Read Ngomba Mɑtʉ̈ɔ 12 Bible Online

Mɑtʉ̈ɔ 12 - Ngomba bible

Mɑtʉ̈ɔ 12

¹Ɛ́ ɡɛ ḿbɔ́ yɛcɔ́ lɛ́Ꞌnji-Pɑyúdɑ, Yɛ́su pɔ́ ńdɛɛ tsɛt ŋkɑ́Ꞌ-mɛsɑ́ŋntsʉ́ʉ, ɡɑŋku pɛ́, pɑ́Ꞌ njí kɑ pɔ́ ńzɑ́ŋ wɔ́p lɑ́, pɔ́p nɛn ɛ́swɛ mɛsɑŋntsʉ́ʉ ŋ́kwɛ́t.

²Pɛcɔ́ pʉɔ nǔu pɑfɑlísɑy jʉ́ɔ pɔ́Ꞌɔ, ńcú nɛ́ Yɛ́su ŋɡɔ: «Líŋɛ lɑ ńjʉ́ɔ pɑ́Ꞌ ɡɑŋku pú ɡɛnɛ yúu mi nɛpʉ́ʉ kɑ́ pɔ́ ḿbíkŋɛ ŋɡɔ pɛ́ ɡɛ lɛ́Ꞌnji-Pɑyúdɑ pɔ́[7].»

³Yɛ́su tsɔ́Ꞌ mbɔ̌ pɔ́p ŋɡɔ: «Pʉʉ ŋkɑɑ mɔ́ ɛ́fúŋ zʉꞋ-ŋwɑꞋnɛ-Sɛ́ yi ɛ́ lɛꞋlɛ́nɛ yúu mi fɔɔ Ndɑvît kɑ ɡɛnɛ pɔ́ kɛ? Pɑ́Ꞌ ɛ́ kɑ pɔ́ yɛcɔ́ lɛ́Ꞌ, njí zɑ́ŋ wɔ́p pɛ́ pʉɔ pɛ́.

⁴A kúu tsɛt zʉꞋ-nɔŋpɔꞋ, ḿbɛ́ɛ mbɛlɛ̂ɛt yí pɛ́ ɡɑ́nɛ mbɔ̌ Sɛ́, ŋ́kwɛ́t tɛ ŋ́ɡɑ́ yɛ́ ɡɑŋku pɛ́, lɑ́ nɛpʉ́ʉ cú ŋɡɔ ndɑꞋ pɑnɔŋpɔꞋ ɡẅɛɛnɛ nɛkwɛ́t!

⁵Kɛ pʉʉ ŋkɑɑ mɔ́ ɛ́fúŋ tsɛt ŋwɑꞋnɛ-Mɔ̌sɛ̂ɛ, ŋɡɔ ɛ́ lɛ́Ꞌnji-Pɑyúdɑ, pɑnɔŋpɔꞋ pi pɔ́p ɡẅɛɛnɛ fɑꞋ zʉꞋ-nɔŋpɔꞋ kɛ́ mbɔɔ jẅiitɛ, lɑ́ ɛ́ pɔɔ ńdɔk ḿbɔ́ ŋɡɔ pɔ́p fɑɑnɛ nɛpʉ́ʉ pɔ́.

⁶Pɔ́Ꞌɔ, ŋ kɛ́ ɛ́sẅíi wʉ́ʉ, wɛcɔ́ ŋu zɑꞋnɛ mɛfɑꞋ mɛ́ ńtsɑ mɛ zʉꞋ-nɔŋpɔꞋ-Sɛ́.

⁷Pʉʉ pɛ́Ꞌnɛ ńjí yúu mi zʉꞋ-ŋwɑꞋnɛ yi ɛ́ cúnɛ ŋɡɔ: Ŋ kɔŋ tsɑ́ɑ mɛjʉ́ŋ, ńtsɑ yúu-pɔꞋ yí pɛ́ lɔknɛ ŋ́ɡúꞋlɛ wɑ́ɑ lɔknɛ ńcú, mbɔ pʉʉ kɑ́ zɑ́p nu tú-pʉɔ pɔ́nɛ, pi pɔ́p kɑ́ fɑɑnɛ nu pɔ́.

