Read Ngomba Mɑtʉ̈ɔ 16 Bible Online

Mɑtʉ̈ɔ 16 - Ngomba bible

Mɑtʉ̈ɔ 16

¹Pɑfɑlísɑy pɔ́p pɑsɑdukɑy tɔ́ ńzẅíꞋ ntsu-Yɛ́su, ḿbíkŋɛ wɛ́ ŋɡɔ ɑ ɡɛ tɑ́Ꞌ ŋkʉꞋnɛ nu yí ɛ́ nyɛtnɛ ŋɡɔ Sɛ́ túunɛ wɛ́.

²Yɛ́su tsɔ́Ꞌ mbɔ̌ pɔ́p ŋɡɔ: «Ɛ́ ɡʉ ntsuŋkẅɛ́Ꞌ ẅi nɛpú shɔtnɛnɛ ḿbɑŋ pʉʉ cú ŋɡɔ: “Njí ɡʉ ŋ́kiɛ lɛ́Ꞌlɑ́Ꞌ júk ḿbɔŋ.”»

³Ɛ́ pɔ́ mbɑ́ꞋmbɑꞋɑ́ ẅi nɛpú pɑŋ ɛ́sʉ́ʉ sʉ́ʉnɛ pʉʉ cú ŋɡɔ: «lɛ́Ꞌlɑ́Ꞌ kɛ́ ɡɛ ńjúk ḿbɔŋ pɔ́.» Pʉʉ pɔ́ tɛ ńdíŋɛ nɛpú, ŋ́ɡɔ́ɔ ńjí pɑ́Ꞌ lɛ́Ꞌlɑ́Ꞌ ɡʉ ŋ́ɡɛ ḿbɔ́ pɔ́Ꞌɔ, lɑ́ ŋ́ɡʉ nǔu yúu mi Sɛ́ sɛ́ ńnyɛt ŋkɔ̂ɔnɛ pʉʉ pɔɔ jí yúu mi yîyɑ́ yúu lɔknɛ ńcú pɔ́ mɛlɑ́Ꞌ kʉ̈ɔ́?

⁴Pʉʉ wɑ́ ẅi pʉʉ ndǔ mbí ŋkɔ̂ɔnɛ pʉʉ pʉɔ kɛpɔŋ, ḿbɛn ŋ́kɛ́ ḿbɔ́ ńtʉʉ tú mbɔ̌ Sɛ́ tʉʉnɛ ḿbɔ́ ḿbíkŋɛ ŋɡɔ n nyɛt ŋkʉꞋnɛ nu. Lɑ́ pɛ́ kɛ́ ɡɛ ńnyɛt wʉ́ʉ nɛ́ yɛcɔ́ yúu pɔ́, tɛ ńdíꞋ ndɑꞋ nu yí ɛ́ kɑ ɡɛnɛ Yɔ́nɑ́ɑshi. Yɛ́su cú pɔ́Ꞌɔ, ńnɑ́ wɔ́p zúꞋu ŋ́ɡʉ.

⁵Pɔ́Ꞌɔ, pɔ́p ɡɛ ńtúu nɛkʉŋ-ŋki, ŋ́ɡɔ ńtúu, ɡɑŋku-Yɛ́su likŋɛ nɛpɛ́ɛ mbɛlɛ̂ɛt.

⁶Yɛ́su ɡɛ ḿbɔ́ ńcú mbɔ̌ pɔ́p ŋɡɔ: «Pʉʉ lɑk tú yʉ́ʉ, ḿbɑ́ɑ fɛntɛ pʉɔ-fɑlísɑy pɔ́p pʉɔ-sɑdukɑy.»

⁷Gɑŋku pɛ́ zúꞋ, ŋ́ɡɔ́ɔ ŋ́kɛ́ ḿbɔ́ ńcú tsɛtsɛt pɔ́p ŋɡɔ, líkcɔ́ ɑ cú pɑ́Ꞌɑ, mbíꞋŋɡɔ pɛkŋɛ lɑ́Ꞌ ńdikŋɛ kɛ́ pɛ́ɛ mbɛlɛ̂ɛt[11].

