Read Ngomba Mɑtʉ̈ɔ 20 Bible Online

Mɑtʉ̈ɔ 20 - Ngomba bible

Mɑtʉ̈ɔ 20

¹Yɛ́su pɛn ŋɡɔ: «nu-nɛfɔɔ-Sɛ́ ɡɔ́ɔ ḿbɔ́ pɔ pɑ́Ꞌ nu-wɛcɔ́ ŋu ẅí ɑ kɑ mʉ́ʉnɛ mbɑ́ꞋmbɑꞋɑ́, ŋ́ɡʉ lɔɔ ɡɑŋfɑꞋ pínɛ ɑ ɡʉ ńníꞋ ŋkɑ́Ꞌ yɛ́.»

²Pɔ́p pɛ́ ɡɑŋfɑꞋ niitɛ pɑ́Ꞌ ɑ ɡʉ ŋ́ɡɑ́ tɑ́Ꞌ pɑk-ŋkɑ́p mbɔ̌ tɑ́Ꞌ ŋu nǔu lɛ́Ꞌlɑ́Ꞌ. A ɡɔ́ɔ ŋ́kɛ́ ńcú pɔ́p ɡʉ nɛ́ ŋkɑ́Ꞌ yɛ́[16].

³Nɛm yɛ́nɛ́pfuꞋú pɛn ŋ́kuꞋ, ɑ pɛn ńcẅɛt njɛ́Ꞌ yɛ́, ńjʉ́ɔ pɛcɔ́ ɡɑŋfɑꞋ pɛn ńtʉ́ʉ mɛfyɑkŋɛ-ndúŋ, mbɔɔ pɔ́ ŋ́ɡɛ yɛcɔ́ yúu pɔ́.

⁴A cú mbɔ̌ pɔ́p ŋɡɔ: «Pʉʉ ɡʉ yʉ́ʉ ŋkɑ́Ꞌ mɔ ɛ́fɑꞋ fɑꞋ. Ŋ ɡʉ ŋ́ɡɛ ńdʉŋtɛ yʉ́ʉ tsɔ́ꞋfɑꞋ nǔu fɑꞋ yʉ́ʉ.»

⁵Píipɑ́ pʉɔ ɡʉ nɛ́ ŋkɑ́Ꞌ. Ŋɡɑŋkɑ́Ꞌ ɡɛ ḿbɔ́ nǔu tẅɛp, ḿbɛn ńcẅɛt njɛ́Ꞌ yɛ́, ŋ́ɡɛ ḿbɔ́ mbɔ́tnjí nǔu nɛm pɛtɑ́t, ḿbɛn ńcẅɛt, ńjʉ́ɔ ɡɑŋfɑꞋ ŋkɑ́ kʉ̈ɔ́ ɔɔ, ńcú pɔ pɔ́Ꞌɔ.

⁶A ɡɛ ḿbɔ́ ntsuŋkẅɛ́Ꞌ nǔu nɛm yɛ́tɑ́ɑ, ńcẅɛt, ńjʉ́ɔ pɛcɔ́ ɡɑŋfɑꞋ tʉ́ʉtɛ, ɑ píkŋɛ wɔ́p ŋɡɔ: «Mɛlɑ́Ꞌ kʉ̈ɔ́ pʉʉ tʉ́ʉ zɑꞋɑ tɛ ɛ́fú mbɑ́ꞋmbɑꞋɑ́ kɛ́ pɔ́ ŋ́ɡɛ yɛcɔ́ yúu?»

⁷Pɔ́p pʉ̈ɔt ŋɡɔ: «Ɛ́ ɡɔ́ ḿbɔ́, mbɔ wɛcɔ́ ŋu kɑ́ fúŋ wɛ́k nǔu fɑꞋ pɔ́.» A cú mbɔ̌ pɔ́p ŋɡɔ: «Pʉʉ ɡʉ yʉ́ʉ ŋkɑ́Ꞌ mɔ ɛ́fɑꞋ fɑꞋ.»

⁸Ŋkɑ́ nɛtsɔ́Ꞌ fɑꞋ kuꞋ, ŋɡɑŋkɑ́Ꞌ cú mbɔ̌ ŋu ẅí ɑ líŋɛ́nɛ yúu pɛ́ ŋɡɔ: «Fúŋ ɡɑŋfɑꞋ, ŋ́ɡɑ́ ŋkɑ́p yɔp, zɛ nǔu pʉɔ pínɛ ɛ fúŋnɛ wɔ́p nǔu fɑꞋ pɔ nzʉʉ lɑ́, ŋ́ɡʉ ŋ́kúu nǔu pʉɔ pínɛ n dɑ́Ꞌ ńzɛ nǔu pɔ́p.»

