Read Ngomba Mɑtʉ̈ɔ 18 Bible Online

Mɑtʉ̈ɔ 18 - Ngomba bible

Mɑtʉ̈ɔ 18

¹Ɛ́ pɔ́ ŋkɑ́ yîyɑ́, ɡɑŋku-Yɛ́su tɔ́ ḿbíkŋɛ wɛ́ ŋɡɔ: «Wɔ̌ ŋu ɡwɛ́ tsɛt nu-nɛfɔɔ-Sɛ́.»

²Yɛ́su fúŋ mɔ́yúu mɔ́ɔ, ńtík wɛ́ mbi pɔ́p,

³ńcú ŋɡɔ: «Tsʉ́Ꞌnɛ ɛ sẅíi wʉ́ʉ, kwɑꞋ nɛ́nẅín, pʉʉ lɑɑ mbɔɔ kúpmɛ mɑt wʉʉ, tɛ ńtsʉ́Ꞌ ḿbɔ́ pɔ pɑ́Ꞌ mbɔ́ŋkʉ̈ɔ́ pɔ́, mbɔ pʉʉ kɛ́ lɑ́Ꞌ ŋ́kúu tsɛt nu-nɛfɔɔ-Sɛ́ pɔ́.

⁴Ŋu ẅí ɑ kɔknɛ mbʉʉ yɛ́ ŋ́ɡɑ́ sɛ́ tɛ ńtsʉ́Ꞌ pɑ́Ꞌ ɡɛɡʉʉ yɔ lɑ́, ɑ ŋu ẅí ɑ wɛ ɡwɛ́ tsɛt nɛfɔɔ-Sɛ́.

⁵Ŋu lɑɑ ńdɔk lík yɑ́ɑ ŋ́kúkŋɛ mɔ́yúu mɔ́ɔ pɑ́Ꞌ wɔ lɑɑ, mbɔ ŋɡɑŋ kúkŋɛ pɔ wɑ́ɑ.»

⁶Lɑ́ ŋu ẅí ɑ ŋ́kɛ́ ńtsʉ́ʉnɛ wɛcɔ́ tɑ́Ꞌ nǔu pɛɡɛɡʉʉ pɔnɛ pi pɔ́p zɑ́pnɛ tʉ́m nǔu mɔ, ńtsʉ́ʉnɛ wɔ́p nɛpɔ́ yi pɔ́p ɡʉ ɛ́fɑɑnɛ nu, mbɔ mbi pɑ́Ꞌ mbɔ pɛ́ cʉŋɛ mɑ́mɑ́ ŋɡɔꞋ lɔ́ŋ-ŋɡɑŋ, ńtsʉ́ʉ wɛ́, ḿmɑꞋ tsɛt mí zʉꞋ-nzɛnzʉ́ʉ.

⁷Ndɔɔ tú-pʉɔ pínɛ pɔ́p ndǔ yɔ mbí, ŋ́ɡɛ pʉɔ fɑɑnɛ mɛnu! Ɛ́ nɛ́nẅín mɛnu ɛ̂mɑ́ ńdɑ́Ꞌ ńjɑ́k pɔ́. Lɑ́ pʉ́ktú kɛ́ ḿbɔ́ ŋu ẅí ɑ ɡʉ ŋ́ɡɛ ŋɡɔ ŋu fɑɑnɛ sɛ̂ndúŋ!

⁸Pɔ́Ꞌɔ lɑ́, ɛ́ lɑɑ ńtsʉ́Ꞌ yi pɔ́ yú kɛ ku yú ɔɔ, tsʉ́ʉnɛ wú, ɔ fɑɑnɛ nu, ɔ zɑ́Ꞌ ḿmɛꞋ tɛ ŋɡɑ sɛsɑ. Mbi ɡu nɛpɔ́ ŋkɛmpɔ́ kɛ kɛmku ɔɔ, ńdɑ́Ꞌ ḿbɔ́ ɡú, ńtsɑ pɑ́Ꞌ ɛ́ lɑɑ ḿbɔ́, ɔ ɡẅɛɛ mbɔ́ mú mɛmbɑ́ kɛ mɛku mú mɛmbɑ́ ɔɔ, ńdɑ́Ꞌ ŋ́kúu tsɛt múk ẅi ɛ́ kɛ́ lɑ́Ꞌ ḿbɛ́ pɔ́.