⁸Yɛ́su jí pɑ́Ꞌ pɔ́p sɛ́ ŋ́kwɑŋɛ pɔ́Ꞌɔ, ńcú mbɔ̌ pɔ́p ŋɡɔ: «Pʉʉ kɑ́ zɑ́p tʉ́m nǔu mɔ sʉ́Ꞌnɛ pɔ́. Pʉʉ kwɑŋɛ pɔ nu-mbɛlɛ̂t yí pʉʉ kɑ́ ɡẅɛɛ mɛlɑ́Ꞌ kʉ̈ɔ́?

⁹Pʉʉ lɔk ḿbɛ́t pɔ kɛ́ jí nu pɔ́ ɔɔ? Ńjí ŋɡɔ pʉʉ kɑ́ kẅíitɛ mbɛlɛ̂ɛt yɑ́ ntɑ́Ꞌ yɛtɑɑ, pɑ́Ꞌ ŋ kɑ lɔknɛ ńzẅík mbɛ́ɛnɛ ntsɑ́Ꞌ yɛ́tɑ́ɑ lɑ́ pɔ́ kɛ? Pʉʉ m̄bɔ́ lɛ́Ꞌ ɛ̂yɑ́ pɑ́Ꞌɑ ńdɑk mɛkɛm mɛ́, ɛ́ cẅɛt pɛtúŋ pɛsʉ́Ꞌʉ lɑ́ɑ,

¹⁰ńjí ŋɡɔ pʉʉ kɑ́ kẅíitɛ mbɛlɛ̂ɛt yɑ́ ntɑ́Ꞌ sɑɑmbɑ́, pɑ́Ꞌ ŋ kɑ lɔknɛ ńzẅík mbɛ́ɛnɛ ntsɑ́Ꞌ yɛ́nɛ́kwɑ lɑ́ pɔ́ kɛ? Pʉʉ m̄bɔ́ lɛ́Ꞌ ɛ̂yɑ́ pɑ́Ꞌɑ ńdɑk mɛkɛm mɛ́, ɛ́ cẅɛt pɛtúŋ pɛsʉ́Ꞌʉ lɑ́ɑ.

¹¹Ɛ́ pɛn ŋ́ɡɛ ŋɡɔ́ku, pʉʉ pɔɔ zúꞋ ŋɡɔ n dɑ́Ꞌ mbɔɔ ńcú nu nǔu mbɛlɛ̂ɛt ŋkɑ́ yi pɔ́ ɔɔ?» M bɛn ńcú ŋɡɔ: «Pʉʉ pɑ́ɑ fɛntɛ-Pɑfɑlísɑy pɔ́p pɑsɑdukɑy.»

¹²Ɛ́ lɛɛ pɔ́Ꞌɔ, Gɑŋku-Yɛ́su ɡɔ́ɔ ŋ́kɛ́ ńzúꞋ ŋɡɔ, ɑ lɑ́Ꞌ ḿbɔɔ ńcú ŋɡɔ pɔ́p pɑ́ɑ fɛntɛ lɔk ńniitɛ mbɛlɛ̂ɛt pɔ́. A lɑ́Ꞌ ńcú pɔ ŋɡɔ pɔ́p pɑ́ɑ yúu mi pɑfɑlísɑy pɔ́p pɑsɑdukɑy zíꞋnɛ pʉɔ.

¹³Yɛ́su ɡʉ tɛ ŋ́kúu tsɛt pɑk-ŋɡɔŋ-Sɛ́zɑlɛ̂ ẅi Filîp kɑ pɔ́nɛ ɛ́sɑ́Ꞌ, ḿbíkŋɛ ɡɑŋku pɛ́ ŋɡɔ: «Lɑ́Ꞌ pɑ́Ꞌɑ ḿbɔ́ sɛ́ ńcú ŋɡɔ Mɔ́ɔ-Ŋu wɔ̌?»

¹⁴Pɔ́p pʉ̈ɔt ŋɡɔ: «Pɛcɔ́ pʉɔ sɛ́ ńcú ŋɡɔ ɔ Jɑ̂ŋ Mbɑptíshi, pɛcɔ́ pɔ́ ńcú ŋɡɔ ɔ Ɛlíyɑ, pɛcɔ́ pɔ́ ńcú yɔ́p ŋɡɔ ɔ Yɛlɛmî, kɛ pɔ wɛcɔ́ ncẅiŋkʉʉ-Sɛ́.»

