Read Ngomba Mɑtʉ̈ɔ 25 Bible Online

Mɑtʉ̈ɔ 25 - Ngomba bible

Mɑtʉ̈ɔ 25

¹Yɛ́su pɛn ńcú ŋɡɔ: «Pɔ́Ꞌɔ lɑ́, nu-nɛfɔɔ-Sɛ́ ɡʉ ńdɑ́Ꞌ ɛ́fí nu-pɔ́ɔŋɡɔɔ nɛɡɛ́m pi pɔ́p kɑ tíinɛ mɛkyɛꞋ mɔ́p, ŋ́ɡʉ nɛzɑ́Ꞌ ŋu mbɛ́ɛnɛ ẅí ɑ ɡʉ ńzɔ́Ꞌ.

²Pɛ́ pɛ́tɑɑ pɔ́ tsɛtsɛt pɔ́p ḿbɔɔ jínu ɡẅɛɛ, pɛ́ pɛ́tɑɑ ɡẅɛɛ jínu.

³Pi pɔ́p ŋkɑɑ jínu ɡẅɛɛ kɑ ɡɔ́ ńtíi mɛkyɛꞋ mɔ́p, mbɔɔ ɡẅɛɛ mɛcɔ́ mɛɡwɛ́t tsɛt yɛcɔ́ yúu ndɛꞋ pɔ́.

⁴Pi pɔ́p kɑ ɡẅɛɛnɛ jínu kɑ ɡɔ́ ńtíi mɛkyɛꞋ mɔ́p, ḿbɛn ńníꞋ mɛcɔ́ mɛɡwɛ́t tsɛt yɛcɔ́ yúu ndɛꞋ ŋ́ɡẅɛɛ.

⁵Ŋu ẅí ɑ ɡʉ ńzɔ́Ꞌ, pɔɔ fɛ́Ꞌnɛ ńtɔ́ pɔ́, pɔ́p nɑ́ŋ tɛ fɛlɔ́k ɡẅɛɛ wɔ́p pɔ́p lɛ́tɛ.»

⁶TʉʉtúꞋ ɡɛ kuꞋ, pɛ́ zúꞋ ŋu lɔk ŋɡi tɛnnɛ ŋɡɔ: «Ŋu ẅí ɑ ɡʉ ńzɔ́Ꞌ pʉ́ɔ ɑ tɔ́nɛ lɑɑ, pʉʉ cẅɛt ŋ́ɡʉ ńzɑ́Ꞌ wɛ́.»

⁷Pɔ́ɔŋɡɔɔ pɑ́ pɛtsʉʉ ɡɔ́ɔ ńjʉɔmɛ, mbɑ wɔ̌ lɑ́ kɑꞋ ŋkʉ-lɑ̂m yɛ́.

⁸Pi pɔ́p kɑ́ ɡẅɛɛ jínu pɔ́ lɑ́, cú mbɔ̌ pi pɔ́p ɡẅɛɛnɛ jínu ŋɡɔ: «Mɛ́k mɛkyɛꞋ sɛ́ ḿbɛ́, pʉʉ ɡɑ́ wɛ́k nɛ mɔ́zʉꞋ nǔu mɛɡwɛ́t mʉ́ʉ lɑ́.»

⁹Pi pɔ́p ɡẅɛɛnɛ jínu pʉ̈ɔt ŋɡɔ: «Pɛk kɛ́ ɡɑ́ pɔ́, pɛk lɑɑ ŋ́ɡɑ́, mbɔ mɛ́k ɡʉ ńjɑ́k. Pʉʉ ɡʉ pɔ ndɑ́-mɛtɑ́ɑ ńzúu mʉ́ʉ.»

