Read Ngiemboon Ŋwà’ne Ngyà jʉ’ 6 Bible Online

Ŋwà’ne Ngyà jʉ’ 6 - Ngiemboon bible

Ŋwà’ne Ngyà jʉ’ 6

¹N nyé ńdíe lǐe, ńgyá mûɔ *Njʉ̀njÿò nyɛ́’ɛ lìi nŋwá’ ná ndùŋ mvfò jʉ’ ná mejʉ’ mɛ̌ sɔɔn mbʉ́a. N jú’ tsɔ̌ tà’ ná menɔ̀ɔn pá lekùa gɔɔn nò lê tsɔ̌ ngyè gie e gwá’a lefàŋ sie é vɛ́te la ngie: Tóo.

²N díe ńgyá, tà’ fɔ́gɔ lÿóon kẅɛ, nyìŋ gẅie à ńnéŋe mǒ á gẅiin kyɛ̀’. Mé náa cÿɔ́’ɔ lefùɔ mbwo yé. Á ne ńgee, ńgiŋe ńtuɔ mengwòŋ, ńne sá’a.

³Mûɔ *Njʉ̀njÿò nyɛ́’ɛ lìi nŋwá’ nà jʉ’ mbɔ́ɔntè yépʉ́a, n jú’ nɔ̀ɔn mbɔ́ɔntè yépʉ́a kwé’e ngyè ye tÿǒ ngie: Tóo.

⁴Atsɔ̌ tà’ lÿóon gwóon ńkẅɛ, ḿbaŋ pá’ mmɔ̌g la. Mé ná metʉ̀ mbwo nyìŋ gẅie à la ńnéŋe mǒ ngie à gʉa ḿma’a tág ndùmo ssé tsetsá’, ńzsé ngie pʉ̀a mesoŋ ge sele sɔbte mennɛ́ mɔ́b é kwéte, ńgÿo pú’u, ńnáa máamáa nně ncù né yé.

⁵Mûɔ *Njʉ̀njÿò nyɛ́’ɛ lìi nŋwá’ nà jʉ’ mbɔ́ɔntè yétá, n jú’ nɔ̀ɔn mbɔ́ɔntè yétá kwé’e ngyè ye tÿǒ ngie: Tóo. N díe ńgyá tà’ ssé lÿóon kẅɛ. Nyìŋ gẅie à ńnéŋe mǒ gẅiin kílo lɔg fʉ̀’ʉ mmó mbwo yé.

⁶N jú’ tsɔ́ mmó fó tsetsɛ̀ɛ menɔ̀ɔn lekùa ńkẅɛ, ńgwá’a ngyè nyìŋ la, ńne ńgɔɔn ngie: Gÿo ná ntí gie mé ge lɔg nkába fà’ ye tà’a lyɛ’ɛ́ lá’, éjú pɔ́ ndà’ tà’ kílo ngesáŋ ntsíŋ, ńgwɔ́ gie e lɔɔn ńgwɔ́ ngesáŋ yege, mé lɔg nkába fà’ ye tà’a lyɛ’ɛ́ lá’, ńjúu kílo yétá, ńgʉa nà mèvɛ pɔ́ melù’, tè gÿo ná ntí gie mé ge zág.

⁷Mûɔ *Njʉ̀njÿò nyɛ́’ɛ lìi nŋwá’ nà jʉ’ mbɔ́ɔntè lekùa, n jú’ nɔ̀ɔn mbɔ́ɔntè lekùa kwé’e ngyè ye tÿǒ ngie: Tóo.

⁸N díe ńgyá atsɔ̌ lÿóon kẅɛ, ńgeme síŋ sǐŋ. Lezíŋ nyìŋ gẅie à ńnéŋe mǒ gwɔ́ le legwé. À jʉ’ gie mepfó ée wó á gwɔ́ nzèm ye. Mé gabte ndùmo tsetsá’ nzsè lekùa, ńnáa tà’ nzsè ngie pɔ́ sá’ légwɔ́ gie pɔ́ ge lɔg nně ncù, é lɔgɔ gwáŋa, é lɔgɔ gwá’a mbɔɔ menɔ̀ɔn tsẅɛ̀, é zẅéte pʉ̀a ná yɛ̌ gwǒŋ.

