Read Ngomba Mɑtʉ̈ɔ 27 Bible Online

Mɑtʉ̈ɔ 27 - Ngomba bible

Mɑtʉ̈ɔ 27

¹Njí ɡɛ ŋ́kiɛ, ŋɡɔŋ pɛtɑ́tndɑ́-pɑnɔŋpɔꞋ, pɔ́p pɛkɛ́m-lɑ́Ꞌ mʉ́ʉ mbɑ́ꞋmbɑꞋɑ́, ńcúꞋlɛ ńzɑ́p ŋɡɔ pɔ́p ɡʉ ŋ́ɡɛ pɛ́ jẅí Yɛ́su,

²pɔ́Ꞌɔ lɑ́, ŋ́ɡɛ pɛ́ kút wɛ́, ńdɔk wɛ́ ŋ́ɡʉ ŋ́ɡɑ́ mbɔ̌ ŋɡɔ́mnɑɑ Pilɑtɔ.

³Jẅidɑ ẅí ɑ kɑ fɛnnɛ Yɛ́su zúꞋ pɑ́Ꞌ pɛ́ zɑ́Ꞌnɛ ntsɑŋ ŋɡɔ pɛ́ ɡʉ ńjẅí Yɛ́su, ŋ́ɡɔ́ɔ ŋ́kɛ́ ńzɛ nɛmʉk yúu mi ɑ kɑ ɡɛnɛ, ḿbɛ́ɛ ŋkɑ́p yi ɑ kɑ cẅɛ́ɛnɛ pɑk mɛɡɛ́mɛ́ntɑ́t nǔu yɔ nu lɑ́, ńdɔk ŋ́ɡʉ ńjʉ́ɔ pɛtɑ́tndɑ́-pɑnɔŋpɔꞋ pɔ́p pɛkɛ́m-lɑ́Ꞌ,

⁴ńcú mbɔ̌ pɔ́p ŋɡɔ: «Ŋ kɑ ɡɛ nu kɛpɔŋ pɑ́Ꞌ ŋ kɑ ɡɑ́nɛ mbúꞋ ŋɡɔ pɛ́ jẅí wɛ́.» Pɔ́p zúꞋ ḿbʉ̈ɔt ŋɡɔ: «Pɛk kɑ́ ɡẅɛɛ nu nǔu pɔ́, ɛ́ zúꞋ nɛ́ ɡu.»

⁵Pɔ́Ꞌɔ lɑ́, Jẅidɑ mɑꞋ ŋkɑ́p zʉꞋ-nɔŋpɔꞋ, ɛ́fú zúꞋu ŋ́ɡʉ, ŋ́ɡɔ́ɔ ŋ́kɛ́ ŋ́ɡʉ ńcʉŋɛ.

⁶Pɛtɑ́tndɑ́-pɑnɔŋpɔꞋ lɑktɛ ŋkɑ́p, ńcú ŋɡɔ: «Mbɔ pɛkŋɛ kɛ́ mbɔɔ níꞋ yɔ ŋkɑ́p nǔu ŋkɑ́p-zʉꞋ-nɔŋpɔꞋ pɔ́, mbíꞋŋɡɔ ɛ́ ŋkɑ́p-mɛci-ŋu.»

⁷Pɔ́p kwɑŋɛ tɛ ḿbɔ́ tɑ́Ꞌ ntsu, ńdɔk ŋkɑ́p ŋ́ɡʉ ńzúu yɛcɔ́ ŋkɑ́Ꞌ ẅi pɛ́ kɑ pɔ́ ɛ́fúŋ ŋɡɔ ŋkɑ́Ꞌ-mbɔ́ɔmɛkʉŋ-tsɑ́Ꞌ, ńzúu pɔ́Ꞌɔ, ńdɔk ŋ́ɡɛ zʉꞋ yí pɛ́ tẅínɛ pɛɡʉʉ zúꞋu.