¹⁰Pɔ́p ɡʉ nɛzúu, ŋu ẅí ɑ zɔ́Ꞌnɛ tsʉ́Ꞌ ńtɔ́, pɔ́p pɛ́ pɔ́ɔŋɡɔɔ pínɛ yɛcɔ́ yúu ŋkɑɑ ḿbɔ́ ńjɑ́k wɔ́p pɔ́ kúu ndɑ́-ndínɑ-lɑ́ɑndɑ́, pɛ́ jʉ́ɔꞋ ntsundɑ́.

¹¹Pɛ́ nɑ́ŋ tɛ ńzúꞋ pɑ́Ꞌ pɛcɔ́ pɔ́ɔŋɡɔɔ pí pɔ́p lɑ́Ꞌnɛ ŋ́ɡʉ zúu mɛɡwɛ́t lɑ́ púꞋtɛnɛ ntsundɑ́, ḿbɔ́ ńcú ŋɡɔ: «Ndɛ, Ndɛ, pɛ́ tsɔ́Ꞌ ntsundɑ́ ŋ́ɡɑ́ mbɔ̌ pɛk.»

¹²Lɑ́ ɑ cú mbɔ̌ pɔ́p ŋɡɔ: «Lɑ́ ɛ sẅíi wʉ́ʉ, kwɑꞋ nɛ́nẅín, ŋ kɑ́ pɔ́ ńjí wʉ́ʉ pɔ́.»

¹³Yɛ́su mikŋɛ ŋɡɔ: «Ɛ́ yɛ́tɛ́ lɑ́ pʉʉ pɑ́ɑ nɛmɛꞋ mbʉʉ yʉʉ, mbíꞌŋɡɔ pʉʉ kɑ́ pɔ́ ńjí lɛ́Ꞌ pɔ́, ŋ́kɛ́ ḿbɔɔ ḿbɔ́ ńjí ŋkɑ́ yi Mɔ́ɔ-Ŋu ɡʉ ńdɑ́Ꞌ ńtɔ́ pɔ́.»

¹⁴Ɛ́ ɡʉ ńdɑ́Ꞌ ḿbɔ́ pɔ pɑ́Ꞌ nu-ŋu ẅí ɑ kɑ tsʉ́Ꞌ nɛɡʉ nɛnɛn, ɛ́fúŋ ɡɑŋfɑꞋ pɛ́, ńnɑ́ ŋkɑ́p yɛ mbɔ̌ pɔ́p,

¹⁵ńdʉŋtɛ yɛ́ mbɑ wɔ̌ lɑ́ pɔ nǔu wɛ́, ńnɑ́ ŋkɑ́p pɑk ŋkʉ yɛ́tɑ́ɑ mbɔ̌ nduŋmbi, ńnɑ́ ŋkɑ́p pɑk ŋkʉ yɛ́pɑ́ mbɔ̌ mbɑ́ɑtɛ, ńnɑ́ pɑk ŋkʉ mbɔ̌ mbɑ́ɑtɛ yɛ́tɑ́t, ŋ́ɡɔ́ɔ ŋ́kɛ́ ŋ́ɡʉ.

¹⁶ŊɡɑŋfɑꞋ ẅí pɛ́ kɑ nɑ́nɛ ŋkɑ́p pɑk ŋkʉ yɛ́tɑ́ɑ mbɔ̌ wɛ́, tsʉ́Ꞌ ŋ́ɡɔ́ɔ fɛ́ꞌnɛ ńtɑ́ŋ yɛ́, tɛ ńjʉ́ yɛcɔ́ pɑk ŋkʉ yɛ́tɑ́ɑ.

¹⁷Ŋu ẅí pɛ́ kɑ nɑ́nɛ yɛ́ pɑk ŋkʉ yɛ́pɑ́, pɛn ńjʉ́ yɛ́ yɛcɔ́ pɑk ŋkʉ yɛ́pɑ́.

¹⁸Lɑ́, ŋu ẅí pɛ́ kɑ nɑ́nɛ pɑk ŋkʉ mbɔ̌ wɛ́ lɑ́, ɡʉ ńtúŋ ɡɛm tsɛt tsɛ́tsɑ́Ꞌ, ńdẅɛꞋ ŋkɑ́p tɑ́t wɛ tsɛtú.

