Read Ngomba Mɑtʉ̈ɔ 6 Bible Online

Mɑtʉ̈ɔ 6 - Ngomba bible

Mɑtʉ̈ɔ 6

¹Yɛ́su pɛn ńcú ŋɡɔ: «Pʉʉ lɑɑ ḿbɔ́ ŋ́ɡʉ ŋ́ɡɛ yúu mi nɛpʉ́ʉ-Sɛ́ píkŋɛnɛ, pʉʉ lɑk tú yʉ́ʉ nɛɡɛ zʉꞋ lɑ́Ꞌ zúꞋu, nǔu ntɛ́ yi pɛ́ ɡʉ ḿbɔ́ ńdíŋɛ wʉ́ʉ. Pʉʉ lɑɑ ŋ́ɡɛ pɔ́Ꞌɔ, mbɔ Tɑ̌ɑ wʉʉ ẅí ɑ tʉ́nɛ́pú kɛ́ ɡɛ ńtsɔ́Ꞌ fɑꞋ yʉ́ʉ pɔ́.

²Ɔ lɑɑ ḿbɔ́ ŋ́ɡʉ ŋ́ɡɑ́ ŋkɑ́p mbɔ̌ pɑkɛ́yúu, kɔɔ ɡɛ pɔ́ pɑ́Ꞌ pɛ́ ɡʉ tʉ́ʉ ḿbɔ́ ńjʉ́ɔ. Gɑŋnyɛtmbʉʉ ɡɛnɛ pɔ́Ꞌɔ. Pɔ́p kúu ndɑ́-cúꞋlɛ, ńtʉ́ʉ mbɑ mɛtú-ndúŋ lɑ́ ŋ́ɡɑ́ yúu, pɔ́Ꞌɔ, ŋɡɔ pʉɔ ɡʉ̈ɔꞋlɛ wɔ́p. Lɑ́ ɛ sẅíi wʉ́ʉ, kwɑꞋ nɛ́nẅín, pɔ́p kɑ lɑ́Ꞌmɔ́ ńcẅɛ́ɛ tsɔ́ꞋfɑꞋ yɔ́p.

³Lɑ́ ɛ́ ɡʉ nǔu ɡu, mbɔ ɔ lɑɑ ŋ́ɡʉ ŋ́ɡɑ́ ŋkɑ́p mbɔ̌ pɑkɛ́yúu, ɔ pɑ́ɑ nɛɡɛ tɛ mbɔŋ súu nu jí.

⁴Ɛ́ lɛɛ pɔ́Ꞌɔ, yúu mi ɔ ɡɑ́nɛ, ɛ́ pɔ́ pɔ tsɛt ntsɛm, Tɑ́t wu Sɛ́ ẅi ɑ jʉ́ɔnɛ yúu mi pɛ́ ɡɑ́nɛ tsɛt ntsɛm, ɡɛ ńtsɔ́Ꞌ fɑꞋ yú.»

⁵Pʉʉ lɑɑ ḿbɔ́ ńcɛꞋlɛ Sɛ́, kɔɔ pʉʉ ɡɛ pɑ́Ꞌ ɡɑŋnyɛtmbʉʉ, pɔ́p kɔŋ nɛtʉ́ʉ tsɛt mɛndɑ́-cúꞋlɛ mbɑ mɛtú-ndúŋ lɑ́ ńcɛꞋlɛ Sɛ́, pɑ́Ꞌ pʉɔ tsʉʉ ɡʉ ńjʉ́ɔ wɔ́p. Lɑ́ ɛ sẅíi wʉ́ʉ, kwɑꞋ nɛ́nẅín, pɔ́p kɑ lɑ́Ꞌmɔ́ ńcẅɛ́ɛ tsɔ́ꞋfɑꞋ yɔ́p.

⁶Lɑ́ ŋ́ɡʉ nǔu pʉʉ, mbɔ ŋu lɑɑ ḿbɔ́ ŋ́ɡʉ ńcɛꞋlɛ Sɛ́, ɑ kúu tsɛt lûmndɑ́ lʉɔmɛ́nɛ, ŋ́kẅíipɛ ntsundɑ́, ńnɑ́ŋ pɔ ndʉɔmɛ lʉɔmɛ́nɛ lɑ́ ńcɛꞋlɛ Tɑ́t wɛ ẅí pɛ́ ńjʉ́ɔ wɛ́ pɔ́. Tɑ́t wu ẅí ɑ jʉ́ɔnɛ yúu mi ɔ ɡɛnɛ zʉꞋ lʉɔmɛ́nɛ, ɑ ɡʉ ŋ́ɡɛ ńtsɔ́Ꞌ fɑꞋ yú.