⁸Tɛ ɛ́fú ŋkɑ́ yîyɑ́, pɛ́ tsʉ́Ꞌ ɛ́fúŋ ẅîwɑ́ ŋkɑ́Ꞌ, pɔ ŋɡɔ ŋkɑ́Ꞌ-mɛci tɛ ŋ́kúu lɔ́Ꞌnɛ.

⁹Yîyɑ́ nu ɡɛ pɔ́Ꞌɔ, ḿbuutɛ nǔu pɑ́Ꞌ Ŋɡɛ́mndʉ̈ɔ́Ꞌ-Sɛ́ Yɛlɛmî kɑ cúnɛ ŋɡɔ: «Pɔ́p kɑ cẅɛ́ɛ ŋkɑ́p pɑk mɛɡɛ́mɛ́ntɑ́t, ɛ́ pɔ́ ndɛn ẅí pɑíslɑyɛ̂l kɑ zɑ́pnɛ ŋɡɔ ɛ́ pɔ́ ŋkɑ́p-tú-ŋɡɑŋ.»

¹⁰Pɔ́p kɑ ɡɑ́ yîyɑ́ ŋkɑ́p ńdɔk ńzúu ŋkɑ́Ꞌ-mbɔ́ɔmɛkʉŋ-tsɑ́Ꞌ, ɛ́ pɔ́ yúu mi Tsɑpʉɔ kɑ lɑ́Ꞌnɛ ńcú ŋɡɔ pɛ́ ɡɛ.

¹¹Yɛ́su kúu mbi Ŋɡɔ́mnɑɑ Pilɑtɔ, ɑ píkŋɛ wɛ́ ŋɡɔ: «Ɔ fɔɔ-pɑyúdɑ ɔɔ?» Yɛ́su pʉ̈ɔt mbɔ̌ wɛ́ ŋɡɔ: «Ɔ cú pɔ́Ꞌɔ.»

¹²Pɛtɑ́tndɑ́-pɑnɔŋpɔꞋ pɔ́p pɛkɛ́m-lɑ́Ꞌ pɔ́ ńtík mɛnu tú-Yɛ́su tɛ ɛ́ zɑ́ɑ zɑ́ɑnɛ, ɑ kɛ́ mbɔɔ ḿbɔ́ ḿbʉ̈ɔt pɔ́.

¹³Pilɑtɔ, cú mbɔ̌ wɛ́ ŋɡɔ: «Ɔ kɑ́ pɔ́ ńzúꞋ ndɛn mɛnu mí pɛ́ cúnɛ nǔu ɡu pɔ́ kɛ?»

¹⁴Lɑ́ Yɛ́su pɔɔ pʉ̈ɔt. Ŋɡɔ́mnɑɑ jʉ́ɔ ɛ́ puu ŋ́kʉꞋnɛ wɛ́ tɛꞋ.

¹⁵Ɛ́ kɑ pɔ́ ḿbɔ́ lɛ́Ꞌ-ndínɑ-Pɑ́skɑ, Ŋɡɔ́mnɑɑ tsɔ́Ꞌ ŋɡɑŋtsɑ́ŋ ẅi lɑ́Ꞌ píkŋɛ́nɛ.

¹⁶Ɛ́ ɡɔ ḿbɔ́ ŋkɑ́ yîyɑ́, wɛcɔ́ ntʉʉ ŋɡɑŋtsɑ́ŋ pɔ́ tsɛt ndɑ́tsɑ́ŋ, pɛ́ fúŋ wɛ́ ŋɡɔ Yɛ́su Pɑnɛpɑ́ɑshi.[23]

¹⁷Lɑ́Ꞌ tɔ́ ńcúꞋlɛ. Pilɑtɔ píkŋɛ ŋɡɔ: «Pʉʉ kɔŋ ŋɡɔ ŋ ɡʉ nǔu pʉɔ pɔnɛ ńnɑ́ pɔ Yɛ́su Pɑnɛpɑ́ɑshi kɛ pɔ Yɛ́su ẅí pɛ́ fúŋnɛ ŋɡɔ Kɛlístɔ?»