⁹Ɛ́ lɑɑ ńtsʉ́Ꞌ yi lík yú tsʉ́ʉnɛ wú, ɔ fɑɑnɛ nu, ɔ tsɔ́Ꞌ ḿmɛꞋ ŋɡɑ sɛsɑ. Mbi ɡu nɛpɔ́ pɛlík ńdɑ́Ꞌ ḿbɔ́ ɡú, ńtsɑ ɡu nɛɡẅɛɛ mík mɛmbɑ́, ńdɑ́Ꞌ ŋ́kúu tsɛt múk.

¹⁰Pʉʉ lɑk tú yʉ́ʉ nɛɡwɑ́k wɛcɔ́ tɑ́Ꞌ nǔu ɡɛ́ɡɛ́ mbɔ́ŋkʉ̈ɔ́ pɔnɛ. Jínɛ ŋɡɔ, pɛcʉ̈ɔ́Ꞌ-Sɛ́ pínɛ pɔ́p líŋɛ́nɛ wɔ́p tʉ́ʉ mbi Sɛ́ túnɛpú ŋkɑ́ tsʉʉ. [

¹¹Mɔ́ɔ-Ŋu kɑ tɔ́ pɔ nɛlɔɔ pʉɔ pínɛ pɔ́p kɑ pɛ́nɛ ŋ́ɡɛ pɔ́p luk.[13]]

¹²Pʉʉ tsʉ́Ꞌ m bíkŋɛ wʉ́ʉ nɛ́ yɔ nu: «Ŋu lɑɑ ḿbɔ́ pɛ́Ꞌnɛ ŋ́ɡẅɛɛ mɛnjinjɔ mɛ́ ŋkʉ, tɑ́Ꞌ pɛ́, mbɔ ɑ ɡʉ ŋ́ɡɛ pɑ́Ꞌɑ? Mbɔ ɑ kɛ́ nɑ́ mɛcɔ́ ntsɔ̌pɛ́nɛ́pfuꞋú nɛ́ mɛɡɛ́mɛ́nɛ́pfúꞋú ndǔ nɛŋkɔ́Ꞌ, ŋ́ɡʉ ńdɔɔ ẅi ɑ pɛ́nɛ pɔ́ ɔɔ?»

¹³Tsʉ́Ꞌnɛ ɛ sẅíi wʉ́ʉ, kwɑꞋ nɛ́nẅín, ɑ lɑɑ ńdɔɔ ẅîwɑ́ tɛ ńjʉ́ɔ, mbɔ ɑ ɡʉ ńtsɑ́ɑtɛ nǔu ẅîwɑ́, ńtsɑ pɛcɔ́ ntsɔ̌pɛ́nɛ́pfuꞋú nɛ́ mɛɡɛ́mɛ́nɛ́pfúꞋú pi pɔ́p kɑ́ pɛ́.

¹⁴Ɛ́ kɛ ḿbɔ́ pɔ pɔ́Ꞌɔ nǔu Tɑ̌ɑ wʉʉ ẅí ɑ tʉ́nɛ́pú, ɑ kɑ́ kɔŋ ŋɡɔ wɛcɔ́ tɑ́Ꞌ nǔu mbɔ́ŋkʉ̈ɔ́ pɛ́ pɛ́ pɔ́.

¹⁵Mɔ́ɔmɑ́ wu lɑɑ ŋ́ɡɛ nu kɛpɔŋ nǔu ɡu, ɔ ɡʉ ńjʉ́ɔ wɛ́, pʉʉnɛ tʉ́ʉ pɛ́pɑ́, ɔ sẅíi wɛ́. A zúꞋ, tɛ ḿbɛ́m mɛfɑɑnɛ mɛ́, mbɔ ɔ cẅɛɛtɛ wɛ́ nǔu sɛ̂ndúŋ kɛpɔŋ.

¹⁶Lɑ́ ŋ́kɛ́ mbɔɔ zúꞋ ɔ lɔɔ tɑ́Ꞌ ŋu kɛ pʉɔ pɛ́pɑ́ ɔɔ, ńjí ŋɡɔ pɛ́ ɡʉ ŋ́ɡɔ ɛ́sẅíi yɔ nu pɑjʉ́ ńjʉ́ɔ pɔ́ sɛ́ pɛ́pɑ́ kɛ pɛtɑ́t ɔɔ.

¹⁷Lɑ́ ɑ kɛ́ ńdʉꞋ nɛzúꞋ nu yi pɔ́p cúnɛ, ɔ lɔk yɔ nu ŋ́ɡʉ cúꞋlɛ-pʉɔ-Sɛ́. A pɛn ńdʉꞋ nɛzúꞋ nu yí cúꞋlɛ cúnɛ, ɔ tsʉ́Ꞌ ńdíŋɛ wɛ́ pɔ pɑ́Ꞌ ŋu ẅí ɑ kɑ́ Jí Sɛ́ pɔ́, kɛ pɔ pɑ́Ꞌ pɛ́ líŋɛ́nɛ ńcẅɛ́ɛntsup-Pɑlɔ́mɑ ɔɔ.

