Read Ngomba Mɑtʉ̈ɔ 7 Bible Online

Mɑtʉ̈ɔ 7 - Ngomba bible

Mɑtʉ̈ɔ 7

¹Kɔɔ pʉʉ nɑ́ŋ ńtɔ́ mɛlɔ́Ꞌ-pʉɔ, ḿbɔ́k Sɛ́ nɛtɔ́ yʉ́ʉ lɔ́Ꞌ.

²Ɛ́ ɡʉ ɛ́fú pɔ nǔu ntɛ́ yi pʉʉ lɔknɛ ńtɔ́ lɔ́Ꞌ pɛcɔ́ pʉɔ, lɑ Sɛ́ pɛ́ɛ fʉꞋ nɛtɔ́ yʉ́ʉ lɔ́Ꞌ ɡúu. Pʉʉ jí ŋɡɔ: Sɛ́ ɡʉ ńtɑ́ɑ ńníꞋ pɑɑ yʉ́ʉ pɔ pɑ́Ꞌ pʉʉ zɛɛnɛ ńníꞋ yɛ́ pɛcɔ́ pʉɔ.

³Ɛ́ pɛn ŋ́ɡɛ ŋɡɔ́ku ɔ pɔ́ ńjʉ́ɔ mɔ́ ŋɡʉɔ-píi yi ɛ́ vunɛ lík-mɔ́ɔmɑ́ wu, lɑ́ kɛm-ntsẅíi nɔɔ lík ɡu, ɔ pɛn ŋ́kɛ́ ḿbɔɔ ḿbɔ́ ńjʉ́ɔ pɔ́ ɔɔ?

⁴Mbɔ ɔ ɡɛ ŋɡɔ́ku, lɑ́ ńcú mbɔ̌ mɔ́ɔmɑ́ wu ŋɡɔ: «Mɔ́ɔmɑ́, tsʉ́Ꞌ n cẅɛɛtɛ ŋɡʉɔ-píi yɑ́ yi ɛ́ lík ɡu lɑɑ, ŋ́ɡɔ́ ńcú, ḿbɔɔ ḿbɔ́ ńjʉ́ɔ kɛm-ntsẅíi mi ɛ́ nɔɔnɛ tsɛt yú pɔ́ ɔɔ?» Lɑ́ ɛ́ zɛɛ ḿbɔŋ nɛɡẅɛɛ jínu.

⁵Ŋkɔŋmík! Piitɛ ńcẅɛɛtɛ kɛm-yúu mi ɛ́ lík ɡu, tɛ ḿbɔ́ ńtsuŋ ńjʉ́ɔ zʉꞋ lɑ́ ŋ́kuꞋ nɛcẅɛɛtɛ ŋɡʉɔ-píi tsɛt lík-mɔ́ɔmɑ́ wu.

⁶Kɔɔ pʉʉ ɡɑ́ yúu mi ɛ́ yɛ́ Sɛ́, mbɔ̌ mvú mbɔ pɔ́p ḿbɛn ɛ́shɔtnɛ ńnɛ́mtɛ wʉ́ʉ. Kɔɔ pʉʉ mɑꞋ túkcí yʉ́ʉ mbi mɛnjínɑɑ. Mbɔ Pɔ́p ɡʉ ńnʉŋtɛ nɛ́ mɛku.

⁷Pʉʉ lɔ́ɔ, Sɛ́ ɡʉ ŋ́ɡɑ́ mbɔ̌ pʉʉ. Pʉʉ lɔɔ, Sɛ́ ɡʉ ŋ́ɡɛ pʉʉ jʉ́ɔ. Pʉʉ púꞋtɛ ntsundɑ́, ɑ ɡʉ ńtsɔ́Ꞌ ŋ́ɡɑ́ mbɔ̌ pʉʉ.

⁸Jínɛ ŋɡɔ ŋu lɑɑ ńdɔ́ɔ yúu, mbɔ pɛ́ ɡʉ ŋ́ɡɑ́ mbɔ̌ wɛ́, ńdɔɔ, mbɔ ɑ ɡʉ ńjʉ́ɔ, ḿbɛn ḿbúꞋtɛ ntsundɑ́, mbɔ pɛ́ ɡʉ ńtsɔ́Ꞌ ŋ́ɡɑ́ mbɔ̌ wɛ́.

⁹Pʉʉ pʉ́ɔlɑ́ ḿbɔ́ pɛtɑ́t mbɔ́ŋkʉ̈ɔ́, mɔ́ɔ wɔ̌ tsɛtsɛt pʉʉ lɑɑ ńdɔ́ɔ mbɛlɛ̂ɛt, mbɔ ɑ ɡʉ ŋ́ɡɑ́ ŋɡɔꞋ mbɔ̌ wɛ́?

¹⁰Mɔ́ɔ wɔ̌ lɔ́ɔ mbɑp shú, mbɔ ɑ ɡʉ ŋ́ɡẅɛɛ nɔ́ ŋ́ɡɑ́ mbɔ̌ wɛ́?

