Read Ngomba Mɑ́lɛ́kúshi 10 Bible Online

Mɑ́lɛ́kúshi 10 - Ngomba bible

Mɑ́lɛ́kúshi 10

¹Yɛ́su fú zúꞋu, ńcʉ́ɔ sɛ̂ndúŋ, ńdɔk shʉ́-Judɛ̂, ŋ́ɡʉ nǔu yɛcɔ́ njʉ́n-ŋki-Juudɛŋ. LɑꞋ pɛn ńcúꞋlɛ nɛjɔ́ŋ yɛ́ tɛ ńzɑ́ɑ, ɑ pɛn ńzɛ nɛzíꞋ wɔ́p nɛ́ nu-Sɛ́ pɑꞋ ɛ́ ḿbɔ́nɛ mɑt mbɔ̌ wɛ́.

²Pɑfɑlísɑy tɔ́ yɔ́p, ḿbɔ́ ŋ́kwɑꞋlɛ wɛ́, ḿbíkŋɛ wɛ́ ŋɡɔ: «Tɛ ɛ́ pɛꞋnɛ nɛpʉ́ʉ nɛkŋɛ pɛ́m ŋɡɔ ŋu zuŋ nzwɛ́ wɛ?»

³Yɛ́su píkŋɛ wɔ́p ŋɡɔ: «Mɔ̌sɛ̂ɛ kɑ cú tsɛt nɛpʉ́ʉ ŋɡɔ pʉʉ ɡɛ pɔ ŋɡɔ́ku?»

⁴Pɔ́p pʉ̈ɔt ŋɡɔ Mɔ̌sɛ̂ɛ kɑ pɛ́m ŋɡɔ ŋu mbɛ́ɛnɛ zuŋ nzwɛ́ wɛ, lɑ́ ŋ́kɛ́ ŋ́ɡɔ ńzuŋ wɛ́, ḿbiitɛ ŋ́ŋwɑꞋnɛ ŋwɑꞋnɛ nɛlɔk ńzuŋ wɛ́.

⁵Yɛ́su cú mbɔ̌ pɔ́p ŋɡɔ: «Mɔ̌sɛ̂ɛ kɑ ɡɑ́ nînɑ́ nɛpʉ́ʉ mbɔ̌ pʉʉ, mbíꞌŋɡɔ ɑ jʉ́ɔ pʉʉ tʉʉ tú mbɔ̌ Sɛ́ tɛ ɛ́ tsɑ.»

⁶Ɛ́ kɑ kɛ́ ɛ́fú nɔŋŋɡɔŋ, ḿbɔɔ pɔ́Ꞌɔ pɔ́. Ɛ́ tsɛt ŋwɑꞋnɛ-Sɛ́ ŋɡɔ: «Sɛ́ kɑ pɔ́ɔ ŋu mbɛ́ɛnɛ pɔ́p mɑŋɡɛ́.»

⁷Pɛ́ kɑ pɛn ŋ́ŋwɑꞋnɛ ŋɡɔ: «Ɛ́ yúu mi ɛ́ ɡɛnɛ, ŋu nɑ́ŋ tɛ ɛ́fɑk mbʉʉ yɛ nǔu tɑ́t wɛ pɔ́p mɑ́ wɛ, ŋ́ɡʉ ńdɑt mbʉʉ yɛ nǔu yɛ mɑŋɡɛ́.

⁸Pɔ́p mɛ́ tɛmtɛ ńtsʉ́ꞌ tɑꞋ ŋu. Ɛ́ lɛɛ pɔ́Ꞌɔ, pɔ́p pɔɔ pɛn ḿbɔ́ pʉɔ pɛ́pɑ́ pɔ́, pɔ́p tsʉꞋ tɑꞋ ŋu.

⁹Pɔ́ꞌɔ lɑ́, ŋumɛsɔŋ pɑ́ɑ nɛfɑk yúu mi Sɛ́ tɛmtɛnɛ.»

