Read Ngomba Mɑtʉ̈ɔ 26 Bible Online

Mɑtʉ̈ɔ 26 - Ngomba bible

Mɑtʉ̈ɔ 26

¹Yɛ́su kɑ zíꞋ nu-Sɛ́ mbɔ̌ pʉɔ tɛ ḿbɔ́tnɛ ńnɑ́ŋ, ńcú mbɔ̌ ɡɑŋku pɛ́ ŋɡɔ:

²«Pʉʉ zɛɛ ḿbɔ́ ńjí ŋɡɔ, ɛ́ tsʉ́Ꞌ ńjɑ́k pɔ lɛ́Ꞌ pɛ́pɑ́ pɛ́ jʉ́ ndínɑ-Pɑ́skɑ. Ŋkɑ́ yi pɛ́ ɡʉ ɛ́fɛn Mɔ́ɔ-Ŋu, pɛ́ kẅii wɛ́ nǔu tʉ́ mbɑ́ŋtɛ pɑ́ŋtɛ́nɛ.»

³Ɛ́ pɔ́ pɔ nǔu mɛlɛ́Ꞌ ɛ̂mɑ́, pɛtɑ́tndɑ́-pɑnɔŋpɔꞋ pɔ́p pɛkɛ́m-lɑ́Ꞌ cúꞋlɛ ntɔ́Ꞌ-Kɑyífɑ, ɑ pɔ́ nɔŋpɔꞋ wɛ ɡwɛ́,

⁴ńcúꞋlɛ pɔ́Ꞌɔ, ńzɑ́p ŋɡɔ pɔ́p ɡʉ ɛ́sɔ́tɛ ŋ́ɡẅɛɛ Yɛ́su, ńjẅí wɛ́.

⁵Lɑ́ pɔ́p pɔ́ ńcú ŋɡɔ kɔɔ pɛ́ kɛ́ ŋ́ɡẅɛɛ wɛ́ lɛ́Ꞌ-ndínɑ, ḿbɔ́k lɑ́Ꞌ nɛtɑ́k zʉꞋ.

⁶Ɛ́ pɔ́ ŋkɑ́ ɛ̂yɑ́ Yɛ́su pɔ́ Mbɛtɑni, ndɑ́-Símɔ̂ŋ, ŋɡɑŋkɑꞋpɑ́p,

⁷ńnɑ́ŋ sɛ́ ḿbɔ́ ŋ́kwɛ́t yúu, wɛcɔ́ mɑŋɡɛ́ kúu yɛ́ ndɑ́, ŋ́ɡɔ́ ńtɔ́ nɛjɔ́ŋ Yɛ́su ŋ́ɡẅɛɛ ndɑ́ŋ, yɛcɔ́ lɑmɛ́ndɑɑ yí ɛ́ cʉ́ɔk ŋkɑ́p tɛꞋ pɔ́ tsɛtú, ɑ tswɛtɛ tú-Yɛ́su.

⁸Gɑŋku-Yɛ́su jʉ́ɔ, ɛ́ pʉ́k wɔ́p tɛꞋ, pɔ́p sẅíitɛ ŋɡɔ: «A zɛɛ ḿbʉ́ʉpɛ yɔ lɑmɛ́ndɑɑ mɛlɑ́Ꞌ kʉ̈ɔ́?

⁹Ɛ́ ńdɑɑ ḿbɔ́ pɛ́ fɛn, ńcẅɛ́ɛ mɑ́mɑ́ ŋkɑ́p, ŋ́ɡɑ́ mbɔ̌ pɛpúŋ.»

¹⁰Yɛ́su jí kwɑŋɛ yɔ́p, ńcú mbɔ̌ pɔ́p ŋɡɔ: «Pʉʉ ɡɑ́ɑnɛ mɛlɑ́Ꞌ kʉ̈ɔ́? A ɡɛ pɔ nu sʉ́Ꞌnɛ nǔu mɔ.

¹¹Pʉʉ ɡʉ ḿbɔ́ ńjʉ́ɔ pɛpúŋ pɔ ŋkɑ́ tsʉʉ, lɑ́ ŋ́ɡʉ nǔu mɔ, mbɔ pɛkŋɛ kɛ́ pɔ́ ŋkɑ́ tsʉʉ pɔ́.

¹²Mɑŋɡɛ́ wɔ lɔk yɔ lɑmɛ́ndɑɑ ńzɔ́Ꞌ mbʉʉ yɑɑ, ńdɔk ńzɑ́Ꞌ njí ńzɔ́Ꞌ wɑ́ɑ lɑ pɛ́ tɑ́ɑ ńníꞋ wɑ́ɑ nɛshi.