¹⁹Ntí nɑꞋ ɛ́sɑk, tɑ́t pɛ́ ɡɑŋfɑꞋ pɔnɛ pɛ́tɑ́t pɛn nzʉʉ, ɛ́fúŋ wɔ́p ḿbíkŋɛ pɑ́Ꞌ pɔ́p kɑ tsʉ́Ꞌnɛ ŋ́ɡɛ nǔu ŋkɑ́p pɔ́Ꞌɔ.

²⁰Ŋu ẅí ɑ kɑ nɑ́nɛ ŋkɑ́p pɑk ŋkʉ yɛ́tɑ́ɑ mbɔ̌ wɛ́ tɔ́, ńnyɛt yɛ́ yɛcɔ́ pɑk ŋkʉ yɛ́tɑ́ɑ, ńcú ŋɡɔ: «Ndɛ ɔ kɑ nɑ́ ŋkɑ́p pɑk ŋkʉ yɛ́tɑ́ɑ mbɔ̌ mɔ, ŋ ɡɛ pɑk ŋkʉ yɛ́tɑ́ɑ zɑ́pmɛ nǔu.»

²¹Tɑ́t wɛ cú mbɔ̌ wɛ́ ŋɡɔ: «Ɛ́ pɔŋ, ɔ ŋɡɑŋfɑꞋ sʉ́Ꞌnɛ, ɔ kɑ ɡɛ yúu mi ŋ kɑ pɔ́ ńzẅíꞋlɛ mbɔ̌ ɡu, pɑ́Ꞌ ɔ kɑ pɑ́ɑnɛ mɔ́ɔ mɔ́yúu sʉ́Ꞌnɛ lɑ́, ŋ ɡʉ ńníꞋ yúu mbɔ̌ ɡu tɛꞋ. Tɔ́ pûu tsɑ́ɑtɛ.»

²²Ŋu ẅí ɑ kɑ nɑ́nɛ ŋkɑ́p pɑk ŋkʉ yɛ́pɑ́ mbɔ̌ wɛ́ lɑ́ tɔ́ yɛ́, ńcú ŋɡɔ: «Ndɛ, ɔ kɑ nɑ́ ŋkɑ́p mbɔ̌ mɔ pɑk ŋkʉ yɛ́pɑ́, jʉ́ɔ yɛcɔ́ pɑk ŋkʉ yɛ́pɑ́ yi ɛ́ zɑ́pmɛ́nɛ nǔu.»

²³Tɑ́t wɛ cú mbɔ̌ wɛ́ ŋɡɔ: «Ɛ́ pɔŋ, ɔ ŋɡɑŋfɑꞋ sʉ́Ꞌnɛ, ɔ kɑ ɡɛ yúu mi ŋ kɑ pɔ́ ńzẅíꞋlɛ mbɔ̌ ɡu, pɑ́Ꞌ ɔ kɑ pɑ́ɑnɛ mɔ́ɔ mɔ́yúu sʉ́Ꞌnɛ lɑ́, ŋ ɡʉ ńníꞋ yúu mbɔ̌ ɡu tɛꞋ. Tɔ́ pûu tsɑ́ɑtɛ.»

²⁴Lɑ́ ŋu ẅí ɑ kɑ nɑ́nɛ ŋkɑ́p pɑk ŋkʉ mbɔ̌ wɛ́ lɑ́ tɔ́ yɛ́, ńcú ŋɡɔ: «Ndɛ, ŋ kɑ pɔ́ ńjí ŋɡɔ ɔ ŋu ńtɛn tɛꞋ, ŋ́kɑ́p yúu zʉꞋ yí ɔ ŋ́kɑɑ zúꞋu mɑꞋ, ḿbʉ̈ɔ́Ꞌ yúu zʉꞋ yí ɔ ŋ́kɑɑ zúꞋu pi.