⁸Yɛ́su pɛn ńcú mbɔ̌ pɔ́p ŋɡɔ: Mɔ́ɔ-Ŋu zɛɛnɛ ŋ́ɡẅɛɛ nɛcú yúu mi ḿbɔ́ pɛ́ ɡɛ nǔu lɛ́Ꞌnji-Pɑyúdɑ.»

⁹Yɛ́su fú zúꞋu, ŋ́ɡʉ ŋ́kúu tsɛt ndɑ́-cúꞋlɛ pɔ́p.

¹⁰Wɛcɔ́ ŋu mbɛ́ɛnɛ pɔ́ yɛ́ ndɑ́ ɛ̂yɑ́, mbɔ pɔ́ yɛ́ kɑ pfú. Pʉɔ pi pɔ́p ḿbɔ́nɛ ndɑ́ ḿbɔ́ ńdɔɔ yúu minɛ pɔ́p ɡʉ ɛ́fú nǔu ńdɔk ɛ́fɛn Yɛ́su, ḿbíkŋɛ wɛ́ ŋɡɔ: «Ɛ́ nǔu nɛpʉ́ʉ nɛkŋɛ pɛ́Ꞌɛ ḿbɔ́ pɛ́ ɡɛ ŋu fíitɛ lɛ́Ꞌnji kɛ ŋɡɑ́ŋ?»

¹¹Yɛ́su tsɔ́Ꞌ mbɔ̌ pɔ́p ŋɡɔ: «A wɔ̌ ɑ tsɛtsɛt pʉʉ, ḿbɔ́ yi ɑ lɑɑ ŋ́ɡẅɛɛ mɔ́ɔ-njinjɔ pɔ wɛ́mɔ́Ꞌ, ɑ vu tsɛt tɑ́ɑ lɛ́Ꞌnji, ɑ nɑ́ kɛ́ fú tsɛtú ŋ́ɡɔ́ɔ ńcẅɛɛtɛ wɛ́?

¹²Ŋumɛsɔŋ yúu tʉʉndɛn ńtsɑ njinjɔ, pɔ́Ꞌɔ lɑ́, pɛ́ lɑɑ ŋ́ɡɛ nu sʉ́Ꞌnɛ nǔu ŋumɛsɔŋ lɛ́Ꞌnji, mbɔ pɛ́ kɑ́ fɑɑnɛ nɛpʉ́ʉ pɔ́.»

¹³Yɛ́su cú mbɔ̌ pfúpɔ́ ŋɡɔ: «Sɛn pɔ́ yú.» A sɛn, pɛ́ jʉ́ɔ ɛ́ pɛn ńtɛntɛ pɑ́Ꞌ yɛcɔ́.

¹⁴Ɛ́ tsɑ pɑfɑlísɑy, pɔ́p fú ndɑ́-cúꞋlɛ ńcẅɛt, ńcúꞋlɛ ńdɔɔ shʉ́ pɑ́Ꞌ pɔ́p ɡʉ ŋ́ɡɛ lɑ ńjẅí Yɛ́su.

¹⁵Yɛ́su pɔ́ tɛ ńjí, ɛ́fú zúꞋu ŋ́ɡʉ. Lɑ́Ꞌ cʉ́ɔ nzʉʉ wɛ́ tɛ ńzɑ́ɑ. A ɡɛ ɡɑŋɡɔɔ tsʉʉ pí ɛ́ tsɛt nɔɔ-lɑ́Ꞌ fíitɛ.

¹⁶A pɛn ńtɔꞋ wɔ́p tɛ ḿbʉ́ʉ, ŋɡɔ pɔ́p pɑ́ɑ nɛɡɛ tɛ pɛ́ ńjí ŋu ẅí ɑ jʉ́.

