Read Ngomba Mɑtʉ̈ɔ 14 Bible Online

Mɑtʉ̈ɔ 14 - Ngomba bible

Mɑtʉ̈ɔ 14

¹Ɛ́ pɔ́ ŋkɑ́ ɛ̂yɑ́, Ɛlɔ̂dɛ ẅí ɑ kɑ pɔ́ ɛ́sɑ́Ꞌ pɑk-ŋɡɔŋ-Ŋɡɑlilɛɛ zúꞋ pɑ́Ꞌ pɛ́ kẅíinɛ lík-Yɛ́su ntɛ́ mɛnu mi ɑ sɛ́ ŋ́ɡɛ,

²ɡɔ́ɔ ŋ́kɛ́ ńcú mbɔ̌ pɛtsiindɑ́ pɛ́ ŋɡɔ: «Ŋu ẅí pɛ́ cúnɛ ɑ Jɑ̂ŋ Mbɑptíshi, mbɔ ɑ zẅíimɛ. Ɛ́ yúu mi ɛ́ ɡɛnɛ, lɑ ɑ kuꞋ nɛɡɛ mɛŋkʉꞋnɛ mɛnu.»

³Ɛlɔ̂dɛ cú pɔ́Ꞌɔ, mbíꞋŋɡɔ ɑ kɑ ɡɛ pɛ́ ɡẅɛɛ Jɑ̂ŋ, ŋ́kút wɛ́ ńníꞋ wɛ́ ndɑ́tsɑ́ŋ, mɛlɑ́Ꞌ Ɛlɔ̂díyɑ ẅí ɑ m̄bɔ́nɛ nzwɛ́-Fílîp, mɔ́ɔmɑ́ pɛ́ Ɛlɔ̂dɛ ɛ̂wɑ́.

⁴Ɛ́ ɡɔ ḿbɔ́, mbɔ Jɑ̂ŋ kɑ pɔ́ ŋ́kɑkŋɛ wɛ́ ŋɡɔ: «Nɛpʉ́ʉ kɑ́ pɔ́ ḿbɛ́m ŋɡɔ ɑ zɔ́Ꞌ Ɛlɔ̂díyɑ pɔ́.»

⁵Ɛlɔ̂dɛ zúꞋ, ńzɛ nɛlɔɔ shʉ́ nɛjẅí Jɑ̂ŋ, lɑ́ ḿbɔ́ ḿbɔ́k mík-pɑyúdɑ. MbíꞋŋɡɔ pɔ́p pɛtsʉʉ kɑ pɔ́ ńjí ŋɡɔ Jɑ̂ŋ Ŋɡɛ́mndʉ̈ɔ́Ꞌ-Sɛ́.

⁶Ɛ́ ɡɛ ḿbɔ́ lɛ́Ꞌ-ndínɑ, nɛlɔk ŋ́kẅíitɛ lɛ́Ꞌ yi pɛ́ kɑ pínɛ fɔɔ Ɛlɔ̂dɛ. Mɔ́ɔ-Ɛlɔ̂díyɑ wɛ mɑŋɡɛ́ nʉŋ mbi pɛɡʉʉ-ndínɑ. Nu pɔŋ fɔɔ Ɛlɔ̂dɛ,

⁷tɛ ɑ cú tɛ ŋ́kɑɑ ŋɡɔ: A lɑɑ ńdɔ́ɔ pɔ kʉ̈ɔ́ mbɔ̌ wɛ́ ɔɔ, mbɔ ɑ ɡʉ ŋ́ɡɑ́.

⁸Mɑ́ pɛ́ mɔ́ɔ mɑŋɡɛ́ tsʉ́ʉnɛ mɔ́ɔ mɑŋɡɛ́ ɛ̂wɑ́, ŋɡɔ ɑ ɡʉ ńcú ŋɡɔ ɑ sɛ́ ŋ́kɔŋ tú-Jɑ̂ŋ Mbɑptíshi tsɛt kɑ́ŋ pɔ ŋkɔ̂ɔnɛ.

⁹Fɔɔ zúꞋ ḿbuu ḿmʉk tɛꞋ. Lɑ́ nɛpɔ́ yi ɑ lɑ́Ꞌ ńcú mbi pɛɡʉʉ pɛ́ tɛ ŋ́kɑɑ ɡɛ, ɑ cú ŋɡɔ pɛ́ ɡɑ́ tú-Jɑ̂ŋ mbɔ̌ mɔ́ɔ mɑŋɡɛ́ ɛ̂wɑ́,

¹⁰ŋ́ɡɔ́ɔ ŋ́kɛ́ ńtúu ŋu, ɑ ɡʉ ndɑ́tsɑ́ŋ, ńzɑ́Ꞌ tú-Jɑ̂ŋ,

¹¹ńníꞋ tsɛt kɑ́ŋ ńdɔk ńtɔ́ ŋ́ɡɑ́ mbɔ̌ mɔ́ɔ mɑŋɡɛ́ ɛ̂wɑ́, ɑ cẅɛ́ɛ, ŋ́ɡʉ ŋ́ɡɑ́ mbɔ̌ mɑ́ wɛ.