⁹Pʉɔ pínɛ pɔ́p zɛ yɔ́p fɑꞋ nǔu nɛm yɛ́tɑ́ɑ ntsuŋkẅɛ́Ꞌ tɔ́, pɛ́ ɡɑ́ tɑ́Ꞌ pɑk-ŋkɑ́p mbɔ̌ mbɑ wɔ̌ lɑ́ nǔu pɔ́p.

¹⁰Pʉɔ pínɛ pɔ́p lɑ́Ꞌnɛ ḿbiitɛ ńzɛ fɑꞋ ɡɔ́ ńtɔ́ yɔ́p, ḿbɔ́ ŋ́kwɑŋɛ ŋɡɔ yɔp ŋkɑ́p ɡʉ nɑꞋ ńzɑ́ɑ, lɑ́ pɛ́ pɛn ŋ́ɡɑ́ pɔ tɑ́Ꞌ pɑk-ŋkɑ́p mbɔ̌ mbɑ wɔ̌ lɑ́ nǔu pɔ́p.

¹¹Pɔ́p ɡɔ ńcẅɛ́ɛ lɔ́ŋ wɔp pɔ́ ńzɑ́ŋ ntɛ́ ŋɡɑŋkɑ́Ꞌ.

¹²Pɔ́p pɔ́ ńcú ŋɡɔ: «Pʉɔ pɔ́nɛ tɔ́ pɔ nzʉʉ, pɔ́p fɑꞋ pɔ ndɑꞋ nǔu tɑ́Ꞌ nɛm, ɔ kɛ́ ḿbɛn ḿbíi wɔ́p pɔ pɑ́Ꞌ pɛk lɑ́, lɑ́ mbɔ pɛk lɑ́Ꞌ ńzɛ fɑꞋ mbɑ́ꞋmbɑꞋɑ́, pɛk kɛ́ ńjúk ɛ́fɑꞋ pɔ kɛ́ jẅiitɛ, mɔ́nɛm pɔ́ ńtɔɔ wɛ́k.»

¹³Ŋɡɑŋkɑ́Ꞌ tsɔ́Ꞌ mbɔ̌ wɛcɔ́ tɑ́Ꞌ ŋu nǔu pɔ́p ŋɡɔ: «Súu wɑɑ, ŋ kɑ́ fɑɑnɛ yɛcɔ́ nu mbɔ̌ ɡu pɔ́. Pûu lɑ́Ꞌ ńniitɛ tɛ ḿbɔ́ tɑ́Ꞌ ŋu, pɑ́Ꞌ ɔ ɡʉ cẅɛ́ɛ tɑ́Ꞌ pɑk-ŋkɑ́p nǔu lɛ́Ꞌlɑ́Ꞌ.»

¹⁴Kɔ ŋkɑ́p yu, ɛ́fú nɛjɔ́ŋ mɔ ńtsʉ́ʉtɛ. Ɛ́ ɡʉ nǔu ŋu ẅí ɑ tɔ́ pɔ nzʉʉ, mbɔ n jʉ́ɔ ŋɡɔ ŋ ɡʉ ŋ́ɡɑ́ ndʉ́ŋndʉŋ yúu mi ŋ ɡɑ́nɛ mbɔ̌ ɡu mbɔ̌ wɛ́.

¹⁵Ŋ ɡẅɛɛ nɛlɔk ŋkɑ́p yɑɑ ŋ́ɡɛ yúu mi ŋ kɔŋnɛ, ɛ́ kɑ́ pɔ́ pɔ́Ꞌɔ pɔ́ kɛ? Kɛ ɔ zɑ́ŋ lɔ́ŋ ntɛ́ pɔ nu yí ɔ jʉ́ɔnɛ m bɔ́ ŋɡɑŋ-pɔŋtʉ́m ɔɔ?

¹⁶Yɛ́su pɛn ńcú ŋɡɔ: «Ɛ́ pɔ́Ꞌɔ lɑ́ ɡɑŋ nzʉʉ ɡʉ ńdɑ́Ꞌ ńtsʉ́Ꞌ pɑ pɔ́ mbi, ɡɑŋ mbi tsʉ́Ꞌ pɑ pɔ́ nzʉʉ.»