¹⁷Pɔ́Ꞌɔ, nu yí Sɛ́ kɑ lɔknɛ ntsu-Ŋɡɛ́mndʉ̈ɔ́Ꞌ wɛ Ɛsɑ̌yɑ ńcú, ɛ́ lɔk ḿbuutɛ.

¹⁸A kɑ cú ŋɡɔ: «Yɔ ŋɡɑŋfɑꞋ wɑɑ ẅí ŋ kɑ tsɔ́Ꞌnɛ. Ŋ kɔŋ wɛ́ tɛꞋ, jʉ́ ɡɛnɛ tʉ́m yɑ́ɑ tsɑ́ɑtɛ. Mɔ ŋ́ɡɛ ńníꞋ Zẅikŋɛ yɑ́ɑ nǔu wɛ́, ɑ ɡʉ ńnyɛt ntɛ́ nɛsɑ́Ꞌ lɑ́Ꞌ yi ɛ́ ndʉ́ŋndʉŋ mbɔ̌ mɛlɑ́Ꞌ mi ɛ́ kɑ́ pɔ́ pɑíslɑyɛ̂l pɔ́.

¹⁹A kɛ́ ɡɛ ńdɔɔ mɛlɑꞋ pɔ́, ŋ́kɛ́ mbɔɔ cú nu tɛ ŋɡi yɛ́ kɔ́Ꞌ tʉ́ pɔ́. Pɛ́ kɛ́ mbɔɔ zúꞋ ɑ tʉ́ʉ mɛtú-ndúŋ ŋ́ɡɑ́ sẅiŋɛ pɔ́.

²⁰A kɛ́ ńdɑ́Ꞌ mbɔɔ pʉ̈ɔ́Ꞌ kɛkɑꞋ yí ɛ́ ŋɔ́Ꞌnɛ́nɛ pɔ́, ŋ́kɛ́ mbɔɔ pík múk nǔu lɑ̂m ẅí ɛ́ ɡʉ ḿbɛ́ pɔ́, ŋ́kɛ́ ńdɑ́Ꞌ ŋ́ɡɛ pɔ pɔ́Ꞌɔ, tɛ ŋ́ɡɛ ŋɡɔ nu nɛ́nẅín jʉ́ lɑ́Ꞌ tsʉʉ.

²¹Mɛŋɡɔŋ tsʉʉ ndǔ mbí tsʉ́Ꞌ ńdɔk pɔ wɛ́ ńnɑ́ŋ.»

²²Pɛ́ lɔk wɛcɔ́ ŋu ńtɔ́ mbi Yɛ́su, mbɔ zẅikŋɛ kɛpɔŋ kɑ ɡɛ ɑ fʉ, ḿbɛn ńtsʉ́Ꞌ cípúꞋ. Yɛ́su ɡɛ ŋu ɛ̂wɑ́ fíitɛ, ŋ́ɡɔ́ɔ ńzɛ nɛsẅíŋɛ, mbɑ nɛjʉ́ɔ zʉꞋ sʉ́Ꞌnɛ.

²³Lɑ́Ꞌ tsʉʉ jʉ́ɔ ḿmɑɑ tɛꞋ, ńcú ŋɡɔ: «Lɛ́Ꞌcɔ́ ɑ ŋu nǔu njẅɛt-fɔɔ Ndɑvît pɛ́ pyɛ́pnɛ lɑ́[8].»

²⁴Lɑ́ pʉɔ-fɑlísɑy zúꞋ pɔ́Ꞌɔ, ńcú ŋɡɔ: «Bɛlzɛbûl, tɑ́tndɑ́-mɛzẅikŋɛ kɛpɔŋ ɡɛnɛ lɑ Yɛ́su kuꞋ nɛzuŋ mɛzẅikŋɛ kɛpɔŋ.»