¹²Gɑŋku-Jɑ̂ŋ zúꞋ, ŋ́ɡʉ ndɑ́tsɑ́ŋ ńtíi pfú yɛ́ ńdɔk ŋ́ɡʉ ńtẅí. Tɛ ɛ́ kuꞋ, pɔ́p ɡʉ ɛ́sẅíi Yɛ́su nɛ́ nu yí ɛ́ lɛɛnɛ.

¹³Yɛ́su zúꞋ yɔ nu, ŋ́kúu tsɛt kɑnúꞋ ḿbɔ́ ŋ́ɡʉ nɛ́ zʉꞋ yi ŋu kɑ́ pɔ́ zúꞋu pɔ́. Lɑ́Ꞌ jí, ɛ́fú tsɛt mɛtʉ́sɔŋ ńcẅɛt, ńnɛn mbʉʉ-mɛkʉŋ ŋki ḿbiitɛ ńzɑ́Ꞌ wɛ́.

¹⁴A kúu zúꞋu, ɛ́fú tsɛt kɑnúꞋ ńcẅɛt, ńjʉ́ɔ nɔɔ-lɑ́Ꞌ, mɛjʉ́ŋ mɔ́p kɔ́ wɛ́. A zɛ nɛɡɛ ɡɑŋɡɔɔ pínɛ pɔ́p tsɛtsɛt pɔ́p fíitɛ.

¹⁵Ɛ́ ɡɛ ḿbɔ́ ntsuŋkẅɛ́Ꞌ, ɡɑŋku-Yɛ́su tɔ́ nɛjɔ́ŋ yɛ́ ńcú ŋɡɔ: «Pɛkŋɛ zɑꞋnɛ kɔ̂ŋtɛt, mbɔ zɑꞋ pɛn mɔ́ ńdɛɛ. Cú mbɔ̌ pʉɔ, pɔ́p ɡʉ zʉꞋ yí mɛnjɛ́Ꞌ zúꞋu, ńdɔɔ yúupɛjʉ́ ńzúu.»

¹⁶Yɛ́su tsɔ́Ꞌ mbɔ̌ pɔ́p ŋɡɔ: «Ɛ́ kɑ́ pɔ́ pɔ ŋɡɔ pɔ́p ɡʉ ŋ́ɡʉ yɛcɔ́ zʉꞋ pɔ́. Pʉʉ ŋ́ɡɑ́nɛ yúu pɔ́p kwɛ́t.»

¹⁷Pɔ́p pʉ̈ɔt mbɔ̌ wɛ́ ŋɡɔ: «Pɛk ɡẅɛɛ pɔ ndɑꞋ mbɛlɛ̂ɛt ntɑ́Ꞌ yɛtɑɑ zɑꞋnɛ ŋ́ɡɛ mɛmbɑŋ shú mɛmbɑ́.»

¹⁸Yɛ́su cú mbɔ̌ pɔ́p ŋɡɔ: «Pʉʉ lɔk ńtɔ́, ŋ́ɡɑ́ mbɔ̌ mɔ zɑꞋnɛ,

¹⁹ńcú pɔ́Ꞌɔ, ńcú mbɔ̌ lɑ́Ꞌ ŋɡɔ: “Pɔ́p pʉ̈ɔ́Ꞌ nɛɡíi ńnɑ́ŋ ndǔ, ḿbɛ́ɛ mbɛlɛ̂ɛt ɛ̂yɑ́ ntɑ́Ꞌ yɛtɑɑ, nɛ́ mɛshú mîmɑ́ mbɑŋ yɛ́pɑ́, ḿbʉꞋ tú yɛ́ ńdíŋɛ tʉ́, ŋ́ɡɛ́mtɛ Sɛ́, ḿbʉ̈ɔ́Ꞌtɛ ŋ́ɡɑ́ mbɔ̌ ɡɑŋku pɛ́, pɔ́p ɡɑp mbɔ̌ lɑ́Ꞌ.”»

²⁰Lɑ́Ꞌ kwɛ́t, ńzwɛ́t. Pɛ́ cúꞋlɛ mɛpfuꞋ, ɛ́ lúu tsɛt pɛtúŋ ntsɔ̌ppɑ́ nɛ́ nɛɡɛ́m.

²¹Pʉɔ pínɛ pɔ́p m̄bɔ́ ŋ́kwɛ́t yúu kɑ pɔ́ mbɛ́ɛnɛ yúu ntsɑ́Ꞌ yɛ́tɑ́ɑ, kɛ́ sɑ́ŋ pɑŋɡɛ́ pɔ́p mbɔ́ŋkʉ̈ɔ́.

²²Yɛ́su ɡɔ́ɔ ńcú mbɔ̌ ɡɑŋku pɛ́ ŋɡɔ: Pɔ́p kúu tsɛt kɑnúꞋ ḿbiitɛ ḿbɔ́ mbi, ńtúu nɛ́ yɛcɔ́ njʉ́n, ɑ tsʉ́Ꞌ nzʉʉ ńdɛɛmɛ nɔɔ-lɑ́Ꞌ pɔ́p ɡʉ.