¹⁷Yɛ́su pɔ́ ḿbʉʉ nɛ́ Yɛlúsɑlɛm, ńdɔɔ ɡɑŋku pɛ́ ntsɔ̌ppɑ́ nɛ́ nɛɡɛ́m, pɔ́p pɛ́pɔ́p pɔ́ ńnɛn, ɑ cú mbɔ̌ pɔ́p ŋɡɔ:

¹⁸«Pʉʉ tsuŋ ńzúꞋ sʉ́Ꞌnɛ, pɛkŋɛ sɛ̂ndúŋ ḿbɔ́ ḿbʉʉ nɛ́ Yɛlúsɑlɛm pɑ́Ꞌɑ, ŋ́kúu zúꞋu, pɛ́ fɛn Mɔ́ɔ-Ŋu mbɔ̌ pɛtɑ́tndɑ́-pɑnɔŋpɔꞋ pɔ́p pɑkyɛ́ꞌtɛ nɛpʉ́ʉ-Mɔ̌sɛ̂ɛ. Pɔ́p ŋɑk wɛ́, ńzɑ́p ŋɡɔ ɑ ɡʉ mpfú,

¹⁹ŋ́ɡɑ́ wɛ́ mbɔ̌ pʉɔ pɔ́p kɑ́ pɔ́ pɑyúdɑ pɔ́, pɔ́p zɔɔtɛ wɛ́, ńdɔk ŋɡwɑɑ ńtswɑ́ɑ wɛ́, ŋ́kẅii wɛ́ nǔu tʉ́ mbɑ́ŋtɛ pɑ́ŋtɛ́nɛ. A pɛn ńzẅíimɛ nǔu nɛvú nǔu mbɑ́ɑtɛ lɛ́Ꞌ pɛtɑ́t.»

²⁰Mɑ́ pɛ́ Jɑ̂k pɔ́p Jɑ̂ŋ, pɔ́ɔ-Zɛbɛ́dɛ́ɛ, lɔk wɔ́p ńtɔ́ mbi Yɛ́su, ŋ́kẅíꞋlɛ sɛ́ nɛlɔ́ɔ yɛcɔ́ yúu mbɔ̌ wɛ́.

²¹Yɛ́su píkŋɛ wɛ́ ŋɡɔ: «Ɔ tsɑ́ɑ ŋɡɔ ŋ ɡɛ ŋɡɔ́ku?» A pʉ̈ɔt ŋɡɔ: «Mɔ sɛ́ ńtsɑ́ɑ ŋɡɔ ɔ pɛ́m mbɔ̌ mɔ ŋɡɔ, ɔ ɡʉ ŋ́ɡɛ ḿbɔ́ fɔɔ, mbɔ́ŋkʉ̈ɔ́ pɑ́ɑ pɔnɛ pɛ́pɑ́ nɑ́ŋ nɛjɔ́ŋ ɡu, tɑ́Ꞌ pɔ́ nǔu ɡúŋ-pɔ́ yú yɛ tʉʉ, wɛcɔ́ pɔ́ nǔu ɡúŋ-pɔ́ yú yɛ ŋkẅɛpmɛ.»

²²Yɛ́su tsɔ́Ꞌ ŋɡɔ: «Pʉʉ kɑ́ jí yúu mi pʉʉ lɔ́ɔnɛ pɔ́. Pʉʉ kuꞋ nɛnɔ́ ntúꞋ-ŋɡʉ̈ɔ́Ꞌ yi ŋ ɡʉ nɛnɔ́?» Pɔ́p pʉ̈ɔt ŋɡɔ: «Pɛk kuꞋ nɛnɔ́.»

²³Yɛ́su cú mbɔ̌ pɔ́p ŋɡɔ: «Ɔ́ɔŋ pʉʉ ɡʉ ŋ́ɡɛ ńnɔ́ ntúꞋ yɑɑ. Lɑ́, ŋ́ɡʉ nǔu nɛtsẅíkŋɛ ŋu nǔu ɡúŋ-pɔ́ yɑ́ɑ yɛ tʉʉ kɛ pɔ yɛ ŋkẅɛpmɛ ɔɔ, mbɔ mɔ kɑ́ nɛ́ ɡẅɛɛ nɛɡɑ́ mbɔ̌ ŋu pɔ́. Tɑ̌ɑ mɔ sɛ́ jínɛ pʉɔ pí ɑ kɑ niitɛ́nɛ yîyɑ́ zʉꞋ ńdɔk ḿbyɛ́p wɔ́p.»

²⁴Pɛcɔ́ ɡɑŋku-Yɛ́su nɛɡɛ́m pɔ́ tɛ ńzúꞋ nu yí pɔ́ɔ-Zɛ́bɛ́dɛ́ cúnɛ, ńzɑ́ŋ lɔ́ŋ ntɛ́ wɔ́p.

