Read Ngomba Mɑtʉ̈ɔ 8 Bible Online

Mɑtʉ̈ɔ 8 - Ngomba bible

Mɑtʉ̈ɔ 8

¹Yɛ́su pɛn ŋ́ɡɔ́ ɛ́fú ndǔ nɛŋkɔ́Ꞌ ḿpfúu, nɔɔ-lɑ́Ꞌ tɛ ńzɑ́ɑ cʉ́ɔ nzʉʉ yɛ́.

²Wɛcɔ́ ŋɡɑŋkɑꞋpɑ́p tɔ́ ŋ́kẅíꞋlɛ sɛ́ mbi yɛ́, ńcú ŋɡɔ: «Tsɑpʉɔ n jí ŋɡɔ ɔ lɑɑ ŋ́kɔŋ, mbɔ ɔ kuꞋ nɛɡɛ ɛ fíitɛ.»

³Yɛ́su zúꞋ, ńcɑklɛ pɔ́ ŋ́ɡẅɛɛ wɛ́, ńcú mbɔ̌ wɛ́ ŋɡɔ: «Ŋ kɔŋ pɔ́Ꞌɔ, fíitɛ.» ŊkɑꞋ ɡɔ́ɔ ḿmɛ nǔu wɛ́, ɑ ɡɔ́ɔ ɛ́fíitɛ.

⁴Yɛ́su cú mbɔ̌ wɛ́ ŋɡɔ: «Pɑ́ɑ nɛkɛ́ ŋ́kẅíi tɛ ŋu zúꞋ, lɑ́ kɛ́ ŋ́ɡʉ ńnyɛt mbʉʉ yu, mbɔ̌ nɔŋpɔꞋ, ḿbɛn ŋ́ɡɑ́ yúu mi nɛpʉ́ʉ-Mɔ̌sɛ̂ɛ sɛ́ ḿbíkŋɛ mbɔ̌ ŋu ẅí ŋkɑꞋ mɛnɛ nǔu wɛ́, pʉɔ tsʉʉ jí ŋɡɔ ɔ fíitɛ.»

⁵Yɛ́su ɡʉ tɛ ŋ́kúu tʉ́sɔŋ-Kɑpɛɛnɑwúm. Wɛcɔ́ tɑ́tndɑ́-ntsɔ-Pɑlɔ́mɑ zɑ́Ꞌ wɛ́, ḿbúꞋ mbɔ́ mbɔ̌ wɛ́,

⁶ńcú ŋɡɔ: «Tsɑpʉɔ, mɔ́ŋkʉ̈ɔ́-fɑꞋ wɑɑ nɔɔ ndɑ́, mbɔ kẅíꞋlɛ ɡẅɛɛ wɛ́, ɑ pɔ́ ńjʉ́ɔ ŋɡʉ̈ɔ́Ꞌ tɛꞋ.»

⁷Yɛ́su cú mbɔ̌ wɛ́ ŋɡɔ: «Mɔ ŋ́ɡʉ zúꞋu ŋ́ɡɛ ɑ fíitɛ.»

⁸Lɑ́ tɑ́tndɑ́-ntsɔ pʉ̈ɔt ŋɡɔ: «Tsɑpʉɔ, n zɑŋɛ ŋu ẅí ɛ́ lɑɑ ḿbɔ́ ɔ tɔ́k tɛ ŋ́kúu ndɑ́ yɛ́. Tʉ́ʉ pɔ pɑ́Ꞌɑ, ńcú nɛ́ ntsu wú mɔ́ŋkʉ̈ɔ́-fɑꞋ wɑɑ fíitɛ.

⁹N cú pɑ́Ꞌɑ, ḿbɔ́ yɑ́ɑ nzʉʉ-ŋu, ńzúꞋ ntsu wɛ́. Ḿbɛn ŋ́ɡẅɛɛ yɑ́ɑ pɑlʉ̈ɔ́Ꞌntsɔ nzʉʉ mɔ, pɔ́p pɔ́ ńzúꞋ wɑ́ɑ. N dɑɑ ńcú mbɔ̌ wɛcɔ́ ŋɡɔ: “Gʉ!” A ɡʉ, ńcú mbɔ̌ wɛcɔ́ ŋɡɔ: “Tɔ́!” A tɔ́, ḿbɛn ńcú mbɔ̌ ŋkwɑɑ wɑɑ ŋɡɔ: “Gɛ pɑ́Ꞌɑ!” A ɡɛ.»

