ńgʉa ná menò mie mé gɔ̌ɔn tsɛ̀ɛ yɔɔn ŋwà’ne, é gwɔ́ mie é ge gÿo mbɔɔ mie e ge lá’ tá gÿo lɔɔn, ńtsẅɛ́te tsɔ́ mmó, mbà Ssé ge gÿo tsẅɛ́te yé mmó gie á kɔ’ɔ́ ńgẅiin nà mentɔ̌ɔn tÿó gie á gÿo mé kwa’a ńgwɔ́ wó tà mbɔɔ ye mmó gie á ké ńgẅiin tsɛ̀ɛ tÿǒsoŋo ndʉalʉ̌a gie mé la’te tsɛ̀ɛ yɔɔn ŋwà’ne.

²⁰Nyìŋ gẅie à ne ńnyɛte ńgɔɔn mɔɔn menò, gɔ̌ɔn ngie: Kwà’ nénʉ́, mèŋ n ge tɔ́g tó. *Amen. Tóo me Cʉ̀apʉ̀a Yěsô.

²¹Cʉ̀apʉ̀a Yěsô ne ńgwɔ́ né pi metsèm!