¹³Ɛ sẅíi wʉ́ʉ, kwɑꞋ nɛ́nẅín, mbɑ ɡɔ́ lɑ́ yi pɛ́ ɡʉ ńdɑ́Ꞌ ńcẅi Ŋkʉʉ sʉ́Ꞌnɛ-Sɛ́ zúꞋu ndǔ mbí ɔɔ, pɛ́ ɡʉ ńdɑ́Ꞌ ḿbɛn ḿbɔ́ ńcú yúu mi mɑŋɡɛ́ wɑ́ ɡɛnɛ, ńdɔk kẅíitɛ wɛ́.»

¹⁴Wɛcɔ́ tɑ́Ꞌ ŋu nǔu pʉɔ ntsɔ̌ppɑ́ nɛ́ nɛɡɛ́m, lík yɛ́ pɔ́ Jẅidɑ Iskɑlyɔt, ɡʉ ńjʉ́ɔ pɛtɑ́tndɑ́-pɑnɔŋpɔꞋ,

¹⁵ńcú mbɔ̌ pɔ́p ŋɡɔ: «N dɑɑ ńnyɛt wʉ́ʉ pɑ́Ꞌ pʉʉ ɡʉ ŋ́ɡɛ lɑ ŋ́ɡẅɛɛ Yɛ́su, pʉʉ ɡɑ́ kʉ̈ɔ́ mbɔ̌ mɔ?» Ɛ́ ɡɛ pɔ́Ꞌɔ, pɔ́p ɡɑ́ ŋkɑ́p pɑk mɛɡɛ́mɛ́ntɑ́t mbɔ̌ wɛ́.

¹⁶A cẅɛ́ɛ, ńzɛ nɛlɔɔ shʉ́ pɑ́Ꞌ ɑ ɡʉ ɛ́fɛn Yɛ́su mbɔ̌ pɔ́p.

¹⁷Ɛ́ ɡɛ ḿbɔ́ nduŋmbi lɛ́Ꞌlɑ́Ꞌ nǔu ŋɡɑp yí pɛ́ ḿbɔ́ ŋ́kwɛ́t mbɛlɛ̂ɛt kɛ́ fɛntɛ, ńdɔk ńjʉ́ ndínɑ-Pɑ́skɑ, ɡɑŋku-Yɛ́su tɔ́ ḿbíkŋɛ wɛ́ ŋɡɔ: «Ɔ kɔŋ ŋɡɔ pɛk ɡʉ ɡɔ́, ńniitɛ yúujʉ́-Pɑ́skɑ zúꞋu?»

¹⁸Yɛ́su cú mbɔ̌ pɔ́p ŋɡɔ: «Pʉʉ ɡʉ tʉ́sɔŋ, ńjʉ́ɔ mɑ́kɛkɛ, ńcú mbɔ̌ wɛ́ ŋɡɔ: Cícɑ cú ŋɡɔ pɛk sẅíi wú ŋɡɔ yɛ́ ŋkɑ́ pɑ́Ꞌɑ ḿbɔ́ ŋ́kuꞋ, ɑ sɛ́ ŋ́kɔŋ ŋɡɔ pɔ́p ɡɑŋku pɛ́ jʉ́ wɔp ndínɑ-Pɑ́skɑ pɔ njɛ́Ꞌ wu.»

¹⁹Gɑŋku pɛ́ ɡɛ pɔ ndʉ́ŋndʉŋ pɑ́Ꞌ ɑ cúnɛ, ńniitɛ yúupɛjʉ́-Pɑ́skɑ zúꞋu.

²⁰Ɛ́ ɡɛ ḿbɔ́ ntsuŋkẅɛ́Ꞌ, Yɛ́su pɔ́p ɡɑŋku pɛ́ ntsɔ̌ppɑ́ nɛ́ nɛɡɛ́m nɑ́ŋ sɛ́ nɛkwɛ́t yúu.

²¹Pɔ́p pɔ́ ŋ́kwɛ́t yúu, Yɛ́su cú ŋɡɔ: «Ɛ sẅíi wʉ́ʉ, kwɑꞋ nɛ́nẅín, wɛcɔ́ tɑ́Ꞌ ŋu tsɛtsɛt pʉʉ ɡʉ ɛ́fɛn wɑ́ɑ.»

²²Pɔ́p zúꞋ, ḿbuu ḿmʉk, mbɑ wɔ̌ lɑ́ tsɛtsɛt pɔ́p píkŋɛ ŋɡɔ: «Ndɛ, ḿbɔ́ ɛ́ pɔ́ mɔ?»

