Read Ngomba Mɑtʉ̈ɔ 13 Bible Online

Mɑtʉ̈ɔ 13 - Ngomba bible

Mɑtʉ̈ɔ 13

¹Yɛ́su pɛn ńcẅɛt ndɑ́ lɛ́Ꞌ ɛ̂yɑ́, ŋ́ɡʉ ńnɑ́ŋ mbʉʉ-nɛkʉŋ-ŋki.

²Nɔɔ-lɑ́Ꞌ tɔ́ ńcúꞋlɛ nɛjɔ́ŋ yɛ́ tɛ ńzɑ́ɑ tɛꞋ, pɔ́Ꞌɔ ɑ kúu tsɛt kɑnúꞋ, ńnɑ́ŋ. Nɔɔ-lɑ́Ꞌ tʉ́ʉ mbʉʉ-ŋki.

³A lɔk mɛsɑknɛkɛt ɛ́sẅíi wɔ́p nɛ́ mɛnu tɛ ɛ́ zɑ́ɑ zɑ́ɑnɛ. Ńcú mbɔ̌ pɔ́p ŋɡɔ: «Wɛcɔ́ ŋu kɑ lɑ́Ꞌ ŋ́ɡʉ mɑꞋ mbiyúu,

⁴ńtɔ́ nɛmɑꞋ, mɛcɔ́ mɛmbɑŋ vu sɛ̂ndúŋ, pɛshʉ́ŋ tɔ́ ńdɑklɛ ŋ́kwɛ́t.

⁵Mɛcɔ́ mɛmbɑŋ vu nǔu zʉꞋ-mɛŋɡɔꞋ, zʉꞋ yí tsɛ́tsɑ́Ꞌ kɑ́ pɔ́ zúꞋu tɛꞋ pɔ́, ɛ́fɛ́Ꞌnɛ ɛ́sɑ́Ꞌ, mbíꞌŋɡɔ ɛ́ kɑ zɑ́pmɛ zɑ́pmɛnɛ.

⁶Mɔ́nɛm ɡɛ ńtɑ́ sʉ́Ꞌnɛ, ńtɔɔ ɛ́ zúu mbíꞌŋɡɔ mɛŋɑŋ ŋ́kɑɑ lɑtnɛ sɛ́ pɔ́.

⁷Mɛcɔ́ mɛmbɑŋ vu tsɛt nɛɡíi kɛpɔŋ, nɛɡíi kɛpɔŋ ɡɛ ńdɔ sɛ́ ɛ́fɛ́mɛ mîmɑ́.

⁸Mɛcɔ́ mɛmbɑŋ vu nǔu zʉꞋ-tsɛ́tsɑ́Ꞌ sʉ́Ꞌnɛ, ɛ́sɑ́Ꞌ ŋ́ɡúꞋ, ńzɛ́m. Mɛcɔ́ mɛtsɛ́n pɔ́ ŋ́ɡɑ́ mbɑŋ ŋkʉ, mɛcɔ́ ɡɑ́ mbɑŋ mɛɡɛ́mɛ́nɛ́ntúkú, mɛcɔ́ ɡɑ́ mbɑŋ mɛɡɛ́mɛ́ntɑ́t.

⁹Ŋu lɑɑ ŋ́ɡẅɛɛ mɛtúutɛ́ nɛlɔk ńzúꞋ nu ɑ zúꞋ.»

¹⁰Gɑŋku-Yɛ́su tɔ́ nɛjɔ́ŋ yɛ́ ḿbíkŋɛ wɛ́ ŋɡɔ: «Ɔ lɔk pɔ sɑknɛkɛt ńcú nu mbɔ̌ lɑ́Ꞌ Mɛlɑ́Ꞌ kʉ̈ɔ́?»