¹⁰Pɔ́p ɡɛ ḿbɛn tɛ ḿbɔ́ ndɑ́, ɡɑŋku pɛ́ pɛn ḿbíkŋɛ wɛ́ nɛ́ nu ntɛ́ nu ɛ̂yɑ́.

¹¹A sẅíi wɔ́p ŋɡɔ: «Ŋu lɑɑ ńzuŋ nzwɛ́ wɛ, ńzɔ́Ꞌ wɛ ndɛꞋ, mbɔ ɑ ɡɛ ɡɑ́ɑ.

¹²Mɑŋɡɛ́ pɛn ńcẅɛt nǔu ndúu mɛ, ŋ́ɡʉ ńzɔ́Ꞌ wɛcɔ́ ŋu ndɛꞋ, mbɔ ɑ ɡɛ ɡɑ́ɑ.»

¹³Pʉɔ pɔ́ ńdɔk pɛcɔ́ mbɔ́ŋkʉ̈ɔ́ ńtɔ́ nɛpɔ́ yi Yɛ́su ɡʉ ńzɑ́p mbɔ́ tú pɔ́p, lɑ́ ɡɑŋku pɛ́ pɔ́ ńtɔꞋ.

¹⁴Yɛ́su jʉ́ɔ pɔ́Ꞌɔ, ɛ́ pɔɔ wɛ́ pɔŋ, ɑ cú mbɔ̌ ɡɑŋku pɛ́ ŋɡɔ: «Pʉʉ nɑ́ ɡɛ́ɡɛ́ mbɔ́ŋkʉ̈ɔ́ pɔ́p tɔ́ ŋ́kẅɛ́ɛtɛ wɑ́ɑ! Kɔɔ pʉʉ kíꞋ wɔ́p nɛtɔ́! Pʉɔ pi pɔ́p pɑꞋ mbɔ́ŋkʉ̈ɔ́ ɡẅɛɛnɛ nu nǔu Nɛfɔɔ-Sɛ́.

¹⁵Ɛ sẅíi wʉ́ʉ, kwɑꞋ nɛ́nẅín, ŋu lɑɑ mbɔɔ tsʉꞋ pɑꞋ mɔ́yúu mɔ́ɔ, ḿbɛ́m ŋɡɔ Sɛ́ tsʉ́Ꞌnɛ ɛ́sɑ́Ꞌ wɛ́ pɔ́, mbɔ ɑ ńdɑ́Ꞌ ŋ́kúu tsɛt ŋɡɔŋ-nɛfɔɔ-Sɛ́ pɔ́.»

¹⁶A cú pɔ́Ꞌɔ, ńcẅɛ́ɛ wɔ́p ŋ́ɡẅɛɛ, ńzɑ́p mbɔ́ nǔu pɔ́p, fɛ́ɛ wɔ́p mbɔ̌ Sɛ́.

¹⁷Yɛ́su ɡɛ ńtʉ́ʉ sɛ̂ndúŋ ḿbɔ́ ŋ́ɡʉ, wɛcɔ́ ŋu kʉ̈ɔ́ ńtɔ́ ŋ́kẅíꞋlɛ mbi yɛ́, ḿbíkŋɛ wɛ́ ŋɡɔ: «Cícɑ, ɡu pɔ́nɛ kwɑꞋ ŋu sʉ́Ꞌnɛ. Ŋ ɡʉ ŋ́ɡɛ yɑ́ɑ ŋɡɔ́ku lɑ́ ŋ́ɡẅɛɛ luk kɛ́mɛ?»

¹⁸Yɛ́su píkŋɛ wɛ́ ŋɡɔ: «Ɔ fúŋ wɑ́ɑ ŋɡɔ ŋu sʉ́Ꞌnɛ mɛlɑ́Ꞌ kʉ̈ɔ́? A ndɑꞋ Sɛ́ pɔ́, mbɔ ŋu sʉ́Ꞌnɛ kɑ́ pɔ́ ɡú pɔ́.