²⁵Yɛ́su jí kwɑŋɛ yɔ́p, ńcú mbɔ̌ pɔ́p ŋɡɔ: «Pʉɔ-tɑ́Ꞌ lɑ́Ꞌ lɑɑ ɛ́shɔtnɛ ńdʉ́ɔꞋ ntsɔ tsɛtsɛt pɔ́p, mbɔ yîyɑ́ lɑ́Ꞌ ɡʉ ḿbɛ́. Pʉɔ-tɑ́Ꞌ tʉ́sɔŋ kɛ tɑ́Ꞌ-tsɛnndɑ́ ɔɔ pɛn ɛ́shɔtnɛ ńdʉ́ɔꞋ ntsɔ tsɛtsɛt pɔ́p, mbɔ yîyɑ́ tʉ́sɔŋ kɛ yîyɑ́ tsɛ́nndɑ́ ɔɔ ɡʉ ḿbɛ́.

²⁶Nɛfɔɔ-Sɑ́ttɑ pɛn ḿbɔ́ pɔ kwɑꞋ pɔ́Ꞌɔ, pʉɔ pɛ́ lɑɑ ɛ́fyɑkŋɛ, ńzɛ nɛshɔtnɛ ńdʉ́ɔꞋ ntsɔ tsɛtsɛt pɔ́p, mbɔ nɛfɔɔ nɛ́ ɡʉ ḿbɛ́.

²⁷Pʉʉ cú ŋɡɔ n dɔk pɔ mɛtʉʉ-Bɛlzɛbul lɑ ńdɔk ńzuŋ mɛzẅikŋɛ kɛpɔŋ, tɛ pɑ́Ꞌ pʉ́ʉ pʉɔ pɛn ńzuŋ yɔ́p mɛzẅikŋɛ kɛpɔŋ lii, pɔ́p pɛn ńdɔk yɔ́p mɛtʉʉ ɡɔ́ lɑ́ ńzuŋ? KwɑꞋ pʉɔ pʉ́ʉ ɛ̂pɑ́ nyɛt wʉ́ʉ ŋɡɔ pʉʉ cú pɑ́Ꞌɑ ɛ́fɑɑnɛ fɑɑnɛ́nɛ.

²⁸Lɑ́ ŋ́ɡʉ nǔu mɔ, mbɔ n dɔk pɔ mɛtʉʉ-Zẅikŋɛ-Sɛ́ lɑ ńzuŋ. Ɛ́ lɔk ńnyɛt ŋɡɔ Sɛ́ ńdɑ́Ꞌmɔ́ ńtɔ́, tɛ ḿbɔ́ fɔɔ ndǔ yɔ mbí.

²⁹Tɛ ɛ́ lɑɑ ḿbɔ́ ŋu ɡɛ ŋɡɔ́ku lɑ ḿbʉ̈ɔ́Ꞌ ndɑ́-ŋu ntʉʉ, ńtíi yúu pɛ́ kɛ́ pɔ́ yi ɑ piitɛ ŋ́kút wɛ́? A piitɛ tɛ ŋ́kút wɛ́, ŋ́kuꞋ nɛkúu ndɑ́ ńtíi yúu pɛ́ tsʉʉ.

³⁰Ŋu lʉꞋ pɑ́Ꞌ pɛkŋɛ ɡʉ ḿbɔ́ nɛ́ nu, mbɔ ɑ lɔk ḿbʉ́ʉpɛ nu yɑ́ɑ, ŋu pɛn ńdʉꞋ nɛcẅɛ́lɛ́ wɑ́ɑ, pɛkŋɛ cúꞋlɛ pʉɔ pɑ́ɑ, mbɔ ɑ tsʉ́Ꞌ ńtɑ́k wɔ́p ɛ́sɑt sɑtnɛ.

³¹Pɔ́Ꞌɔ, lɑ́ n cú mbɔ̌ pʉʉ ŋɡɔ ɛ́ lɑɑ ḿbɔ́ Sɛ́ lɑ́Ꞌ ńdikŋɛ mɛnu kɛpɔŋ pʉɔmɛsɔŋ tsʉʉ, ŋ́ɡɑ́ mbɔ̌ pɔ́p, tɛ mbɑ mɛsẅíŋɛ tsʉʉ mí pɔ́p lɔknɛ ńzɔɔtɛ wɛ́. Lɑ́ ŋu kɛ́ ńzɔɔtɛ Zẅikŋɛ-Sɛ́, mbɔ pɛ́ ŋ́ɡʉ ńdɑ́Ꞌ ńdikŋɛ ŋ́ɡɑ́ mbɔ̌ wɛ́ pɔ́.