¹¹Pʉʉ ẅí pʉʉ fʉꞋnɛ́nɛ nu tɛꞋ jí nɛɡɑ́ yúu sʉ́Ꞌnɛ mbɔ̌ mbɔ́ŋkʉ̈ɔ́ pʉ́ʉ, tɛ ŋkɑ́ yɛsʉ́Ꞌʉ́ nǔu Tɑ̌ɑ wʉʉ ẅí ɑ tʉ́nɛ́pú? A ɡʉ ŋ́ɡɑ́ yúu sʉ́Ꞌnɛ mbɔ̌ pʉɔ pi pɔ́p lɔ́ɔnɛ mbɔ̌ wɛ́.

¹²Yúu mi pʉʉ sɛ́ ńtsɑ́ɑ ŋɡɔ pɛ́ ɡɛ nǔu pʉʉ lɑ́, pʉʉ ɡɛ kwɑꞋ yɛ́tɛ́ ɡúu nǔu pɛcɔ́ pʉɔ. Pʉʉ lɑɑ ŋ́ɡɛ pɔ́Ꞌɔ, mbɔ ɛ́ ɡʉ ḿbɔ́ yúu mi nɛpʉ́ʉ-Mɔ̌sɛ̂ɛ mbɑ mɛŋwɑꞋnɛ pɛŋɡɛ́mndʉ̈ɔ́Ꞌ-Sɛ́ píkŋɛnɛ.

¹³Pʉʉ tsʉ́Ꞌ nɛlɔɔ sɛ̂ndúŋ-tʉ́nɛ́pú, ńdɛɛ pɔ nǔu ntsuŋkɑ́Ꞌ ẅi ɛ́ kʉ́ʉpɛ kʉ́ʉpɛ́nɛ. Ntsuŋkɑ́Ꞌ ẅi ɛ́ ɡúꞋnɛ tɛꞋ, ɡʉ pɔ nɛ́ lɑ́Ꞌ-nɛvú. Sɛ̂ndúŋ ẅi ɛ́ ɡʉnɛ lɑ́Ꞌ-nɛvú ɡúꞋ tɛꞋ, nɛzɑ́ɑ pʉɔ sɛ́ ńdɛɛ pɔ ẅîwɑ́.

¹⁴Lɑ́ ntsuŋkɑ́Ꞌ ẅi ɛ́ ɡʉnɛ lɑ́Ꞌ-luk kɛ́mɛ kɑ́ ɡúꞋ. Sɛ̂ndúŋ pɛn ŋ́kʉ́ʉpɛ, pɑlɛɛ ẅîwɑ́ kɑ́ zɑ́ɑ.

¹⁵Pʉʉ lɑk tú yʉ́ʉ nǔu pʉɔ pí pɔ́p cɔtnɛ nu ŋɡɔ pɔ́p pɛŋɡɛ́mndʉ̈ɔ́Ꞌ-Sɛ́. Pɔ́p júk ńtɔ́ nɛjɔ́ŋ pʉʉ ŋɡɔ pɔ́p mɛnjinjɔ, lɑ́ kwɑŋɛ yɔ́p pɔ́ pɔ yɛ́ mɛnɑɑŋɡwɛ.

¹⁶Pʉʉ ɡʉ ńjí wɔ́p nǔu ŋɡɛnɛ mɛnu mɔ́p. Pɛ́ lɔɔ ŋ́kɑ́p nyɛt nǔu tʉ́-ndẅindẅi pɔ́, ndʉ́ŋndʉŋ pɑ́Ꞌ ɛ́ lɑɑ ḿbɔ́ pɛ́ pɔɔ kɑ́p nɛpi nǔu tʉ́-nɛŋɡɑ̌m pɔ́.

¹⁷Tʉ́ sʉ́Ꞌnɛ zɛ́m pɔ ntɑ́ɑ sʉ́Ꞌnɛ, lɑ́ tʉ́ kɛpɔŋ zɛ́m pɔ ntɑ́ɑ kɛpɔŋ,

¹⁸mbɔ tʉ́ sʉ́Ꞌnɛ pɔɔ zɛ́m ntɑ́ɑ kɛpɔŋ pɔ́, tʉ́ kɛpɔŋ kɛ́ mbɔɔ zɛ́m ntɑ́ɑ sʉ́Ꞌnɛ pɔ́.

¹⁹Tʉ́ tsʉʉ yi ɛ́ kɑ́ pɔ́ ńzɛ́m ntɑ́ɑ sʉ́Ꞌnɛ pɔ́, pɛ́ kʉ́ɔꞋ ńtɔɔ múk.

²⁰Pɔ́Ꞌɔ, pʉʉ ɡʉ ŋ́ɡɛ ŋ́ɡɔ́ ńjí pʉɔ pínɛ pɔ́p cɔtnɛ nu ŋɡɔ pɔ́p pɛŋɡɛ́mndʉ̈ɔ́Ꞌ-Sɛ́, ɛ́ lɛɛ pɔ nǔu mɑt wɔp.