⁷Pʉʉ lɑɑ ḿbɔ́ ńcɛꞋlɛ Sɛ́, kɔɔ pʉʉ cú nu kɛ́ zɑ́Ꞌ pɑ́Ꞌ pʉɔ pinɛ pɔ́p kɑ́ jí Sɛ́ pɔ́, pɔ́p kwɑŋɛ pɔ ŋɡɔ pɔ́p ɡʉ ńtɑ́ŋ zɔɔ tɛꞋ lɑ́ pɛ́ zúꞋ.

⁸Kɔɔ pʉʉ fʉꞋnɛ wɔ́p, mbíꞌŋɡɔ Tɑ̌ɑ wʉʉ sɛ́ ńjí yúu mi ɛ́ sɛ́ ńjɑ́k mbɔ̌ pʉʉ, tɛ pʉʉ ɡɔ ńdɔ́ɔ ɑ pɔ́ ńjí.

⁹Pʉʉ lɑɑ ḿbɔ́ ńcɛꞋlɛ Sɛ́ pʉʉ cú ŋɡɔ: «Tɑ́t wɛk, ɡu ẅí ɔ pɔ́nɛ tʉ́nɛ́pú. Gɛ pʉɔmɛsɔŋ jí ŋɡɔ ɑ ndɑꞋ ɡu ḿbɔ́ Sɛ́.

¹⁰Gɛ nɛfɔɔ nú tɔ́. Gɛ pɛ́ pɔ́ ńzúꞋ ntsu wú ndǔ tsɛ́tsɑ́Ꞌ, pɑ́Ꞌ pɛ́ sɛ́ ńzúꞋ tʉ́nɛ́pú.

¹¹Gɑ́ yɛ́k yúujʉ́ yi ɛ́ ɡʉ ŋ́kuꞋ nǔu pɛk lɔ́Ꞌnɛ,

¹²likŋɛ mɛfɑɑnɛ mɛ́k, ŋ́ɡɑ́ mbɔ̌ pɛk, pɑ́Ꞌ pɛk sɛ́ ńdikŋɛ yɛ́k ŋ́ɡɑ́ mbɔ̌ pʉɔ pi pɔ́p ɡɛnɛ nǔu pɛk lɑ́.

¹³Kɔɔ nɑ́ wɛk pɛk kúu tsɛt ŋkwɑꞋnɛ, cẅɛ́ɛ wɛ́k mbɔ̌ Sɑ́ttɑ. MbíꞋŋɡɔ ɡu pɔ́nɛ fɔɔ, mɛtʉʉ tsʉʉ pɛn ḿbɔ́ pɔ mú, pɛ́ sɛ́ ŋ́ɡúꞋlɛ pɔ ndɑꞋ wú mɛŋɡuꞋ mɛŋɡuꞋ. Ɛ́ pɔ́Ꞌɔ.»

¹⁴Ɛ́ pɔ́Ꞌɔ, ḿbɔ́ yi pʉʉ lɑɑ ńzɛɛ ńdikŋɛ mɛfɑɑnɛ pɛcɔ́ pʉɔ, lɑ́ mbɔ Tɑ̌ɑ wʉʉ ẅí ɑ tʉ́nɛ́pú ɡʉ ŋ́ɡɛ ńdíkŋɛ mʉ́ʉ ɡúu.

¹⁵Lɑ́ pʉʉ lɑɑ ŋ́kɛ́ mbɔɔ likŋɛ mɛfɑɑnɛ pɛcɔ́ pʉɔ pɔ́, mbɔ Tɑ̌ɑ wʉʉ ŋ́ɡʉ ŋ́ɡɛ ńdikŋɛ mʉ́ʉ ɡúu pɔ́.

¹⁶Pʉʉ lɑɑ ŋ́kɔŋ kɔŋnɛ ńnɑ́ŋ njí nɛcɛꞋlɛ Sɛ́, kɔɔ pʉʉ kɔk shʉ́ wʉ́ʉ pɑ́Ꞌ ɡɑŋnyɛtmbʉʉ. Pɔ́p kɔk shʉ́ wɔ́p, ńdɔk ńnyɛt ŋɡɔ pɔ́p sɛ́ ńnɑ́ŋ njí nɛcɛꞋlɛ Sɛ́. Lɑ́ ɛ sẅíi wʉ́ʉ, kwɑꞋ nɛ́nẅín, pɔ́p ńdɑ́Ꞌmɔ́ ŋ́ɡẅɛɛ tsɔ́ꞋfɑꞋ yɔ́p.

¹⁷Lɑ́ ŋ́ɡʉ nǔu pʉʉ, mbɔ ŋu lɑɑ ḿbɔ́ ńnɑ́ŋ njí nɛcɛꞋlɛ Sɛ́, ɑ ɛ́suk shʉ́ wɛ́, ɛ́shɛp tú yɛ́.