¹¹Yɛ́su pʉ̈ɔt mbɔ̌ pɔ́p ŋɡɔ: «Sɛ́ kɑ ɡɛ ŋɡɔ pʉʉ wɔ jínɛ nu nɛ́nẅín nǔu nɛfɔɔ-Sɛ́ ni ɛ́ kɑ lʉɔmɛ́nɛ, ŋ́ɡʉ nǔu pɔ́p ɑ pɔɔ ɡɛ ŋɡɔ pɔ́p jí pɔ́.

¹²Ŋu ɡẅɛɛ yúu, mbɔ pɛ́ ɡʉ ŋ́kẅiꞋ yɛcɔ́ mbɔ̌ wɛ́ ɑ lɔk ŋ́ɡẅɛɛ tɛ ɛ́ zɑ́ɑ. Lɑ́ ŋ́kɛ́ ŋ́ɡʉ nǔu ŋu ẅí ɑ kɑ́ ɡẅɛɛ yúu pɔ́, mbɔ pɛ́ ɡʉ ńcẅɛ́ɛ mɔ́zʉꞋ ẅí ɑ zɛɛnɛ ŋ́ɡẅɛɛ.

¹³Yúu mi ɛ́ ɡɛnɛ lɑ́ n dɔk pɔ sɑknɛkɛt ńcú nu mbɔ̌ pɔ́p, ɛ́ ŋɡɔ pɔ́p líŋɛ zʉꞋ, ŋ́kɛ́ mbɔɔ jʉ́ɔ, ńzúꞋ ŋ́kɛ́ mbɔɔ zúꞋ tsɛt wɛ pɔ́.»

¹⁴Ɛ́ lɔk ḿbuutɛ pɑ́Ꞌ Ŋɡɛ́mndʉ̈ɔ́Ꞌ-Sɛ́ Ɛsɑ̌yɑ kɑ ŋwɑꞋnɛnɛ ŋɡɔ Sɛ́ cú ŋɡɔ: «pʉʉ ɡʉ ŋ́ɡɛ ḿbɔ́ ńzúꞋ ŋ́kɛ́ ḿbɔɔ zúꞋ tsɛt wɛ pɔ́, ḿbɔ́ ńdíŋɛ zʉꞋ ŋ́kɛ́ mbɔɔ yúu jʉ́ɔ

¹⁵MbíꞋŋɡɔ tʉ́m pʉɔ-lɑ́Ꞌ pɔ́nɛ kɑ sʉk pɔ́p kɑ zʉnɛ mɛtúutɛ́ mɔ́p, ŋ́kẅíipɛ mík mɔ́p, ńdɔk ḿbɔɔ ŋ́kɔŋ nɛlɔk mík mɔ́p ńjʉ́ɔ zʉꞋ pɔ́, nɛlɔk mɛtúutɛ́ mɔ́p ńzúꞋ nu pɔ́, tʉ́m yɔ́p pɔɔ pɑ́klɛ. Pɔ́p pɔɔ kɔŋ nɛkúpmɛ mɑt wɔp pɔ́, ńdɔk ḿbɔɔ ŋ́kɔŋ ŋɡɔ ŋ ɡɛ pɔ́p fíitɛ pɔ́.»

¹⁶Lɑ́ ɛ́ ɡʉ nǔu pʉʉ, mbɔ pʉʉ pɛpɔ́ttú, mbíꞌŋɡɔ mík mʉ́ʉ sɛ́ ńjʉ́ɔ zʉꞋ, mɛtúutɛ́ mʉ́ʉ pɔ́ ńzúꞋ zʉꞋ.

¹⁷Lɑ́ ŋ kɛ́ ɛ́sẅíi wʉ́ʉ, kwɑꞋ nɛ́nẅín, pɛŋɡɛ́mndʉ̈ɔ́Ꞌ-Sɛ́ tɛ ńzɑ́ɑ, mbɑ pɛcɔ́ pɑzúꞋnɛ Sɛ́ kɑ tsɑ́ɑ nɛjʉ́ɔ mɛnu mí pʉʉ jʉ́ɔnɛ lɑɑ tɛꞋ, mbɔɔ jʉ́ɔ, ńtsɑ́ɑ nɛzúꞋ mɛnu mí pʉʉ zúꞋnɛ lɑɑ, mbɔɔ zúꞋ.

