Read Ngomba Mɑtʉ̈ɔ 9 Bible Online

Mɑtʉ̈ɔ 9 - Ngomba bible

Mɑtʉ̈ɔ 9

¹Pɔ́p cú pɔ́Ꞌɔ, Yɛ́su kúu tsɛt kɑnúꞋ, ńtúu ŋki ḿbɛn nɛ́ tsɛt tʉ́sɔŋ yɔ́p.[4]

²Ŋ́kúu zúꞋu, pɛ́ lɔk wɛcɔ́ ŋɡɑŋkẅíꞋlɛ ńtɔ́, ɑ nɔɔ ndǔ pɑ́ŋtɛ. Yɛ́su jʉ́ɔ ntɛ́ yi, mbɛ́ɛnɛ yí pɔ́p lɔknɛ wɛ́ ńtɔ́, lɔknɛ ńzɑ́p tʉ́m nǔu wɛ́, ńcú mbɔ̌ ŋɡɑŋkẅíꞋlɛ ŋɡɔ: «Mɔ́ɔ wɑɑ kɔɔ pɔ́k! Pɛ́ likŋɛ mɛnu kɛpɔŋ mú ŋ́ɡɑ́ mbɔ̌ ɡu.»

³Pɛcɔ́ pɑkyɛ́Ꞌtɛ nɛpʉ́ʉ-Mɔ̌sɛ̂ɛ pɔ́ zúꞋu, ńzúꞋ, ḿbɔ́ ńcú tsɛtsɛt pɔ́p ŋɡɔ: «Ŋu wɔ kɑŋ kɔꞋ-Sɛ́ mbɑ́ɑ!»

⁴Yɛ́su jí yúu mi pɔ́p sɛ́ ŋ́kwɑŋɛ, ńcú mbɔ̌ pɔ́p ŋɡɔ: «Pʉʉ ɡɛ ŋɡɔ́ku ŋ́ɡẅɛɛ yɔ ntɛ́ kwɑŋɛ kɛpɔŋ tsɛt tʉ́m yʉ́ʉ?

⁵Pʉʉ jʉ́ɔ ŋɡɔ ɛ́ zɑŋɛ pɔ nɛcú mbɔ̌ ŋu ŋɡɔ: “Pɛ́ likŋɛ mɛnu kɛpɔŋ mú”, kɛ pɔ nɛcú ŋɡɔ: “lɔ sɛ́ ńnɛn?”

⁶Ŋ ɡʉ ŋ́kɛ́ ńnyɛt wʉ́ʉ ŋɡɔ: Mɔ́ɔ-Ŋu ɡẅɛɛ mɛtʉʉ ndǔ tsɛ́tsɑ́Ꞌ yɔ, nɛlɔk ńdikŋɛ mɛnu kɛpɔŋ pʉɔmɛsɔŋ ŋ́ɡɑ́ mbɔ̌ pɔ́p.» Pɔ́Ꞌɔ lɑ́, ńcú mbɔ̌ ŋɡɑŋkẅíꞋlɛ ŋɡɔ: «Lɔ sɛ́, ńtíi pɑ́ŋtɛ wu, ńdɔk ŋ́ɡʉ nɛ́ njɛ́Ꞌ ɡu.»

⁷Ŋu ɛ̂wɑ́ lɔ sɛ́, ŋ́ɡʉ nɛ́ njɛ́Ꞌ yɛ́.

⁸Lɑ́Ꞌ jʉ́ɔ yɔ nu ḿbɔ́k Sɛ́, ŋ́ɡúꞋlɛ wɛ́ nǔu pɑ́Ꞌ ɑ ɡɑ́nɛ yɔ ntɛ́ mɛtʉʉ mbɔ̌ pʉɔmɛsɔŋ.

