Read Ngomba Mɑtʉ̈ɔ 28 Bible Online

Mɑtʉ̈ɔ 28 - Ngomba bible

Mɑtʉ̈ɔ 28

¹Lɛ́Ꞌnji-Pɑyúdɑ ɡɛ ńdɛɛ, ɛ́ pɔ́ mbɑ́ꞋmbɑꞋɑ́ nǔu nduŋmbi lɛ́Ꞌ nǔu ŋɡɑplɑ́Ꞌ, Mɑlíyɑ-Mɑkdɑlɑ pɔ́p wɛcɔ́ Mɑlíyɑ pɔ́ ŋ́ɡʉ nɛjʉ́ɔ nɛshi,

²ŋ́ɡɔ́ ŋ́kúu zúꞋu, ńzúꞋ tsɛ́tsɑ́Ꞌ puu ńtsʉ́Ꞌnɛ tɛꞋ. MbíꞋŋɡɔ Cʉ̈ɔꞋ-Sɛ́ ɛ́fú tʉ́nɛ́pú ńcúŋ, ńtɔ́ ŋ́kiimɛ ŋɡɔꞋ yí pɛ́ kɑ lɔknɛ ńjʉ́ɔꞋ ntsu-nɛshi, ŋ́kɔ́Ꞌ ńnɑ́ŋ ndǔ ŋɡɔꞋ ɛ̂yɑ́.

³A kɑ pɔ́ ŋ́kyɛꞋ zʉꞋ pɑ́Ꞌ mɛnɛ́ɛ-mbʉŋ lɑ́, mɛndẅí mɛ́ pɛn ḿbɔ́ fúk tɛ ŋ́ŋwɑŋɛ.

⁴Pɑpyɛ́p nɛshi jʉ́ɔ pɔ́Ꞌɔ, ŋ́ɡwɛt, ḿbɔ́k, ḿvutɛ ńnɔɔtɛ sɛ́ pɑ́Ꞌ pɛpfú lɑ́.

⁵Cʉ̈ɔꞋ-Sɛ́ cú mbɔ̌ pɑŋɡɛ́ ɛ̂pɑ́ ŋɡɔ: «Kɔɔ pʉʉ pɔ́k, n jí ŋɡɔ pʉʉ tɔ́ lɔɔ Yɛ́su ẅí pɛ́ kɑ kẅiinɛ wɛ́ nǔu tʉ́ mbɑ́ŋtɛ pɑ́ŋtɛ́nɛ lɑ́.»

⁶A kɑ́ pɛ́t ḿbɔ́ zɑꞋnɛ pɔ́, ɑ zẅíimɛ nǔu nɛvú pɑ́Ꞌ ɑ kɑ cúnɛ lɑ́. Pʉʉ tɔ́ ńdíŋɛ zʉꞋ yí pfú yɛ́ ḿbɔ́nɛ zúꞋu lɑ ńjʉ́ɔ.

⁷Pʉʉ ɡɔ́ɔ ŋ́ɡʉ ɛ́sẅíi ɡɑŋku pɛ́ ŋɡɔ ɑ zẅíimɛ nǔu nɛvú, ŋɡɔ ɑ piitɛ Ŋɡɑlilɛɛ ḿbɔ́ ńzẅíꞋlɛ wʉ́ʉ pɛ́ pɔ́p, pʉʉ ɡʉ ŋ́kúu zúꞋu lɑ ńjʉ́ɔ wɛ́. Yɔ nu yí mɔ ḿbɔ́ ŋ́ɡẅɛɛ nɛsẅíi wʉ́ʉ.

⁸Pɑŋɡɛ́ pɔ ɡɔ́ɔ ɛ́fú mbʉʉ nɛshi ŋ́ɡʉ nɛcú yɔ nu mbɔ̌ ɡɑŋku-Yɛ́su. CʉɔꞋ pɛ́t ḿbɔ́ pɔ nǔu pɔ́p, lɑ́ pɔ́p pɔ́ ńtsɑ́ɑtɛ tsɑ́ɑtɛ́nɛ,

⁹ńtɔ́ nɛnɛn, ḿbuutɛ Yɛ́su. A cú mbɔ̌ pɔ́p ŋɡɔ. «N cɛꞋlɛ wʉ́ʉ!» Pɔ́p pi mɛkẅíꞋlɛ mbi yɛ́, ŋ́ɡẅɛɛ mɛku mɛ́, ŋ́ɡúꞋlɛ wɛ́.

¹⁰Yɛ́su ɡɔ́ɔ ŋ́kɛ́ ńcú mbɔ̌ pɔ́p ŋɡɔ: «Kɔɔ pʉʉ pɔ́k.» Pʉʉ ɡʉ ńcú mbɔ̌ pɔ́ɔpɛ́mɑ́ pɑ́ɑ, ŋɡɔ pɔ́p ɡʉ nɛ́ Ŋɡɑlilɛɛ, ŋɡɔ pɔ́p ɡʉ ńjʉ́ɔ wɑ́ɑ pɔ zúꞋu.

