Read Ngomba Mɑ́lɛ́kúshi 1 Bible Online

Mɑ́lɛ́kúshi 1 - Ngomba bible

Mɑ́lɛ́kúshi 1

¹Nzɛnɛ Ŋkʉʉ Sʉ́Ꞌnɛ nǔu Yɛ́su Kɛlístɔ mɔ́ɔ-Sɛ́, pʉ̈ɔ́lɑ́.

²Ɛ́ kɑ zɛ pɑꞋ Sɛ́ kɑ cúnɛ tsɛt ŋwɑꞋnɛ-ŋɡɛ́mndʉ̈ɔ́Ꞌ Ɛsɑ̌yɑ ŋɡɔ: «ZuꞋu, ŋ ɡʉ ńdɑ́Ꞌ ńtúu mɑ́ntúu wɑɑ ɑ pɔ́ mbi ḿbɔ́ ńniitɛ ndúŋ ẅi ɔ ńdɛɛ nǔu.»

³Ŋɡi-ŋu kɔꞋ ɛ́fú kɔ̂ŋtɛt, ńcú ŋɡɔ: «Pʉʉ niitɛ sɛ̂ndúŋ ẅi Tsɑpʉɔ ńdɛɛ nǔu, ŋ́ɡɛ mɛlɛ̌ɛndúŋ mi ɑ ńdɛɛ nǔu tʉ́ʉ ndʉ́ŋndʉŋ.[1]»

⁴Ɛ́ ɡɔ́ ńdẅiklɛ wɛcɔ́ ŋu ɡɛ ńcẅɛt kɔ̂ŋtɛt lík yɛ́ pɔ́ Jɑ̂ŋ. Ḿbɔ́ ɛ́sɑ́Ꞌ mbɔ̌ lɑ́Ꞌ ŋɡɔ, pɔ́p kúpmɛ mɑt wɔp, ɑ nuꞋ wɔ́p ŋki, Sɛ́ likŋɛ mɛnu kɛpɔŋ mɔ́p ŋ́ɡɑ́ mbɔ̌ pɔ́p.

⁵Pʉɔ tsʉʉ fú tsɛt pɑk-ŋɡɔŋ-Judɛ̂ ḿbɔ́ ńtɔ́, tɛ mbɑ pʉɔ tsʉʉ Yɛlúsɑlɛm tɔ́ nɛjʉ́ɔ Jɑ̂ŋ ɛ̂wɑ́ ńjʉ́ɔ wɛ́ pɔ́Ꞌɔ, ḿbɛ́m mɛnu kɛpɔŋ mɔ́p, ɑ nuꞋ wɔ́p tsɛt ŋki-Juudɛŋ.

⁶Jɑ̂ŋ kɑ pɔ́ kɔ̂ŋtɛt pɔ́Ꞌɔ, ḿmɑꞋ ndẅí, mbɔ pɛ́ kɑ lɔk mɛnuk-nɑɑ ẅi pɛ́ fúŋnɛ ŋɡɔ shɑmɔ̂ɔ ḿbɑ́Ꞌ, ńdɔk ŋɡup-nɑɑ ńtsɔ́ lúꞋ yɛ́. A kɑ pɔ́ ŋ́kwɛ́t ŋɡẅíimɛ ḿbɛn ńjʉ́ lumɔ́nɑɑ.

⁷A kɑ pɔ́ ɛ́sɑ́Ꞌ mbɔ̌ lɑ́Ꞌ ńcú ŋɡɔ: «Wɛcɔ́ ŋu nzʉʉ mɔ ḿbɔ́ ńtɔ́, ɑ tsɑ wɑ́ɑ, ŋ kɑ́ kuꞋ mbɑ nɛŋɔ́Ꞌnɛ sɛ́, ŋ́kíɛꞋ mɛŋkʉ-mɛtɑp mɛ́ pɔ́.