⁹Yɛ́su fú zúꞋu ŋ́ɡʉ, ŋ́ɡɔ ńdɛɛ zʉꞋ yí pɛ́ cẅɛ́ɛnɛ ntsup-Pɑlɔ́mɑ zúꞋu, wɛcɔ́ ŋu nɑ́ŋ, lík yɛ́ pɔ́ ŋɡɔ Mɑtʉ̈ɔ. Yɛ́su cú mbɔ̌ wɛ́ ŋɡɔ: Tɔ́ pûu tsʉ́Ꞌnɛ ńnɛn. A lɔ sɛ́, ńcʉ́ɔ nzʉʉ yɛ́.

¹⁰Yɛ́su ɡɛ ḿbɔ́ ndɑ́-Mɑtʉ̈ɔ ḿbɔ́ ŋ́kwɛ́t yúu, pɛcɔ́ pɑcẅɛ́ɛ ntsup-Pɑlɔ́mɑ tɛ ńzɑ́ɑ, pɔ́p pɛcɔ́ ɡɑŋ-tswɛ́ kɛpɔŋ, tɔ́ ŋ́kẅɛ́ɛtɛ Yɛ́su pɔ́p ɡɑŋku pɛ́, pɔ́p pɛ́pɔ́p nɑ́ŋ sɛ́ ḿbɔ́ ŋ́kwɛ́t yúu.

¹¹Pɑfɑlísɑy jʉ́ɔ pɔ́Ꞌɔ, ḿbíkŋɛ ɡɑŋku-Yɛ́su ŋɡɔ: «Tɑ̌ɑ wʉʉ kwɛ́t yúu pɔ́p pɑcẅɛ́ɛ ntsup-Pɑlɔ́mɑ ŋ́ɡɛ pɛcɔ́ pʉɔ kɛpɔŋ mɛlɑ́Ꞌ kʉ̈ɔ́?»

¹²Yɛ́su zúꞋ pɑ́Ꞌ pɔ́p cúnɛ, ɛ́sɑk nɛkɛt mbɔ̌ pɔ́p ŋɡɔ: «Mbɔ ŋu pɔɔ pɔ́ tʉʉ, ŋ́ɡʉ ńdɔɔ ŋɡɛmɛfu pɔ́, ŋu ɡɔɔ lɑ ńdɔɔ wɛ́.

¹³Ɛ́ yɛ́tɛ́ lɑ́ mɔ sɛ́ ńcú mbɔ̌ pʉʉ ŋɡɔ ɡʉnɛ ńzíꞋ yúu mi ɛ́ kɑ cẅɛtnɛ tsu-Sɛ́, ɑ ńcú ŋɡɔ: Mɔ, ŋ kɔŋ ŋɡɔ pʉɔ tsɑ́ɑmɛjʉ́ŋ pɛcɔ́, ńtsɑ pɔꞋ ẅí pɛ́ lɔknɛ ŋ́ɡúꞋlɛ wɑ́ɑ. Yɛ́su ɡɔ ḿmɛkŋɛ n cú ŋɡɔ: Mɔ ŋkɑɑ tɔ́ nɛfúŋ pʉɔ pɔ́p kwɑŋɛ ŋɡɔ pɔ́p nɛ́nẅín pɔ́, mɔ m̄bɔ́ ńtɔ́ ntɛ́ pɔ ɡɑŋmɛfɑɑnɛ ŋɡɔ pɔ́p pɛn mbɔ̌ Sɛ́.»

¹⁴Gɑŋku-Jɑ̂ŋ ɡɛ ńtɔ́, ḿbíkŋɛ Yɛ́su ŋɡɔ: «Pɛk pɛ́ pɑfɑlísɑy nɑ́ŋ ŋ́kɔŋ kɔŋnɛ ńnɑ́ŋ njí, pú pʉɔ kɛ́ ḿbɔɔ pɔ́Ꞌɔ ɡɛ mɛlɑ́Ꞌ kʉ̈ɔ́?»