¹⁸Pilɑtɔ kɑ pɔ́ ńcú pɔ́Ꞌɔ, mbíꞋŋɡɔ ɑ ńtsuŋ ḿbɔ́ ńjí ŋɡɔ pɛ́ kɔ́Ꞌ pɔ lɔ́ŋ nǔu Yɛ́su lɑ ɛ́fɛn wɛ́.

¹⁹Pilɑtɔ kɑ pɔ́ ŋ́ŋɑk nu-Yɛ́su, nzwɛ́ wɛ túu ŋu ŋɡɔ ɑ ɡʉ, ńcú mbɔ̌ wɛ́ ŋɡɔ ɑ lɑk tú yɛ́ nǔu ntsɑŋ-ŋu wɑ́, ŋɡɔ ɑ pɑ́Ꞌɑ ḿbɔ́ mbúꞋ, ŋɡɔ ŋɡɑŋ sẅíi wɛ́ ŋɡɔ ɑ lɑ́Ꞌ ńdɛ́ lɑ́Ꞌ, ńdɛ́ njʉɔ nǔu wɛ́ ɛ́ ɡɑ́ɑnɛ wɛ́ tɛꞋ.

²⁰Pɛtɑ́tndɑ́-pɑnɔŋpɔꞋ pɔ́p pɛkɛ́m-lɑ́Ꞌ pɔ́ ńtsʉ́ʉnɛ lɑ́Ꞌ ŋɡɔ pɔ́p píkŋɛ ŋɡɔ Pilɑtɔ tsɔ́Ꞌ pɔ Pɑnɛpɑ́ɑshi ŋ́ɡɛ pɛ́ jẅí Yɛ́su.

²¹Ŋɡɔ́mnɑɑ pɛn ńcú mbɔ̌ lɑ́Ꞌ ŋɡɔ: «Ŋ ɡʉ ńnɑ́ tɑ́Ꞌ ŋɡɑŋtsɑ́ŋ mbɔ̌ pʉʉ. Pʉʉ kɔŋ ŋɡɔ ŋ ɡʉ nǔu pʉɔ pɔnɛ pɛ́pɑ́, ńnɑ́ wɔ̌?» Pɔ́p ɡɔ Pɑnɛpɑ́ɑshi!

²²Pilɑtɔ pɛn ḿbíkŋɛ ŋɡɔ: «Tɛ mɔ pɑ́Ꞌɑ ŋ́ɡɛ pɔ ŋɡɔ́ku nǔu Yɛ́su ẅí pɛ́ fúŋnɛ ŋɡɔ Kɛlístɔ?» Pʉɔtsʉʉ pʉ̈ɔt ŋɡɔ: «Pɛ́ kẅii wɛ́ nǔu tʉ́ mbɑ́ŋtɛ pɑ́ŋtɛ́nɛ!»

²³Pilɑtɔ píkŋɛ wɔ́p ŋɡɔ: «KwɑꞋ nu kɛpɔŋ yí ɑ ɡɛnɛ pɔ́ pɔ kʉ̈ɔ́?» Lɑ́ lɑ́Ꞌ kẅiꞋ ŋ́ɡɑ́ ɡwɑ́t, ńcú pɔ ŋɡɔ: «pɛ́ kɛ́ ŋ́kẅii wɛ́ kẅiinɛ!»

²⁴Pilɑtɔ jʉ́ɔ ŋɡɔ yɛcɔ́ nɛɡɛ kɑ́ pɔ́ ɡú pɔ́, ḿbɔ́ ńjʉ́ɔ ŋɡɔ mbɔ ɛ́ shɔtnɛ pʉɔ tɑ́k zʉꞋ, ŋ́ɡɔ́ɔ ŋ́kɛ́ ńtíi ŋki, ɛ́suk mbɔ́ mɛ́ mbi-lɑ́Ꞌ, ńcú ŋɡɔ: «Ŋ kɑ́ ɡẅɛɛ nu nǔu nu-ŋu wɑ́ pɔ́, ɛ́ sɛ́ ńdíŋɛ pɔ wʉ́ʉ.»