¹¹Pɑŋɡɛ́ pɔ́ sɛ̂ndúŋ ḿbɔ́ ŋ́ɡʉ, pɛcɔ́ pɑlʉ̈ɔ́Ꞌntsɔ nǔu pi pɔ́p kɑ pɔ́ ḿbyɛ́p nɛshi ɡʉ tʉ́sɔŋ, ḿbɛ́ɛtɛ mbɑ kʉ̈ɔ́ lɑ́ yi ɛ́ lɛɛnɛ, ɛ́sẅíi mɑ́nzɔŋ-pɛtɑ́tndɑ́-pɑnɔŋpɔꞋ.

¹²Pɛtɑ́tndɑ́-pɑnɔŋpɔꞋ, fúŋ pɛkɛ́m-lɑ́Ꞌ, pɔ́p pɛpɔ́p cúꞋlɛ ńnɑ́ŋ sɛ́, ŋ́kwɑŋɛ, ŋ́ɡɑ́ ḿbʉ̈ɔꞋ-ŋkɑ́p mbɔ̌ pɑlʉ̈ɔ́Ꞌntsɔ,

¹³ńcú mbɔ̌ pɔ́p ŋɡɔ: «Pʉʉ cú pɔ ŋɡɔ pʉʉ lɑ́Ꞌ ḿbɔ́ ńdɛ́ nɛtúꞋ, ɡɑŋku-Yɛ́su tɔ́ ńjɔ pfú yɛ́ ńdɔk ŋ́ɡʉ.

¹⁴Ŋɡɔ́mnɑɑ lɑɑ ŋ́kɛ́ ńzúꞋ, mbɔ pɛk ɡʉ ńjí nu yí pɛk ɡʉ ɛ́sẅíi wɛ́, ḿbɔ́k wʉ́ʉ nɛjʉ́ɔ ŋɡʉ̈ɔ́Ꞌ.»

¹⁵Pɑlʉ̈ɔ́Ꞌntsɔ cẅɛ́ɛ ŋkɑ́p, ŋ́ɡɛ pɑ́Ꞌ pɛ́ cúnɛ mbɔ̌ pɔ́p. Ɛ́ pɔ́Ꞌɔ lɑ́ yɔ nu ɡɔ́ɔ ɛ́sɑt zʉꞋ tsɛtsɛt pɑyúdɑ. Pɛ́ cú pɔ yɛ́tɛ́ tɛ ŋ́kúu lɔ́Ꞌnɛ.

¹⁶Gɑŋku-Yɛ́su ntsɔ̌pmɔꞋ nɛ́ nɛɡɛ́m ɡɛ pɔ́Ꞌɔ ŋ́ɡʉ nɛ́ Ŋɡɑlilɛɛ, ŋ́kɔ́Ꞌ ndǔ nɛŋkɔ́Ꞌ ni Yɛ́su kɑ pɔ́nɛ zúꞋu, mbɔ ɑ kɑ lɛꞋlɛ mbɔ̌ pɔ́p, ŋɡɔ pɔ́p pɛ́pɔ́p ɡʉ ńdɑ́Ꞌ ḿbuutɛ zúꞋu.

¹⁷Pɔ́p pɔ́ tɛ ńjʉ́ɔ Yɛ́su, ŋ́kẅíꞋlɛ sɛ́, ŋ́ɡúꞋlɛ wɛ́, lɑ́ pɛcɔ́ pʉɔ pɔ́ tsɛtsɛt pɔ́p, ḿbɔ́ ḿmʉꞋlɛ mʉꞋlɛ́nɛ.

¹⁸Yɛ́su tɔ́ nɛjɔ́ŋ pɔ́p, ńcú mbɔ̌ pɔ́p ŋɡɔ: «Sɛ́ kɑ ɡɑ́ mɛtʉʉ tsʉʉ mbɔ̌ mɔ nɛlɔk ɛ́sɑ́Ꞌ yúu mi ɛ́ tʉ́nɛ́pú mbɑ yi ɛ́ ndǔ tsɛ́tsɑ́Ꞌ.»

¹⁹Pɔ́Ꞌɔ lɑ́, pʉʉ ɡʉ túu nɛ́ túu, ńdɔk pʉɔmɛsɔŋ ŋ́ɡɛ ɡɑŋku pɑ́ɑ, ńnuꞋ wɔ́p ŋki nǔu lík Tɑ́t, mbɑ Mɔ́ɔ, mbɑ zẅikŋɛ Lɛ́ɛnɛ́nɛ,

²⁰ńzíꞋ wɔ́p nɛtík ku nǔu mɛnu tsʉʉ mi mɔ ńzíꞋnɛ wʉ́ʉ. Pʉʉ jí ŋɡɔ, kwɑꞋ mɔ, ŋ ɡʉ ńdɑ́Ꞌ ḿbɔ́ pɔ tsɛtsɛt pʉʉ tɛ ntsɛ́llɛ́ lɑ́Ꞌ mɛ.