¹⁵Yɛ́su tsɔ́Ꞌ mbɔ̌ pɔ́p ŋɡɔ: «Tɛ ɛ́ lɑɑ ḿbɔ́ pɛ́ ɡʉ nɛlúŋ-ŋu, ɑ pɛ́t ńnɑ́ŋ nɑ́ŋnɛ pɛsúu pɛ́ pi pɛ́ lɑ́Ꞌnɛ ɛ́fúŋ nɑ́ŋ tsɛt nɛmʉk mɛlɑ́Ꞌ kʉ̈ɔ́? Lɑ́ pɛ́ ɡʉ ńdɑ́Ꞌ ɛ́fú mbɔ̌ pɔ́p yɛcɔ́ lɛ́Ꞌ ɛ́sɑꞋ wɛ́, pɔ́Ꞌɔ lɑ́, pɔ́p nɑ́ŋ nji ŋkɑ́ ɛ̂yɑ́.»

¹⁶Yɛ́su pɛn ɛ́sɑk nɛkɛt ńcú ŋɡɔ: «Ɛ́ lɑɑ ḿbɔ́ ŋu pɔɔ lɔk yúu-ndẅí fí ńdɔk ńtsɛ́t nɛpʉ́ nǔu ndwɛn ndẅí pɔ́. Ŋu lɑɑ ŋ́ɡɛ pɔ́Ꞌɔ, mbɔ yúu-ndẅí fí ɡʉ ŋ́kẅiꞋ ɛ́sɑ ndẅí, nɛpʉ́ kẅiꞋ ŋ́ɡúꞋ.

¹⁷Pɛ́ lɔ ńdẅɛꞋ mɛluꞋ tsɛt kɑ́Ꞌlɛ-ŋɡup, mbɔɔ níꞋ mɛluꞋ mí pɛ́ pɛ́t ńtsɔ́Ꞌ tsɛt ndwɛn kɑ́Ꞌlɛ pɔ́. Pɛ́ lɑɑ ŋ́ɡɛ pɔ́Ꞌɔ, mbɔ mɛluꞋ fí ɡʉ ɛ́fɔꞋ, ɛ́sɑ́ɑ ndwɛn kɑ́Ꞌlɛ ɛ̂wɑ́, pɛ́ sɑ́ɑ mɛluꞋ, ɛ́sɑ́ɑ kɑ́Ꞌlɛ. Ɛ́ píkŋɛ ŋɡɔ pɛ́ níꞋ mɛluꞋ fí pɔ tsɛt kɑ́Ꞌlɛ fí, mɛluꞋ pɔ́p kɑ́Ꞌlɛ luk.»

¹⁸Yɛ́su pɔ́ ńcú nu mbɔ̌ pɔ́p pɔ́Ꞌɔ, wɛcɔ́ ŋkɛ́m tɔ́, ńnɔɔ mɛku wɛ́ ńcú ŋɡɔ: «Mɔ́ɔ wɑɑ wɛ mɑŋɡɛ́ pɛ́t ḿpfú pɔ ŋkɔ̂ɔnɛ, lɑ́ tɔ́ ńzɑ́p pɔ́ yú nǔu wɛ́ ɑ ɡɔ́ɔ ńduk.»

¹⁹Yɛ́su lɔ sɛ́, pɔ́p ɡɑŋku pɛ́ cʉ́ɔ nzʉʉ yɛ́.

²⁰Pɔ́p pɔ́ ŋ́ɡʉ, wɛcɔ́ mɑŋɡɛ́ pɔ́ tsɛtsɛt lɑ́Ꞌ, ŋ́ɡẅɛɛ ɡɔɔ-mɑ́sɔ́ɔ, mbɔ ɛ́ ɡɑ́nɛ wɛ́ ɡɑ́nɛnɛ ŋɡuꞋ ntsɔ̌ppɑ́ nɛ́ nɛɡɛ́m. A nɑꞋtɛ, ɛ́fú nzʉʉ, ńtɔ́ ŋ́ɡẅɛɛ nɛcɔ́ŋ-ndẅí-Yɛ́su,

²¹mbíꞋŋɡɔ ɑ kɑ pɔ́ ńcú tsɛt tú yɛ́ ŋɡɔ: «N dɑɑ ńcɑklɛ pɔ́ yɑ́ɑ tɛ sǐi ŋ́ɡẅɛɛ pɔ ndẅí yɛ́, mbɔ ŋ ɡʉ ɛ́fíitɛ!»