¹⁸Pɔ́Ꞌɔ lɑ́, pʉʉ wɔ zẅíꞋlɛ nu yí sɑknɛkɛt nǔu ŋu ẅí ɑ pinɛ yúu lɔknɛ ńcú:

¹⁹Mbʉʉ-sɛ̂ndúŋ yi mɛcɔ́ mɛmbɑŋ vunɛ zúꞋu, pʉɔ pínɛ pɔ́p zúꞋ nu-nɛfɔɔ-Sɛ́, mbɔɔ zúꞋ tɛ ńzúꞋ pɔ́. Sɑ́ttɑ tɔ́, ɛ́fú tsɛt tʉ́m yɔ́p ńcẅɛɛtɛ.

²⁰ZʉꞋ-mɛŋɡɔꞋ pʉɔ pínɛ pɔ́p zúꞋnɛ nu-Sɛ́, ɛ́fɛ́Ꞌnɛ ḿbɛ́m nɛ́ tsɑ́ɑtɛ,

²¹lɑ́ mbɔɔ nɑ́ ɛ́ lɑt mɛŋɑŋ tʉ́m pɔ́p pɔ́, mbíꞌŋɡɔ pɔ́p pɔ́ pʉɔ-lɛ́Ꞌlɑ́Ꞌ. Pɛ́ pɔ́ tɛ ńzɛ nɛkʉ́ʉnɛ wɔ́p, ńnyɛt wɔ́p nɛ́ ŋɡʉ̈ɔ́Ꞌ mɛlɑ́Ꞌ nu-Sɛ́ pɔ́p ɡɔ́ɔ ḿmɛꞋ.

²²Mbiyúu mi ɛ́ vunɛ tsɛt nɛɡíi kɛpɔŋ, nu-pʉɔ pínɛ pɔ́p zúꞋnɛ sẅíŋɛ-Sɛ́, ŋ́ɡɛ ńzɛ nɛmʉk mɛnu-njí, ńzɛ nɛzɑ́p tʉ́m yɔ́p nǔu ŋkɑ́p. Yîyɑ́ yúu ɡɛ sẅíŋɛ-Sɛ́ mɛ tʉ́m pɔ́p kɛ́ pii.

²³Mbiyúu mi ɛ́ vunɛ nǔu tsɛ́tsɑ́ꞌ sʉ́Ꞌnɛ nu-pʉɔ pínɛ pɔ́p zúꞋnɛ sẅíŋɛ-Sɛ́ tɛ ńtsuŋ ńzúꞋ. Pɔ́p pɑ́Ꞌ mɛtsɛ́n-yúu mi mɛcɔ́ ɡɑ́nɛ mɛmbɑŋ ŋkʉ, mɛcɔ́ ɡɑ́ mɛɡɛ́mɛ́nɛ́ntúkú, mɛcɔ́ ɡɑ́ mɛɡɛ́mɛ́ntɑ́t.

²⁴Yɛ́su pɛn ɛ́sẅíi wɔ́p nɛ́ yɛcɔ́ sɑknɛkɛt ŋɡɔ: «Nu-nɛfɔɔ-Sɛ́ pɔ́ pɑꞋ nu-ŋu ẅí ɑ kɑ pinɛ mbiyúu sʉ́Ꞌnɛ ŋkɑ́Ꞌ yɛ́.

²⁵Lɑ́ pɛ́ pɔ́ tɛ ńdɛ́, ŋɡɑŋmbuu wɛ tɔ́ ḿbi yúu kɛpɔŋ tsɛtsɛt yi sʉ́Ꞌnɛ yi ɛ́ fínɛ yi sʉ́Ꞌnɛ ɛ̂yɑ́, ŋ́ɡʉ.

²⁶Ŋ́ɡɛ pɔ́Ꞌɔ yúu ɡɛ ɛ́sɑ́Ꞌ, ŋ́ɡúꞋ tɛ ŋ́ɡɑ́ mɛtsɔ́Ꞌ. Pɛ́ jʉ́ɔ yúu kɛpɔŋ pɔ́ tsɛtú.

