Read Ngomba Mɑtʉ̈ɔ 11 Bible Online

Mɑtʉ̈ɔ 11 - Ngomba bible

Mɑtʉ̈ɔ 11

¹Yɛ́su kɑ cú yɔ nu mbɔ̌ ɡɑŋku pɛ́ ntsɔ̌ppɑ́ nɛ́ nɛɡɛ́m tɛ ḿbɔ́tnɛ ńnɑ́ŋ, ɛ́fú zúꞋu ŋ́ɡʉ, ńnɛn ńzíꞋ pʉɔ nɛ́ yúu ḿbɛn ɛ́sɑ́Ꞌ Ŋkʉʉ sʉ́Ꞌnɛ tsɛt mɛtʉ́sɔŋ nǔu yîyɑ́ pɑk-ŋɡɔŋ.

²Ɛ́ pɔ́ ŋkɑ́ ɛ̂yɑ́, Jɑ̂ŋ Mbɑptíshi pɔ́ ndɑ́ntsɑ́ŋ, ńzúꞋ pɛ́ pɔ́ ɛ́sẅíŋɛ nǔu mɛnu mí Kɛlístɔ ɡɛnɛ. A túu pɛcɔ́ ɡɑŋku pɛ́ ŋɡɔ pɔ́p ɡʉ ḿbíkŋɛ Yɛ́su ŋɡɔ,

³ɑ Nzɑ́Ꞌŋkʉ ẅí pɛ́ sɛ́ ńzẅíꞋlɛ wɛ́ lɑ́ kɛ pɔ́p ḿbɛn ńzẅíꞋlɛ pɔ wɛcɔ́ ŋu ndɛꞋ ɔɔ?

⁴Pɔ́p ɡʉ ńjʉ́ɔ Yɛ́su, ɑ pʉ̈ɔt mbɔ̌ pɔ́p ŋɡɔ: «Pʉʉ ɡʉ ḿbɛ́ɛtɛ yúu mi pʉʉ zúꞋnɛ mbɑ yi pʉʉ jʉ́ɔnɛ ɛ́sẅíi Jɑ̂ŋ,

⁵ɛ́sẅíi wɛ́ ŋɡɔ: Pɛfʉmík sɛ́ ńjʉ́ɔ zʉꞋ, pɑpʉ̈ɔ́Ꞌtɛ mɛku pɔ́ ńnɛn sʉ́Ꞌnɛ, ɡɑŋŋkɑꞋ pɔ́ ɛ́fíitɛ, pɛmbúꞋ-mɛtúutɛ́ pɔ́ ńzúꞋ zʉꞋ, pɛpfú pɔ́ ńjʉɔmɛ, pɛ́ sɛ́ ɛ́sɑ́Ꞌ Ŋkʉʉ sʉ́Ꞌnɛ nu-Sɛ́ mbɔ̌ pɛpúŋ.»

⁶Pɔ́ttú ŋu ẅi ɑ kɛ́ kɔɔtɛ nǔu mɔ ḿvu sɛ́ pɔ́!

⁷Gɑŋntúu-Jɑ̂ŋ ɡʉ, Yɛ́su tsʉ́Ꞌ ńcú nu ntɛ́ Jɑ̂ŋ, mbɔ̌ lɑ́Ꞌ yi pɔ́p ḿbɔ́nɛ zúꞋu, ḿbíkŋɛ wɔ́p ŋɡɔ: «Ɛ́ ḿbɔ́ ŋkɑ́mbi pʉʉ ɡɔ́ ŋ́ɡʉ ŋkɔ̂ŋtɛ nɛjʉ́ɔ Jɑ̂ŋ, ḿbɔ́ ŋ́kwɑŋɛ nɛjʉ́ɔ kʉ̈ɔ́? KɛkɑꞋ yí fɛfʉ̈ɔt sɛ́ ńtsʉ́Ꞌnɛ lɑ́? Ŋɡɑŋ.

⁸Tɛ pʉʉ kɑ pɔ́ ŋ́ɡʉ pɔ nɛjʉ́ɔ kʉ̈ɔ́? Ŋu ẅí ɑ mɑꞋnɛ mɛndẅí-ŋkɑ́p lɑ́? Lɑ́ pɑmɑꞋ yîyɑ́ ntɛ́ mɛndẅí nɑ́ŋ pɔ ntɔ́Ꞌ?»