²²Yɛ́su shɔtnɛ, ńjʉ́ɔ wɛ́, ńcú mbɔ̌ wɛ́ ŋɡɔ: «Mɑ́ɑ, kɔɔ pɔ́k, ntɛ́ yi ɔ lɔknɛ ńzɑ́p tʉ́m yú nǔu mɔ lɑɑ, ɡɛ ɔ fíitɛ.» A ɡɔ́ɔ ɛ́fíitɛ pɔ ŋkɑ́ ɛ̂yɑ́ ŋkɑ́ ɛ̂yɑ́.

²³Yɛ́su ɡʉ tɛ ŋ́kúu njɛ́Ꞌ ndʉ́m ɛ̂wɑ́, ńjʉ́ɔ, mbɔ pɑpúꞋ yúu ńdɔk ńtẅíi mpfú, ńdɑ́Ꞌmɔ́ ńtɔ́ tɛ ńtʉ́ʉtɛ, lɑ́Ꞌ pɛn ḿbɔ́ ńzɑ́ɑ nɛsẅíi. Yɛ́su cú mbɔ̌ pɔ́p ŋɡɔ: «

²⁴Pʉʉ ɡʉtɛ, mɔ́ɔ mɑŋɡɛ́ kɑ́ pfú, ɑ lɛ́ lɛ́nɛ.» Lɑ́Ꞌ zúꞋ ŋ́ɡwɛ wɛ́ ɡwɛnɛ.

²⁵Pɛ́ fú ndɑ́ ńcẅɛɛtɛ pʉɔ. Yɛ́su kúu ndɑ́, ŋ́ɡẅɛɛ pɔ́-mɔ́ɔ mɑŋɡɛ́ ɛ̂wɑ́, ɑ ɡɔ́ɔ ńdɔ sɛ́.

²⁶Pɛ́ lɔk yɔ nu ɛ́sɑt zʉꞋ nǔu yîyɑ́ pɑk-ŋɡɔŋ.

²⁷Yɛ́su fú zúꞋu ḿbɔ́ ŋ́ɡʉ, pɛcɔ́ pɛfʉmík pɛ́pɑ́ cʉ́ɔ nzʉʉ yɛ́, ḿbɔ́ ŋ́ɡɑ́ ŋɡi tʉ́ ńcú ŋɡɔ: «Ŋu nǔu njẅɛt-fɔɔ Ndɑvît tsɑ́ɑ mɛjʉ́ŋ mɛ́k!»

²⁸A ɡʉ tɛ ŋ́kúu ndɑ́, pɛfʉmík pɑ́ tɔ́ ŋ́kẅɛ́ɛtɛ wɛ́, ɑ píkŋɛ wɔ́p ŋɡɔ: «Pʉʉ kwɑŋɛ ŋɡɔ ɛ́ lɑɑ ḿbɔ́ ŋ ɡɛ yúu mi pʉʉ píkŋɛnɛ lɑɑ?» Pɔ́p ɡɔ: «Ɔ́ɔŋ mbɑ̌ɑ Tsɑpʉɔ ɔ kuꞋ nɛɡɛ.»

²⁹Pɔ́Ꞌɔ lɑ́ Yɛ́su ɡɔ́ɔ ŋ́kɛ́ ńzɑ́p pɔ́ nǔu mík mɔ́p, ńcú ŋɡɔ: «Ɛ́ pɔŋ ŋɡɔ mbɑ kʉ̈ɔ́ lɑ́ pɔ́ pɑ́Ꞌ pʉʉ zɑ́pnɛ tʉ́m nǔu mɔ ŋ́kwɑŋɛ ŋɡɔ ɛ́ ɡʉ ḿbɔ́.»

³⁰Mík mɔ́p ɡɔ́ɔ ŋ́kɛ́ ńjʉ́ɔ zʉꞋ. Yɛ́su tɔꞋ wɔ́p tɛ ḿbʉ́ʉ ŋɡɔ: «Ḿbɑ́ɑ wʉ́ʉ nɛkɛ́ ŋ́ɡɛ tɛ ŋu jí pɑ́Ꞌ ɛ́ lɛɛnɛ.»