²⁷GɑŋfɑꞋ-ŋɡɑŋŋkɑ́Ꞌ wɑ́ tɔ́ ńcú mbɔ̌ wɛ́ ŋɡɔ: “Ndɛ, ɔ ŋ́kɑɑ pi pɔ mbiyúu sʉ́Ꞌnɛ tsɛt ŋkɑ́Ꞌ wú pɔ́ ɔɔ? Mbiyúu kɛpɔŋ pɛn ɛ́fú ɡɔ́ zúꞋu?”»

²⁸A pʉ̈ɔt mbɔ̌ pɔ́p ŋɡɔ: «Ɛ́ fɑꞋ wɛcɔ́ ŋɡɑŋmbuu. GɑŋfɑꞋ pɛ́ píkŋɛ wɛ́ ŋɡɔ: “Tɛ ɔ pɛ́m ŋɡɔ pɛk ɡʉ ńtsɔ́Ꞌ yúu kɛpɔŋ ɛ̂yɑ́?”»

²⁹A ɡɔ ŋɡɑ́ŋ, ḿbɔ́ pʉʉ tɔ́ nɛtsɔ́Ꞌ yúu kɛpɔŋ ɛ̂yɑ́, ńtɛmtɛ ńtsɔ́Ꞌ wɔ́p yúu sʉ́Ꞌnɛ.

³⁰Pʉʉ nɑ́ pɔ́p yúu sʉ́Ꞌnɛ tɛmtɛ ŋ́ɡúꞋ tɛ ŋ́kúu ŋkɑ́ nɛlɔk yúu. Ɛ́ ḿbɔ́ ŋkɑ́ yîyɑ́ n cú mbɔ̌ pɑlɔk yúu ŋɡɔ pɔ́p piitɛ ńtsɔ́Ꞌ yúu kɛpɔŋ, ŋ́kútɛ mɛkɑ́Ꞌ mɛkɑ́Ꞌ pɑ́Ꞌ pɛ́ ɡʉ ńtɔɔ múk, ŋ́ɡʉ nǔu yúu sʉ́Ꞌnɛ pɔ́p lɑk ńníꞋ tsɛt ŋkɛn wɑ́ɑ.

³¹Yɛ́su pɛn ńcú yɛcɔ́ sɑknɛkɛt mbɔ̌ pɔ́p ŋɡɔ: «Nu-nɛfɔɔ-Sɛ́ ɡɔ́ɔ ḿbɔ́ pɑꞋ yɛcɔ́ ntɛ́ nɛsɑɑ-sɛ́súk[10] yí ŋu kɑ pinɛ ḿbi yɛ ŋkɑ́Ꞌ yɛ́.

³²Yîyɑ́ ntɛ́ nɛsɑɑ-sɛ́súk kʉ̈ɔ́k ńtsɑ mɛmbɑŋ-yúu tsʉʉ, lɑ́ ɛ́ kɑ ɡɛ ɛ́sɑ́Ꞌ, ŋ́ɡúꞋ, ŋ́ɡʉ tʉ́ ńtsɑ yúupɛjʉ́ pi ɛ́ ŋkɑ́Ꞌ tsʉʉ, ńtsʉ́Ꞌ tʉ́, ńtɔ́k mbɔ́, pɛshʉ́ŋ tɔ́ ḿbɑ́Ꞌ mɛŋkɑɑ mɔ́p tsɛtú.»

³³Yɛ́su pɛn ńcú yɔ sɑknɛkɛt ŋɡɔ: «Nu-nɛfɔɔ-Sɛ́ pɔ́ pɑ́Ꞌ mɔ́zʉꞋ fɛntɛ yi mɑŋɡɛ́ lɔknɛ ɛ́fɛntɛ fɑlîn yi ɑ fʉꞋnɛ túkɑ́ŋ yɛ́tɑ́t ńtsɛp, ḿbúꞋ púꞋnɛ tɛ mɔ́zʉꞋ fɛntɛ ɛ̂yɑ́ ɡɛ, fɑlîn yi tsɛpnɛ ɛ̂yɑ́ kɔ́Ꞌ tsʉʉ.»