⁹Tɛ pʉʉ m̄bɔ́ ŋ́ɡʉ nɛjʉ́ɔ pɔ wɔ̌? Ŋɡɛ́mndʉ̈ɔ́Ꞌ-Sɛ́ kîi? Ɔ́ɔŋ lɑ́ ŋ kɛ́ ɛ́sẅíi wʉ́ʉ, ɑ kɑ pɔ́ jʉ́, lɑ́ ńtsɑ mbɑ ŋɡɛ́mndʉ̈ɔ́Ꞌ-Sɛ́.

¹⁰Jɑ̂ŋ ɛ̂wɑ́ zɛɛ ḿbɔ́ ŋu ẅí Sɛ́ kɑ tsʉ́Ꞌ nɛcú nu nǔu wɛ́, ńcú pɛ́ ŋwɑꞋnɛ ŋɡɔ: «ZúꞋ ŋ ɡʉ ńtúu mɑ́ntúu wɑɑ ɑ piitɛ ńtɔ́, ḿbɔ́ ńniitɛ sɛ̂ndúŋ yú lɑ ɔ tɔ́.»

¹¹Yɛ́su pɛn ŋ́kẅiꞋ ńcú ŋɡɔ: «Ɛ sẅíi wʉ́ʉ, kwɑꞋ nɛ́nẅín, wɛcɔ́ ŋumɛsɔŋ ŋkɑɑ zɛɛ ḿbɔ́ ɡú tɛ ńdɛɛ Jɑ̂ŋ Mbɑptíshi pɔ́. Lɑ́ ɛ́ pʉ́ɔlɑɑ, mbɔ ŋu ẅí ɑ kʉ̈ɔ́knɛ nǔu nu-nɛfɔɔ-Sɛ́ ni ɛ́ zɛnɛ lɑɑ, ɡú ńdɛɛ Jɑ̂ŋ.

¹²Ɛ́ lɔk ḿbɔ́ ŋɡɔ tɛ ɛ́fú nǔu ŋkɑ́-Jɑ̂ŋ Mbɑptíshi, ŋ́kúu ŋkɔ̂ɔnɛ, pɛ́ sɛ́ ńzuŋ ŋ́kúu nǔu nu nɛfɔɔ-Sɛ́[6].

¹³Ɛ́ pɑ́Ꞌɑ, mbíꞋŋɡɔ Mɔ̌sɛ̂ɛ pɔ́p pɛŋɡɛ́mndʉ̈ɔ́Ꞌ-Sɛ́ pɛtsʉʉ kɑ cú nu ntɛ́ ŋɡɔŋ-nɛfɔɔ-Sɛ́ tɛ ŋ́kúu nǔu ŋkɑ́-Jɑ̂ŋ.

¹⁴Pʉʉ lɑɑ ḿbɛn ḿbɔ́ ŋ́kɔŋ nɛjí ŋu ẅi Jɑ̂ŋ jʉ́, mbɔ mɔ, ŋ ɡʉ ŋ́kɛ́ ɛ́sẅíi wʉ́ʉ ŋɡɔ ɑ lɔk ḿbɔ́ Ɛlíyɑ ẅí ɑ kɑ pɔ́ ŋ́ɡʉ ḿbɛn ńtɔ́.

¹⁵Ŋu lɑɑ ŋ́ɡẅɛɛ mɛtúutɛ́ nɛlɔk ńzúꞋ nu ɑ zúꞋ.»

¹⁶Yɛ́su pɛn ńcú ŋɡɔ: «Tɛ mɔ ńdɔk kʉ̈ɔ́ ḿbɛ́ɛ fʉꞋ nǔu pʉɔ pínɛ pɔ́p ndǔ mbí ŋkɔ̂ɔnɛ? Pɔ́p fí mbɔ́ŋkʉ̈ɔ́ pi pɔ́p nɑ́ŋnɛ ndǔ zɑ́n, ḿbɔ́ ńzɔp tsɛtsɛt pɔ́p, ŋ́ɡɑ́ ɡwɑ́t ŋɡɔ:

¹⁷“Pɛk kɑ púꞋ nɛlúŋ pʉʉ pɔɔ nʉŋ, ńtíi nɛvú pʉʉ pɔɔ lɑɑ.”