²³Yɛ́su pʉ̈ɔt mbɔ̌ pɔ́p ŋɡɔ: «Ŋu ẅí pɔ́ yɛ́kŋɛ ɡʉ ḿbuutɛ tsɛt kɑ́ŋ, ɑ ŋu ẅí ɑ ɡʉ ɛ́fɛn wɑ́ɑ.»

²⁴Mɔ́ɔ-Ŋu ɡʉ ḿpfú, ɛ́ pɔ́ pɑ́Ꞌ pɛ́ kɑ cúnɛ tsɛt ŋwɑꞋnɛ-Sɛ́, lɑ́, pʉ́ktú ŋu ẅí ɑ ɛ́fɛn wɛ́. Mbi pɑ́Ꞌ pɛ́ ŋ́kɑɑ ŋ́ɡʉ ḿbí wɛ́ pɔ́.

²⁵Jẅidɑ, ŋɡɑŋmɛnɑŋ ɛ̂wɑ́, píkŋɛ yɛ́ Yɛ́su ŋɡɔ: «Cícɑ ɔ lɑ́Ꞌ wɑ́ɑ kɛkʉ̈ɔ́?» Yɛ́su pʉ̈ɔt mbɔ̌ wɛ́ ŋɡɔ: «Gu kɛ́ nɛ́ ńcú!»

²⁶Pɔ́p pɛ́pɔ́p pɔ́ ńjʉ́ yúupɛjʉ́, Yɛ́su pɛ́ɛ mbɛlɛ̂ɛt, ŋ́ɡɑ́ pɑꞋlɑ́ mbɔ́-Sɛ́, ḿbʉ̈ɔ́Ꞌtɛ ŋ́ɡɔ ŋ́ɡɑ́ mbɔ̌ ɡɑŋku pɛ́, ńcú ŋɡɔ: «Pʉʉ kɔ ŋ́kwɛ́t, yɔ mbɑp-mbʉʉ yɑɑ,»

²⁷ḿbɛn ńtíi ntúꞋ-mɛluꞋ, ŋ́ɡɑ́ pɑꞋlɑ́ mbɔ̌ Sɛ́, ŋ́ɡɔ́ ŋ́ɡɑ́ mbɔ̌ ɡɑŋku pɛ́, ńcú ŋɡɔ: «Pʉʉ kɔ ńnɔ́ pɛtsʉʉ.

²⁸MbíꞋŋɡɔ yɔ mɛci mɑ́ɑ, ɛ́ mɛci mí Sɛ́ lɔknɛ ŋ́ɡwɑt kɑɑ, ɛ́ mi ɛ́ tswɛtnɛ nǔu tú-pʉɔ tɛ ńzɑ́ɑ, pɑ́Ꞌ Sɛ́ ɡʉ ńdɔk ńdikŋɛ mɛnu kɛpɔŋ mɔ́p.

²⁹Ɛ sẅíi wʉ́ʉ, ŋ kɛ́ lɑ́Ꞌ ḿbɛn ńnɔ́ mɔnɛ mɛluꞋ pɔ́, tɛ ńdɑ́Ꞌ ńtsʉ́Ꞌ ńnɔ́ pɔ mɛ fí ŋkɑ́ yi pɛkŋɛ ńtsʉ́Ꞌ ḿbɔ́ pɔ tsɛt nɛfɔɔ-Tɑ̌ɑ mɔ.»

³⁰Ŋ́ɡɛ pɔ́Ꞌɔ, pɔ́p pɛ́pɔ́p ɡɔ́ɔ ŋ́kɛ́ ńzɔp mɛŋki ńdɔk ŋ́ɡúꞋlɛ Sɛ́, ŋkɑ́ kuꞋ pɔ́p cẅɛt, ŋ́ɡʉ nɛ́ ndǔ nɛŋkɔ́Ꞌ-mɛtʉ́-mɛɡwɛ́t-ɔliivɛ.

³¹Pɔ́p pɔ́ ŋ́ɡʉ, Yɛ́su cú mbɔ̌ pɔ́p ŋɡɔ: «Ɛ́ ɡʉ ŋ́ɡɛ ḿbɔ́ nɛtúꞋ lɔ́Ꞌnɛ, pʉʉ pɛtsʉʉ tɛmtɛ ḿmɛꞋ wɑ́ɑ ŋ́kʉɔ, ɛ́ puutɛ pɑ́Ꞌ pɛ́ kɑ ŋwɑꞋnɛ́nɛ ŋɡɔ Sɛ́ cú ŋɡɔ: Mɔ, ŋ ɡʉ ńdɑ́Ꞌ ńjẅí mbyɛ́p mbí, mɛnjinjɔ mɛ́ sɑt tɛt.»