³²Ŋu lɑɑ ɛ́sẅíŋɛ kɛpɔŋ nǔu Mɔ́ɔ-Ŋu, mbɔ Sɛ́ ɡʉ ńdɑ́Ꞌ ńdikŋɛ ŋ́ɡɑ́ mbɔ̌ wɛ́. Lɑ́ ŋu kɛ́ ɛ́sẅíŋɛ kɛpɔŋ nǔu Zẅikŋɛ Lɛ́ɛnɛ́nɛ, mbɔ pɛ́ kɛ́ likŋɛ ŋ́ɡɑ́ mbɔ̌ wɛ́ ŋkɔ̂ɔnɛ mbɑ nǔu yɛcɔ́ kɛm-ŋkɑ́ pɔ́.»

³³Yɛ́su pɛn ŋɡɔ: «Tʉ́ lɑɑ ḿbɔ́ tʉ́ sʉ́Ꞌnɛ, mbɔ ɛ́ ɡʉ ńzɛ́m pɔ ntɑ́ɑ sʉ́Ꞌnɛ. Tʉ́ kɛ́ ḿbɔ́ yi kɛpɔŋ, mbɔ ɛ́ ɡʉ ńzɛ́m pɔ ntɑ́ɑ kɛpɔŋ. Pɛ́ zɛɛ ńjí yîyɑ́ tʉ́ pɔ nǔu mɛntɑ́ɑ mɛ́.»

³⁴Njẅɛt-mɛnɔ́, mbɔ pʉʉ pɔ́ pʉɔ kɛpɔŋ pɑ́Ꞌɑ, ńcú nu sʉ́Ꞌnɛ ŋɡɔ́ku? Ŋu cú pɔ nu yí ɛ́ tsɛt tʉ́m yɛ́.

³⁵Pʉʉ jí ŋɡɔ: «Ŋu lɑɑ ŋ́ɡẅɛɛ tʉ́m sʉ́Ꞌnɛ, mbɔ ɑ ɡʉ ŋ́ɡẅɛɛ ntsu sʉ́Ꞌnɛ, ŋ́ɡẅɛɛ tʉ́m kɛpɔŋ, mbɔ sẅiŋɛ kɛpɔŋ ɡʉnɛ ńcẅɛt ntsu wɛ́.»

³⁶Ɛ sẅíi wʉ́ʉ: «Ɛ́ ɡʉ ńdɑ́Ꞌ lɛ́Ꞌ yi Sɛ́ ńzɑ́Ꞌ mɛtsɑŋ-pʉɔmɛsɔŋ, ẅîwɑ́ ŋu ɡẅɛɛ nɛpɛ́ɛtɛ mɛɡɛɡʉʉ sẅiŋɛ mí ɛ́ kɑ cẅɛtnɛ ntsu wɛ́.

³⁷Sɛ́ ɡʉ ńdɑ́Ꞌ ńdɔk pɔ nu yí ɛ́ kɑ cẅɛtnɛ ntsu mbɑ wɔ̌ lɑ́, ńzɑ́Ꞌ ntsɑŋ yɛ́, ɑ pɔɔ vu, ɑ luk. Ŋ́kɛ́ ḿvu ɑ kúu ŋɡʉ̈ɔ́Ꞌ.»

³⁸Yɛ́su cú yɔ nu tɛ ḿbɔ́tnɛ ńnɑ́ŋ, pɛcɔ́ pɑkyɛ́ꞌtɛ nɛpʉ́ʉ-Mɔ̌sɛ̂ɛ pɔ́p pɛcɔ́ pɑfɑlísɑy cú mbɔ̌ wɛ́ ŋɡɔ: «Cícɑ, pɛk sɛ́ ńtsɑ́ɑ ŋɡɔ ɔ ɡɛ tɑ́Ꞌ ŋkʉꞋnɛ nu.»