¹⁸Yɑ́ kwɑꞋ pɑ́Ꞌ pɔ́p kɑ ɡɛnɛ nǔu Jɑ̂ŋ. A kɑ tɔ́ ḿbɔɔ yúu kwɛ́t, ḿbɔɔ mɛluꞋ nɔ́, pɔ́p cú ŋɡɔ mɛzẅikŋɛ kɛpɔŋ mbʉʉ yɛ.

¹⁹Mɔ́ɔ-Ŋu kɛ́ ńtɔ́ yɛ́ ŋkɔ̂ɔnɛ, ḿbɔ́ ŋ́kwɛ́t yúu ḿbɛn ńnɔ́ mɛluꞋ, pɔ́p cú ŋɡɔ pɛ́ líŋɛ wɛ́ lɑ ńjʉ́ɔ, ŋu wɑ́ pɔ́ ŋkwɛ́tyúu, ḿbɔ́ nɛ́nɔ́mɛluꞋ, ḿbɔ́ súu-pɑcẅɛ́ɛntsup-Pɑlɔ́mɑ mbɑ wɛ pɛcɔ́ pʉɔ kʉʉnɛ́nɛ. Lɑ́ pɛ́ sɛ́ ńjʉ́ɔ jínu yi ɛ́ yɛ́ Sɛ́ ńdɛɛ pɔ nǔu mɛfɑꞋ mí ɛ́ ɡɛnɛ.»

²⁰Yɛ́su cú pɔ́Ꞌɔ, ńzɛ nɛlɑꞋ pʉɔ-mɛtʉ́sɔŋ pí ɑ kɑ ɡʉnɛ zúꞋu, ŋ́ɡɛ mɛŋkʉꞋnɛ nu tɛ ɛ́ zɑ́ɑ, pʉɔ ɛ̂pɑ́ kɛ́ mbɔɔ shɔtnɛ ńcʉ́ɔ nzʉʉ Sɛ́ pɔ́.

²¹A cú mbɔ̌ pɔ́p ŋɡɔ: «Ndɔɔ tú pʉʉ pʉɔ-Kɔlɑzîŋ, mbɑ tú pʉʉ pʉɔ-Mbɛtsɑyídɑ, mɛnu mɔ mí pɛ́ kɑ ɡɛnɛ tsɛtsɛt pʉʉ, ɛ́ m̄bɔ́ pɛ́Ꞌnɛ ḿbɔ́ pɔ tsɛt tʉ́sɔŋ Til pɔ́p Sidɔŋ, mbɔ pɔ́p kɑ lɑ́Ꞌmɔ́ ŋ́kúp mɑt, ḿmʉk, ɛ́sɑ mɛpɑɑ ḿmɑꞋ, ńzɔ́Ꞌ pfú ńdɔk ńdúŋ.

²²Ɛ́ yúu mi ɛ́ ɡɛnɛ n cú ŋɡɔ: Ɛ́ ɡʉ ńdɑ́Ꞌ ḿbɔ́ lɛ́Ꞌ yi Sɛ́ ŋ́ŋɑk pʉɔmɛsɔŋ, yí ŋɡʉ̈ɔ́Ꞌ lɛɛ yɛ́ pʉɔ-Til pɔ́p yɛ́ pʉɔ-Sidɔ́ŋ,

²³ŋ́ɡʉ nǔu pʉʉ pʉɔ-Kɑpɛɛnɑwúm, pʉʉ kwɑŋɛ ŋɡɔ Sɛ́ ɡʉ ŋ́kɑꞋ wʉ́ʉ kɑꞋnɛ tɛ pʉʉ kúu nɛpú pɔ́ ɔɔ? Ɛ sẅíi wʉ́ʉ ŋɡɔ: Ŋɡɑŋ, ɑ ɡʉ ŋ́kɔk wʉ́ʉ kɔknɛ pʉʉ ɡʉ tɛ ŋ́kúu lɑ́Ꞌ-pɛpfú sɛ́. MbíꞋŋɡɔ mɛŋkʉꞋnɛ mɛnu mi pɛ́ kɑ ɡɛnɛ lɑ́Ꞌ pʉʉ, ɑ m̄bɔ́ pɛ́Ꞌɛ ŋ́ɡɛ pɔ Sɔdɔ̂m, mbɔ Sɔdɔ̂m yɛ́ pɔ ɡú tɛ ŋ́kúu lɔ́Ꞌnɛ