¹⁵Yɛ́su píkŋɛ wɔ́p ŋɡɔ: «KwɑꞋ pʉʉ yʉ́ʉ cú ŋɡɔ mɔ wɔ̌?»

¹⁶Símɔ Pyɛ̂ pʉ̈ɔt ŋɡɔ: «Ɔ Nzɑ́Ꞌŋkʉ, mɔ́ɔ-Sɛ́ ẅi ɑ ɡú.»

¹⁷Yɛ́su ɡɔ́ɔ ŋ́kɛ́ ńcú mbɔ̌ wɛ́ ŋɡɔ: «Símɔ mɔ́ɔ-Jɑ̂ŋ, ɔ pɔ́ttú, mbíꞌŋɡɔ ŋumɛsɔŋ kɑ́ nɛ ɡɛ, lɑ́ ɔ jí yɔ nu nɛ́nẅín pɔ́. Tɑ̌ɑ mɔ ẅí ɑ tʉ́nɛ́pú nyɛtnɛ wú.»

¹⁸Ŋ ɡʉ ŋ́kɛ́ ḿbɛn ɛ́sẅíi wú, kwɑꞋ nɛ́nẅín, ŋɡɔ: «Ɔ Pyɛ̂, ńdɔk ńcú ŋɡɔ ŋɡɔꞋ, ŋ ɡʉ ŋ́ɡɛ ńtík cúꞋlɛ-pʉɔ pɑ́ɑ ndǔ ŋɡɔꞋ ɛ̂yɑ́. Tɛ mbɑ nɛvú pɔɔ lɑ́Ꞌ ŋ́kuꞋ nɛnʉꞋnɛ yîyɑ́ cúꞋlɛ pɔ́.

¹⁹Ŋ ɡʉ ŋ́ɡɛ ŋ́ɡɑ́ mɛtsɔ́Ꞌ nɛlɔk ńtsɔ́Ꞌ ndúŋ-nɛfɔɔ-Sɛ́ mbɔ̌ wu. Yúu mi ɔ ɡʉ ŋ́ɡɛ ńdʉꞋnɛ ndǔ tsɛ́tsɑ́Ꞌ, pɛ́ ɡʉ ńdʉꞋ tʉ́nɛ́pú. Yúu mi ɔ ɡʉ ḿbɛ́m ndǔ tsɛ́tsɑ́Ꞌ pɛ́ ɡʉ ŋ́ɡɛ ḿbɛ́m tʉ́nɛ́pú.»

²⁰Yɛ́su cú pɔ́Ꞌɔ, ŋ́ɡɔ́ɔ ŋ́kɛ́ ŋ́kwɛn ɡɑŋku pɛ́ ŋɡɔ, kɔɔ pɔ́p kẅíi tɛ ŋu ndɛꞋ jí ŋɡɔ ɑ Nzɑ́Ꞌŋkʉ.

²¹Ɛ́ fú ŋkɑ́ ɛ̂yɑ́, Yɛ́su Kɛlístɔ zɛ nɛsɑ́ɑnɛ sɑ́ɑnɛ́nɛ ḿbʉ́ mbɔ̌ ɡɑŋku pɛ́ ŋɡɔ: «Ɛ́ sɛ́ ḿbíkŋɛ ŋɡɔ ɑ ɡʉ Yɛlúsɑlɛm. A ɡʉ ŋ́kúu zúꞋu ńjʉ́ɔ ŋɡʉ̈ɔ́Ꞌ tɛꞋ mbɔ̌ pɛkɛ́m-lɑ́Ꞌ, pɔ́p pɛtɑ́tndɑ́-pɑnɔŋpɔꞋ, mbɑ pɑkyɛ́ꞌtɛ nɛpʉ́ʉ-Mɔ̌sɛ̂ɛ, pɔ́p ɡɛ pɛ́ jẅí wɛ́. A pɛn ńzẅíimɛ nǔu nɛvú nǔu mbɑ́ɑtɛ lɛ́Ꞌ pɛtɑ́t.»