¹⁰Yɛ́su zúꞋ yɔ sẅiŋɛ yí ɛ́ cẅɛtnɛ ntsu-tɑ́tndɑ́-ntsɔ ŋ́ɡʉ̈ɔꞋtɛ wɛ́, ɛ́shɔtnɛ ńcú mbɔ̌ lɑ́Ꞌ yi ɛ́ nzʉʉ yɛ́ ŋɡɔ: «Ɛ sẅíi wʉ́ʉ, kwɑꞋ nɛ́nẅín, mbɑ tsɛt ŋɡɔŋ Pɑíslɑyɛ̂l, ŋ kɑ́ jʉ́ɔ wɛcɔ́ ŋu ẅí ɑ zɑ́pnɛ tʉ́m nǔu mɔ pɑ́Ꞌ jʉ́ pɔ́.

¹¹Mɔ ńzɛɛ ḿbɛn ɛ́sẅíi wʉ́ʉ ŋɡɔ pʉɔ tɛ ńzɑ́ɑ ɡʉ ńdɑ́Ꞌ ɛ́fú mɛshʉ́ mɛshʉ́ ndǔ tsɛ́tsɑ́Ꞌ, ńtɔ́ ŋ́kúu tsɛt ŋɡɔŋ fí ẅi Sɛ́ sɑ́Ꞌnɛ, pɔ́p pɛ́ Ábɛlɛhɑ̂m, nɛ́ Ɛsɑk, mbɑ Yɑkɔ̂p tɛmtɛ ńjʉ́ ndínɑ.

¹²Pɛɡʉʉ ɡɔ́ ḿbɔ́ zúꞋu, mbɔ pɛ́ cẅɛɛtɛ pʉɔ pínɛ nɛfɔɔ m̄bɔ́ nɔ́p ŋ́ɡɑ́ píi tsɛt fɛ́m nzɛ́nzʉ́ʉ. Pɔ́p pɔ́ zúꞋu ḿbɔ́ ńdɑɑ, ḿbɔ́ ŋ́kwɛ́t mɛsɔŋ.»

¹³Yɛ́su pɛn ńcú mbɔ̌ tɑ́tndɑ́-ntsɔ ŋɡɔ: «Pɛn nɛ́ njɛ́Ꞌ wu! Pɑ́Ꞌ ɔ zɑ́pnɛ tʉ́m nǔu mɔ lɑ́, yúu mi ɔ tsɑ́ɑnɛ ɡʉ ḿbɔ́ pɔ́Ꞌɔ.» Ńcú pɔ́Ꞌɔ, mɔ́ŋkʉ̈ɔ́-fɑꞋ-tɑ́tndɑ́-ntsɔ ɡɔ́ɔ ɛ́fíitɛ pɔ ŋkɑ́ ɛ̂yɑ́, ŋkɑ́ ɛ̂yɑ́.

¹⁴Yɛ́su fú zúꞋu ŋ́ɡʉ ndɑ́-Pyɛ̂, ŋ́kúu zúꞋu ńjʉ́ɔ mɑ́kẅiꞋ-Pyɛ̂ nɔɔ, mbʉʉnút pɔ́ nǔu wɛ́.

¹⁵Yɛ́su ɡẅɛɛ pɔ́ yɛ́, mbʉʉnút zɑ́Ꞌnɛ. A lɔ sɛ́ ńniitɛ yúu ńdɔk ńdíŋɛ wɛ́.

¹⁶Ntsuŋkẅɛ́Ꞌ ɡɛ ḿbɔ́, pɛ́ lɔk pʉɔ tɛ ńzɑ́ɑ pínɛ mɛzẅikŋɛ kɛpɔŋ sɛ́ ŋ́ɡɑ́ɑnɛ wɔ́p ńtɔ́ mbi Yɛ́su, ɑ cú nu tɑ́Ꞌ ŋkɑ́. Mɛzẅikŋɛ kɛpɔŋ fú nǔu pʉɔ ńcẅɛt, ɡɑŋɡɔɔ pɛn ɛ́fíitɛ ɡúu.