²⁵Pʉɔtsʉʉ pʉ̈ɔt ŋɡɔ: «Mɛci ŋu wɑ́ ńtúŋ nǔu pɛk tɛ mbɑ nǔu mbɔ́ŋkʉ̈ɔ́ pɛk.»

²⁶Pɔ́Ꞌɔ lɑ́, Pilɑtɔ ɡɔ́ɔ ŋ́kɛ́ ńcẅɛɛtɛ Pɑnɛpɑ́ɑshi ndɑ́tsɑ́ŋ, ŋ́ɡɛ pɛ́ lɔk ŋɡwɑɑ ńtswɑ́ɑ Yɛ́su, ḿbɛn ŋ́ɡɑ́ wɛ́ ŋɡɔ pɛ́ lɔk wɛ́ ŋ́ɡʉ, ŋ́kẅii wɛ́ nǔu tʉ́ mbɑ́ŋtɛ pɑ́ŋtɛ́nɛ.

²⁷Pɑlʉ̈ɔ́Ꞌntsɔ-pɑlɔ́mɑ ɡɔ́ɔ ŋ́kɛ́ ńdɔk Yɛ́su ŋ́ɡʉ ntɔ́Ꞌ-ŋɡɔ́mnɑɑ, pɔ́p pɛtsʉʉ cúꞋlɛ ńzɛmɛ wɛ́ ńníꞋ sɔŋ,

²⁸ńtɛmtɛ ɛ́sɔt mɛndẅí mɛ́, ńtsʉ́Ꞌ ḿmɑꞋ pɔ ndẅí-nɛfɔɔ nǔu wɛ́,

²⁹ḿbɛn ńdɔk mɛnzɔ́ŋ ḿbɑ́Ꞌ cɔꞋ ɛ́sɔ tú yɛ́, ńníꞋ kɛkɑꞋ nǔu pɔ́ yɛ́ yi tʉʉ, ḿbɔ́ ŋ́kẅíꞋlɛ mbi yɛ́, ńzɔɔtɛ wɛ́ ńcú ŋɡɔ: «Zɑɑmɔ́ɔ, fɔɔ pɑyúdɑ!»

³⁰Ḿbɔ́ ńtẅik mɛ́tɛ́ nǔu wɛ́, ńcẅɛ́ɛ kɛkɑꞋ, ńtswɑ́ɑ tú yɛ́,

³¹ńzɔɔtɛ wɛ́ tɛ ŋ́kɑɑ, ɛ́fú nǔu wɛ́ ɛ́sɔt ndẅí-nɛfɔɔ, ḿbɛn ḿmɑꞋ kwɑꞋ mɛ́ mɛndẅí nǔu wɛ́. Ɛ́ kuꞋ pɔ́p lɔk wɛ́ ɛ́fú zúꞋu ńcẅɛt, nɛɡʉ ŋ́kẅii nǔu tʉ́ mbɑ́ŋtɛ pɑ́ŋtɛ́nɛ.

³²Pɑlʉ̈ɔ́Ꞌntsɔ lɔk wɛ́ ɛ́fú tʉ́sɔŋ ńcẅɛt, ńnɛn tɛ ḿbuutɛ wɛcɔ́ ŋu Silɛ̂nɛ, pɛ́ fúŋ wɛ́ ŋɡɔ Símɔ, pɛ́ ɛ́fyɛ́t wɛ́ ŋɡɔ ɑ tíi tʉ́ mbɑ́ŋtɛ pɑ́ŋtɛ́nɛ-Yɛ́su.

