Read Ngiemboon Ŋwà’ne Ngyà jʉ’ 7 Bible Online

Ŋwà’ne Ngyà jʉ’ 7 - Ngiemboon bible

Ŋwà’ne Ngyà jʉ’ 7

¹M bɔ́ɔntè ńgyá *mecÿɔ́’ Ssé lekùa ndùmo ssé tsetsá’, é tyéte ná meshÿó lekùa, ńne ńtáte mefefà lekùa mie ée ndùmo ssé tsetsá’, légwɔ́ gie atsɔ̌ fefà tè cʉa ndùmo ssé tsetsá’ wɔ́, é ké le cʉa ndùm ntse té pàa wɔ́, é ké le cʉ’e tsɔ̌ tà’a tÿǒ wɔ́.

²Mèŋ n gyá tsɔ̌ tà’ *cÿɔ́’ Ssé, á ne fóo shÿó sá’ nèm ńkwɔ́’ɔ né tÿǒ, ńgẅiin mmó gie e Ssé gẅie aa ńgwɔ́ pɔ́ wó, aa ńdɔgɔ ńcÿɔ’ɔ liŋé yé nà mmó. Wɛ̌ *cÿɔ́’ Ssé ne ńdɔgɔ ngyè tetʉ́ʉ ńgɔɔn mbwo *mecÿɔ́’ Ssé lekùa pie mé la túmo wɔ́b ngie pɔ́ gʉa gÿo nò tepòŋ ndùmo ssé tsetsá’, mbɔɔ ná ntse té pàa la ngie:

³Tà pi gwóon ńgÿo nò tepòŋ ndùmo ssé tsetsá’. Tà pi gÿo ná ntse té pàa. Tà pi gÿo ná metÿǒ. Pi zẅí’te tà peg cÿɔ’ɔ liŋé nà zǐ pafa’a fà’ Ssé yege.

⁴Mèŋ n deen ńké ńjú’ mé gɔɔn ngie, epʉ̀a pie mé cÿɔ’ɔ́ liŋé ye Ssé nà zǐ yɔ́b ée pʉ̀a ntsá’ nkÿo lê ntsá’ ntsɔ̀b lekùa lê móm lekùa (144.000), ḿbú fóo nà metsìŋe ndá púɔ pà Israel ntsèm ntsèm.

⁵Á la gʉa nà ngẅɛ̀ Jẅida, mé cÿɔ’ɔ liŋé ná pʉ̀a ntsá’ ntsɔ̀b pʉ́a nê legém (12.000), ńgʉa nà ngẅɛ̀ Rẅiben, é gwɔ́ ntsá’ ntsɔ̀b pʉ́a nê legém (12.000), ńgʉa nà ngẅɛ̀ Gad, é gwɔ́ ntsá’ ntsɔ̀b pʉ́a nê legém (12.000),

⁶ńgʉa nà ngẅɛ̀ Asɛ̀ɛ, é gwɔ́ ntsá’ ntsɔ̀b pʉ́a nê legém (12.000), ńgʉa nà ngẅɛ̀ Neftali, é gwɔ́ pʉ̀a ntsá’ ntsɔ̀b pʉ́a nê legém (12.000), ńgʉa nà ngẅɛ̀ Manase, é gwɔ́ pʉ̀a ntsá’ ntsɔ̀b pʉ́a nê legém (12.000),

⁷ńgʉa nà ngẅɛ̀ Simeon, é gwɔ́ pʉ̀a ntsá’ ntsɔ̀b pʉ́a nê legém (12.000), ńgʉa nà ngẅɛ̀ Lěvi, é gwɔ́ pʉ̀a ntsá’ ntsɔ̀b pʉ́a nê legém (12.000), ńgʉa nà ngẅɛ̀ Isakar, é gwɔ́ pʉ̀a ntsá’ ntsɔ̀b pʉ́a nê legém (12.000),

⁸ńgʉa nà ngẅɛ̀ Zabulon, é gwɔ́ pʉ̀a ntsá’ ntsɔ̀b pʉ́a nê legém (12.000), ńgʉa nà ngẅɛ̀ Joseph, é gwɔ́ pʉ̀a ntsá’ ntsɔ̀b pʉ́a nê legém (12.000), ńgʉa nà ngẅɛ̀ Mběnjameŋ, é gwɔ́ pʉ̀a ntsá’ ntsɔ̀b pʉ́a nê legém (12.000) pie mé cÿɔ’ɔ́ liŋé ye Ssé nà zǐ yɔ́b.