³²Yɛ́su pɛn ńcú ŋɡɔ: «Mɔ, ŋ ɡʉ ŋ́ɡɛ ḿbɔ́ tɛ ńzẅíimɛ nǔu nɛvú, ḿbiitɛ Ŋɡɑlilɛɛ ńzẅíꞋlɛ wʉ́ʉ.»

³³Pyɛ̂ cú mbɔ̌ wɛ́ ŋɡɔ: «Pɛcɔ́ pʉɔ lɑɑ ḿmɛꞋ wú ŋ́kʉɔ pɛtsʉʉ, mbɔ ɛ́ lɑɑ ḿbɔ́ m bɔɔ wú mɛꞋ.»

³⁴Yɛ́su pʉ̈ɔt mbɔ̌ wɛ́ ŋɡɔ: «Lɑ́ ŋ kɛ́ ɛ́sẅíi wú, kwɑꞋ nɛ́nẅín, mɔ̂ŋkʉ̈ɔ́Ꞌ ɡʉ ŋ́ɡɛ ŋ́ɡɔ́ ńtɔ́ŋ nɛtúꞋ lɔ́Ꞌnɛ, mbɔ ɔ muŋɛ wɑ́ɑ ŋkɑ́ yɛ́tɑ́t.»

³⁵Pyɛ̂ cú mbɔ̌ wɛ́ ŋɡɔ: «Pɛ́ lɑɑ ńzɛɛ ńtɛmtɛ wûu ḿbɔ́ ńdɔk ŋ́ɡʉ pɔ nɛjẅí, mbɔ ɛ́ lɑɑ ḿbɔ́ m bɔɔ wú muŋɛ!» PfuꞋ ɡɑŋku pɛ́ pɛtsʉʉ pɛn ńcú yɔ́p pɔ pɔ́Ꞌɔ.

³⁶Yɛ́su pɔ́p ɡɑŋku pɛ́ ɡʉ tɛ ŋ́kúu yɛcɔ́ zʉꞋ-ŋkɑ́Ꞌ yí pɛ́ fúŋnɛ ŋɡɔ Ŋɡɛ̂tsɛ́mɑnî, ɑ cú mbɔ̌ pɔ́p ŋɡɔ: «Pʉʉ nɑ́ŋ zɑꞋnɛ, ŋ ɡʉ zíꞋnɛ ńcɛꞋlɛ Sɛ́,»

³⁷ɛ́fɑk pyɛ̂ pɔ́p mbɔ́ŋkʉ̈ɔ́ Zɛbɛ́dɛ̂ pɛ́pɑ́, pɔ́p pɛpɔ́p ɡʉ, ɑ zɛ nɛzúꞋ kɛ́kɑ́ŋ tʉ́m yɛ́, nɛvú kwɛ́t wɛ́,

³⁸ŋ́ɡɔ́ɔ ŋ́kɛ́ ńcú mbɔ̌ pɔ́p ŋɡɔ: «Tʉ́m yɑ́ɑ pɑ́Ꞌɑ ḿbɔ́ ḿmʉk pɔ nǔu ntɛ́ yi ḿbɔ́ m pfú pfúnɛ. Pʉʉ nɑ́ŋ zɑꞋnɛ, ḿbɑ́ɑ ŋu wɛkŋɛ nɛmɛꞋ mbʉʉ yɛ ńdɛ́,»

³⁹ńcú pɔ́Ꞌɔ, ńnɑ́Ꞌ ŋ́ɡʉ mbi, ŋ́kɔkŋɛ ńnɔɔ sɛ́, ɛ́sɔp shʉ́ wɛ́ sɛ́, ḿbɔ́ ńcɛꞋlɛ Sɛ́ ńcú ŋɡɔ: «Tɑ̌ɑ mɔ, ɛ́ lɑɑ ḿbɔ́ yi ḿbɔ́ ɛ́ pɔ́ pɔ́Ꞌɔ, ɔ ɡɛ yɔ ntúꞋ-ŋɡʉ̈ɔ́Ꞌ fú nɛjɔ́ŋ mɔ ńtsʉ́ʉtɛ! Lɑ́, kɔɔ ɡɛ wɑɑ nɛkɔŋtɛ, ɡɛ pɔ wu nɛkɔŋtɛ.»

⁴⁰Yɛ́su cɛꞋlɛ Sɛ́ pɔ́Ꞌɔ, ḿbɛn nzʉʉ nɛ́ nɛjɔ́ŋ ɡɑŋku pɛ́, ńjʉ́ɔ pɔ́p pɔ́ ńdɛ́. A cú mbɔ̌ Pyɛ̂ ŋɡɔ: «Pʉʉ fɑ́ɑ mbɔɔ kuꞋ pɑ́Ꞌ ḿbɔ́ pɛkŋɛ tɛmtɛ ɛ́sʉk fɛlɔ́k mbɑ nǔu tɑ́Ꞌ nɛm pɔ́ pʉ́ɔ!