¹⁹Ɔ kɑ́ pɔ́ ḿmuŋɛ nɛpʉ́ʉ-Sɛ́ ni ɛ́ cúnɛ ŋɡɔ: Kɔɔ jẅí ŋu, ḿbɑ́ɑ nɛɡɛ ɡɑp, kɔɔ jʉ̈ɔ, kɔɔ tík sɔ́ɔ tú-ŋu, kɔɔ fu ŋu, ɡɑ́ mɛkuꞋ-tɑ́t wu pɔ́p mɑ́ wu.»

²⁰Ŋu ɛ̂wɑ́ pʉ̈ɔt mbɔ̌ Yɛ́su ŋɡɔ: «Ndɛ, tɛ ɛ́fú pɑꞋ ŋ kɑ pɛ́tnɛ ḿbɔ́ pɔ mɔ́ɔsuu, n dɔ ŋ́kɛ́ ńtswɛ́ ŋ́ɡẅɛɛ mɛnɛpʉ́ʉ ɛ̂mɑ́ ɡẅɛɛnɛ tsʉʉ.»

²¹Yɛ́su pɛn ńdíŋɛ wɛ́, nu yɛ́ pɔŋ wɛ́, ɑ cú mbɔ̌ wɛ́ ŋɡɔ: «Tɑ́Ꞌ yúu wɛ́mɔ́Ꞌ pɛ́t ńjɑ́k yi ɔ ɡʉ ŋ́ɡɛ. Gʉ, ɛ́fɛn yúu pú tsʉʉ, ŋ́ɡɑp ŋkɑ́p mbɔ̌ pɑkɛ́yúu, ńdɑ́Ꞌ ŋ́ɡẅɛɛ yúu tʉʉndɛn tʉ́nɛ́pú. Gʉ ŋ́ɡɛ pɔ́Ꞌɔ, ḿbɛn ńtɔ́ ńcʉ́ɔ nzʉʉ mɔ.»

²²Ŋu wɑ́ zúꞋ yɔ sẅiŋɛ, shʉ́ wɛ́ ɡɔ́ɔ ḿpfúu. A tɛ́m ŋkwɛn yɛ́, ŋ́ɡɔ ŋ́ɡʉ, ńcɔ́ŋɛ tú yɛ́ cɔ́ŋɛ́nɛ, mbíꞌŋɡɔ ɑ kɑ ɡẅɛɛ yúu tʉʉndɛn tɛꞋ.

²³Yɛ́su tsʉꞋ nzʉʉ ɛ́shɔtnɛ ńdíŋɛ pʉɔ pi pɔ́p kɑ tʉ̈ɔ́Ꞌlɛnɛ wɛ́ ńníꞋ sɔŋ, ńcú mbɔ̌ ɡɑŋku pɛ́ ŋɡɔ: «Ɛ́ tɛn pɑꞋ ɛ́ lɑɑ ḿbɔ́ ŋɡɑŋyúu pɛ́m ŋɡɔ Sɛ́ tsʉ́Ꞌnɛ ɛ́sɑ́Ꞌ wɛ́.»

²⁴Gɑŋku pɛ́ zúꞋ yɔ sẅiŋɛ, ɛ́ kʉꞋnɛ wɔ́p tɛꞋ. Yɛ́su pɛn ńcú mbɔ̌ pɔ́p ŋɡɔ: «Mbɔ́ŋkʉ̈ɔ́ pɑ́ɑ, ŋu nɛpɛ́m tɛ Sɛ́ tsʉ́Ꞌnɛ ɛ́sɑ́Ꞌ wɛ́ tɛn tɛꞋ.