²⁵Ŋ kɑ pɔ́ ḿbɔ́k wú, ŋ́ɡʉ ńdẅɛꞋ mɛpɑk-ŋkɑ́p mú tsɛt tsɛ́tsɑ́Ꞌ, ɛ́ pʉ́ɔlɑɑnɛ! Ŋkɑ́p yu pʉ́ɔ.»

²⁶Lɑ́, tɑ́t wɛ pʉ̈ɔt mbɔ̌ wɛ́ ŋɡɔ: «Ɔ ŋɡɑŋfɑꞋ kɛpɔŋ, ḿbɔ́ ndɔ́ŋ, ɔ kɑ pɔ́ ńjí ŋɡɔ n dɔ ŋ́kɑ́p yúu zʉꞋ yí mɔ ŋ́kɑɑ zúꞋu mɑꞋ, ḿbʉ̈ɔ́Ꞌ yúu zʉꞋ yí mɔ ŋ́kɑɑ zúꞋu pi.

²⁷Ɔ kɑ pɔ́ ńjí pɔ́Ꞌɔ, kʉ̈ɔ́ ɡɛ, ɔ pɔɔ ɡʉ ŋ́ɡɑ́ ŋkɑ́p yɑɑ mbɔ̌ pɑtɑ́ŋ ŋkɑ́p pɑ́Ꞌ ŋ ɡʉ ŋ́ɡɛ ŋ́ɡɔ ńtɔ́ ńcẅɛ́ɛ, pii zɑ́pmɛ nǔu pɔ́ ɔɔ?

²⁸Pʉʉ cẅɛ́ɛ ŋkɑ́p ɛ̂yɑ́ pɑk ŋkʉ mbɔ̌ wɛ́, ŋ́ɡɑ́ mbɔ̌ ŋu ẅí ɑ ɡẅɛɛnɛ ntsɑ́Ꞌ mbʉʉ,

²⁹mbíꞋŋɡɔ ŋu lɑɑ ɛ́sɑ́Ꞌ tʉʉ lɑ́ ŋ́ɡẅɛɛ yúu, mbɔ pɛ́ ɡʉ ŋ́kẅiꞋ, ɑ ɡẅɛɛ ɛ́ zɑ́ɑ, lɑ́ ŋu kɛ́ mbɔɔ sɑ́Ꞌ tʉʉ pɔ́, mbɔ pɛ́ ɡʉ ɛ́fú mbɔ̌ wɛ́ cẅɛ́ɛ mbɑ mɔ́zʉꞋ yí ɑ ɡẅɛɛnɛ.

³⁰Pʉʉ ɡẅɛɛ ŋɡɑŋfɑꞋ kɛ́ kuꞋ nǔu yɛcɔ́ nu wɑ́, ḿmɑꞋ wɛ́ píi tsɛt fɛ́m nzɛ́nzʉ́ʉ. A nɑ́ŋ zúꞋu ńdɑɑ, ḿbɔ́ ŋ́kwɛ́t mɛsɔŋ.»

³¹Mɔ́ɔ-Ŋu ɡʉ ḿbɔ́ tɛ ńtɔ́ tsɛt nɛɡúꞋ wɛ, tɛ pɔ́p pɛcʉ̈ɔ́Ꞌ pɛ́ pɔ́nɛ, ɑ nɑ́ŋ ndǔ kɔꞋ yɛ́, ḿbɔ́ fɔɔ ẅí yɛcɔ́ yúu kɑ́ tsɑ wɛ́ pɔ́.

³²Mɛlɑ́Ꞌ tsʉʉ cúꞋlɛ mbi yɛ́, ɑ tíitɛ pʉɔ, ɛ́fɑk pɑ́Ꞌ mbyɛ́p mbí fɑk mɛnjinjɔ nǔu mbí ntʉʉ lɑ́,

³³ńtík mɛnjinjɔ nǔu ɡúŋ-pɔ́ yɛ́ yi tʉʉ, ńtík mbí ntʉʉ nǔu ɡúŋ-pɔ́ yɛ́ yi ŋkẅɛpmɛ.