⁸Ɛ́ ɡʉ nǔu mɔ, mbɔ n nuꞋ wʉ́ʉ pɔ tsɛt ŋki. Lɑ́ ɑ ɡʉ ńtɔ́ ńnuꞋ wʉ́ʉ pɔ mbɔ̌ Zẅikŋɛ Lɛ́ɛnɛ́nɛ.»

⁹Ɛ́ kɑ pɔ́ nǔu mɛlɛ́Ꞌ ɛ̂mɑ́, Yɛ́su pɔ́ Nɑ̌ɑzɑlɛt, tsɛt pɑk-ŋɡɔŋ-Ŋɡɑlilɛɛ ɛ́fú zúꞋu ńtɔ́ ńjʉ́ɔ Jɑ̂ŋ, ɑ nuꞋ wɛ́ tsɛt ŋki-Juudɛŋ.

¹⁰Yɛ́su pɔ́ ɛ́fú ŋki ńcẅɛt, ńjʉ́ɔ ntsu-tʉ́nɛ́pú ɡɔ́ɔ ńtsɔ́Ꞌnɛ ńtʉ́ʉ, Zẅikŋɛ Lɛ́ɛnɛ́nɛ cúŋ, ḿbɔ́ pɑꞋ puutɛ lɑ́, ńtɔ́ ńtʉ́ʉ nǔu wɛ́.

¹¹Ŋɡi fú tʉ́nɛ́pú ńcú ŋɡɔ: «Ɔ pɔ́nɛ mɔ́ɔ wɑɑ, ŋ kɔŋ wú tɛꞋ, ɔ ŋkʉ-tʉ́m yɑ́ɑ.»

¹²Zẅikŋɛ tɔ́ nǔu Yɛ́su pɔ́Ꞌɔ, ńtsʉ́ʉnɛ wɛ́, ɑ ɡɔ́ɔ ŋ́ɡʉ nɛ́ kɔ̂ŋtɛt.

¹³Pɔ́p mɛyúumɛku pɔ́nɛ zúꞋu, ɑ nɑ́ŋ nɑ́ŋnɛ lɛ́Ꞌlɑ́Ꞌ mɛɡɛ́mɛ́nɛ́kwɑ, Sɑ́ttɑ pɔ́nɛ ńtɔ́ ŋ́kwɑꞋnɛ wɛ́ ŋɡɔ ɑ fɑɑnɛ nu. Pɛcʉ̈ɔꞋ-Sɛ́ pɔ́ ńtɔ́ɔtɛ wɛ́.

¹⁴Pɛ́ kɑ pɔ́ tɛ ŋ́ɡẅɛɛ Jɑ̂ŋ, ŋ́ɡɔ́ɔ ńníꞋ wɛ́ ndɑ́tsɑ́ŋ, Yɛ́su ɡʉ nɛ́ Ŋɡɑlilɛɛ. Ḿbɔ́ ńcẅi Ŋkʉʉ Sʉ́Ꞌnɛ-Sɛ́ ńcú ŋɡɔ:

¹⁵«Ŋkɑ́ pɑ́Ꞌnɛ mbɔ ɛ́ kuꞋ tɛ Sɛ́ ɡʉ ńzɛ nɛnyɛt nɛfɔɔ nɛ́. Pʉʉ kúpmɛ mɑt wʉʉ, ḿbɛn ḿbɛ́m Ŋkʉʉ Sʉ́Ꞌnɛ ɛ̂wɑ́.»

¹⁶Yɛ́su ɡɛ ḿbɔ́ ńnɛn mbʉʉ nɛtʉŋ-ŋki-Ŋɡɑlilɛɛ, ńjʉ́ɔ mbɛ́ɛnɛ yɛ́pɑ́, ɑ pɔ́ Símɔ pɔ́p ntsʉ́Ꞌzʉʉ wɛ Ndɛlɛ́yɑ. Pɔ́p pɔ́ pɑmɑꞋ mɛshú, ḿbɔ́ ḿmɑꞋ mɛŋkʉ ŋki.