²⁵Ɛ́ zɑŋɛ mbɔ̌ mɑ́mɑ́ nɑɑ, shʉ̈ɔ́ nɛsɔ́ tsɛt ntẅɛɛ-sɑ́Ꞌ, ńtsɑ ŋɡɑŋyúu nɛpɛ́m ŋɡɔ Sɛ́ tsʉ́Ꞌnɛ ɛ́sɑ́Ꞌ wɛ́.»

²⁶Yɔ nu mɛkŋɛ ŋ́kʉꞋnɛ ɡɑŋku pɛ́. Pɔ́p cú ŋɡɔ, tɛ ɛ́ lɑɑ ḿbɔ́ pɔ pɑꞋɑ, mbɔ wɔ̌ ɡʉ ńdɑ́Ꞌ ńduk?

²⁷Yɛ́su líŋɛ wɔ́p tɛ ńcú ŋɡɔ: «Ɛ́ tsɑ pɔ pʉɔmɛsɔŋ, ɛ́ lɑɑ ḿbɔ́ ɛ́ pɔɔ Sɛ́ tsɑ, mbíꞌŋɡɔ ɑ kuꞋ nɛɡɛ mbɑ kʉ̈ɔ́ lɑ́.»

²⁸Pyɛ̂ cú mbɔ̌ Yɛ́su ŋɡɔ: «Tɛ pɛk kɑ nɑ́ yúu tsʉʉ, ńcʉ́ɔ nzʉʉ wu pɑꞋɑ lɑ́?»

²⁹Yɛ́su pʉ̈ɔt ŋɡɔ: «Lɑ́ ɛ sẅíi wʉ́ʉ, kwɑꞋ nɛ́nẅín, ɛ́ lɑɑ ḿbɔ́ ŋu pɔɔ nɑ́ ndɑ́ yɛ, nɑ́ pɔ́ɔpɛ́mɑ́ pɛ́ pɛ́ mbɛ́ɛnɛ mbɑ pɛ́ pɑŋɡɛ́, nɑ́ mɑ́ wɛ pɔ́p tɑ́t wɛ, nɑ́ mbɔ́ŋkʉ̈ɔ́ pɛ́ pɔ́p mɛŋkɑ́Ꞌ mɛ́, mɛlɑ́Ꞌ wɑ́ɑ mbɑ mɛlɑ́Ꞌ Ŋkʉʉ Sʉ́Ꞌnɛ ẅí ɑ ɡʉ nɛcẅi,

³⁰tɛ ḿbɛ́t kɛ́ zɛ pɔ ŋkɔ̂ɔnɛ nɛɡẅɛɛ yɛcɔ́ ŋkɑ́ ŋkʉ pɔ́, pɛ́ ɡʉ ŋ́kʉ́ʉnɛ wɛ́, lɑ́, Sɛ́ kɛ́ ŋ́ɡɛ ɑ fú pɔ ŋkɔ̂ɔnɛ ŋ́ɡẅɛɛ mɛndɑ́, ŋ́ɡẅɛɛ pɔ́ɔpɛ́mɑ́, ŋ́ɡẅɛɛ pɛmɑ́ pɛ́, ŋ́ɡẅɛɛ mbɔ́ŋkʉ̈ɔ́ pɛ́, ŋ́ɡẅɛɛ mɛŋkɑ́Ꞌ mɛ́, ḿbɛn ńdɑ́Ꞌ ḿbɔ́ tsɛt ŋɡɔŋ fí, ŋ́ɡẅɛɛ luk kɛ́mɛ.

³¹Lɑ́ pɛcɔ́ nɛzɑ́ɑ pʉɔ pi pɔ́p tʉ́ʉnɛ mbi ŋkɔ̂ɔnɛ ɡʉ ńdɑ́Ꞌ ńtsʉ́ꞌ pɛndẅiknzʉʉ, pɑ pɔ́ nzʉʉ tsʉꞋ pɑ pɔ́ mbi.»