³⁴Yɛ́su kɛ́ ńdɔk pɔ sɑknɛkɛt ńcú mɔnɛ mɛnu mbɔ̌ lɑ́Ꞌ. A ŋ́kɑɑ pɔ́ ńcú yɛcɔ́ nu nɛ́ pɔ́p kɛ́ sɑknɛkɛt lɛɛ nǔu pɔ́.

³⁵A m̄bɔ́ ŋ́ɡɛ pɔ́Ꞌɔ, nɛpɔ́ yi nu yɔ yí Ŋɡɛ́mndʉ̈ɔ́Ꞌ-Sɛ́ kɑ cúnɛ lɑɑ ɡʉ ḿbuutɛ. A kɑ cú ŋɡɔ: «Mɔ ŋ́ɡɛ ńdɔk mɛsɑknɛkɛt ɛ́sẅíi wɔ́p nɛ́ nu. Ŋ ɡʉ ŋ́ɡɛ ɛ́sẅíi wɔ́p nɛ́ mɛnu mi ɛ́ lʉɔmɛ́nɛ tɛ ɛ́fú ŋkɑ́ yi pɛ́ kɑ niitɛ́nɛ píi mbi.»

³⁶Yɛ́su ɡɔ́ɔ ŋ́kɛ́ ńnɑ́ lɑ́Ꞌ ŋ́kúu ndɑ́, ɡɑŋku pɛ́ kẅɛ́ɛtɛ wɛ́, ḿbíkŋɛ wɛ́ ŋɡɔ: «A kyɛ́Ꞌtɛ sɑknɛkɛt nǔu mbiyúu yi kɛpɔŋ yɑ́ ɛ́sẅíi wɔ́p.»

³⁷A cú mbɔ̌ pɔ́p ŋɡɔ: «Ŋu ẅí ɑ pinɛ yúu sʉ́Ꞌnɛ ɑ Mɔ́ɔ-Ŋu.»

³⁸Ŋkɑ́Ꞌ pɔ́ ndǔ mbí, mbiyúu sʉ́Ꞌnɛ pɔ́ pʉɔ pínɛ Sɛ́ sɑ́Ꞌnɛ wɔ́p, mbiyúu yi kɛpɔŋ pɔ́ pʉɔ pínɛ Sɑ́ttɑ sɛ́ ɛ́sɑ́Ꞌ wɔ́p.

³⁹Ŋɡɑŋmbuu ẅí ɑ pinɛ mbiyúu kɛpɔŋ, pɔ́ Sɑ́ttɑ ɛ̂wɑ́. Nɛlɔk yúu pɔ́ ndẅiknzʉʉ lɛ́Ꞌmbí, ɡɑŋfɑꞋ pɔ́ pɛcʉ̈ɔ́Ꞌ-Sɛ́.

⁴⁰Ndʉ́ŋndʉŋ pɑ́Ꞌ pɛ́ tsɔ́Ꞌnɛ yúu kɛpɔŋ ńtɔɔ múk lɑ́, ɛ́ ɡʉ ńdɑ́Ꞌ ḿbɛn ḿbɔ́ pɔ pɔ́Ꞌɔ, nǔu ndẅiknzʉʉ lɛ́Ꞌlɑ́Ꞌ.

⁴¹Mɔ́ɔ-Ŋu ɡʉ ńdɑ́Ꞌ ńtúu pɛcʉ̈ɔ́Ꞌ pɛ́, pɔ́p fú tsɛtsɛt pʉɔ pɛ́ ńcẅɛɛtɛ ŋɡɑŋ ŋkwɑꞋnɛ mbɑ pʉɔ kɛpɔŋ,

⁴²ḿmɑꞋ wɔ́p tsɛt mɑ́mɑ́ múk, pɔ́p pɔ́ zúꞋu ḿbɔ́ ńdɑɑ, ḿbɔ́ ŋ́kwɛ́t mɛsɔŋ.