²¹Ɛ́ ɡʉ nǔu pʉɔ pínɛ pɔ́p fúŋnɛ wɑ́ɑ ŋɡɔ: «Tsɑpʉɔ, Tsɑpʉɔ pɔ́p pɛtsʉʉ kɛ́ lɑ́Ꞌ ńjʉ́ pii-nɛfɔɔ-Sɛ́ pɔ́. NdɑꞋ pʉɔ pínɛ pɔ́p ɡɛnɛ yúu mi Tɑ̌ɑ mɔ ẅí ɑ tʉ́nɛ́pú sɛ́ ŋ́kɔŋ ŋɡɔ pɛ́ ɡɛ.»

²²Ɛ́ ɡʉ ńdɑ́Ꞌ ḿbɔ́ lɛ́Ꞌ yi mɔ ŋ́ɡɛ ńzɑ́Ꞌ tsɑŋ, pʉɔ tɛ ńzɑ́ɑ cú ŋɡɔ: «Tsɑpʉɔ! Tsɑpʉɔ! Pɛk ŋkɑɑ ḿbɔ́ ńdɔk pɔ lík yú ɛ́sẅíi nu-Sɛ́ pɔ́ ɔɔ? Pɛk ŋkɑɑ pɔ́ ńdɔk pɔ lík yú ńzuŋ mɛzẅikŋɛ kɛpɔŋ pɔ́ ɔɔ? Pɛk kɑ pɔ́ ńdɔk pɔ lík yú ŋ́ɡɛ ndɑɑkɑ́jʉ́ɔ nu pɔ́ ɔɔ?»

²³Ŋ ɡɔ́ɔ ŋ́kɛ́ ńcú mbɔ̌ pɔ́p ŋɡɔ: «Mɔ ŋkɑɑ mɔ zɛɛ ńjí wʉ́ʉ pɔ́, pʉʉ pɑfʉꞋ mɛnu kɛpɔŋ, pʉʉ fú nɛjɔ́ŋ mɔ ńtsʉ́ʉtɛ.»

²⁴«Ŋu lɑɑ ńtɔ́ ńtsɛ́t wɑ́ɑ, ńzẅíꞋlɛ sẅiŋɛ yɑ́ɑ, ŋ́ɡɛ pɑ́Ꞌ ɛ́ sɛ́ ḿbíkŋɛ, mbɔ ŋɡɑŋ fí wɛcɔ́ njínu[3] wɑ́ ẅi, ɑ kɑ tsʉ́Ꞌ nɛkút ndɑ́ yɛ́, ńtúŋ zʉꞋ tɛ ńjʉ́ɔ mɑ́mɑ́ ŋɡɔꞋ, ńtík ndɑ́ ndǔ.

²⁵Mbʉŋ ɡɛ ńdɔ́, ŋ́ɡʉ ŋki tɔ́, fɛfʉ̈ɔt tsʉ́Ꞌnɛ, ńtɛ́mɛ nǔu ndɑ́. Ndɑ́ pɔɔ vu, mbíꞋŋɡɔ pɛ́ kɑ tík ndɑ́ nǔu ŋɡɔꞋ.

²⁶Lɑ́ ŋu ẅí ɑ zúꞋnɛ sẅiŋɛ yɑ́ɑ, mbɔɔ ɡɛ pɑ́Ꞌ n cúnɛ pɔ́, mbɔ ŋɡɑŋ fí pɔ ɡʉɡʉʉ ŋu ẅí ɑ kɑ kútnɛ ndɑ́ yɛ́ kɛ́ túŋ cʉ́.

²⁷Mbʉŋ ɡɛ ńdɔ́, kúŋ tɔ́, fɛfʉ̈ɔt tsʉ́Ꞌnɛ ńtɛ́mɛ nǔu ndɑ́ ɛ̂yɑ́, ɛ́ kɛ́mɛ ḿbʉ̈ɔtnɛ sɛ́ pɑ́Ꞌɑ ŋkɑɑ-shʉ̈ɔ́Ꞌ.»

²⁸Yɛ́su zíꞋ pʉɔ nɛ́ mɔnɛ mɛnu tɛ ḿbɔ́tnɛ ńnɑ́ŋ, lɑ́Ꞌ puu ḿmɑɑ yɛ́ ntɛ́ nɛzíꞋ pʉɔ nɛ́ yúu,

²⁹mbíꞋŋɡɔ ɑ ŋkɑɑ pɔ́ ŋ́ɡɛ pɑ́Ꞌ pɑkyɛ́Ꞌtɛ nɛpʉ́ʉ-Mɔ̌sɛ̂ɛ pɔ́. A m̄bɔ́ ńzíꞋ tɛ ńjí yúu mi ɑ ɡɛnɛ.