⁴¹Kɔɔ pʉʉ pɛn ńdɛ́, pʉʉ cɛꞋlɛ Sɛ́, ḿbɔ́k mɛnu nɛkwɑꞋnɛ wʉ́ʉ, pʉʉ vu. Tʉ́m-ŋu tɛntɛ tɛꞋ lɑ́, mbɑp-mbʉʉ pɔ́t pɔ́tnɛ.»

⁴²Yɛ́su pɛn ɛ́fú nɛjɔ́ŋ pɔ́p ŋ́ɡʉ nǔu mbɑ́ɑtɛ yɛ́pɑ́, ńcɛꞋlɛ Sɛ́ ńcú ŋɡɔ: «Tɑ̌ɑ mɔ, ɛ́ lɑɑ ḿbɔ́ yi yɛcɔ́ nɛɡɛ tɛ kẅɛ́Ꞌlɛ yɔ ntúꞋ nɛjɔ́ŋ mɔ kɑ́ pɔ́ ɡú pɔ́, ŋ́kɛ́ ḿbɔ́ yi ŋ kɛ́ ńnɔ́ nɔ́nɛ, ɔ ɡɛ pɑ́Ꞌ ɔ kɔŋnɛ,»

⁴³ńcú pɔ́Ꞌɔ, ḿbɛn ḿbɛn nzʉʉ, ńjʉ́ɔ pɔ́p pɔ́ ńdɛ́ lɛ́nɛ, mbíꞋŋɡɔ ɛ́ kɑ ɡɔ́ ḿbɔ́, mbɔ fɛlɔ́k ɡẅɛɛ wɔ́p tɛꞋ.

⁴⁴Yɛ́su nɑ́ wɔ́p, ḿbɛn ŋ́ɡʉ cɛꞋlɛ Sɛ́ nǔu mbɑ́ɑtɛ yɛ́tɑ́t, ḿbɛn ńcú pɔ nu yí ɑ zɛɛnɛ ńcú,

⁴⁵ŋ́ɡɛ pɔ́Ꞌɔ, ḿbɛn ɛ́fú zúꞋu ḿbɛn nzʉʉ, ŋ́kẅɛ́ɛtɛ ɡɑŋku pɛ́, ńcú mbɔ̌ pɔ́p ŋɡɔ: «Pʉʉ tsuŋ ńdɛ́, ńjẅiitɛ sʉ́Ꞌnɛ. Pʉʉ ɡɔ́ɔ ŋ́kɛ́ ńjʉ́ɔ, ŋkɑ́ kuꞋ! Pɛ́ ɡʉ ɛ́fɛn Mɔ́ɔ-Ŋu mbɔ̌ pʉɔ kɛpɔŋ.»

⁴⁶Pʉʉ lɔ sɛ́ pɛkŋɛ ɡʉ! Ŋu ẅí ɑ fɛnnɛ wɑ́ɑ mbɔ̌ pɔ́p pʉ́ɔlɑ́ ɑ tɔ́nɛ lɑɑ!

⁴⁷Yɛ́su pɛ́t ńcú cúnɛ, Jẅidɑ, ẅí ɑ wɛcɔ́ tɑ́Ꞌ nǔu ɡɑŋku pɛ́ ntsɔ̌ppɑ́ nɛ́ nɛɡɛ́m tɔ́, lɑ́Ꞌ pɔ́ nzʉʉ yɛ́ tɛ ńzɑ́ɑ, ŋ́ɡẅɛɛ mɛníi-ntsɔ pɔ́p pɛsʉʉ, ḿbɔ́ pʉɔ pínɛ pɛtɑ́tndɑ́-pɑnɔŋpɔꞋ pɔ́p pɛkɛ́m-lɑ́Ꞌ túunɛ wɔ́p.

⁴⁸Ɛ́ ɡɔ́ ḿbɔ́, mbɔ Jẅidɑ kɑ sẅíi wɔ́p pɑ́Ꞌ ɑ ɡʉ ŋ́ɡɛ lɑ pɔ́p lii Yɛ́su, yîyɑ́ lii pɔ́ ŋɡɔ ɑ lɑɑ ńcɛꞋlɛ ŋu, ḿmɑ́ɑ wɛ́ pɔ́p jí ŋɡɔ ɑ jʉ́ ŋ́ɡɔ́ɔ ŋ́ɡẅɛɛ wɛ́.