³⁹Yɛ́su pʉ̈ɔt ŋɡɔ: Pʉɔ pí pɔ́p ndǔ mbí ŋkɔ̂ɔnɛ pʉɔ kɛpɔŋ, ḿbɛn ŋ́kɛ́ ńtʉʉ pɔ tú mbɔ̌ Sɛ́ ḿbɔ́ ḿbíkŋɛ ŋɡɔ pɛ́ ɡɛ tɑ́Ꞌ ŋkʉꞋnɛ nu pɔ́p jʉ́ɔ. Lɑ́ pɛ́ ŋ́ɡʉ ńnyɛt wɔ́p nɛ́ yɛcɔ́ yúu pɔ́, tɛ ńdíꞋ ndɑꞋ nu yí ɛ́ kɑ ɡɛnɛ Yɔ́nɑ́ɑshi Ŋɡɛ́mndʉ̈ɔ́Ꞌ-Sɛ́.

⁴⁰Ndʉ́ŋndʉŋ pɑ́Ꞌ Yɔ́nɑ́ɑshi kɑ nɑ́ŋnɛ tsɛt nɛpɛm-mɑ́mɑ́ shú lɛ́Ꞌ pɛtɑ́t lɑ́; Mɔ́ɔ-Ŋu ɡʉ ńdɑ́Ꞌ ŋ́ɡɛ yɛ́ lɛ́Ꞌ pɛtɑ́t tsɛt tsɛ́tsɑ́Ꞌ.

⁴¹Lɑ́ ɛ sẅíi wʉ́ʉ, ɛ́ ɡʉ ńdɑ́Ꞌ lɛ́Ꞌ yi Sɛ́ ŋ́ŋɑk pʉɔmɛsɔŋ, pʉɔ Niniivɛ lɔ sɛ́ ńtɔ́ ńtʉ́ʉ, ńzɑ́p nu tú-pʉɔ pínɛ pɔ́p ndǔ mbí ŋkɔ̂ɔnɛ. MbíꞋŋɡɔ Yɔ́nɑ́ɑshi kɑ cú nu mbɔ̌ pɔ́p, pɔ́p zúꞋ, ŋ́kúp mɑt wɔp. Pɔ́Ꞌɔ, ŋkɔ̂ɔnɛ ŋu ẅí ɑ pɛnnɛ ɛ́sẅíi wʉ́ʉ nɛ́ nu lɔ́Ꞌnɛ pʉʉ pɔɔ pɛ́m, tsɑ Yɔ́nɑ́ɑshi.

⁴²Ɛ́ ɡʉ ńdɑ́Ꞌ lɛ́Ꞌ yi Sɛ́ ŋ́ŋɑk pʉɔmɛsɔŋ, mɑ́ɑfɔɔ ɡwɛ́-pʉɔ-Shɛ́bɑ lɔ sɛ́ ńtɔ́ ńtʉ́ʉ, ńzɑ́p nu tú-pʉɔ pínɛ pɔ́p ndǔ mbí ŋkɔ̂ɔnɛ, mbíꞌŋɡɔ ɑ kɑ zúꞋ ŋɡɔ jínu-fɔɔ Sɑlɛ́mɔ lɛɛ yɛ́ pʉɔtsʉʉ, ɛ́fú tɛ lɑ́Ꞌ yɛ́ ńdɔ sɛ́ ńtɔ́, ńdɔk mík mɛ́ ńjʉ́ɔ yɛ́. Pɔ́Ꞌɔ ŋkɔ̂ɔnɛ, ŋu ẅí ɑ pɛnnɛ ɛ́sẅíi wʉ́ʉ nɛ́ nu lɔ́Ꞌnɛ pʉʉ pɔɔ pɛ́m, yɛ́ jínu tsɑ yɛ́ fɔɔ Sɑlɛ́mɔ.