⁴³Ɛ́ ɡɔ́ ḿbɔ́ pɔ́Ꞌɔ, pʉɔ pínɛ pɔ́p zúꞋnɛnɛ Sɛ́ pɔ́ tsɛt ŋɡɔŋ ẅí Tɑ̌ɑ wɔp Sɛ́ sɑ́Ꞌnɛ, ḿbɔ́ ŋ́ŋwɑŋɛ pɑ́Ꞌ mɔ́nɛm lɑ́. Ŋu lɑɑ ŋ́ɡẅɛɛ mɛtúutɛ́ nɛlɔk ńzúꞋ nu ɑ zúꞋ.

⁴⁴Yɛ́su pɛn ńcú ŋɡɔ: «Nu-nɛfɔɔ-Sɛ́ pɛn ḿbɔ́ pɔ pɑ́Ꞌ yɛcɔ́ yúu tʉʉndɛn yi ɛ́ lʉɔmɛ́nɛ tsɛt wɛcɔ́ ŋkɑ́Ꞌ, ŋu pɔ́ tɛ ńjʉ́ɔ, ḿbɛn ńdẅɛꞋ, ńdɔk nɛtsɑ́ɑtɛ ŋ́kʉɔ ŋ́ɡʉ ɛ́fɛn yúu pɛ́ tsʉʉ, ńdɔk ŋkɑ́p ńtɔ́ ńzúu ẅîwɑ́ ŋkɑ́Ꞌ.

⁴⁵Nu-nɛfɔɔ-Sɛ́ pɛn ḿbɔ́ pɔ pɑ́Ꞌ nu-ntɑ́ŋmɛtɑ́ɑ ẅi ɑ lɔɔnɛ túkcí sʉ́Ꞌnɛ.

⁴⁶A pɔ́ tɛ ńjʉ́ɔ yɛcɔ́ túkcí yi ɛ́ cɔ́knɛ ŋkɑ́p tɛꞋ, ŋ́ɡʉ ɛ́fɛn yúu pɛ́ tsʉʉ tsʉʉ, ńdɔk ŋkɑ́p ńtɔ́ ńzúu yɛ́tɛ́.»

⁴⁷Yɛ́su pɛn ŋɡɔ: «Nu-nɛfɔɔ-Sɛ́ pɛn ḿbɔ́ pɔ pɑ́Ꞌ nu-mɛŋkʉ mi ŋu mɑꞋnɛ tsɛt nɛkʉŋ-ŋki, mɛshú kúu tsɛtú ntɛ́ ntɛ́.

⁴⁸Mɛŋkʉ pɔ́ tɛ ńdúu, pɛ́ shuŋ ńdɔk ŋ́ɡʉ mbʉʉ-ŋki, ḿbɔ́tnɛ ńnɑ́ŋ sɛ́, ńtíitɛ mɛshú sʉ́Ꞌnɛ, ńníꞋ tsɛt pɛtúŋ, ḿmɛꞋ mɛcɔ́ mi mbɔ ɛ́ pɔɔ cẅɛ́lɛ́ ŋu pɔ́.

⁴⁹Ɛ́ ɡʉ ńdɑ́Ꞌ ḿbɔ́ pɔ pɔ́Ꞌɔ, nǔu ndẅiknzʉʉ lɛ́Ꞌmbí. Pɛcʉ̈ɔ́Ꞌ-Sɛ́ ɡʉ ńdɑ́Ꞌ ńtɔ́, ɛ́fú tsɛtsɛt ɡɑŋnu nɛ́nẅín, ńdɔɔ pʉɔ kɛpɔŋ,

⁵⁰ḿmɑꞋ wɔ́p tsɛt nɛkʉŋ-múk. Pɔ́p pɔ́ zúꞋu ḿbɔ́ ńdɑɑ, ḿbɔ́ ŋ́kwɛ́t mɛsɔŋ.»