³³Pɔ́p ɡʉ tɛ ŋ́kúu yɛcɔ́ zʉꞋ yi pɛ́ fúŋnɛ ŋɡɔ Ŋɡɔlŋɡɔ́tɑ, ńdɔk ńcú ŋɡɔ: «ZʉꞋ-mɛtsẅí-tú.»

³⁴Pɔ́p kúu zúꞋu, ńdɔk yɛcɔ́ yúu mi ɛ́ lẅi lẅinɛ ɛ́fɛntɛ mɛluꞋ, ŋ́ɡɑ́ ŋɡɔ Yɛ́su nɔ́. Yɛ́su zẅíꞋ mbɔɔ kɔŋ nɛnɔ́ pɔ́.

³⁵Pɑlʉ̈ɔ́Ꞌntsɔ ɡɔ́ɔ ŋ́kɛ́ ŋ́kẅii wɛ́ nǔu tʉ́ mbɑ́ŋtɛ pɑ́ŋtɛ́nɛ, ḿmɑꞋ ńtíitɛ ńdɔk ŋ́ɡɑp mɛndẅí mɛ́, ŋ́ɡɑ́ yɛ́ mbɑ wɔ̌ lɑ́ tsɛtsɛt pɔ́p.

³⁶Ɛ́ kuꞋ, pɔ́p nɑ́ŋ sɛ́ ḿbɔ́ ḿbyɛ́p Yɛ́su.

³⁷Pɛ́ ŋwɑꞋnɛ yúu mi ɑ fɑɑnɛ́nɛ ŋ́kẅii tʉ́ nǔu zʉꞋ yi tú yɛ́ ḿbɔ́nɛ zúꞋu ŋɡɔ: «Yɔ Yɛ́su, fɔɔ-pɑyúdɑ.»

³⁸Pɔ́p kɑ pɛn ŋ́kẅii pɛtsɔ́ŋ pɛ́pɑ́ nǔu mɛtʉ́ mbɑ́ŋtɛ pɑ́ŋtɛ́nɛ, tɑ́Ꞌ pɔ́ nǔu ɡúŋ-pɔ́-Yɛ́su yi tʉʉ, wɛcɔ́ pɔ́ nǔu ɡúŋ-pɔ́ ŋkẅɛpmɛ.

³⁹Pɑlɛɛ sɛ̂ndúŋ kɑ pɔ́ ŋ́ŋíŋɛ wɛ́ ɡúu, ńzɔɔtɛ Yɛ́su,

⁴⁰ńcú ŋɡɔ: «Ɔ kɑ pɔ́ ńdɔɔ nɛkɛm ndɑ́-nɔŋpɔꞋ, ńdɔk lɛ́Ꞌlɑ́Ꞌ pɛtɑ́t ŋ́kút. KwɑꞋ ɡu zɛɛ ńcẅɛ́ɛ tú yú, pɑ́Ꞌ ɔ lɑɑ ḿbɔ́ mɔ́ɔ-Sɛ́, ɛ́fú nǔu tʉ́ mbɑ́ŋtɛ pɑ́ŋtɛ́nɛ ḿpfúu.»

⁴¹Pɛtɑ́tndɑ́-pɑnɔŋpɔꞋ, pɔ́p pɑkyɛ́ꞌtɛ nɛpʉ́ʉ-Mɔ̌sɛ̂ɛ, pɔ́p pɛkɛ́m-lɑ́Ꞌ pɔ́ ńzɔɔtɛ yɔ́p Yɛ́su ɡúu ńcú ŋɡɔ:

⁴²«A kɑ ɡɛ pɛcɔ́ pʉɔ luk, lɑ́ ɑ kɑ́ kuꞋ nɛcẅɛ́ɛ yɛ́ tú mbɔ̌ nɛvú pɔ́! A lɑɑ ḿbɔ́ fɔɔ-pɑíslɑyɛ̂l, ɑ ɛ́fú nǔu tʉ́ mbɑ́ŋtɛ pɑ́ŋtɛ́nɛ ŋkɔ̂ɔnɛ ḿpfúu pɛk jʉ́ɔ, ńzɑ́p tʉ́m yʉ́k nǔu wɛ́.