²³Yɛ́su tsʉ́Ꞌ ńdɛɛmɛ nɔɔ-lɑ́Ꞌ, ŋ́kɔ́Ꞌ ndǔ nɛŋkɔ́Ꞌ nɛcɛꞋlɛ Sɛ́. TúꞋ ɡɛ ŋ́ɡɔ sʉ́ʉ, ɑ tsʉ́Ꞌ ḿbɔ́ zúꞋu pɔ zɛnɛjʉ́,

²⁴mbɔ kɑnúꞋ zɛɛ ńnɛn tɛ ḿbɔ́ sɔŋ-ŋki. Ŋki pɔ́ ŋ́ɡɑ́ɑnɛ pʉɔ pɛ́, mbíꞋŋɡɔ fɛfʉ̈ɔt kɑ pɔ́ ńtɔ́ pɔ mbi nɛ́ mbi.

²⁵Ɛ́ ɡɛ ḿbɔ́ ŋkɔ́Ꞌnjí, Yɛ́su pɔ́ nɑ́ɑnɛ wɔ́p, ḿbɔ́ ńnɛn ndǔ ŋki.

²⁶Gɑŋku pɛ́, jʉ́ɔ pɑ́Ꞌ ɑ sɛ́ ńnɛn ndǔ ŋki, ńzɛ nɛpɔ́k, ŋ́kwɑŋɛ ŋɡɔ ɛ́ jʉ́jʉ́ŋ-ŋu, ḿbɔ́ ńtɔɔ ŋɡuŋ.

²⁷Lɑ́ Yɛ́su ɡɔ́ɔ ńcú mbɔ̌ pɔ́p ŋɡɔ: Pʉʉ pɔ́tnɛ ńnɑ́ŋ, ɑ pɔ́ mɔ, kɔɔ pʉʉ pɔ́k.

²⁸Pyɛ̂ ɡɔ́ɔ ŋ́kɛ́ ńcú mbɔ̌ wɛ́ ŋɡɔ: «Tsɑpʉɔ ɑ lɑɑ ḿbɔ́ kwɑꞋ ɡu, ɔ ɡɛ n nɛn ndǔ ŋki ńtɔ́ ńzɑ́Ꞌ wú.»

²⁹Yɛ́su cú mbɔ̌ wɛ́ ŋɡɔ: Tɔ́! Pyɛ̂ cẅɛt tsɛt kɑnúꞋ, ḿbɔ́ ńnɛn ndǔ ŋki nɛɡʉ ńzɑ́Ꞌ wɛ́.

³⁰Lɑ́ ńjʉ́ɔ fɛfʉ̈ɔt pɔ́ ńtsʉ́Ꞌnɛ tɛꞋ, ɑ pɔ́k, ńzɛ nɛmɛnɛ tsɛt ŋki, ŋ́ɡɔ́ɔ ŋ́kɛ́ ŋ́kíi ŋɡɔ: «Tsɑpʉɔ, m pfú ɛɛ!»

³¹Yɛ́su ɡɔ́ɔ ńcɑklɛ pɔ́ yɛ́ ŋ́kwɑ́p wɛ́, ńcú mbɔ̌ wɛ́ ŋɡɔ: Ɔ zɑ́p tʉ́m nǔu mɔ pɔ mɔ́zʉꞋ! Ɔ ɡɔ́ ḿmʉꞋlɛ ŋ́ɡɛ pɑ́Ꞌɑ?

³²Pɔ́pmɛ kúu tsɛt kɑnúꞋ, fɛfʉ̈ɔt zɑ́Ꞌnɛ.

³³Pʉɔ pínɛ pɔ́p tsɛt kɑnúꞋ pi mɛkẅíꞋlɛ mɔ́p mbi Yɛ́su ńcú ŋɡɔ: «Ɛ́ kwɑꞋ nɛ́nẅín, ɔ mɔ́ɔ-Sɛ́.»

³⁴Pɔ́p túu ŋki tɛ ŋ́kúu nǔu njʉ́n yɛ Jɛnɛzɑlɛ̂t,

³⁵ŋ́ɡɔ́ ḿpfúu tɛ ńtʉ́ʉ sɛ́, pɛ́ lii Yɛ́su, ŋ́ɡɔ́ɔ ŋ́kʉɔtɛ, ŋ́ɡʉ tsɛt mɛnjɛ́Ꞌ tsʉʉ ŋ́ɡɛ pɛ́ lɔk ɡɑŋɡɔɔ tsʉʉ ńtɔ́.

³⁶ḾbúꞋ mbɔ́ mbɔ̌ wɛ́ ŋɡɔ ɑ sǐi ḿbɛ́m, pɔ́p ɡẅɛɛ pɔ ndɑꞋ nɛcɔ́ŋ-ndẅí nɛ́. Pʉɔ tsʉʉ pí pɔ́p kɑ ɡẅɛɛnɛ nɛcɔ́ŋ-ndẅí ɛ̂nɑ́ fíitɛ.