³⁴Fɔɔ ɡɔ́ɔ ŋ́kɛ́ ńcú mbɔ̌ pʉɔ pí pɔ́p nǔu ɡúŋ-pɔ́ yɛ́ yi tʉʉ ŋɡɔ: «Pʉʉ ẅínɛ tɑ̌ɑ mɔ kɑ níꞋnɛ mbɔ́tnɛ nǔu pʉʉ, pʉʉ tɔ́ ŋ́kúu tsɛt nɛfɔɔ ní Sɛ́ kɑ lɑ́Ꞌ ńniitɛ ńdɔk ńzẅíꞋlɛ wʉ́ʉ tɛ ɛ́fú nɛnɔŋ ŋɡɔŋ.

³⁵MbíꞋŋɡɔ, njí kɑ pɔ́ ńzɑ́ŋ wɑ́ɑ, pʉʉ ɡɑ́ yúu ŋ kwɛ́t, ɡɑ́k yɑ́ɑ pɔ́ shí, pʉʉ ɡɑ́ ŋki n nɔ́, ŋ kɑ pɔ́ ŋɡʉʉ pʉʉ kúkŋɛ wɑ́ɑ.

³⁶Mɔ ŋ́kɑɑ ndẅí mɑꞋ pʉʉ ɡɑ́ ndẅí, m mɑꞋ. Ŋ kɑ pɔ́ ŋ́ɡɔɔ, pʉʉ tɔ́ ńtsɑꞋ ɡɔɔ yɑ́ɑ. Ŋ kɑ pɔ́ ndɑ́tsɑ́ŋ, pʉʉ tɔ́ ńdíŋɛ wɑ́ɑ.»

³⁷Pʉɔ ɛ̂pɑ́ pi pɔ́p kɑ ɡɛnɛ yúu mi Sɛ́ sɛ́ ŋ́kɔŋ zúꞋ pɔ́Ꞌɔ, ḿbíkŋɛ ŋɡɔ: «Tsɑpʉɔ, njí kɑ zɑ́ŋ wú shʉ́n, tɛ pɛk jʉ́ɔ wú ŋ́ɡɑ́ yúu ɔ kwɛ́t? Gɑ́k yú shí shʉ́n, tɛ pɛk jʉ́ɔ wú ŋ́ɡɑ́ ŋki, ɔ ńnɔ́?

³⁸Ɔ kɑ pɔ́ ŋɡʉʉ pɑ́Ꞌɑ shʉ́n, tɛ pɛk kúkŋɛ wú? Ɔ ŋ́kɑɑ ndẅí shʉ́n mɑꞋ lɑ pɛk ɡɑ́ ndẅí ɔ mɑꞋ?

³⁹Ɔ kɑ pɔ́ shʉ́n ḿbɔ́ ŋ́ɡɔɔ, ḿbɔ́ ndɑ́tsɑ́ŋ shʉ́n tɛ pɛk tɔ́ ńdíŋɛ wú?»

⁴⁰Fɔɔ pʉ̈ɔt mbɔ̌ pɔ́p ŋɡɔ: «Ɛ sẅíi wʉ́ʉ, kwɑꞋ nɛ́nẅín, mbɑ yɛ́tɛ́ ŋkɑ́ ɔɔ yi pʉʉ kɑ ɡɛnɛ mɔnɛ mɛnu, nǔu wɛ́t mɔ́ɔ mɔ́ŋu ẅí ɑ mɔ́ɔmɑ́ mɔ lɑ́, mbɔ pʉʉ kɑ pɔ́ ŋ́ɡɛ pɔ nǔu mɔ.»