²²Pyɛ̂ ɡɔ́ɔ ŋ́kɛ́ ɛ́fúŋ wɛ́ ntsɛm, ńzɛ nɛkɑkŋɛ wɛ́, ńcú mbɔ̌ wɛ́ ŋɡɔ: «Tsɑpʉɔ, kɔɔ Sɛ́ pɛ́m yîyɑ́ ntɛ́ nu ɡɛ wú! Mbɔ ɛ́ pɔɔ pɔ́ pɔ́Ꞌɔ pɔ́.»

²³Yɛ́su shɔtnɛ, ńcú mbɔ̌ Pyɛ̂ ŋɡɔ: «Fú nzʉʉ mɔ ńtsʉ́ʉtɛ Sɑ́ttɑ! Ɔ tsʉ́Ꞌ ńtɑɑtɛ wɑ́ɑ tɑɑtɛnɛ. Ɔ kɑ́ pɔ́ ŋ́kwɑŋɛ pɑ́Ꞌɑ, ɛ́ pɔ́ pɑ́Ꞌ Sɛ́ sɛ́ ŋ́kwɑŋɛ pɔ́, yɑ́ pɔ́ pɔ kwɑŋɛ-pʉɔmɛsɔŋ.»

²⁴Yɛ́su pɛn ńcú mbɔ̌ ɡɑŋku pɛ́ ŋɡɔ: Ŋu lɑɑ ŋ́ɡʉ ḿbɔ́ wɑ́ɑ ŋu, ɑ ɡwɑ́k túmbʉʉ yɛ́, ńtíi yɛ́ tʉ́ mbɑ́ŋtɛ pɑ́ŋtɛ́nɛ ńdɔk ḿbɛ́m nɛpfú, lɑ ńcʉ́ɔ nzʉʉ mɔ.

²⁵Ŋu ẅí ɑ ɡʉ ńzɛɛ ńdɔɔ nɛpɑ́ɑ yɛ́ luk, pɔ́nɛ ŋu ẅí ɑ ɡʉ ḿbɛ́ yɛ luk ɛ̂yɑ́. Lɑ́ ŋu ẅí ɑ ḿbɛ́ wɛ luk mbíꞋ wɑ́ɑ, ẅîwɑ́ ŋu ɡʉ ńdɑ́Ꞌ ḿbɔ́ pɔ́ ɡú.

²⁶Pɛ́ lɑɑ ńzɛɛ ńtíi mbí yɔ tsʉʉ ŋ́ɡɑ́ mbɔ̌ ŋu, lɑ́ kɛ́ ḿbɔ́ yi ɛ́ ɡʉ ńdɔk pɔ́p tú yɛ́ pɔ́, mbɔ ɡʉ cẅɛ́lɛ́ wɛ́ nǔu kʉ̈ɔ́? A lɑɑ ḿbɔ́ ŋu lɔk kʉ̈ɔ́ ńdɔk ŋ́kúpmɛ tú wɛ́?

²⁷Pʉʉ jí ŋɡɔ: «Mɔ́ɔ-Ŋu ɡʉ ŋ́ɡɛ ńtɔ́ pɔ́p pɛcʉ̈ɔ́Ꞌ pɛ́, ńtɔ́ pɔ́Ꞌɔ, tsɛt nɛɡúꞋ-Tɑ́t wɛ, ɑ tsɔ́Ꞌ fɑꞋ mbɑ wɔ̌ lɑ́, pɔ nǔu ŋɡɛnɛ mɛnu mɛ́.

²⁸Ɛ sẅíi wʉ́ʉ, kwɑꞋ nɛ́nẅín, pɛcɔ́ mbɔ ntɑ́Ꞌ nǔu pʉɔ pínɛ pɔ́p zɑꞋnɛ ŋkɔ̂ɔnɛ kɛ́ ɡɛ mpfú, kɛ́ pɔ́ yi pɔ́p jʉ́ɔ pɑ́Ꞌ Mɔ́ɔ-Ŋu tɔ́nɛ pɑ́Ꞌ fɔɔ pɔ́.»