Read Ngiemboon Ŋwà’ne Ngyà jʉ’ 9 Bible Online

Ŋwà’ne Ngyà jʉ’ 9 - Ngiemboon bible

Ŋwà’ne Ngyà jʉ’ 9

¹*Cÿɔ́’ Ssé mbɔ́ɔntè yétʉ̀a tóŋ wé ntaŋ. Mèŋ n gyá tsɔ̌ cÿɔ́’ saŋ, mbà à ně fó lepwó ńgwe ndùmo ssé tsetsá’. Mé náa kí lɔg ńtsɔ́’ ncwò pÿé té lǎŋ mbwo ye.

²Cÿɔ́’ saŋ awɛ̌ tsɔ́’ ncwò pÿé té lǎŋ. Ndyé fó wó ńkwɔ́’ pá’ ndyé gẅie éfóo jʉ’ gie mé tuɔ tsǎ’ wó la. Wɛ̌ ndyé pú ńjÿó jʉ’ tà mé té gíŋe ńgyá lejÿɔ́g nèm wɔ́.

³Ngǐm kẅɛte tsɛ̀ɛ ndyé mmɔ̌g ŋwɛ́, ḿbú sa ndùmo ssé tsetsá’. Mé ná metʉ̀ mbwo pɔ́b lélɔg ńtsɔ́gte pʉ̀a pá’ mengɔ́ɔn ssé mie ée ndùmo ssé tsetsá’ ńtsɔ́gte pʉ̀a la.

⁴Mé tsẅii mbwo pɔ́b ngie tà pɔ́ gÿo nò tepòŋ ná legǐ, ńgie tà pɔ́ gÿo nò tepòŋ ná tsɔ́ mmó gie á sa’á ndùmo ssé tsetsá’, tà ńne sẅéte, ńgie pɔ́ gÿo nò tepòŋ ná tsɔ́ tÿǒ, ńgie pɔ́ gÿo nò tepòŋ pɔ́ ná pʉ̀a pie à liŋé ye Ssé á té nà zǐ yɔ́b wɔ́.

⁵Mé la tè náa wɔ́b metʉ̀, á gwɔ́ lélɔg ńzẅé pʉ̀a mesoŋ wɔ́. Á la gwɔ́ pɔ́ lélɔg ńnáa wɔ́b ngʉ̀ngʉ̀ ná nǎ mesaŋ métʉ̀a. Yɛ̌ ngʉ̀ngʉ̀ lêen ńgwɔ́ pɔ́ pá’ gie nyìŋ gyá ná pá’ ngɔ́ɔn ssé tsɔgɔ́ yé la.

⁶Á ge gwɔ́ nà mesaŋ ŋwɛ́, epʉ̀a mesoŋ fa’a legwé pɔ́ légyá, é tsɔ́ɔn lékwé, tá legwé kÿo wɔ́b kÿo.

⁷Yɛ̌ ngǐm ŋwɛ́ e la gwɔ́ pɔ́ pá’ melÿóon pie mé nyɛté wɔ́b lélɔg ńgʉa ńdÿɔ́’ ncù la. Atsɔ́ mmó laa twó pɔ́b, ńgwɔ́ pɔ́ pá’ cÿɔ́’ɔ lefùɔ gie mé la lɔgɔ tʉ̌ gɔ̂l ńnyɛte la. Meshÿó mɔ́b gwɔ́ pɔ́ pá’ meshÿó pʉ̀a mesoŋ la.

⁸Menòŋo twó mɔ́b la gwɔ́ pɔ́ pá’ menòŋo twó pànzwě la. Mesoŋ mɔ́b gwɔ́ pɔ́ pá’ mesoŋ pú’ ntʉ̀ la.

⁹Kʉ́kʉ́b wɔb la gwɔ́ pɔ́ pá’ fʉ̀’ gie mé zǎb nzsǒ ncù gie mé la lɔgɔ tʉ̌ ńtsó á mǒ la. Pɔ́ gwɔ́ tà ne ńzie, mbabá mɔ́b gÿo jʉ’ zẅɛ pá’ fʉ̀’ gie mekélêg mie melÿóon tà ńgyɔ́ɔn ne shwoŋo, é ne ńzẅɛɛ ńcʉa ńgee ńdÿɔ́’ ncù la.

¹⁰Menku mɔ́b lâ mesisìŋ mɔ́b gwɔ́ pɔ́ pá’ mengɔɔn ssé la. Metʉ̀ mɔ́b lélɔg ńná pʉ̀a ngʉ̀ngʉ̀ á nà mesaŋ métʉ̀a éfó ná menku mɔ́b.

¹¹Nyìŋ gẅie aa mbwo pɔ́b ńgwɔ́ pá’ fùɔ wɔb, ésá’a wɔ́b, é gwɔ́ *ssé tepòŋ[2] gie e gẅiin nò ná pÿé té lǎŋ gẅie lezíŋ sé ée nà shwóŋè pa Heber ńgwɔ́ lê abaddon, ńgwɔ́ nà shwóŋè pà Gelekia ńgwɔ́ lê Apolion ńdɔgɔ ńgɔɔn ngie: ngàŋa tág.