¹⁷A cú mbɔ̌ pɔ́p ŋɡɔ: «Pʉʉ tɔ́ ńcʉ́ɔ nzʉʉ mɔ, mɔ ŋ́ɡɛ pʉʉ tsʉꞋ ńcúꞋlɛ pɔ pʉɔmɛsɔŋ.»

¹⁸Pɔ́p ɡɔ́ɔ ńnɑ́ mɛŋkʉ mɔ́p, ńcʉ́ɔ nzʉʉ yɛ́.

¹⁹A nɑ́Ꞌ ńnɛn, ńjʉ́ɔ pɛcɔ́ pʉɔ pɛ́pɑ́, Jɑ̂k pɔ́p ntsʉ́Ꞌnzʉʉ wɛ Jɑ̂ŋ, pɔ́ɔ-Zɛbɛ́dɛ́ɛ, pɔ́p pɔ́ tsɛt kɑnúꞋ ḿbɔ́ ńniitɛ mɛŋkʉ mɔ́p.

²⁰A ɡɔ́ɔ ɛ́fúŋ wɔ́p ɡúu, pɔ́p ɡɔ́ɔ ńnɑ́ tɑ́t wɔp Zɛbɛ́dɛ̂ pɔ́p ɡɑŋfɑꞋ, tsɛt kɑnúꞋ, ńcʉ́ɔ nzʉʉ yɛ́.

²¹Pɔ́p pɛ́pɔ́p ɡʉ tɛ ŋ́kúu Kɑpɛɛnɑwûm, ɛ́ pɔ́ lɛ́Ꞌ-nɛjẅiitɛ-pɑyúdɑ, Yɛ́su ɡʉ ndɑ́-cúꞌlɛ, ńzɛ nɛzíꞋ pʉɔ nɛ́ nu-Sɛ́.

²²A ḿbɔ́ ŋ́ɡɛ pɑꞋ ŋu Sɛ́ túunɛ wɛ́, ḿbɔɔ ŋ́ɡɛ pɑꞋ pɑkyɛ́Ꞌtɛ nɛpʉ́ʉ-Sɛ́ pɔ́, lɑ́Ꞌ zúꞋ sẅiŋɛ yɛ́, ḿmɑɑ tɛꞋ.

²³A ḿbɔ́ sẅiŋɛ wɛcɔ́ ŋu pɔ́ yɛ́ ndɑ́-cúꞌlɛ ɛ̂yɑ́, mbɔ yɛcɔ́ zẅikŋɛ kɛpɔŋ kɑ ɡẅɛɛ wɛ́, ɑ nɑ́ŋ tɛ ŋ́ɡíɛt ŋɡɔ:

²⁴«Yɛ́su mɔ́ɔ-Nɑ̌zɑlɛt, pɛkŋɛ ɡẅɛɛ kʉ̈ɔ́? Ɔ kɑ fɑ́ɑ ńtɔ́ pɔ nɛpík wɛ́k? Mɔ sɛ́ ńjí wú. Ɔ fú nɛjɔ́ŋ Sɛ́.»

²⁵Yɛ́su cʉ́ɔk yîyɑ́ zẅikŋɛ kɛpɔŋ ńcú mbɔ̌ wɛ́ ŋɡɔ: «Nɑ́Ꞌ, ɛ́fú nǔu ŋu wɑ́ ńcẅɛt!»

²⁶Zẅikŋɛ kɛpɔŋ ɛ̂yɑ́ puu ńtsʉꞋnɛ wɛ́ tsʉ́Ꞌnɛnɛ, tɛ ŋ́ɡɔ́ ɛ́fú nǔu wɛ́ ńcẅɛt, ńtɔɔ ŋɡuŋ tɛꞋ.