¹⁸Ŋ ɡʉ ɛ́sẅíi wʉ́ʉ, kwɑꞋ nɛ́nẅín, ŋɡɔ: «Pʉʉ lɑɑ ńjʉ́ɔ nu tɛ ńdʉꞋ yîyɑ́ nu ndǔ tsɛ́tsɑ́Ꞌ, mbɔ pɛ́ ɡʉ ḿbɛn ńdʉꞋnɛ tʉ́nɛ́pú. Pʉʉ kɛ ńjʉ́ɔ nu tɛ ḿbɛ́m ndǔ tsɛ́tsɑ́Ꞌ, mbɔ pɛ́ ɡʉ ḿbɛn ḿbɛ́m yîyɑ́ nu tʉ́nɛ́pú.»

¹⁹KwɑꞋ nɛ́nẅín, m bɛn ɛ́sẅíi wʉ́ʉ ŋɡɔ: «Pʉɔ pɛ́pɑ́ tsɛtsɛt pʉʉ lɑɑ ḿbɔ́ tɑ́Ꞌ ntsu ndǔ tsɛ́tsɑ́Ꞌ zɑꞋnɛ, ńdɔ́ɔ pɔ kʉ̈ɔ́ lɑ́ mbɔ̌ Tɑ̌ɑ mɔ ẅí ɑ tʉ́nɛ́pú, mbɔ ɑ ɡʉ ŋ́ɡɑ́ mbɔ̌ pɔ́p.

²⁰ZʉꞋ yí pʉɔ pɛ́pɑ́ kɛ pʉɔ pɛtɑ́t zúꞋu, ńcúꞋlɛ zúꞋu nǔu lík yɑ́ɑ, mbɔ ŋ ɡʉ ḿbɔ́ tsɛtsɛt pɔ́p.»

²¹Pyɛ̂ ɡɔ́ɔ ŋ́kɛ́ ńtɔ́ ḿbíkŋɛ Yɛ́su ŋɡɔ: «Ndɛ, mɔ́ɔmɑ́ mɔ lɑɑ ɛ́fɑɑnɛ nu mbɔ̌ mɔ, n dikŋɛ ŋ́ɡɑ́ mbɔ̌ wɛ́ ŋkɑ́ yɛsʉ́Ꞌ? Ŋkɑ́ sɑɑmbɑ́ kíi.»

²²Yɛ́su cú ŋɡɔ ŋɡɑŋ, ŋ kɑ́ cú ŋɡɔ ŋkɑ́ sɑɑmbɑ́ ndɑꞋ pɔ́, n cú ŋɡɔ ŋkɑ́ mɛɡɛ́m sɑɑmbɑ́ ŋkɑ́ sɑɑmbɑ́.

²³Ɛ́ yɛ́tɛ́ lɑ́ nu-nɛfɔɔ-Sɛ́ fí nu-wɛcɔ́ fɔɔ ẅí, ɑ kɑ pɔ́ ŋ́kɔŋ ŋɡɔ ɡɑŋfɑꞋ pɛ́ tɔ́ pɔ́p pɛ́pɔ́p sɑ́ŋ yúu pɛ́ pi ɛ́ mbɔ̌ pɔ́p, pɔ́p pɑꞋ ŋ́ɡɑ́ mbɔ̌ wɛ́.

²⁴Ḿbɔ́ tɛ ńzɛ, pɛ́ lɔk wɛcɔ́ tɑ́Ꞌ ńtɔ́ mbi yɛ́, pɔ́pmɛ ɡẅɛɛ ŋkɑ́p tɛ ɛ́ pɔ́ milɛyɑ̂[14]

²⁵A pɔɔ ɡẅɛɛ ŋkɑ́p nɛlɔk ńtɔŋɛ nzɔ́ yɛ́ pɔ́, fɔɔ cú ŋɡɔ pɛ́ fɛn wɛ́, ɛ́fɛn nzwɛ́ wɛ, pɔ́p mbɔ́ŋkʉ̈ɔ́ pɛ́, tɛ mbɑ kʉ̈ɔ́ lɑ́ yi ɑ ɡẅɛɛnɛ, ńdɔk ńtɔŋɛ nzɔ́ yɛ.