¹²Ndùŋ mvfò ngʉ̀ngʉ̀ cʉ̌a. Á yɔɔn metsɔ́ mengʉ̀ngʉ̀ mémbʉ́a gwɔ́ nzèm ńne ńtóo.

¹³*Cÿɔ́’ Ssé mbɔ́ɔntè ntɔgɔ́ tóŋ wé ntaŋ. N jú’ tsɔ̌ ngyè fó ná mendóŋ lekùa mie ée nà jʉ’ gie mé tuɔ shúm gyě wó ńkẅɛɛ. Yɛ̌ jʉ’ gwɔ́ mvfò Ssé, mbà mé la lɔgɔ tʉ̌ gɔ̂l ńnyɛte.

¹⁴Ngyè ŋwɛ́ tsẅii mbwo *cÿɔ́’ Ssé gẅie aa mbɔ́ɔntè ntɔgɔ́, gẅie à la gẅiin ntaŋ ngie à kyɛ́’te *messé tepòŋ lekùa pie mé la lɔg metsɛ̂n ńkwɛ́ɛ wɔ́b, pɔ́ gwɔ́ ngʉ̀ŋe ntse gẅie mé tóŋo lê Efalate la.

¹⁵Mé lêen ńké ńkyɛ́’te *messé tepòŋ ápɛ̌ lekùa. Mbà Ssé la cwoŋte wɔ́b ńdɔgɔ ńzẅí’te yɛ̌ lyɛ’ɛ́ lá’, á wɛ̌ saŋ, é yɛ̌ ngù’, légwɔ́ gie pɔ́ ge zẅé tà’ nzsè á nà pʉ̀a mesoŋ nzsè tá.

¹⁶Mèŋ n jú’ mé gɔɔn nzẅìŋ pàlÿɔ́’ ncù pie é lɔgɔ melÿóon ńgiŋe ngie pɔ́ ée memillion nkÿo pʉ́a.

¹⁷Wɔɔn pá’ e Ssé la nyɛ́’ nÿɔ́g mɔ́ɔn, mèŋ n gyá melÿóon, tà mbɔɔ pʉ̀a pie é laa ndùm wó. Pɔ́ la ma’a kème nzsǒ ncù gie mé lɔgɔ tʉ̌ ńgÿo, á gwɔ́ kʉ́kʉ́b pɔ́b ḿbaŋa pá’ mmɔ̌g la, ńgíŋe ńgʉme gʉme pá’ tsɔ́ tóon gẅie nzẅìŋ ée mǒ tɛ’ la, ńgíŋe ńne ḿbaŋa pá’ ffò tÿó gie á ne ńkwé la. Atwó melÿóon la gwɔ́ pɔ́ pá’ twó pú’ ntʉ̀ la. Mmɔ̌g, lê ndyé mbɔɔ tsɔ̌ ntí *mekʉ̀a ne fóo ncwò pɔ́b ńkẅɛɛ.

¹⁸Mmɔ̌g ŋwɛ́, lâ ndyé, mbɔɔ lâ yɛ̌ ntí *mekʉ̀a ŋwɛ́, ée shúm sa sie é náa ngɔ́’, mbà é la ne fóo ncwò melÿóon ńkẅɛɛ la, é la zẅé tà’ nzsè ná pʉ̀a mesoŋ nzsè tá.

¹⁹Á nue metʉ̀ melÿóon é gwɔ́ pɔ́ ncwò pɔ́b, mbɔɔ ná mesǎŋ mɔ́b. Mesǎŋ mɔ́b gwɔ́ pɔ́ pá’ mennú la, ńgẅiin metwó, ńdɔgɔ pɔ́ mɛ̌ ńgÿo nò tepòŋ.

²⁰Á gʉa nà pfwɔ́’ɔ pʉ̀a pie sɔɔn shúm sie é náa ngɔ́’ la tè wɔ́b zẅé, pɔ́ ké tè kúbe mà wɔ́b ńgwá’ mefà’ tepòŋ mie pɔ́ fa’a wɔ́. Pɔ́ la tè nyé légu’te *messé tepòŋ wɔ́. Pɔ́ té nyé légu’te shúm sie mé gu’te ngie ee messé wɔ́, é sie mé la lɔgɔ tʉ̌ gɔ̂l ńnyɛte, kà pɔ́ sie mé la lɔgɔ tʉ̌ nkáb ńnyɛte wɔ́, kà sie mé la lɔgɔ tʉ̌ nʉ̀ ńnyɛte wɔ́, kà sie mé la lɔgɔ tóon ńnyɛte wɔ́, kà sie mé la lɔgɔ kème tÿǒ ńnyɛte wɔ́, éshúm sie é té ku’u légyá jʉ’ wɔ́, ńké tè ku’u lé jú’u nò wɔ́, ńké tè ku’u légiŋ wɔ́.

²¹Pɔ́ la gíŋ tè kúbe mà wɔ́b, ńnyé lézẅé nyìŋ wɔ́, ńké tè nyé lekàŋ wɔ́, ńké tè nyé pá’ ńgwɔ́ mbàŋa lâ pànzwě tsetsɛ̀ɛ pɔ́b kẅɛ́te wɔ̌wɔ́ɔ pâ pɔ̌ nuŋe nuŋe wɔ́, ńké tè tsǒŋ nyé.