²⁷Ɛ́ kʉꞋnɛ lɑ́Ꞌ tsʉʉ, tɛ lɛ́m yɔ́p sɑ́ɑnɛ, pɔ́p píkŋɛ tsɛtsɛt pɔ́p ŋɡɔ: «Tɛ yɔ nu ŋɡɔ́ku? A pɔ́ ɛ́sɑ́Ꞌ Ŋkʉʉ Sʉ́Ꞌnɛ tɛ ńcʉ̈ɔ́k mɛzẅikŋɛ kɛpɔŋ, pɔ́p zúꞋ ntsu wɛ́.» Ɛ́ pɑꞋɑ ḿbɔ́ pɔ yɛcɔ́ nu fí kɛkʉ̈ɔ́? A sɛ́ ńzíꞋ pʉɔ pɑꞋ ŋu Sɛ́ túunɛ.

²⁸Pɔ́ꞌɔ lɑ́, lík yɛ́ ɡɔ́ɔ ɛ́sɑt lɑ́Ꞌ tsɛt pɑk-ŋɡɔŋ-Ŋɡɑlilɛɛ tsʉʉ.

²⁹Yɛ́su pɔ́p ɡɑŋku pɛ́ ɡɔ́ɔ ɛ́fú ndɑ́-cúꞌlɛ ńcẅɛt. Pɔ́p Jɑ̂k ŋ́ɡɛ Jɑ̂ŋ ɡʉ ndɑ́ pɛ́ Símɔ pɔ́p Ndɛlɛ́yɑ.

³⁰Mɑ́kẅiꞋ-Símɔ kɑ nɔɔ, mbʉʉnút pɔ́ nǔu wɛ́. Yɛ́su kúu zúꞋu pɛ́ ɡɔ́ɔ ɛ́sẅíi wɛ́.

³¹A kẅɛ́Ꞌlɛ ńtʉ́ʉ mbi yɛ́, ŋ́ɡẅɛɛ pɔ́ yɛ́, ŋ́ɡɛ ɑ lɔ sɛ́. Mbʉʉnút zɑ́Ꞌnɛ, ɑ ɡʉ ńniitɛ yúujʉ́ ŋ́ɡɑ́ mbɔ̌ pɔ́p.

³²Ntsuŋkẅɛ́Ꞌ ɡɛ ḿbɔ́, tɛ mbɔ mɔ́nɛm pɛ́ mɔ́, pʉɔ zúꞋu zɛ nɛtíi ɡɑŋɡɔɔ tsʉʉ, mbɑ pʉɔ pinɛ mɛcɔ́ mɛzẅikŋɛ kɛpɔŋ kɑ ɡẅɛɛnɛ wɔ́p, ńdɔk ńtɔ́ ńjʉ́ɔ Yɛ́su.

³³Pʉɔ-tʉ́sɔŋ ɛ̂wɑ́ tsʉʉ cúꞋlɛ ntsundɑ́.

³⁴Yɛ́su ɡɛ mɛɡɔɔ ntɛ́ nɛ́ ntɛ́ nǔu pʉɔ tɛ ńzɑ́ɑ mɛ, ḿbɛn ńzuŋ mɛzẅikŋɛ kɛpɔŋ tɛ ńzɑ́ɑ nǔu pʉɔ. A ŋkɑɑ pɛ́m tɛ yɛcɔ́ zẅikŋɛ kɛpɔŋ ɛ̂yɑ́ cú nu pɔ́, mbíꞌŋɡɔ pɔ́p kɑ pɔ́ ńjí ŋu ẅí ɑ jʉ́.

³⁵Njí kɑ pɔ́ ŋ́kiɛ, zʉꞋ pɛ́t ɛ́sʉ́ʉ sʉ́ʉnɛ, Yɛ́su lɔ sɛ́, ɛ́fú ndɑ́ ńcẅɛt, ŋ́ɡʉ nɛ́ ŋkɔ̂ŋtɛt, ńzɛ nɛcɛꞋlɛ Sɛ́.

³⁶Símɔ pɔ́p pɛcɔ́ ŋɡɑŋku-Yɛ́su tsʉꞋ nzʉʉ ḿbɔ́ ńdɔɔ wɛ́,

³⁷ńdɔɔ wɛ́ lɔɔnɛ tɛ ńjʉ́ɔ wɛ́, ńcú mbɔ̌ wɛ́ ŋɡɔ: «Pʉɔ tsʉʉ sɛ́ ńdɔɔ wú.»