⁹N gyá sɔɔn shúm tà ńtsẅé jʉ’, e Ssé gíŋe ńnyɛ́’ nÿɔ́g mɔ́ɔn, n gyá nùɔ lá’ gie ńgwɔ́ nyìŋ le sáŋ tà ńzsé nzẅìŋ wɔ́. Mbà pʉ̀a fǒ nà mengwòŋ ntsèm, éfó nà mengẅɛ̀ mengẅɛ̀, ńgwɔ́ mentí mentí, éshwóŋó meshwóŋè ntí ntí mie ée ndùmo ssé tsetsá’. Pɔ́ la tyé mvfò lʉŋe lefùɔ, mbɔɔ mvfò Mûɔ *Njʉ̀njÿò, ḿma’ meféfɔ́gɔ nzsǒ, ńgẅiin meyáŋa letÿǒon,

¹⁰ńne ńdɔgɔ ngyè tetʉ́ʉ ńgɔɔn ngie: Nyìŋ létsẅɛ́ à fóo mbwo Ssé yege gẅie à ńnéŋe nà lʉŋe lefùɔ mbɔɔ mbwo Mûɔ *Njʉ̀njÿò.

¹¹Á gwaa gwɔ́ pú’u, *mecÿɔ́’ Ssé métsèm tyéte ńtÿɔ́’ɔ lʉŋe *lefùɔ Ssé, ńtÿɔ́’ melÿò, mbɔɔ menɔ̀ɔn lekùa ńnéŋe soŋ. *Mecÿɔ́’ Ssé ŋwɛ́ gwe ssé, ésɔb shÿó wɔ́b ssé, á mvfò lʉŋe lefùɔ, ńgu’te Ssé,

¹²ńne ńgɔɔn ngie: *Amen, agù’te, legú’, azse nò, lenǎ ndǎg, lenǎ mekù’, metʉ̀ pâ ngʉ̀’ e gwɔ́ mbwo Ssé nà ngù’ nkɔ́ɔn né nkɔ̌ɔn. *Amen.

¹³Atsɔ̌ tà’ ná melÿò lêen ńké ńzɛ́te wɔ̀ɔn ngie: Epʉ̀a pɔɔn pie pɔ́ ma’ mefɔ́gɔ nzsǒ lɔɔn ée pà wɔ̌, ḿbiŋe fóo nzɔ̌?

¹⁴Mèŋ n tsɔ́’ ngie, a Ndè, gù zɔ ne ńzsé. Á gɔɔn ngie ée pʉ̀a pie éfóo tsɛ̀ɛ máamáa ngɔ́’ ya. Pɔ́ ka lɔg metse mûɔ *Njʉ̀njÿò, ésɔg menzsǒ mɔ́b tà é lʉ́a, ńcʉ́’ʉ féfɔ́gɔ.

¹⁵Áa mmó gie á gÿo pɔ́ tyé mvfò lʉŋe *lefùɔ Ssé, á tsɛ̀ɛ jʉ’ yé, ńne ńgu’te yé zsó pɔ́ tsẅɛ́’. Nyìŋ gẅie à ńnéŋe nà lʉŋe lefùɔ, à ge taa ntàb we é lɔg kábte wɔ́b.

¹⁶Nzyè é le gíŋe ńgyáŋa wɔ́b gwɔ́, agàga yɔ́b le gíŋe é shÿó wɔ́. Nèm le gíŋe ńcúɔ ndù pɔ́b wɔ́. Atsɔ́ mmó le gíŋe ńgÿo mbùm yɔb tween wɔ́.

¹⁷Á nue mûɔ *Njʉ̀njÿò gẅie à tyé tsetsɛ̀ɛ lʉŋe lefùɔ ge gwɔ́ ngàŋa pyɛ́bɛ wɔ́b, é lɔgɔ wɔ́b é gʉa nà meti’í ntse, á jʉ’ gie ntse ge gÿo mé gwɔ́ wó. E Ssé gÿo ḿbú ńtsí’i ntse nÿɔ́g mɔ́b ntsèm.