²⁴Ɛ́ yúu mi ɛ́ ɡɛnɛ n cú ŋɡɔ: Ɛ́ ɡʉ ńdɑ́Ꞌ ḿbɔ́ lɛ́Ꞌ yi Sɛ́ ŋ́ŋɑk pʉɔmɛsɔŋ, yʉ́ʉ ŋɡʉ̈ɔ́Ꞌ lɛɛ yɛ́ pʉɔ-Sɔdɔ́m.»

²⁵Yɛ́su ɡɛ ńcú ŋɡɔ: «Tɑ̌ɑ mɔ, Tsɑpʉɔ, ɡu ẅí ɔ sɑ́Ꞌnɛ tʉ́nɛ́pú mbɑ tsɛ́tsɑ́Ꞌ, ŋ ɡɑ́ pɑ́Ꞌlɑ́ mbɔ̌ ɡu pɑ́Ꞌ ɔ kɑ nyɛtnɛ mɔnɛ mɛnu mbɔ̌ pɛɡɛɡʉʉ, ńdʉɔ mbɔ̌ pɑjínu pɔ́p pʉɔ pínɛ pɔ́p kɑ zíꞋnɛ.

²⁶Ɔ́ɔŋ mbɑ̌ɑ Tɑ̌ɑ mɔ, ɔ kɑ jʉ́ɔ ŋɡɔ ɔ ɡʉ ŋ́ɡɛ yɔ nu pɔ́ pɔ́Ꞌɔ.»

²⁷Yɛ́su pɛn ńcú ŋɡɔ: «Tɑ̌ɑ mɔ kɑ nɑ́ mbɑ kʉ̈ɔ́ lɑ́ nǔu mbɔ́ mɑ́ɑ, mbɔ sɑ̌ɑ ŋu pɔɔ jí mɔ́ɔ pɔ́, ndɑꞋ Tɑ̌ɑ jínɛ wɛ́. Ŋu kɛ́ mbɔɔ jí Tɑ̌ɑ pɔ́, ndɑꞋ mɔ́ɔ nɛ jínɛ wɛ́, ḿbɛn ŋ́ɡɛ ŋu ẅí mɔ́ɔ kɔŋnɛ nɛnyɛt Tɑ́t wɛ mbɔ̌ wɛ́.

²⁸Pʉʉ pɛtsʉʉ pínɛ pʉʉ tíinɛ piꞋ nǔu mbɑɑndyɔŋ ɛ́ jɔt wʉ́ʉ tɛ pʉʉ kɑ́ɑ, pʉʉ tɔ́ ńtsɛ́t wɑ́ɑ, ŋ ɡɛ pʉʉ jẅiitɛ.

²⁹Pʉʉ tíi mbɑɑndyɔŋ-piꞋ yɑ́ɑ ńzɑ́p mbʉ̈ɔꞋ pʉʉ, ḿbɛn ḿbɛ́m ŋɡɔ n zíꞋ wʉ́ʉ pɑ́Ꞌ pʉʉ ɡʉ ŋ́ɡɛ, mbíꞌŋɡɔ m bɔ́tnɛ, tʉ́m yɑ́ɑ pɛn ŋ́kɛ́ mbɔɔ cʉ́ɔk. Ŋ ɡʉ ŋ́ɡɑ́ zʉꞋ yí pʉʉ ɡʉ fíitɛ tʉ́m yʉ́ʉ zúꞋu.

³⁰Yɑ́ɑ piꞋ zɑŋɛ nɛtíi, mbɑɑndyɔŋ-piꞋ yɑ́ɑ pɔ́tnɛ mbʉ̈ɔꞋ pʉʉ.»