³¹Lɑ́ pɔ́p jɛ́Ꞌ tɛ ŋ́kúu píi ńdɔk lík-Yɛ́su ɛ́sɑt zʉꞋ tsʉʉ nǔu yîyɑ́ pɑk-lɑ́Ꞌ.

³²Pɛfʉmík ɡɔ́ ɛ́fú ndɑ́ ńcẅɛt, pɛ́ lɔk wɛcɔ́ ŋu ńtɔ́ mbi Yɛ́su, mbɔ yɛcɔ́ zẅikŋɛ kɛpɔŋ kɑ ɡɛ ɑ tsʉ́Ꞌ ntsɑꞋmbúꞋ.

³³Yɛ́su pɔ́ tɛ ńzuŋ yîyɑ́ zẅikŋɛ kɛpɔŋ, ntsɑꞋmbúꞋ ɛ̂wɑ́ ɡɔ́ɔ ńzɛ nɛcú nu. Lɑ́Ꞌ jʉ́ɔ ḿmɑɑ, ḿbɔ́ ńcú ŋɡɔ: Pɛ́ ŋ́kɑɑ mɔ́ zɛɛ ńjʉ́ɔ yɔ ntɛ́ nu tsɛt ŋɡɔŋ-pɑíslɑyɛ̂l pɔ́.

³⁴Lɑ́ pɑfɑlísɑy cú yɔ́p ŋɡɔ: «Fɔɔ-mɛzẅikŋɛ kɛpɔŋ ɡɛnɛ lɑ Yɛ́su kuꞋ nɛzuŋ mɛzẅikŋɛ kɛpɔŋ.»

³⁵Yɛ́su pɔ́ ńdɛɛ tsɛt mɛtʉ́sɔŋ tsʉʉ mbɑ tsɛt mɛlɑ́Ꞌ, ŋ́kúu mbɑ ɡɔ́ lɑ́ ŋ́ɡʉ ndɑ́-cúꞋlɛ, ńzíꞋ pʉɔ nɛ́ nu-Sɛ́, ɛ́sɑ́Ꞌ Ŋkʉʉ sʉ́Ꞌnɛ ẅí ɛ́ cúnɛ pɑ́Ꞌ nɛfɔɔ-Sɛ́ pɔ́nɛ, ŋ́ɡɛ mɛɡɔɔ ntɛ́ nɛ́ ntɛ́ fíitɛ nǔu pʉɔ, mɛlɔ́Ꞌ ntɛ́ nɛ́ ntɛ́ mɛ mbʉʉ-pʉɔ,

³⁶ńjʉ́ɔ nɔɔ-lɑ́Ꞌ, mɛjʉ́ŋ mɔ́p kɔ́ wɛ́, mbíꞋŋɡɔ pɔ́p kɑ pɔ́ pɑ́Ꞌ nɔɔ-mɛnjinjɔ mí ntsiinɛ kɑ́ pɔ́ ɡú pɔ́. Pɔ́p pɔ́ mɛjʉ́ŋ mɛjʉ́ŋ, mbɔ pɔ́p tsɑ́ŋtɛ.

³⁷Pɔ́Ꞌɔ, ɑ ɡɔɔ ŋ́kɛ́ ńcú mbɔ̌ ɡɑŋku pɛ́ ŋɡɔ: «Yúu pinɛ pɛ́ ɡʉnɛ ŋkɑ́Ꞌ nɛlɔk zɑ́ɑ tɛꞋ, ndɛn ɡɑŋfɑꞋ pɛn kʉ̈ɔ́k.

³⁸Ɛ́ pɔŋ ŋɡɔ pʉʉ púꞋ mbɔ́ mbɔ̌ ŋɡɑŋŋkɑ́Ꞌ ɑ kẅiꞋ ɡɑŋfɑꞋ pínɛ pɔ́p ɡʉ ḿbɔ́ ńdɑk yúu pɛ́.»