¹⁷Ɛ́ lɔk pɔ́Ꞌɔ, ḿbuutɛ nǔu nu yí Ŋɡɛ́mndʉ̈ɔ́Ꞌ-Sɛ́ Ɛsɑ̌yɑ kɑ cúnɛ ŋɡɔ: «Jʉ́ kɑ tíinɛ mɛlɔ́Ꞌ mɛkŋɛ mbíꞋ, ḿbɛn ɛ́fú nǔu pɛkŋɛ ńcẅɛɛtɛ mɛɡɔɔ mɛkŋɛ ḿbiꞋ.»

¹⁸Yɛ́su jʉ́ɔ pɑ́Ꞌ lɑ́Ꞌ cúꞋlɛ́nɛ nɛjɔ́ŋ yɛ́ tɛ ńzɑ́ɑ, ńcú mbɔ̌ ɡɑŋku pɛ́ ŋɡɔ pɔ́p pɛ́pɔ́p túu nǔu yɛcɔ́ njʉ́n-ŋki.

¹⁹Wɛcɔ́ ŋkyɛ́Ꞌtɛ nɛpʉ́ʉ-Mɔ̌sɛ̂ɛ tɔ́ nɛjɔ́ŋ yɛ́ ńcú mbɔ̌ wɛ́ ŋɡɔ: «Cícɑ, ɔ ɡʉ ŋ́ɡʉ ɡɔ́ lɑ́, ŋ kɛ́ ḿbɔ́ pɔ nzʉʉ wu.»

²⁰Yɛ́su pʉ̈ɔt mbɔ̌ wɛ́ ŋɡɔ pɛkwɛt ɡẅɛɛ mɛmbʉ́, pɛshʉ́ŋ pɛn ŋ́ɡẅɛɛ mɛŋkɑɑ mɔ́p. Lɑ́ Mɔ́ɔ-Ŋu kɑ́ ɡẅɛɛ zʉꞋ yí ɛ́ lɑɑ ḿbɔ́ ɑ jẅiitɛ zúꞋu pɔ́.

²¹Wɛcɔ́ tɑ́Ꞌ nǔu pʉɔ pí pɔ́p nzʉʉ yɛ́ cú mbɔ̌ wɛ́ ŋɡɔ: «Ndɛ tsʉ́Ꞌ n zɛɛ ŋ́ɡʉ ńtẅíi tɑ̌ɑ mɔ.»

²²Yɛ́su pʉ̈ɔt mbɔ̌ wɛ́ ŋɡɔ: «Cʉ́ɔ pɔ nzʉʉ mɔ, ńnɑ́ pɛpfú pɔ́p tẅíi pɛpfú pɔ́p.»

²³Yɛ́su ŋ́kúu tsɛt kɑnúꞋ, ɡɑŋku pɛ́ kúu yɔ́p tsɛtú.

²⁴Ḿbɔ́ ŋ́ɡʉ, ɛ́ ɡɔ́ ḿbɔ́ yɛcɔ́ ŋkɑ́ mɑ́mɑ́ fɛ́m vu ndǔ ŋki, ńzɛ nɛtsʉꞌnɛ ńtíi ŋki tíinɛ tɛ ɛ́ tsʉꞋ ńdɔɔ pɔ nɛkẅíipɛ kɑnúꞋ. Ɛ́ ɡɔ ḿbɔ́ Yɛ́su pɔ́ ńdɛ́.

²⁵Pɔ́p tɔ́ nɛjɔ́ŋ yɛ́, ḿbɔ́ ńjʉɔmɛ wɛ́, ńcú ŋɡɔ: «Tsɑpʉɔ, cẅɛ́ɛ wɛ́k mbɔ̌ nɛvú. Pɛ́kŋɛ pfú tɛ ńdɛm.»

²⁶A cú mbɔ̌ pɔ́p ŋɡɔ: «Pʉʉ pɔ́k kʉ̈ɔ́? Pʉʉ lɔɔ ńzɑ́p tʉ́m nǔu Sɛ́ ŋkɑ́ tsʉʉ pɔ́!» Ńcú pɔ́Ꞌɔ, ńdɔ sɛ́, ńcʉ̈ɔ́k fɛ́m pɔ́p ŋki. ZʉꞋ nɑꞋ ŋ́ɡɔ kɛ̂m.