³²Yɛ́su pɔ́p ɡɑŋku pɛ́ ɡɛ ḿbɔ́ sɛ̂ndúŋ ḿbɔ́ ḿbʉʉ nɛ́ Yɛlúsɑlɛm, ɑ tík tú yɛ́, ḿbɔ́ mbi pɔ́p ḿbɔ́ ŋ́ɡʉ, lɑ́, wɔ nɛɡʉ Yɛlúsɑlɛm ɛ̂wɑ́ tsúꞋ tú yɔ́p, ḿbɛn ŋ́ɡɛ pʉɔ pinɛ pɔ́p pɛpɔ́p sɛ̂ndúŋ tsʉꞋ ńcʉ̈ɔꞋ cʉɔꞋnɛ. Yɛ́su ɛ́fɑk ɡɑŋku pɛ́ ntsɔ̌ppɑ́ nɛ́ nɛɡɛ́m, pɔ́p tɔ́ nɛ́ nɛjɔ́ŋ yɛ. A zɛ nɛsẅíi wɔ́p nɛ́ yúu mi ɛ́ ɡʉ ŋ́ɡɛ wɛ́, ŋɡɔ:

³³«Pʉʉ tsuŋ ńzúꞋ sʉ́Ꞌnɛ, pɛkŋɛ sɛ̂ndúŋ ḿbɔ́ ḿbʉʉ nɛ́ Yɛlúsɑlɛm pɑꞋɑ, ŋ́kúu zúꞋu, pɛ́ fɛn Mɔ́ɔ-Ŋu mbɔ̌ pɛtɑ́tndɑ́-pɑnɔŋpɔꞋ pɔ́p pɑkyɛ́Ꞌtɛ nɛpʉ́ʉ-Mɔ̌sɛ̂ɛ, pɔ́p ŋɑk wɛ́, ńzɑ́p pɑꞋ ɑ ɡʉ ḿpfú, ŋ́ɡɑ́ wɛ́ mbɔ̌ pʉɔ-túu ndɛꞋ.

³⁴Pɔ́p zɔɔtɛ wɛ́, ńtẅik mɛ́tɛ́ nǔu wɛ, ńdɔk ŋɡwɑɑ ńtswɑ́ɑ wɛ́, ńjẅí wɛ́, ɑ pɛn ńzẅíimɛ nǔu nɛvú nǔu mbɑ́ɑtɛ lɛ́Ꞌ pɛtɑ́t.»

³⁵Jɑ̂k pɔ́p Jɑ̂ŋ, pɔ́ɔ-Zɛbɛ́dɛ́ɛ kẅɛ́Ꞌlɛ mbʉʉ yɔp ńtɔ́ nɛ́ nɛjɔ́ŋ Yɛ́su, ńcú mbɔ̌ wɛ́ ŋɡɔ: «Tɑ̌ɑ wɛk, sɛ́sẅíi, pɛk lɑɑ ńdɔ́ɔ yúu mbɔ̌ wu, ɔ pɛ́m ŋ́ɡɑ́ yîyɑ́ yúu mbɔ̌ pɛk.»

³⁶Yɛ́su píkŋɛ wɔ́p ŋɡɔ: «Pʉʉ kɔŋ ŋɡɔ ŋ ɡɛ ŋɡɔ́ku mbɔ̌ pʉʉ?»

³⁷Pɔ́p pʉ̈ɔt ŋɡɔ: «Tɑ̌ɑ wɛk, pɛk tsɑ́ɑ ŋɡɔ ɔ lɑɑ ŋ́ɡɛ ḿbɔ́ tsɛt nɛɡúꞋ wu, ɔ tsẅíkŋɛ wɛ́k nɛjɔ́ŋ wu, tɑꞋ ŋu pɔ́ nǔu ɡúŋ-pɔ́ yú yɛ tʉʉ, wɛcɔ́ ŋu pɔ́ nǔu ɡúŋ-pɔ́ yú yɛ ŋkẅɛpmɛ.»