⁹Mûɔ *Njʉ̀njÿò nyɛ́’ɛ lìi nŋwá’ nà jʉ’ mbɔ́ɔntè yétʉ̀a, mèŋ n gyá mentʉ́m pʉ̀a pie mé la zẅéte wɔ́b, mélà’mie pɔ́ la shwóŋó nò Ssé mbɔɔ ná pá’ pɔ́ la gɔɔn mmó gie pɔ́ zsé nà nò Yěsô, é nuŋte tsìŋe jʉ’ gie mé nuŋe pwɔ́’ wó,

¹⁰ńne ńga’te lê ngyè tetʉ́ʉ ńgɔɔn ngie: Cʉ̀apʉ̀a, gù gẅie ɔ́ɔ Ssé, ńgwɔ́ nyìŋ gẅie à shwóŋó nò nénʉ́, ɔ̀ ge zẅí’te tà kú pɔ́ síŋe, tá ŋag pʉ̀a ndùmo ssé tsetsá’, é néŋ ngʉ̀ngʉ̀ twó pɔ́b ńtí pá’ pɔ́ la zẅéte wég?

¹¹Mé lêen ńké ńnáa fɔ́gɔ zsǒ mbwo wɔ̌wɔ́ɔ ná pɔ́b, ńgɔɔn né pɔ́b ngie pɔ́ ná’a ńgíŋe ḿbʉ́le ńzẅí’te méjʉ’, apfwɔ́’ɔ mefɛ́ pɔ́b pie pâ pɔ̌ kɔ́ɔn ḿbú fa’a fà’a Ssé, é tó tà ḿmag, á nue á ne ńzɛ́te ngie me gíŋe ńzẅéte wɔ́b yɔ́b pá’ pɔ́b.

¹²Mûɔ *Njʉ̀njÿò ne ńnyɛ́’ɛ lìi nŋwá’ nà jʉ’ mbɔ́ɔntè ntɔgɔ́, n ne ńdíe, ńjú’ atsetsá’ pú ńcʉ’e pá’ɔɔn tɛ’, nèm sele síŋ pá’ nzsǒ gie mé lɔgɔ ńdúŋo legwé la. Saŋ pú sele ḿbaŋ pá’ metse la.

¹³Mecÿɔ́’ saŋ fó lefaŋ ńkeme ḿbʉle ndùmo ssé tsetsá’ pá’ máamáa fóm ne ńcʉa, mentɔ̌ɔn tÿǒ mie é kaa tʉʉ é keme ḿbʉle ssé pú’u la.

¹⁴Lefaŋ mag pá’ tà’ shʉa ffò ŋwà’ne gẅie mé ně ńkate la. Mé fó ná mejʉ’ mie mekwɛ́ ée wó, tà mbɔɔ ná mejʉ’ mie melá’ mie ntse la kéle ńnéŋe soŋ ée wó, ésa’ ńdɔg ńgʉa.

¹⁵Mefùɔ pie ée ndùmo ssé tsetsá’, memáa pʉ̀a, mentándá pà lÿɔ́’ ncù, megàŋ nkáb, megàŋ metʉ̀, menkwɔ̀ɔn tà mbɔɔ pà ndù nnɛ́. Pɔ́ métsèm lyeen tsɛ̀ɛ memvwɔ́’, á nà metóon mie ée ndùm mekwɛ́,

¹⁶ńne ńgɔɔn mbwo mekwɛ́, mbɔɔ mbwo memáa metóon ngie: Pí keme sẅɛ́ɛ wég, ńdÿoon wég. Nyìŋ gẅie à ńnéŋe nà lʉŋe lefùɔ lɛ, á le gíŋe ńgyá wég wɔ́. Mûɔ *Njʉ̀njÿò le gíŋe ńgyáŋa lóŋ ná peg wɔ́.

¹⁷Á nue máamáa lyɛ’ɛ́ lá’ gie pɔ́ ge gyáŋa lóŋ aa pá’ɔɔn, mbà a tǒ, ńgwɔ́ wɔ̌ vwɔ’ɔ?