⁴³A kɑ zɑ́p tʉ́m yɛ́ nǔu Sɛ́, Sɛ́ lɑɑ ḿbɔ́ ŋ́kɔŋ wɛ́ tɛ ɛ́sẅíi nu, ɑ ɡɛ ɑ luk ŋkɔ̂ɔnɛ!» Jʉ́ ŋkɑɑnɛ zɛɛ ńcú ŋɡɔ: «A mɔ́ɔ-Sɛ́ pɔ́ ɔɔ?»

⁴⁴Ŋ́ɡʉ nǔu pɛtsɔ́ŋ pi pɛ́ kɑ kẅiinɛ wɔ́p nǔu mɛtʉ́ mbɑ́ŋtɛ pɑ́ŋtɛ́nɛ nɛjɔ́ŋ Yɛ́su pɔ́p pɛn ḿbɔ́ ńzɔɔtɛ yɔ́p wɛ́ pɔ pɔ́Ꞌɔ.

⁴⁵Tẅɛp kɑ pɔ́ tɛ ŋ́kuꞋ, zʉꞋ tsʉʉ ndǔ ŋɡɔŋ puu sʉ́ʉ, tɛ ńdɑ́Ꞌ ŋ́kúu nǔu nɛm yɛ́tɑ́t mbɔ́tnjí.

⁴⁶Ɛ́ pɔ́ nǔu nɛm yɛ́tɑ́t ɛ̂yɑ́, Yɛ́su kíi nɛ́ ŋɡi tɛnnɛ ńcú ŋɡɔ: «Ɛlɔyí, Ɛlɔyí lɑmɑ sɑbɑtɑnîi,» ńdɔk ńcú ŋɡɔ: «Sɛ́ wɑɑ, Sɛ́ wɑɑ, ɔ mɛꞋ wɑ́ɑ mɛlɑ́Ꞌ kʉ̈ɔ́?»

⁴⁷Pɛcɔ́ pʉɔ pí pɔ́p m̄bɔ́nɛ zúꞋu zúꞋ, ńcú ŋɡɔ: «A pʉɔlɑ́ ɑ sɛ́ ɛ́fúŋ Ɛlíyɑ lɑɑ!»

⁴⁸Wɛcɔ́ tɑ́Ꞌ ŋu nǔu pɔ́p ɡɔ́ɔ ŋ́kʉɔ, ŋ́ɡʉ ńdɔɔ kuntsɑ́ɑ, ńtsɛp tsɛt cícɔ́k mɛluꞋ, ɛ́sɔ́klɛ nǔu tú-kɛkɑꞋ, ńcɑklɛ ńníꞋ ntsu-Yɛ́su ŋɡɔ ɑ fíitɛ.

⁴⁹Pɛcɔ́ pʉɔ pɔ́ ńcú ŋɡɔ: «Pʉʉ tsʉ́Ꞌ pɛkŋɛ jʉ́ɔ kɛ Ɛlíyɑ ɡʉ ńtɔ́ ɛ́fú nǔu tʉ́ mbɑ́ŋtɛ pɑ́ŋtɛ́nɛ ŋ́kɔk wɛ́ ɔɔ!»

⁵⁰Yɛ́su pɛn ŋ́kíi nɛ́ ŋɡi tɛnnɛ ŋ́ɡɔ́ɔ ńcʉ́ɔ.

