Read Ngomba Mɑtʉ̈ɔ 3 Bible Online

Mɑtʉ̈ɔ 3 - Ngomba bible

Mɑtʉ̈ɔ 3

¹Ɛ́ zɛ ńnɑ́ŋ, Jɑ̂ŋ Mbɑptíshi ŋwɑk kɔ̂ŋtɛt-Judɛ̂, ḿbɔ́ ɛ́sɑ́Ꞌ Ŋkʉʉ ŋɡɔ:

²«Pʉʉ kúpmɛ mɑt wʉʉ, mbíꞌŋɡɔ ŋkɑ́ yi Sɛ́ ɡʉ ɛ́sɑ́Ꞌ nɛfɔɔ nɛ́ kẅɛ́Ꞌlɛ tɛ ḿbɔ́ ḿbɑ́ɑtɛ.»

³Jɑ̂ŋ lɔk pɔ́Ꞌɔ, ḿbɔ́ ŋu ẅí Ŋɡɛ́mndʉ̈ɔ́Ꞌ-Sɛ́ Ɛsɑ̌yɑ kɑ cúnɛ nu ntɛ́ wɛ́ ŋɡɔ: «Ŋɡi-ŋu kɔ́Ꞌ ɛ́fú kɔ̂ŋtɛt, ńcú ŋɡɔ: “Pʉʉ niitɛ sɛ̂ndúŋ-Tsɑpʉɔ, ŋ́ɡɛ mɛlɛ̌ɛndúŋ mɛ́ tʉ́ʉ ndʉ́ŋndʉŋ.”»

⁴Jɑ̂ŋ kɑ pɔ́ kɔ̂ŋtɛt, ḿmɑꞋ ndẅí, mbɔ pɛ́ kɑ lɔk mɛnuk-kɑmɛ̂l ḿbɑ́Ꞌ, ńdɔk ŋɡup-nɑɑ ńtsɔ́ lúꞋ yɛ́, pɛ́ yúujʉ́ pɔ́ ŋɡẅíimɛ ŋ́ɡɛ lumɔ́nɑɑ.

⁵Pʉɔ pɔ́ ɛ́fú Yɛlúsɑlɛm, mbɑ tsɛt Judɛ̂ tsʉʉ, mbɑ nǔu pɑk-ŋɡɔŋ yí ɛ́ mbʉʉ-ŋki-Juudɛŋ ɡúu ńtɔ́ ńjʉ́ɔ Jɑ̂ŋ,

⁶ńtʉ́ʉ mbi pʉɔtsʉʉ, ḿbɛ́m mɛnu kɛpɔŋ mɔ́p, ɑ nuꞋ wɔ́p tsɛt ŋki-Juudɛŋ.

⁷Jɑ̂ŋ jʉ́ɔ pɑ́Ꞌ pʉɔ nǔu nɔɔ-pɑfɑlísɑy pɔ́p pʉɔ nǔu nɔɔ-pɑsɑdukɑy tɔ́nɛ yɔ́p tɛ ńzɑ́ɑ, pɑ́Ꞌ ɑ ɡʉ ńnuꞋ wɔ́p ŋki, ɑ cú mbɔ̌ pɔ́p ŋɡɔ: «Njẅɛt mɛnɔ́, pɑtɑ́ɑ mɛzúŋ, wɔ̌ pɛnnɛ ɛ́sẅíi wʉ́ʉ nɛkʉɔ ŋɡʉ̈ɔ́Ꞌ yi pʉʉ lɔɔnɛ tɛ ɛ́ pɔ́ ŋ́ɡʉ ḿvu nǔu pʉʉ?

⁸Pʉʉ ɡɛ pɔ mɛnu sʉ́Ꞌnɛ mí ɛ́ nyɛtnɛ ŋɡɔ pʉʉ kúpmɛ mɑt.

⁹Pʉʉ pɑ́ɑ nɛlɔk pɔ ndɑꞋ ntsu wʉ́ʉ ńcú ŋɡɔ: “Pɛk njẅɛt-Ábɛlɛhɑ̂m. Lɑ́ ŋ kɛ́ ɛ́sẅíi wʉ́ʉ, Sɛ́ kuꞋ nɛshɔt mɛŋɡɔꞋ mɔ ńdɔk ŋ́ɡɛ njẅɛt-Ábɛlɛhɑ̂m.”