⁴³Ŋu lɑɑ ŋ́ɡẅɛɛ zẅikŋɛ kɛpɔŋ mbʉʉ yɛ́, ɛ́ ɡɛ ńcẅɛt, ŋ́kɑ́t zʉꞋ zúpɛlɛnɛ ńdɔɔ zʉꞋ yí ɛ́ ɡʉ ḿbɑɑmɛ zúꞋu, ńdɔɔ mbɔɔ jʉ́ɔ,

⁴⁴mbɔ ɑ ŋ́ɡɔ́ɔ ŋ́kɛ́ ńcú ŋɡɔ, ɛ́ pɔŋ ŋɡɔ m bɛn nzʉʉ tsɛt ndɑ́ yɑɑ yí ŋ kɑ zɛɛnɛ ḿbɔ́ zúꞋu. A lɑɑ ḿbɛn nzʉʉ ńjʉ́ɔ ɛ́ tʉ́ʉ níinɛ, mbɔ pɛ́ kɑ zʉk, ńniitɛ yúu tsɛtú,

⁴⁵mbɔ ɑ ɡʉ ŋ́ɡʉ ŋ́ɡúu mɛcɔ́ mɛzẅikŋɛ kɛpɔŋ sɑɑmbɑ́, ɛ́ pɔ́ mi pɔ́p zɑ́ɑnɛ sɔ́ɔ tɛ ńtsɑ wɛ́, pɔ́p pɛ́pɔ́p pɛn nzʉʉ ŋ́kúu nǔu ŋu ɛ̂wɑ́, ńdɔk wɛ́ ŋ́ɡɛ ndɑ́ yɔp. Pɔ́Ꞌɔ, ŋɡʉ̈ɔ́Ꞌ-ŋɡɑŋ zɑ́ɑ ńtsɑ pɑ́Ꞌ ɛ́ kɑ zɛɛnɛ ḿbɔ́. Ɛ́ ɡʉ ńdɑ́Ꞌ ḿbɛn ḿbɔ́ pɔ ndʉ́ŋndʉŋ pɔ́Ꞌɔ, nǔu nu-pʉɔ pínɛ pɔ́p ndǔ mbí ŋkɔ̂ɔnɛ ḿbɔ́ pɛ́ kɛpɔŋ.

⁴⁶Yɛ́su kɑ pɛ́t ɛ́sẅíŋɛ mbɔ̌ lɑ́Ꞌ sẅiŋɛ́nɛ, mɑ́ wɛ pɔ́p pɔ́ɔpɛ́mɑ́ pɛ́ tɔ́, ńtʉ́ʉ píi ḿbɔ́ ńdɔɔ nɛjʉ́ɔ wɛ́.

⁴⁷Ŋu tɔ́ ńcú mbɔ̌ Yɛ́su ŋɡɔ: «Mɑ́ wu pɔ́p pɔ́ɔpɛ́mɑ́ pú píi ḿbɔ́ ńtsɑ́ɑ nɛcú nu mbɔ̌ wu.[9]»

⁴⁸Yɛ́su tsɔ́Ꞌ mbɔ̌ ŋu ɛ̂wɑ́ ŋɡɔ: «Wɔ̌ mɑmɑ́ wɑɑ, pɛ́ wɔ̌ pɔ́ pɔ́ɔpɛ́mɑ́ pɑ́ɑ?»

⁴⁹Ńcú pɔ́Ꞌɔ, ńdɔk pɔ́ ńnyɛt ɡɑŋku pɛ́, ńcú ŋɡɔ: «Mɑmɑ́ wɑɑ pɔ́p pɔ́ɔpɛ́mɑ́ pɑ́ɑ pʉ́ɔlɑ́.»

⁵⁰Ŋu ɡɛ yúu mi Tɑ̌ɑ mɔ ẅí ɑ tʉ́nɛ́pú sɛ́ ŋ́kɔŋ, mbɔ ẅîwɑ́ ŋu mɔ́ɔmɑ́ wɑɑ wɛ mbɛ́ɛnɛ, ḿbɔ́ wɛ mɑŋɡɛ́, ḿbɔ́ mɑmɑ́ wɑɑ.