⁵¹Yɛ́su cʉ́ɔ pɔ́Ꞌɔ, ndẅí yi pɛ́ kɑ lɔknɛ ŋ́kʉŋ yɛcɔ́ zʉꞋ tsɛt zʉꞋ-nɔŋpɔꞋ fú tʉ́ ɛ́sɑ́ɑnɛ pɑk pɛ́pɑ́ tɛ ŋ́kúu sɛ́. Tsɛ́tsɑ́Ꞌ tsʉ́Ꞌnɛ, mɛŋɡɔꞋ sɑ́ɑtɛ,

⁵²mɛtú-mɛshi tsɔ́Ꞌnɛ ńtʉ́ʉ, pɛpfú pi pɔ́p kɑ zɑ́pnɛ tʉ́m yɔ́p nǔu Sɛ́ jʉɔmɛ tɛ ńzɑ́ɑ,

⁵³ɛ́fú tsɛt mɛshi cẅɛɛtɛ. Yɛ́su ɡɛ ḿbɔ́ tɛ ńzẅíimɛ nǔu nɛvú, pɔ́p kúu Yɛlúsɑlɛm, tʉ́sɔŋ-ndɛ́ɛnɛ Lɛ́ɛnɛ́nɛ, pʉɔ tɛ ńzɑ́ɑ jʉ́ɔ wɔ́p.

⁵⁴Yɛ́su kɑ pfú pɑ́Ꞌɑ, tɑ́tndɑ́-pɑlʉ̈ɔ́Ꞌntsɔ pɔ́p pɑlʉ̈ɔ́Ꞌntsɔ pí pɔ́p kɑ pɔ́ ḿbyɛ́p Yɛ́su jʉ́ɔ pɑ́Ꞌ tsɛ́tsɑ́Ꞌ púunɛ ńtsʉ́Ꞌnɛ, ḿbɛn ńjʉ́ɔ mbɑ kʉ̈ɔ́lɑ́ yi ɛ́ sɛ́ ńdɛɛ, ńcʉ̈ɔꞋ tɛꞋ, ńcú ŋɡɔ: «Ŋu wɔ ḿbɔ́ kwɑꞋ mɔ́ɔ-Sɛ́.»

⁵⁵Pɑŋɡɛ́ tɛ ńzɑ́ɑ tʉ́ʉ ŋɡɑ sɛsɑ ḿbɔ́ ńdíŋɛ, mbɔ pɔ́p kɑ pɔ́ nzʉʉ-Yɛ́su tɛ ɛ́fú Ŋɡɑlilɛɛ, ńnɛn ńtɔ́ɔtɛ wɛ́.

⁵⁶Ɛ́ m̄bɔ́ tsɛtsɛt pɔ́p, yɔ pɔ́ Mɑlíyɑ-Mɑkdɑlɑ, ŋ́ɡɛ Mɑlíyɑ mɑ́ pɛ́ Jɑ̂k pɔ́p Yɔsɛ̂p, ḿbɛn ŋ́ɡɛ mɑ́ pɛ́ pɔ́ɔ-Zɛbɛ́dɛ́ɛ.

⁵⁷Ɛ́ ɡɛ ḿbɔ́ ntsuŋkẅɛ́Ꞌ wɛcɔ́ ŋɡɑŋyúu tɔ́, lík yɛ́ pɔ́ ŋɡɔ Yɔsɛ̂p, ɑ pɔ́ ŋu-tʉ́sɔŋ-Alimɑtɛ́, ḿbɔ́ ɑ tsʉ́Ꞌ yɛ́ ɡúu wɛcɔ́ ŋu-Yɛ́su.

⁵⁸A ɡʉ ńjʉ́ɔ pilɑtɔ, ńdɔ́ɔ pfú-Yɛ́su nɛɡʉ ńdẅɛꞋ. Pilɑtɔ pɛ́m, ńcú ŋɡɔ pɛ́ ɡɑ́ nɛ́ jʉ́.