³⁸Yɛ́su tsɔ́Ꞌ mbɔ̌ pɔ́p ŋɡɔ: «Pʉʉ kɑ́ jí yúu mi pʉʉ lɔ́ɔnɛ pɔ́. Pʉʉ kuꞋ nɛnɔ́ ntúꞋ-ŋɡʉ̈ɔ́Ꞌ yi ŋ ɡʉnɛ nɛnɔ́? Kɛ pʉʉ kuꞋ pɔ nɛpɛ́m ŋɡɔ pɛ́ nuꞋ wʉ́ʉ tsɛt ŋɡʉ̈ɔ́Ꞌ yi pɛ́ ɡʉnɛ tsɛtú nɛnuꞋ wɑ́ɑ?»

³⁹Pɔ́p pʉ̈ɔt ŋɡɔ: «Pɛk kuꞋ.» Yɛ́su cú mbɔ̌ pɔ́p ŋɡɔ: «Ɛ́ nɛ́nẅín ŋɡɔ pʉʉ ɡʉ ńnɔ́ ntúꞋ yi ŋ ɡʉnɛ nɛnɔ́, pɛ́ ɡʉ ḿbɛn nuꞋ wʉ́ʉ ɡúu tsɛt ŋɡʉ̈ɔ́Ꞌ yi ŋ ɡʉnɛ nɛjʉ́ɔ.

⁴⁰Lɑ́, ɛ́ ɡʉ nǔu nɛtsẅíkŋɛ ŋu nǔu ɡúŋ-pɔ́ yɑ́ɑ yɛ tʉʉ kɛ pɔ yɛ ŋkẅɛpmɛ ɔɔ, mbɔ mɔ kɑ́nɛ ɡẅɛɛ nɛɡɑ́ mbɔ̌ ŋu pɔ́, yîyɑ́ zʉꞋ ɛ́ yɛ́ pʉɔ pi Sɛ́ kɑ niitɛ́nɛ ńdɔk ḿbyɛ́p wɔ́p.»

⁴¹Pɛcɔ́ ɡɑŋku-Yɛ́su nɛɡɛ́m pɔ́ tɛ ńzúꞋ nu yí Jɑ̂k pɔ́p Jɑ̂ŋ cúnɛ, ńzɛ nɛzɑ́ŋ lɔ́ŋ ntɛ́ wɔ́p.

⁴²Yɛ́su fúŋ wɔ́p pɛ́tsʉʉ, pɔ́p tɔ́, ɑ cú mbɔ̌ pɔ́p ŋɡɔ: «Pʉʉ sɛ́ ńjí ŋɡɔ pɛfɔɔ-pɑkɛ́jí Sɛ́ ɡɔ́ ɛ́sɑ́Ꞌ lɑ́Ꞌ, ḿbɔ́ ńnɔꞋ pʉɔ nɔꞋnɛ, pɛmɑ́ pʉɔ pɔ́ ɛ́fyɛ́t lɑ́Ꞌ fyɛ́tnɛ.

⁴³Lɑ́, ɛ́ kɛ́ mbɔɔ pɔŋ ŋɡɔ ɛ́ pɔ́ tsɛtsɛt pʉʉ ḿbɔ́ pɔ́Ꞌɔ pɔ́. Ŋu lɑɑ ḿbɔ́ ŋ́kɔŋ nɛpɔ́ ndʉ́m tsɛtsɛt pʉʉ, mbɔ ɛ́ pɔŋ ŋɡɔ ɑ shɔtnɛ ńtsʉ́ꞌ mɔ́ŋkʉ̈ɔ́ wʉʉ.

⁴⁴Ŋu lɑɑ ḿbɔ́ ńdɔɔ nɛpɔ́ wɛ ɡwɛ́ tsɛtsɛt pʉʉ, mbɔ ɛ́ pɔŋ ŋɡɔ ɑ pɛ́m ŋkwɑɑ-pʉɔtsʉʉ.