²⁷Pɔ́p pɛtsʉʉ tɛmtɛ ḿmɑɑ, ńcú tsɛtsɛt pɔ́p ŋɡɔ: «Yɔ yɛ́tɛ́ ntɛ́ ŋu tɛ mbɑ fɛ́m pɔ́p ŋki zúꞋ ntsu wɛ́?»

²⁸Yɛ́su ɡʉ tɛ ŋ́kúu nǔu yɛcɔ́ njʉ́n. Ɛ́ pɔ́ ŋɡɔŋ-pʉɔ-Ŋɡɑndɑlɑ, pɛcɔ́ pʉɔ pɛ́pɑ́ pínɛ mɛzẅikŋɛ kɛpɔŋ kɑ kúunɛ nǔu pɔ́p fú zʉꞋ pɛ́ tẅínɛ pʉɔ zúꞋu ńcẅɛt ńzɑ́Ꞌ wɛ́, mbɔ pɔ́p kɑ fʉꞋ mɔ nu fʉꞋnɛ tɛ ŋu pɔɔ ḿbɛn ńdɛɛ ẅîwɑ́ shʉ́ pɔ́.

²⁹Pɔ́p kíi ńcú mbɔ̌ Yɛ́su ŋɡɔ: «Ɔ lɔɔ nɛɡɛ ŋɡɔ́ku nǔu pɛk, mɔ́ɔ-Sɛ́? Ɔ kɑ tɔ́ zɑꞋnɛ pɔ nɛzɑ́Ꞌ njí ńníꞋ wɛ́k tsɛt ŋɡʉ̈ɔ́Ꞌ kɛkʉ̈ɔ́?»

³⁰Ɛ́ ɡɔ́ ḿbɔ́ yɛcɔ́ kɑt-mɛnjínɑɑ pɔ́ mbʉʉ zúꞋu ḿbɔ́ ŋ́kɑ́t ŋ́kwɛ́t yúu.

³¹Mɛzẅikŋɛ kɛpɔŋ púꞋ mbɔ́ mbɔ̌ Yɛ́su ŋɡɔ: «Ɔ lɑɑ ńzuŋ wɛ́k, ɔ pɛ́m pɛk ɡʉ ŋ́kúu nǔu kɑt-mɛnjínɑɑ mí.»

³²Yɛ́su cú mbɔ̌ pɔ́p ŋɡɔ: «Pʉʉ ɡʉ!» Pɔ́p ɡɔ́ɔ ŋ́kɛ́ ɛ́fú nǔu pʉɔ pɑ́ ńcẅɛt, ŋ́ɡʉ ŋ́kúu nǔu mɛnjínɑɑ. Pɛ́ ɡɔ́ ńjʉ́ɔ, kɑt-mɛnjínɑɑ ɛ̂mɑ́ fú zúꞋu ŋ́kʉŋtɛ, ńtɑ́kŋɛ, ńzɔt ḿbʉ̈ɔtnɛ tsɛt nɛkʉŋ-ŋki, ńnɔ́ ŋki ḿpfútɛ.

³³Pʉɔ pí pɔ́p kɑ pɔ́ ḿbyɛ́p mɛnjínɑɑ jʉ́ɔ pɔ́Ꞌɔ, ńtɑ́kŋɛ ŋ́kʉɔtɛ, ŋ́ɡʉ tʉ́sɔŋ ḿbɔ́ ḿbɛ́ɛtɛ mbɑ kʉ̈ɔ́lɑ́ yi ɛ́ lɛɛnɛ, ḿbɛn ḿbɛ́ɛtɛ yɛ́ pʉɔ pínɛ mɛzẅikŋɛ kɛpɔŋ kɑ pɔ́nɛ nǔu pɔ́p lɑ́.

³⁴Lɑ́Ꞌ zúꞋ, ɛ́fú tʉ́sɔŋ ńcẅɛt, ńtɔ́ nɛjʉ́ɔ Yɛ́su, ḿbɔ́ tɛ ńjʉ́ɔ wɛ́, ḿbúꞋ mbɔ́ mbɔ̌ wɛ́ ŋɡɔ ɑ fú lɑ́Ꞌ pɔ́p ŋ́ɡʉ.