⁵⁹Pɛ́ kíɛꞋ, Yɔsɛ̂p cẅɛ́ɛ, ńdɔk pɔ́-ndẅí fí ŋ́kɑ́tɛ pfú yɛ́,

⁶⁰ńtíi wɛ́ ńdɔk ŋ́ɡʉ ńníꞋ tsɛt nɛshi ni ɑ kɑ pɛ́t ɛ́sʉꞋ nǔu ŋɡɔꞋ, ɛ́ pɔ́ nɛ́ Yɔsɛ̂p. A níꞋ Yɛ́su tsɛtú, ńtsʉ́ʉ mɑ́mɑ́ ŋɡɔꞋ ńdɔk ńjʉ́ɔꞋ ntsu-nɛshi ɛ̂nɑ́ ŋ́ɡʉ.

⁶¹A kɑ ɡɔ́ ńníꞋ Mɑlíyɑ-Mɑkdɑlɑ pɔ́p wɛcɔ́ Mɑlíyɑ nɑ́ŋ sɛ́ nɛpɑ́ɑtɛ nɛshi, ḿbɔ́ ńjʉ́ɔ.

⁶²Njí ɡɛ ŋ́kiɛ, ɛ́ pɔ́ lɛ́Ꞌnji-Sɛ́ yi pɛ́ kɑ pɔ́ yɛcɔ́ lɛ́Ꞌ ḿbɔ́ ńniitɛ lɑ́. Pɛtɑ́tndɑ́-pɑnɔŋpɔꞋ pɔ́p pɑfɑlísɑy tɛmtɛ ńcúꞋlɛ njɛ́Ꞌ-Pilɑtɔ,

⁶³ńcú mbɔ̌ wɛ́ ŋɡɔ: «Zɑɑmɛtɑ́ɑ, pɛk sɛ́ ŋ́kẅíitɛ yɛcɔ́ nu.» Ŋɡɑŋcɔtnu wɑ́ kɑ pɛ́t ntʉʉ, ńcú ŋɡɔ: «Ŋ ɡʉ ńdɑ́Ꞌ ńzẅíimɛ nǔu nɛvú nǔu mbɑ́ɑtɛ lɛ́Ꞌ pɛtɑ́t.»

⁶⁴Ɛ́ pɔ́Ꞌɔ, lɑ́ pɛk sɛ́ ḿbíkŋɛ ŋɡɔ ɔ cú pɑlʉ̈ɔ́Ꞌntsɔ pyɛ́p nɛshi tɛ ŋ́kúu nǔu mbɑ́ɑtɛ lɛ́Ꞌ pɛtɑ́t. Tɛ ɛ́ pɔɔ pɔ́Ꞌɔ pɔ́, mbɔ ḿbɔ́ ɡɑŋku pɛ́ tɔ́ ńjɔ pfú yɛ́, ŋ́ɡɔ́ɔ ŋ́kɛ́ ŋ́ɡʉ ɛ́sẅíi lɑ́Ꞌ ŋɡɔ ɑ zẅíimɛ nǔu nɛvú! Yîyɑ́ cɔtnu mɛkŋɛ ḿbʉ́k tɛ ńtsɑ yi mbi.

⁶⁵Pilɑtɔ cú mbɔ̌ pɔ́p ŋɡɔ: «Pɑlʉ̈ɔ́Ꞌntsɔ pʉ́ɔlɑ́.» Pʉʉ ɡʉ ŋ́ɡɛ pɛ́ pyɛ́p nɛshi pɑ́Ꞌ pʉʉ kɔŋnɛ!

⁶⁶Pɔ́p ɡʉ ńdɔk yɛcɔ́ yúu ńnɑŋ ŋɡɔꞋ yí pɛ́ lɑ́Ꞌnɛ ńdɔk ńjʉ́ɔꞋ nɛshi, ŋ́ɡɔ́ɔ ńtík pɑlʉ̈ɔ́Ꞌntsɔ, pɔ́p pɔ́ ḿbyɛ́p, ḿbɔ́k yúu nɛɡɛ nǔu nɛshi.