²⁵Yɛ́su fúŋ wɔ́p pɛtsʉʉ, ńcú mbɔ̌ pɔ́p ŋɡɔ: «Pʉʉ sɛ́ ńjí ŋɡɔ pɛtɑ́ɑ-ŋɡɔŋ sɛ́ ɛ́sɑ́Ꞌ lɑ́Ꞌ, ńnɔꞋ pʉɔ nɔꞋnɛ, pɛmɑ́pʉɔ pɔ́ ɛ́fyɛ́t lɑ́Ꞌ fyɛ́tnɛ.

²⁶Lɑ́ ɛ́ kɛ́ mbɔɔ pɔŋ ŋɡɔ ɛ́ pɔ́ tsɛtsɛt pʉʉ ḿbɔ́ pɔ́Ꞌɔ pɔ́. Ŋu lɑɑ ḿbɔ́ ŋ́kɔŋ nɛpɔ́ ndʉ́m tsɛtsɛt pʉʉ, mbɔ ɛ́ pɔ́ŋ ŋɡɔ ɑ tsʉ́Ꞌ mɔ́ŋkʉ̈ɔ́ wʉʉ.

²⁷Ŋu nǔu pʉʉ lɑɑ ḿbɔ́ ŋ́kɔŋ nɛpɔ́ ndʉ́m tsɛtsɛt pʉʉ, mbɔ ɛ́ pɔŋ ŋɡɔ ɑ pɛ́m nɛpɔ́ ŋkwɑɑ wʉʉ.

²⁸Ndʉ́ŋndʉŋ pɑ́Ꞌ Mɔ́ɔ-Ŋu ŋkɑɑ tɔ́ ndǔ tsɛ́tsɑ́Ꞌ, pɔ pɑ́Ꞌ pʉɔmɛsɔŋ ɡʉ ɛ́fɑꞋ mbɔ̌ wɛ́ pɔ́, ɑ kɑ tɔ́ pɔ nɛfɑꞋ mbɔ̌ pʉɔmɛsɔŋ, ɛ́fɑꞋ fɑꞋ tɛ ḿbɛn ŋ́ɡɑ́ tú yɛ́ nɛlɔk ńtsúꞋ pʉɔ tɛ ńzɑ́ɑ.»

²⁹Yɛ́su pɔ́p ɡɑŋku pɛ́ ɡɛ ḿbɔ́ ɛ́fú tsɛt tʉ́sɔŋ-Yɛlíkɔ ńcẅɛt, nɔɔ-lɑ́Ꞌ cʉ́ɔ nzʉʉ yɛ́.

³⁰Pɛcɔ́ pɛfʉmík pɛ́pɑ́ pi pɔ́p nɑ́ŋnɛ mbʉʉ-sɛ̂ndúŋ, zúꞋ ŋɡɔ Yɛ́su sɛ́ ńdɛɛ zúꞋu, ńzɛ nɛɡɑ́ ɡwɑ́t, ńcú ŋɡɔ: «Tsɑpʉɔ ŋu nǔu njẅɛt-fɔɔ Ndɑvît tsɑ́ɑ mɛjʉ́ŋ mɛ́k.»

³¹Pʉɔ tɛ ńzɑ́ɑ kɑkŋɛ wɔ́p ŋɡɔ pɔ́p nɑꞋ, lɑ́ pɔ́p ɡɔ́ɔ mɛkŋɛ ŋ́ɡɑ́Ꞌ nɛɡɑ́ ɡwɑ́t ńcú ŋɡɔ: «Tsɑpʉɔ, ŋu nǔu njẅɛt-fɔɔ Ndɑvît tsɑ́ɑ mɛjʉ́ŋ mɛ́k.»

³²Yɛ́su tʉ́ʉ ɛ́fúŋ wɔ́p, ḿbíkŋɛ wɔ́p ŋɡɔ: «Pʉʉ tsɑ́ɑ ŋɡɔ ŋ ɡɛ ŋɡɔ́ku nǔu pʉʉ?»

³³Pɔ́p pʉ̈ɔt ŋɡɔ: «Tsɑpʉɔ, ɡɛ ŋɡɔ mík mɛ́k jʉ́ɔ zʉꞋ.»

³⁴Yɛ́su tsɑ́ɑ mɛjʉ́ŋ mɔ́p, ńzɑ́p mbɔ́ mɛ́ nǔu mík mɔ́p, ɛ́ ɡɔ́ɔ ńzɛ nɛjʉ́ɔ zʉꞋ, pɔ́p cʉ́ɔ nzʉʉ yɛ́.