¹⁸Ɛ́ lɛɛ pɔ́Ꞌɔ, wɛcɔ́ ŋu pɔɔ jí ŋɡɔ ɔ sɛ́ ńnɑ́ŋ njí nɛcɛꞋlɛ Sɛ́ pɔ́. Tɑ́t wu Sɛ́ zɛnɛjʉ́ ẅi pɛ́ kɑ́ pɔ́ ńjʉ́ɔ wɛ́ pɔ́ zɛɛnɛ ńjí. Jʉ́ ẅi ɑ sɛ́ ńjʉ́ɔ yúu mi ɔ ɡɛnɛ ndʉɔmɛ lʉɔmɛ́nɛ ɡʉ ŋ́ɡɛ ńtsɔ́Ꞌ fɑꞋ yú.

¹⁹Kɔɔ pʉʉ cúꞋlɛ yúu tʉʉndɛn yʉ́ʉ ndǔ tsɛ́tsɑ́Ꞌ. ZʉꞋ yí sɑɑ pɔ́p ɡwɛ́tkɑ́ɑ ɡʉ ŋ́kwɛ́t tsʉʉ, ŋ́kɛ́ ḿbɔɔ pɔ́Ꞌɔ pɔ́, pɛtsɔ́ŋ pʉ̈ɔ́Ꞌ ndɑ́, ńtíi.

²⁰Pʉʉ cúꞋlɛ yúu tʉʉndɛn yʉ́ʉ pɔ nɛjɔ́ŋ-Sɛ́, zʉꞋ sɑɑ pɔ́p ɡwɛ́tkɑ́ɑ kɑ́ pʉ́ʉpɛ yúu pɔ́. Pɛtsɔ́ŋ pɛn ŋ́kɛ́ ḿbɔɔ kuꞋ nɛpʉ̈ɔ́Ꞌ ndɑ́ ńtíi yúu pɔ́.

²¹Jínɛ ŋɡɔ yúu tʉʉndɛn ŋu lɑɑ ḿbɔ́ ɡɔ́ lɑ́, mbɔ tʉ́m yɛ́ ɡʉ ḿbɔ́ pɔ zúꞋu.

²²Mík-ŋu mbɔ̌ wɛ́ ḿbɔ́ pɑ́Ꞌ lɑ̂m ẅí ɑ lɔknɛ ńjʉ́ɔ zʉꞋ, mík mú lɑɑ ḿbɔɔ sʉ́ʉ, mbɔ ɔ ɡʉ ńjʉ́ɔ zʉꞋ sʉ́Ꞌnɛ.

²³Lɑ́ mík mú pɛn ḿbɔ́ tɛ sʉ́ʉ, mbɔ ɔ ɡʉ ńtsʉ́Ꞌ ḿbɔ́ pɔ tsɛt nzɛ́nzʉ́ʉ. Mík mú pɔ́ tɛ sʉ́ʉ pɑ́Ꞌ pɛ́ cúnɛ lɑɑ, mbɔ ɔ ɡʉ ńtsʉ́Ꞌ ḿbɔ́ pɔ tsɛt fɛ́m nzɛ́nzʉ́ʉ.

²⁴Ɛ́ lɑɑ ḿbɔ́ wɛcɔ́ ŋkwɑɑ pɔɔ fɑꞋ mbɔ̌ pɛtɑ́fɑꞋ pɛ́pɑ́ tɑ́Ꞌ ŋkɑ́ pɔ́. A ɡʉ ńzúꞋ ntsu tɑ́Ꞌ, ńdʉꞋnɛ nɛzúꞋ ntsu wɛcɔ́. A ɡʉ ŋ́kɔŋ tɑ́Ꞌ ŋu, ḿbɑɑ wɛcɔ́. Ɛ́ lɑɑ ḿbɔ́ pʉʉ pɔɔ ḿbɔ́ ńzɑ́p tʉ́m nǔu Sɛ́, ḿbɛn ḿbɔ́ ńzɑ́p nǔu ŋkɑ́p pɔ́.

²⁵N dɔk ɛ́sẅíi wʉ́ʉ ŋɡɔ: Kɔɔ pʉʉ nɑ́ŋ ḿbúꞋ mbʉʉ yʉʉ ŋɡɔ pɛk ɡʉ ŋ́kwɛ́t kʉ̈ɔ́, pɛk ɡʉ ńdɔk ŋki ɡɔ́ ńnɔ́? Pɛk ɡʉ ńdɔk ndẅí ɡɔ́ ḿmɑꞋ? Wʉʉ nɛpɔ́ ɡú kɑ́ tsɑ yúupɛjʉ́ pɔ́ ɔɔ? Mbʉʉ ŋu pɛn mbɔɔ pɔ́ yúu tʉʉndɛn ńtsɑ mɛndẅí pɔ́ ɔɔ?