⁵¹Yɛ́su píkŋɛ ɡɑŋku pɛ́ ŋɡɔ: «Tɛ pʉʉ zúꞋ mɔ mɛnu tsʉʉ?» Pɔ́p pʉ̈ɔt ŋɡɔ: «Ɔ́ɔŋ, pɛk zúꞋ.»

⁵²A cú ŋɡɔ: «Pʉʉ kɛ́ ńjí ŋɡɔ ŋkyɛ́Ꞌtɛ nɛpʉ́ʉ-Mɔ̌sɛ̂ɛ ẅí ɑ pɛ́mnɛ nu-nɛfɔɔ-Sɛ́ ɑ pɔ́ pɔ pɑꞋ wɛcɔ́ ndʉ́m ẅi yúu ŋɡuꞋ pɔ́p yɛ́ ŋɡuꞋ yɔ tsɛt ntɑŋ yɛ́. A nɑ́ŋ tɛ mbʉʉ yɛ pɔŋ, ɑ ɡʉ nǔu ńcẅɛɛtɛ ntɛ́ yi ɑ kɔŋnɛ.»

⁵³Yɛ́su lɔk mɛsɑknɛkɛt ńcú nu mbɔ̌ pʉɔ tɛ ḿbɔ́tnɛ ńnɑ́ŋ, ɛ́fú zúꞋu ŋ́ɡʉ

⁵⁴nɛ́ lɑ́Ꞌ pɔ́p, ŋ́kúu zúꞋu, ḿbɔ́ ńzíꞋ pʉɔ nɛ́ nu-Sɛ́ tsɛt ndɑ́-cúꞋlɛ-pɑyúdɑ. Pʉɔ pínɛ pɔ́p zúꞋu zúꞋ sẅiŋɛ yɛ́, ḿmɑɑ ńcú ŋɡɔ: «A lɔk yɔ jínu nɛ́ mɛtʉʉ nɛlɔk ŋ́ɡɛ mɛŋkʉꞋnɛ mɛnu ɛ́fú ɡɔ́?

⁵⁵A kɑ́ pɔ́ mɔ́ɔ-kɑ́pɛ́ndɑɑ pɔ́? Lík-mɑ́ wɛ kɑ́ pɔ́ ŋɡɔ Mɑlíyɑ pɔ́? A kɑ́ pɔ́ mɔ́ɔmɑ́-Jɑ̂k, nɛ́ Yɔsɛ̂p, mbɑ Símɔ nɛ́ Jẅidɛ pɔ́?

⁵⁶Pɔ́ɔpɛ́mɑ́ pɛ́ pɛ́ pɑŋɡɛ́ tsʉʉ kɑ́ pɔ́ pɔ tsɛtsɛt pɛkŋɛ pɔ́? A lɔk yɔ ntɛ́ mɛnu ɛ́fú pɔ ɡɔ́?»

⁵⁷Pɔ́p cú pɑ́Ꞌɑ, ŋ́ɡwɑ́k wɛ́. Yɛ́su ɡɔ́ɔ ŋ́kɛ́ ńcú mbɔ̌ pɔ́p ŋɡɔ: «Pɛ́ ɡɑ́ mɛkuꞋ-Ŋɡɛ́mndʉ̈ɔ́Ꞌ-Sɛ́ zʉꞋ tsʉʉ, tɛ ɛ́ tsʉ́Ꞌ ndɑꞋ lɑ́Ꞌ pɔ́p, ŋ́ɡɛ pʉɔ-tsɛ́nndɑ́ yɔ́p.»

⁵⁸Pɔ́Ꞌɔ, Yɛ́su pɔɔ kíi ŋ́ɡɛ mɛŋkʉꞋnɛ mɛnu zúꞋu tɛ ɛ́ zɑ́ɑ pɔ́, mbíꞋŋɡɔ pɔ́p ŋ́kɑɑ zɑ́p tʉ́m nǔu wɛ́ pɔ́.