³⁸A pʉ̈ɔt mbɔ̌ pɔ́p ŋɡɔ: «Pɛkŋɛ pɛn ŋ́ɡʉ zʉꞋ ndɛꞋ, tsɛt mɛcɔ́ mɛlɑ́Ꞌ mi ɛ́ shʉ́ zɑ́Ꞌnɛ, ńcẅi Ŋkʉʉ Sʉ́Ꞌnɛ-Sɛ́ mbɑ zúꞋu, mbíꞋŋɡɔ ɛ́ ncẅɛtnɛ ndɑ́ mɑ́ɑ.»

³⁹A cú pɔ́Ꞌɔ, ḿbɔ́ ńnɛn zʉꞋ tsʉʉ tsɛt pɑk-ŋɡɔŋ-Ŋɡɑlilɛɛ, ŋ́kúu tsɛt mɛndɑ́-cúꞋlɛ, ńcẅi Ŋkʉʉ Sʉ́Ꞌnɛ-Sɛ́, ḿbɛn ńzuŋ mɛzẅikŋɛ kɛpɔŋ nǔu pʉɔ.

⁴⁰Wɛcɔ́ ŋɡɑŋkɑꞋ ɡɛ ńtɔ́ ŋ́kẅíꞋlɛ mbi Yɛ́su, ḿbuꞋ mbɔ́ mbɔ̌ wɛ́ ńcú ŋɡɔ: «Ɔ lɑɑ ŋ́kɔŋ, mbɔ ɔ kuꞋ nɛɡɛ ɛ fíitɛ.»

⁴¹Mɛjʉ́ŋ mɛ́ kɔ́ wɛ́, ɑ cɑklɛ pɔ́ ŋ́ɡẅɛɛ wɛ́, ńcú ŋɡɔ: «Ŋ kɔŋ pɔ́Ꞌɔ, fíitɛ.»

⁴²ŊkɑꞋ ɡɔ́ɔ ḿmɛ nǔu wɛ́, ɑ fíitɛ.

⁴³Ŋ́ɡɛ pɔ́Ꞌɔ, ɑ zuŋ wɛ́ ńcú ŋɡɔ ɑ fú zúꞋu ŋ́ɡʉ;

⁴⁴ḿbɛn ńcú ŋɡɔ: «Pɑ́ɑ nɛcú sɑ̌ɑ nu mbɔ̌ ŋu. Gʉ ńnyɛt pɔ mbʉʉ yu mbɔ̌ nɔŋpɔꞋ, ḿbɛn ńnɔŋ pɔꞋ ẅí nɛpʉ́ʉ-Mɔ̌sɛ̂ɛ sɛ́ ḿbíkŋɛ mbɔ̌ ŋu ẅí ŋkɑꞋ mɛnɛ nǔu wɛ́, ɡɛ pɔ́Ꞌɔ, pʉɔ jí ŋɡɔ ɔ fíitɛ.»

⁴⁵Lɑ́ ɑ ɡʉ, ńdɔk nu ɛ̂yɑ́ ɛ́sɑt zʉꞋ. Ɛ́ pɔ́ pɔ́nɛ tɛ Yɛ́su pɔɔ ḿbɛn ɛ́sɑ́ɑnɛ sɑ́ɑnɛ́nɛ, ŋ́kúu yɛcɔ́ tʉ́sɔŋ pɔ́, ńtsʉ́ꞌ ŋ́ɡɔ́ŋ pɔ sɛ̂ndúŋ, zʉꞋ yí pʉɔ kɑ́ pɔ́ zúꞋu pɔ́. Pɛ́ kɛ́ ḿbɔ́ ɛ́fú zʉꞋ tsʉʉ ńtɔ́ tɔ́nɛ ńjʉ́ɔ wɛ́.