Read Ngomba Mɑtʉ̈ɔ 1 Bible Online

Mɑtʉ̈ɔ 1 - Ngomba bible

Mɑtʉ̈ɔ 1

¹Mɛlík-pɛtɑ́t mɑ̂ɑŋɡɑpnjẅɛt-Yɛ́su Kɛlístɔ ẅi ɑ nǔu njẅɛt-fɔɔ Ndɑvît, ẅi ɑ nǔu njẅɛt-Ábɛlɛhɑ̂m ɡúu pʉ́ɔlɑɑnɛ:

²Ábɛlɛhɑ̂m kɑ pí Ɛsɑk, Ɛsɑk pí Yɑkɔ̂p, Yɑkɔ̂p pí Jẅídɑ pɔ́p pɔ́ɔpɛ́mɑ́ pɛ́.

³Jẅídɑ pí Fɑlɛ̂s pɔ́p Zɑlɑ, mɑ́ wɔp pɔ́ Tɑmɑ̂l, Fɑlɛ̂s pí Ɛslɔm, Ɛslɔm pí Álɑ̂m.

⁴Álɑ̂m pí Amínɑdɑp, Amínɑdɑp pí Nɑɑsɔŋ, Nɑɑsɔŋ pí Sɑlmɔ́ŋ,

⁵Sɑlmɔ́ŋ pí Bɔ́ɔz, mɑ́ pɛ́ Bɔ́ɔz pɔ́ Lɑɑp, Bɔ́ɔz pí Ɔbɛ̂d, mɑ́ pɛ́ Ɔbɛ̂d pɔ́ Lẅíd, Ɔbɛ̂d pí Jɛsɛ́,

⁶Jɛsɛ́ pí fɔɔ Ndɑvît, fɔɔ Ndɑvît kɑ pí Sɑlɛ́mɔ, mbɔ mɑ́ pɛ́ Sɑlɛ́mɔ kɑ pɔ́ nzwɛ́ Ẅílí.

⁷Sɑlɛ́mɔ pí Lɔbwɑ́m, Lɔbwɑ́m pí Ábyɑ, Ábyɑ pí Asɑf,

⁸Asɑf pí Jɔsɑfɑ́d, Jɔsɑfɑ́d pí Jɔlɑ́m, Jɔlɑ́m pí Ɔzíyɑs,

⁹Ɔzíyɑs pí Jwɑtɑ́ŋ, Jwɑtɑ́ŋ pí Ashɑz, Ashɑz pí Ɛzɛ́kyɑs,

¹⁰Ɛzɛ́kyɑs pí Mɑnɑsɛ́, Mɑnɑsɛ́ pí Amɔ̂ŋ, Amɔ̂ŋ pí Jɔsíyɑs,

¹¹Jɔsíyɑs pí Yɛ́kɔ́níyɑ pɔ́p pɔ́ɔpɛ́mɑ́ pɛ́. Ɛ́ pɔ́ ŋkɑ́ ɛ̂yɑ́ pɛ́ ɡẅɛɛtɛ pɑíslɑyɛ̂l, pɔ́p tsʉ́Ꞌ ɡɑŋtsɑ́ŋ-ntsɔ, pɛ́ lɔk wɔ́p ŋ́ɡʉ Mbɑbilɔ̂nɛ.

¹²Yɑ́ ku-pʉɔ lɛɛ, Yɛ́kɔ́níyɑ pí Sɑlɑtyɛl, Sɑlɑtyɛl pí Zɔlɔbɑbɛl,

¹³Zɔlɔbɑbɛl pí Abiyûd, Abiyûd pí Ɛlíyɑkim, Ɛlíyɑkim pí Azɔl,

¹⁴Azɔl pí Sɑdɔ́k, Sɑdɔ́k pí Akim, Akim pí Ɛliyud.

¹⁵Ɛliyud pí Ɛlɛyɑzɑ́l, Ɛlɛyɑzɑ́l pí Mɑ́tɑ́ŋ, Mɑ́tɑ́ŋ pí Yɑkɔ̂p,

¹⁶Yɑkɔ̂p pí Yɔsɛ̂p, Yɔsɛ̂p pɔ́ ndúu Mɑlíyɑ, Mɑlíyɑ pɔ́ mɑ́ pɛ́ Yɛ́su ẅí pɛ́ fúŋnɛ ŋɡɔ Nzɑ́Ꞌŋkʉ.

¹⁷Ɛ́ lɔk ńtɛmtɛ ḿbɔ́ mɛzuŋ ntsɔ̌pɛ́nɛ́kwɑ nɛ́ nɛɡɛ́m tɛ ɛ́fú nǔu Ábɛlɛhɑ̂m ŋ́ɡʉ ŋ́kúu nǔu Ndɑvît, ḿbɛn ḿbɔ́ mɛzuŋ ntsɔ̌pɛ́nɛ́kwɑ nɛ́ nɛɡɛ́m tɛ ɛ́fú nǔu Ndɑvît ŋ́kúu nǔu ŋkɑ́ yi pɛ́ kɑ ɡẅɛɛnɛ pɑíslɑyɛ̂l, pɔ́p tsʉ́Ꞌ ɡɑŋtsɑ́ŋ-ntsɔ, pɛ́ lɔk wɔ́p ŋ́ɡʉ Mbɑbilɔ̂nɛ, ḿbɑ́ɑtɛ pɛ́ pɛn ŋ́ɡẅɛɛ mɛzuŋ ntsɔ̌pɛ́nɛ́kwɑ nɛ́ nɛɡɛ́m lɑ́ ŋ́ɡʉ ŋ́kúu nǔu Nzɑ́Ꞌŋkʉ.