²⁶Lɑ́ ŋɡɑŋ zúꞋ ḿvu sɛ́ mbi fɔɔ, ńcú ŋɡɔ: «Zɑɑmɛtɑ́ɑ, pɛ́ nɑꞋ sʉk ńzẅíꞋlɛ wɑ́ɑ, ŋ ɡʉ ŋ́ɡɛ ńtɔŋɛ tɛ ɛ́ mɛ!»

²⁷Mɛjʉ́ŋ mɛ́ kɔ́ fɔɔ, ɑ nɑ́ ŋkɑ́p yɛ́ mbɔ̌ wɛ́, ńnɑ́ wɛ́ ɑ ɡʉ.

²⁸Lɑ́ ŋɡɑŋfɑꞋ wɑ́ fú mbi fɔɔ ŋ́ɡʉ ŋ́kúu sɛ̂ndúŋ, ḿbuutɛ wɛcɔ́ súu nɛ ŋɡɑŋfɑꞋ, mbɔ ẅîwɑ́ ŋɡɑŋfɑꞋ kɑ tɔ́ ńcẅɛ́ɛ ŋkɑ́p yɛ́ tɛ ɛ́ pɔ́ ŋkɑ́p pɑk ŋkʉ[15]. A puutɛ wɛ́ pɔ́Ꞌɔ, ŋ́ɡẅɛɛ wɛ́, ńtík ŋɡɑk lɔ́ŋ wɛ́, ńcú ŋɡɔ: «Gɑ́ ŋkɑ́p yɑɑ yɑ́ pɔ ŋkɔ̂ɔnɛ.»

²⁹Ŋu wɑ́ vu mbi yɛ́, ḿbúꞋ mbɔ́ mbɔ̌ wɛ́ ńcú ŋɡɔ: «NɑꞋ sʉk ńzẅíꞋlɛ wɑ́ɑ, ŋ ɡʉ ŋ́ɡɛ ŋ́ɡɑ́ ŋkɑ́p yu.»

³⁰A lʉꞋ, ḿbɛn ńdɔk wɛ́ ŋ́ɡʉ ḿmɑꞋ ndɑ́tsɑ́ŋ.

³¹Pɛcɔ́ ɡɑŋfɑꞋ-fɔɔ jʉ́ɔ, ɛ́ pʉ́k wɔ́p, tɛ pɔ́p ɡʉ ḿbɛ́ɛtɛ yúu mi ɛ́ lɛɛnɛ ɛ́sẅíi fɔɔ.

³²Fɔɔ cú pɛ́ ɡʉ ŋ́ɡẅɛɛ ẅîwɑ́ ŋu ńdɔk ńtɔ́, ɑ cú mbɔ̌ wɛ́ ŋɡɔ: «Kɛ́ tsɑ́ɑ mɛjʉ́ŋ, n dɑ́Ꞌ ńtsɑ́ɑ mɛjʉ́ŋ mú, ńnɑ́ ŋkɑ́p yɑɑ mbɔ̌ wu, mbíꞋŋɡɔ ɔ lɑ́Ꞌ ḿbúꞋ mbɔ́ mbɔ̌ mɔ.

³³Mɛlɑ́Ꞌ kʉ̈ɔ́ ɔ kɑ́ tsɑ́ɑ mɛjʉ́ŋ súu nu, pɑ́Ꞌ n dɑ́Ꞌnɛ ńtsɑ́ɑ mú pɔ́ ɔɔ?»

³⁴Yɔ nu tsuŋ ńzɑ́ŋ fɔɔ, ɑ túu pɛ́ ɡʉ ńníꞋ wɛ́ tsɑ́ŋ, ḿbɔ́ ńnyɛt wɛ́ nɛ́ ŋɡʉ̈ɔ́Ꞌ tɛ ŋ́kúu ŋkɑ́ yi ɑ ńtɔŋɛ yɛ nzɔ́.

³⁵Yɛ́su lẅiklɛ ńcú ŋɡɔ: «Ɛ́ ndʉ́ŋndʉŋ pɑ́Ꞌ Tɑ̌ɑ mɔ ẅí ɑ tʉ́nɛ́pú, ɑ ɡʉ ŋ́ɡɛ nǔu mbɑ wɔ̌ lɑ́ tsɛtsɛt pʉʉ, pɑ́Ꞌ ɑ lɑɑ mbɔɔ likŋɛ mɛfɑɑnɛ mɔ́ɔmɑ́ wɛ nɛ́ ŋɡɔŋ tʉ́m yɛ́ tsʉʉ pɔ́.»