⁴⁹Jẅidɑ tɔ́ ɛ́ pɔɔ lɑ́ɑtɛ ɑ ɡɔ́ɔ ńtsʉ́ʉtɛ mbʉʉ yɛ, ńtɔ́ nɛjɔ́ŋ Yɛ́su, ńcú ŋɡɔ: «Ndɛ, n cɛꞋlɛ,» ŋ́ɡɔ́ɔ ḿmɑ́ɑ wɛ́.

⁵⁰Yɛ́su tsɔ́Ꞌ mbɔ̌ wɛ́ ŋɡɔ: «Súu wɑɑ, ɡɛ pɔ yúu mi ɔ tɔ́nɛ nɛɡɛ.» Lɑ́Ꞌ ɡɔ́ɔ ŋ́kɛ́ ńtɔ́ ŋ́ɡẅɛɛ Yɛ́su.

⁵¹Wɛcɔ́ tɑ́Ꞌ ŋu nǔu pʉɔ pínɛ pɔ́p pɛ́ Yɛ́su lɑ́Ꞌnɛ ḿbɔ́, sɔŋ níi-ntsɔ tsɛt mbɑ́ɑ nɛlɔk ŋ́kʉ́ɔꞋ ŋɡɑŋfɑꞋ-nɔŋpɔꞋ wɛ ɡwɛ́, kẅɛ́ɛtɛ nɛtúutɛ nɛ́, ńzwɑ́.

⁵²Yɛ́su cú mbɔ̌ wɛ́ ŋɡɔ: NíꞋ níi yu tsɛt mbɑ́ɑ, ŋu ẅí ɑ sɔŋnɛ níi ɡʉ ńdɑ́Ꞌ ḿpfú pɔ níi.

⁵³Ɔ kɑ́ pɔ́ ńjí ŋɡɔ ɛ́ lɑ́Ꞌ ḿbɔ́ pɛ́Ꞌnɛ ḿbɔ́ nu-ntsɔ, mbɔ n dɑ́Ꞌ ɛ́fúŋ Tɑ̌ɑ mɔ ɑ ɡɔ́ɔ ńtúu pɛcʉ̈ɔ́Ꞌ pɛ́, tɛ pɔ́p lɛɛ ntsɑ́Ꞌ nɛ ntsɑ́Ꞌ.

⁵⁴N dɑɑ ŋ́kɛ́ ŋ́ɡɛ pɔ́Ꞌɔ, yúu mi pɛ́ kɑ ŋwɑꞋnɛ́nɛ tsɛt ŋwɑꞋnɛ-Sɛ́ ɡɛ pɑ́Ꞌɑ lɑ ḿbuutɛ? Pɛ́ kɑ ŋwɑꞋnɛ tsɛtú ŋɡɔ: Mɛnu ɡʉ ńdɑ́Ꞌ ńdɛɛtɛ pɔ pɑ́Ꞌ ɛ́ lɛɛtɛ́nɛ ŋkɔ̂ɔnɛ lɑɑ.

⁵⁵Ŋ́ɡɛ pɔ́Ꞌɔ, Yɛ́su ɡɔ́ɔ ŋ́kɛ́ ńcú mbɔ̌ lɑ́Ꞌ ŋɡɔ: «Pʉʉ ɡɔ́ ńtɔ́ nɛɡẅɛɛ wɑ́ɑ, ŋ́ɡẅɛɛ mɛníi-ntsɔ pɔ́p pɛsʉʉ pɑ́Ꞌ ŋkɑ́ yi pʉʉ ɡʉ ɡẅɛɛ ntsɔ́ŋ pɑ́Ꞌɑ ŋɡɔ́ku? Mɔ m̄bɔ́ lɛ́Ꞌ tsʉʉ ḿbɔ́ pɔ tsɛtsɛt pʉʉ zʉꞋ-nɔŋpɔꞋ, ḿbɔ́ ńzíꞋ pʉɔ nɛ́ nu-Sɛ́! Pʉʉ kɛ́ mbɔɔ wɑ́ɑ ɡẅɛɛ.

⁵⁶Lɑ́ mɛnu mí ɛ́ lɛɛtɛ́nɛ lɑɑnɛ lɔk ḿbuutɛ nǔu nu yí pɛŋɡɛ́mndʉ̈ɔ́Ꞌ-Sɛ́ kɑ ŋwɑꞋnɛ́nɛ.» Pɛ́ ɡẅɛɛ Yɛ́su pɑ́Ꞌɑ, ɡɑŋku pɛ́ pɛtsʉʉ mɛꞋ wɛ́ ŋ́kʉɔ.