¹⁰Pɛ́ zɛɛ mɔ́ ńdɑ́Ꞌ ńtíi nzɑɑ nɛlɔk ŋ́kʉ́ɔꞋ mbɑ yɛ́tɛ́ tʉ́ lɑ́ yi ɛ́ kɑ́ pɔ́ ńzɛ́m ntɑ́ɑ sʉ́Ꞌnɛ pɔ́, ɛ́fú sɛ́ kʉ́ɔꞋ wɛ́, ŋ́kɛ́ ḿmɑꞋ pɔ múk.

¹¹Mɔ, ŋ ɡẅɛɛ yɑ́ɑ pɔ ndɑꞋ nɛnuꞋ wʉ́ʉ tsɛt ŋki, nɛlɔk ńnyɛt ŋɡɔ pʉʉ kúpmɛ mɑt. Lɑ́ ŋu ẅí ɑ nzʉʉ mɔ ḿbɔ́ ńtɔ́, ɡʉ ńtɔ́ yɛ́ ńníꞋ pʉɔ mbɔ̌ Zẅikŋɛ Lɛ́ɛnɛ́nɛ, ńníꞋ pʉɔ tsɛt múk. A tsɑ wɑ́ɑ, tɛ ŋ kɑ́ kuꞋ nɛsɔt mɛtɑp mɛ́ pɔ́.

¹²A ɡʉ ńtɔ́ ńtíitɛ yúu pinɛ pɛ́ lɑknɛ ŋkɑ́Ꞌ. ŃníꞋ yɛ sʉ́Ꞌnɛ tsɛt ŋkɛn. Ńtsʉ́Ꞌ kyɑŋɛ ḿbʉ̈ɔt tsɛt múk ẅi ɛ́ kɛ́ lɑ́Ꞌ ḿbɛ́ pɔ́.»

¹³Yɛ́su ɡɔ́ɔ ŋ́kɛ́ ɛ́fú Ŋɡɑlilɛɛ ńtɔ́ ntsuŋki-Juudɛŋ, ńjʉ́ɔ Jɑ̂ŋ nɛpɔ́ yi Jɑ̂ŋ ɡʉ ńnuꞋ wɛ́ ŋki.

¹⁴Jɑ̂ŋ pɔ́ ńdʉꞋ, ḿbɔ́ ńcú mbɔ̌ wɛ́ ŋɡɔ: «Gu ɡẅɛɛnɛ nɛnuꞋ wɑ́ɑ ŋki, ɔ pɛn ńtɔ́ ŋɡɔ mɔ nuꞋnɛ wú tsɛt ŋki?»

¹⁵Lɑ́ Yɛ́su pʉ̈ɔt mbɔ̌ wɛ́ ŋɡɔ: «Pɛ́m ŋɡɔ ɛ́ pɔ́ pɔ́Ꞌɔ, ŋkɔ̂ɔnɛ, pûu ɡɛ pɔ́Ꞌɔ, mbíꞋŋɡɔ ɛ́ píkŋɛ ŋɡɔ pûu ɡɛ yúu tsʉʉ yí Sɛ́ píkŋɛnɛ ɛ́ lɔk ḿbɔ́ ndʉ́ŋndʉŋ.» Jɑ̂ŋ ɡɔ́ɔ ŋ́kɛ́ ḿbɛ́m,

¹⁶ńnuꞋ wɛ́ ŋki. Yɛ́su pɔ́ tɛ ńcẅɛt, ntsu-tʉ́nɛ́pú tsɔ́Ꞌnɛ ńtʉ́ʉ. A jʉ́ɔ Zẅikŋɛ-Sɛ́ fú tʉ́nɛ́pú ńcúŋ ḿbɔ́ pɑ́Ꞌ puutɛ lɑ́, ńtɔ́ ńnɑ́ŋ nǔu wɛ́.

¹⁷Ŋɡi-ŋu fú tʉ́nɛ́pú ŋɡɔ: «Yɔ Mɔ́ɔ wɑɑ, ŋ kɔŋ wɛ́ tɛꞋ, ɑ yɑ́ɑ tsɑ́ɑtɛ.»