²⁶Pʉʉ líŋɛ pɛshʉ́ŋ lɑ́ ńjʉ́ɔ, pɔ́p lɔɔ ḿbi yúu pɔ́, ŋ́kɛ́ ḿbɔɔ ńdɑk yúu ŋ́ɡɑ́ ndɑ́ pɔ́, pɔ́p kɑ́ ɡẅɛɛ ntɑŋ pɔ́, Sɛ́ ẅi ɑ tʉ́nɛ́pú zẅíknɛ wɔ́p. Pʉʉ mbɔ̌ Sɛ́ ḿbɔ́ yúu tʉʉndɛn tɛꞋ, ńtsɑ pɛshʉ́ŋ.

²⁷A wɔ̌ ɑ nǔu pʉʉ ẅí ḿbɔ́ ɑ sǐi ńdɔk pɔ pɑ́Ꞌ ɑ púꞋnɛ mbʉʉ yɛ, ŋ́kuꞋ nɛkẅiꞋ tɑ́Ꞌ lɛ́Ꞌ nǔu mɛlɛ́Ꞌlɑ́Ꞌ mɛ́?

²⁸Tɛ pʉʉ púꞋ mbʉʉ yʉʉ nǔu nu mɛndẅí mɛlɑ́Ꞌ kʉ̈ɔ́? Pʉʉ líŋɛ mɛtɔ̌ɔtɔ̌ɔ mi ɛ́ nǔu nɛɡíi ŋkɑ́Ꞌ ńjʉ́ɔ. Nɛɡíi lɔɔ ɛ́fɑꞋ fɑꞋ pɔ́, ŋ́kɛ́ ḿbɔɔ ḿbɑ́Ꞌ mɛndẅí pɔ́.

²⁹Lɑ́ ŋ kɛ́ ɛ́sẅíi wʉ́ʉ, nɛɡíi mɑꞋ ndẅí tɛ mbɑ fɔɔ Sɑlɛ́mɔ kɑ lɑ́Ꞌ ḿbɔ́ nǔu wɛ nɛɡúꞋ tsʉʉ tsʉʉ, ḿbɔɔ lɑ́Ꞌ ḿmɑꞋ ndẅí tɛ ɛ́ pɔŋ pɑ́Ꞌ yɔp pɔ́.

³⁰Tɛ Sɛ́ lɑɑ ḿmɑꞋ ndẅí sʉ́Ꞌnɛ nǔu nɛɡíi ẅi ɑ júknɛ ŋkɑ́Ꞌ lɔ́Ꞌnɛ, njí kiɛ pɛ́ kʉ́ɔꞋ ńtɔɔ múk, mbɔ ɛ́ ɡʉ ŋ́kúu nǔu pʉʉ lɑ ɑ zɑ́k ndẅí kîi? Ɛ́ pɔ́ pɔ ŋɡɔ: «Pʉʉ kɑ́ zɑ́p tʉ́m nǔu Sɛ́ ŋkɑ́ tsʉʉ pɔ́.

³¹Pɔ́Ꞌɔ lɑ́, pʉʉ pɛn ḿbúꞋ mbʉʉ yʉʉ, ńcú ŋɡɔ pɛ́ ɡʉ ŋ́kwɛ́t kʉ̈ɔ́? Pɛ́ ɡʉ ńdɔk ŋki ɡɔ́ ńnɔ́? Pɛ́ ɡʉ ńdɔk ndẅí ɡɔ́ ḿmɑꞋ?

³²Pɑ kɛ́ jí Sɛ́ nɑ́ŋnɛ ŋ́ɡẅɛɛ yîyɑ́ ntɛ́ kwɑŋɛ. Ɛ́ ɡʉ nǔu pʉʉ, mbɔ Tɑ̌ɑ wʉʉ Sɛ́ jí yúu mi ɛ́ ɡʉ cẅɛ́lɛ́ wʉ́ʉ.

³³Pʉʉ luŋmbi ńzúꞋ pɔ nu-nɛfɔɔ-Sɛ́, pɔ́p yúu mi Sɛ́ sɛ́ ŋ́kɔŋ, ɑ tsʉ́Ꞌ ŋ́ɡɑ́ mîmɑ́ mɛyúu ńdɔk ŋ́kẅiꞋ kẅiꞋnɛ.

³⁴Pɔ́Ꞌɔ lɑ́, kɔɔ pʉʉ púꞋ mbʉʉ yʉʉ nǔu nu-lɛ́Ꞌlɑ́Ꞌ-zɔ́n. Lɛ́Ꞌlɑ́Ꞌ-zɔ́n, ɡʉ ŋ́ɡɛ ńtɔ́ nɛ́ mɛ́ mɛnu. Yɛ́tɛ ŋɡʉ̈ɔ́Ꞌ lɑ́ kuꞋ nǔu yɛ́ lɛ́Ꞌlɑ́Ꞌ.»