⁵⁷Pʉɔ pínɛ pɔ́p ɡẅɛɛnɛ Yɛ́su lɔk wɛ́ ŋ́ɡʉ nɛ́ ntɔ́Ꞌ-Kɑyífɑ. A pɔ́ nɔŋpɔꞋ wɛ ɡwɛ́. Mbɔ pɑkyɛ́ꞌtɛ nɛpʉ́ʉ-Mɔ̌sɛ̂ɛ pɔ́p pɛkɛ́m-lɑ́Ꞌ tɛmtɛ ńcúꞋlɛ zúꞋu.

⁵⁸Ŋ́ɡʉ nǔu Pyɛ̂, ɑ cʉ́ɔ nzʉʉ Yɛ́su lɑ́ ŋ́kɛ́ ḿbɔ́ pɔ ŋɡɑ sɛsɑ, ŋ́ɡʉ tɛ ńtɔ́k ŋ́kúu tɛtɑ́ɑ-nɔŋpɔꞋ wɛ ɡwɛ́, ŋ́ɡʉ ńnɑ́ŋ sɛ́ tsɛtsɛt ɡɑŋfɑꞋ, ḿbɔ́ ńdɔɔ nɛjʉ́ɔ pɑ́Ꞌ yɔ nu ɡʉ ńdẅiklɛ pɔ́Ꞌɔ.

⁵⁹Pɛtɑ́tndɑ́-pɑnɔŋpɔꞋ pɔ́p pɑsɑ́Ꞌlɑ́Ꞌ, pɔ́ ńdɔɔ cɔtnu yí pɔ́p ɡʉ ńzɑ́p tú-Yɛ́su lɑ ńdɔk ŋ́ɡɛ pɛ́ jẅí wɛ́.

⁶⁰Ŋ́kɛ́ ḿbɔɔ ḿbɔ́ ńjʉ́ɔ pɔ́. Tɛ mbɑ pɑ́Ꞌ ɡɑŋcɔtnu kɑ tɔ́nɛ tɛ ńzɑ́ɑ ḿbɔ́ ńzɑ́p mɛnu tú-Yɛ́su. Ɛ́ tsʉ́Ꞌ nɛlẅiklɛ, pɛcɔ́ pʉɔ pɛ́pɑ́ tɔ́ ńcú ŋɡɔ:

⁶¹«Ŋu wɑ́ lɑ́ kɑ cú ŋɡɔ: A kuꞋ nɛkɛm ndɑ́-nɔŋpɔꞋ, ńdɔk lɛ́Ꞌ pɛtɑ́t ŋ́kút.»

⁶²NɔŋpɔꞋ wɛ ɡwɛ́ ɡɔ́ɔ ŋ́kɛ́ ńdɔ sɛ́ ḿbíkŋɛ Yɛ́su ŋɡɔ: «Ɔ nɑꞋ nɑꞋnɛ ɛɛ? Ɔ kɑ́ pɔ́ ńzúꞋ mɛnu mí pɛ́ cúnɛ nǔu ɡu lɑ́ pɔ́ kɛ?»

⁶³Lɑ́ Yɛ́su pɔɔ tsɔ́p. NɔŋpɔꞋ wɛ ɡwɛ́ cú mbɔ̌ wɛ́ ŋɡɔ: «Lɔk lík-Sɛ́ ẅi ɑ ntʉʉ, ŋ́kɑɑ ɛ́sẅíi wɛ́k ŋɡɔ ɔ Nzɑ́Ꞌŋkʉ ẅí ɑ mɔ́ɔ-Sɛ́ kɛ ɔ kɑ́ pɔ́ ńjʉ́ɔ pɔ́ ɔɔ?

⁶⁴Yɛ́su tsɔ́Ꞌ mbɔ̌ wɛ́ ŋɡɔ: Ɔ cú, lɑ́ ŋ kɛ́ niitɛ ɛ́sẅíi wʉ́ʉ, tɛ ɛ́fú ŋkɔ̂ɔnɛ, pʉʉ ɡʉ ŋ́ɡɛ ńjʉ́ɔ Mɔ́ɔ-Ŋu nɑ́ŋ nǔu ɡúŋ-pɔ́ tʉʉ-Ŋɡɑŋ-mɛtʉʉ tsʉʉ, ḿbɛn ńjʉ́ɔ ɑ pɔ́ ɛ́fú tsɛt lɑ́ɑ tʉ́nɛ́pú ńtɔ́.»