⁴¹Ŋ́ɡɔ́ɔ ŋ́kɛ́ ḿbɛn ńcú mbɔ̌ pʉɔ pí pɔ́p nǔu ɡúŋ-pɔ́ yɛ́ yi ŋkẅɛpmɛ, ɛ́ yɛ́tɛ́: «Pʉʉ ɡɑŋndɔɔ, pʉʉ fú nɛjɔ́ŋ mɔ ŋ́ɡʉ tɛ ŋɡɑ sɑk, ŋ́kúu tsɛt múk ẅi ɛ́ kɛ́ lɑ́Ꞌ ḿbɛ́ pɔ́, ẅi pɛ́ kɑ niitɛ́nɛ ntɛ́ Sɑ́ttɑ pɔ́p pɛcʉ̈ɔ́Ꞌ pɛ́.

⁴²MbíꞋŋɡɔ njí kɑ zɑ́ŋ wɑ́ɑ, pʉʉ pɔɔ ɡɑ́ yúu ŋ kwɛ́t pɔ́, ɡɑ́k yɑ́ɑ shí, pʉʉ pɔɔ ɡɑ́ ŋki n nɔ́ pɔ́.

⁴³Ŋ kɑ pɔ́ ŋɡʉʉ, pʉʉ pɔɔ wɑ́ɑ kúkŋɛ. Mɔ ŋ́kɑɑ ndẅí mɑꞋ, pʉʉ pɔɔ ɡɑ́ ndẅí m mɑꞋ pɔ́. Ŋ kɑ pɔ́ ŋ́ɡɔɔ, ḿbɛn ŋ́ɡɛ ḿbɔ́ ndɑ́tsɑ́ŋ, pʉʉ pɔɔ wɑ́ɑ líŋɛ.»

⁴⁴Pɔ́p ɡúu pɛn ńcú ŋɡɔ: «Tsɑpʉɔ, pɛk kɑ jʉ́ɔ wú shʉ́n, njí pɔ́ zɑ́ŋ wú, ńjʉ́ɔ wú shʉ́n, ɡɑ́k yú pɔ́ shí, ńjʉ́ɔ wú shʉ́n, ɔ pɔ́ ŋɡʉʉ, ńjʉ́ɔ wú shʉ́n ɔ pɔ́ kɛ́ mɑꞋ ndẅí, ńjʉ́ɔ wú shʉ́n, ɔ pɔ́ ŋ́ɡɔɔ, ńzúꞋ shʉ́n ɔ pɔ́ ndɑ́tsɑ́ŋ, pɛk pɔɔ wú cẅɛ́lɛ́?»

⁴⁵Fɔɔ tsɔ́Ꞌ mbɔ̌ pɔ́p ŋɡɔ: «Ɛ sẅíi wʉ́ʉ, kwɑꞋ nɛ́nẅín, mbɑ yɛ́tɛ́ ŋkɑ́ lɑ́ yi pʉʉ ŋ́kɑɑ ɡɛ mɔnɛ mɛnu nǔu wɛ́t mɔ́ɔ mɔ́ŋu ẅí ɑ mɔ́ɔmɑ́ mɔ pɔ́, mbɔ pʉʉ ŋ́kɑɑ pɛn ŋ́ɡɛ yúu nǔu mɔ pɔ́.»

⁴⁶Pɔnɛ pʉɔ ɡɔ́ɔ ŋ́kɛ́ ŋ́ɡʉ nɛ́ zʉꞋ yí pɔ́p ɡʉ ńdɑ́Ꞌ ńtswɛ́ zúꞋu, ńjʉ́ɔ pɔ ŋɡʉ̈ɔ́Ꞌ kɛ́ mɛ. Pʉɔ pí pɔ́p kɑ ɡɛnɛ yúu mi Sɛ́ sɛ́ ŋ́kɔŋ, pɔ́p kúu tsɛt luk kɛ́ mɛ.