¹⁸Yɔ pɑ́Ꞌ ɛ́ kɑ lɛɛnɛ pɔ́Ꞌɔ, lɑ pɛ́ pí Yɛ́su Kɛlístɔ. Mɑ́ wɛ Mɑlíyɑ kɑ pɔ́, mbɔ Yɔsɛ̂p kɑŋ wɛ́, tɛ pɛ́ pɛ́m ŋɡɔ ɑ zɔ́Ꞌ wɛ́, ɑ pɛ́t kɛ́ ɡʉ tɛ ŋ́kúu njɛ́Ꞌ yɛ́, pɛ́ ɡɔ ḿvukŋɛ ńjʉ́ɔ ɑ pɔ́ shǔutɛ, mbɔ Zẅikŋɛ Lɛ́ɛnɛ́nɛ ɡɛnɛ ɑ shuŋ.

¹⁹Ndúu mɛ Yɔsɛ̂p pɔ́ ŋu nɛ́nẅín lɑ́, ŋ́kɛ́ ḿbɔɔ ḿbɔ́ ŋ́kɔŋ nɛcẅɛt nǔu wɛ́ tsɛtsɛt lɑ́Ꞌ pɔ́, pɔ́Ꞌɔ ḿbɔ́ ŋ́kwɑŋɛ pɔ pɑ́Ꞌ ɑ ɡʉ ńdʉꞋnɛ wɛ́ pɔ tsɛt ntsɛm tɛ ŋu pɔɔ jí,

²⁰ḿbɛ́t ŋ́kwɑŋɛ kwɑŋɛ́nɛ, ńdɛ́ njʉɔ ńjʉ́ɔ Cʉ̈ɔꞋ-Sɛ́ fúŋ wɛ́, ńcú mbɔ̌ wɛ́ ŋɡɔ: «Yɔsɛ̂p, ɡu ẅí ɔ nǔu njẅɛt-fɔɔ Ndɑvît, cẅɛ́ɛ nzwɛ́ wu Mɑlíyɑ ńníꞋ ndɑ́ kɛ́ pɔ́k, mbíꞋŋɡɔ ɑ shǔutɛ pɑ́Ꞌɑ, mbɔ Zẅikŋɛ Lɛ́ɛnɛ́nɛ ɡɛnɛ.

²¹A ɡʉ ńtɑ́ɑ ḿbí mɔ́ɔ mbɛ́ɛnɛ, ɔ cẅi lík yɛ́ ŋɡɔ Yɛ́su, ńdɔk ńcú ŋɡɔ ɛ́fúŋ wɛ́ pɔ́Ꞌɔ, mbíꞋŋɡɔ jʉ́ ɡʉnɛ ŋ́ɡɛ pʉɔ-lɑ́Ꞌ pɔ́p luk ndɔɔ-mɛnu kɛpɔŋ mɔ́p. Yɛ́su lɔk ńcú ŋɡɔ luk.»

²²Mɔ mɛnu lɔk ḿbuutɛ pɑ́Ꞌɑ nǔu sẅiŋɛ yí Tsɑpʉɔ kɑ lɔknɛ ntsu-Ŋɡɛ́mndʉ̈ɔ́Ꞌ wɛ ńcú ŋɡɔ:

²³«Pɛ́ ɡʉ ńdɑ́Ꞌ ŋ́ɡɔ́ ńjʉ́ɔ, mɔ́ɔŋɡɔɔ pɛ́t kɛ́ jí ŋu mbɛ́ɛnɛ ḿbɔ́ shǔutɛ, ḿbí mɔ́ɔ mbɛ́ɛnɛ, pɛ́ cẅi lík yɛ́ ŋɡɔ Ɛmɑ́nwɛ̂l, ɛ́ lɔk ńcú ŋɡɔ Sɛ́ tsɛtsɛt pɛkŋɛ.»

²⁴Cʉ̈ɔꞋ-Sɛ́ cú pɔ́Ꞌɔ, Yɔsɛ̂p pɔ́ tɛ ńjʉɔmɛ, ŋ́ɡɛ yúu mi ɑ cúnɛ mbɔ̌ wɛ́, ńcẅɛ́ɛ nzwɛ́ wɛ ńníꞋ ndɑ́.

²⁵Lɑ́ pɔ́pmɛ́ kɛ́ ńdɑ́Ꞌ ḿbɔɔ nɔɔ, tɛ ɑ ɡɛ ḿbí mɔ́ɔ ɛ̂wɑ́, Yɔsɛ̂p cẅi lík yɛ́ ŋɡɔ Yɛ́su.