⁶⁵NɔŋpɔꞋ wɛ ɡwɛ́ zúꞋ pɔ́Ꞌɔ, ɛ́shɔtnɛ ɛ́sɑtɛ mɛndẅí mɛ́, ńcú ŋɡɔ: «A zɔɔtɛ Sɛ́, pɛkŋɛ pɛn ńdɔɔ pɔ yɛ́tɛ́ ntɛ́ pɑjʉ́ ńjʉ́ɔ. KwɑꞋ pʉʉ yʉ́ʉ zúꞋ pɑ́Ꞌ ɑ zɔɔtɛnɛ Sɛ́.»

⁶⁶Pʉʉ Kwɑŋɛ yʉ́ʉ ŋɡɔ kʉ̈ɔ́? Lɑ́Ꞌ pʉ̈ɔt ŋɡɔ: «A ŋu ẅí ḿbɔ́ pɛ́ jẅí wɛ́ jẅínɛ.»

⁶⁷Pɔ́p ɡɔ́ɔ ŋ́kɛ́ ńtẅik mɛ́tɛ́ shʉ́-Yɛ́su, ŋ́kwɛn wɛ́, pɛcɔ́ pʉɔ pɔ́ ńtɛ́m mbɔ́ nɛtúutɛ yɛ́,

⁶⁸ńcú ŋɡɔ: «Nzɑ́Ꞌŋkʉ, kíɛꞋ ŋu ẅí ɑ tswɑ́ɑnɛ wú.»

⁶⁹Ɛ́ ɡɔ́ ḿbɔ́ pɔ́Ꞌɔ, Pyɛ̂ nɑ́ŋ tɛtɑ́ɑ. Wɛcɔ́ ŋɡɑŋfɑꞋ wɛ mɑŋɡɛ́ tɔ́, ńcú mbɔ̌ wɛ́ ŋɡɔ: «Mbɑ ɡu yú pʉʉ pɛ́ Yɛ́su ŋu-Ŋɡɑlilɛɛ wɑ́ ḿbɔ́ ńnɛn.»

⁷⁰Pyɛ̂ muŋɛ wɛ́ tɛ lɑ́Ꞌ pɔ́ ńzúꞋ zúꞋnɛ tsʉʉ ńcú ŋɡɔ: «Ŋ kɑ́ jí nu yí ɔ lɔɔnɛ nɛcú pɔ́!»

⁷¹Ŋ́ɡɔ́ɔ ŋ́kɛ́ ŋ́ɡʉ ńnɑ́ŋ nɛ́ ntsuŋkɑ́Ꞌ. Wɛcɔ́ ŋɡɑŋfɑꞋ wɛ mɑŋɡɛ́ jʉ́ɔ wɛ́, ńcú mbɔ̌ pʉɔ pínɛ pɔ́p ḿbɔ́nɛ zúꞋu ŋɡɔ: «Ŋu wɔ pɔ́p Yɛ́su ŋu-Nɑ̌ɑzɑlɛt kɑ pɔ́nɛ.»

⁷²Pyɛ̂ pɛn ḿmuŋɛ, ńcú tɛ ŋ́kɑɑ ŋɡɔ: «ŋ kɑ́ jí ŋu ɛ̂wɑ́ pɔ́.»

⁷³Pɛ́ nɑꞋ ńnɑ́ŋ, pʉɔ pí pɔ́p ḿbɔ́nɛ zúꞋu tɔ́ nɛjɔ́ŋ Pyɛ̂, ńcú ŋɡɔ: «Ɛ́ kɑ́ pɔ́ nu lɔɔnɛ pɔ́, ɔ wɛcɔ́ ŋu wɔp. Yu ntɛ́ nɛsẅíŋɛ ɡɛnɛ lɑ pɛk cú pɔ́Ꞌɔ.»

⁷⁴A ɡɔ́ɔ ŋ́kɛ́ ńzɛ nɛɡɔ́: «Sɛ́ jẅí wɑ́ɑ, zɑŋ yɑ́ɑ, ŋ kɑ́ pɔ́ ńjí ŋu ɛ̂wɑ́ pɔ́.» Ŋ́ɡɔ́ ńcú pɔ́Ꞌɔ, mɔ̂ŋkʉ̈ɔ́Ꞌ pɔ́ ńtɔ́ŋ.

⁷⁵Pyɛ̂ ɡɔ́ɔ ŋ́kẅíitɛ pɑ́Ꞌ Yɛ́su lɑ́Ꞌnɛ ńcú mbɔ̌ wɛ́ ŋɡɔ mɔ̂ŋkʉ̈ɔ́Ꞌ ɡʉ ŋ́ɡɛ ŋ́ɡɔ́ ńtɔ́ŋ, mbɔ ɔ muŋɛ wɑ́ɑ ŋkɑ́ yɛ́tɑ́t, ɛ́fú tɛtɑ́ɑ ńcẅɛt, ŋ́kíi tɛꞋ.