⁴⁵MbíꞋŋɡɔ Mɔ́ɔ-Ŋu ŋ́kɑɑ zɛɛ ńtɔ́ ndǔ tsɛ́tsɑ́Ꞌ pɔ pɑꞋ pʉɔmɛsɔŋ ɡʉ ɛ́fɑꞋ mbɔ̌ wɛ́ pɔ́, ɑ kɑ tɔ́ pɔ nɛfɑꞋ mbɔ̌ pʉɔmɛsɔŋ, ɛ́fɑꞋ fɑꞋnɛ tɛ ḿbɛn ŋ́ɡɑ́ tú yɛ́ nɛlɔk ńcẅɛ́ɛ tú-pʉɔ tɛ ńzɑ́ɑ.»

⁴⁶Yɛ́su pɔ́p ɡɑŋku pɛ́ ɡʉ tɛ ŋ́kúu Yɛlíkɔ́, ḿbɔ́ ńdɛɛ, mɑ́mɑ́ nɔɔ-lɑ́Ꞌ cẅɛt, ńcʉ́ɔ nzʉʉ. Wɛcɔ́ fʉmík nɑ́ŋ mbʉʉ-sɛ̂ndúŋ, ḿbɔ́ ńdɔ́ɔ ndɔ́ɔ, lík yɛ́ pɔ́ ŋɡɔ Mbɑltímɛ̂, ɑ pɔ́ mɔ́ɔ-Timɛ̂ɛ.

⁴⁷A zúꞋ ŋɡɔ Yɛ́su mɔ́ɔ-Nɑ̌zɑlɛt lɛɛnɛ, ŋ́kɑꞋ ŋɡi yɛ ŋ́ɡɑ́ tʉ́, ńzɛ nɛcú ŋɡɔ: «Yɛ́su ɡu ẅí ɔ nǔu njẅɛt-fɔɔ Ndɑvît, tsɑ́ɑ mɛjʉ́ŋ mɑ́ɑ.»

⁴⁸Pʉɔ tɛ ńzɑ́ɑ kɑkŋɛ wɛ́ ŋɡɔ ɑ nɑ́Ꞌ, lɑ́ ɑ ɡɔ́ɔ ḿmɛkŋɛ ŋ́ɡɑ́Ꞌ, ŋ́ɡɑ́ ŋɡi yɛ tʉ́ ŋɡɔ: «Ŋu nǔu njẅɛt-fɔɔ Ndɑvît, tsɑ́ɑ mɛjʉ́ŋ mɑ́ɑ.»

⁴⁹Yɛ́su tʉ́ʉ ńcú ŋɡɔ: «Pʉʉ fúŋ wɛ́.» Pɔ́p cú mbɔ̌ fʉmík ŋɡɔ: «Sɑ́Ꞌ tʉʉ ńdɔ sɛ́, ɑ sɛ́ ɛ́fúŋ wú.»

⁵⁰Fumík lɔ sɛ́, ńjɛ́Ꞌ ndẅí-fɑ́k yɛ ḿmɑꞋ nzʉʉ, ŋ́ɡʉ ńtsɛ́t Yɛ́su.

⁵¹Yɛ́su píkŋɛ wɛ́ ŋɡɔ: «Ɔ tsɑ́ɑ ŋɡɔ ŋ ɡɛ ŋɡɔ́ku nǔu ɡu?» Fumík pʉ̈ɔt ŋɡɔ: «Ndɛ n tsɑ́ɑ nɛpɛn ńjʉ́ɔ zʉꞋ.»

⁵²Yɛ́su cú mbɔ̌ wɛ́ ŋɡɔ: «PɑꞋ ɔ zɑ́b tʉ́m nǔu mɔ lɑ́, ɔ fíitɛ, tsʉꞋ ŋ́ɡʉ yú ɡʉnɛ.» Fumík ɡɔ́ɔ ńzɛ nɛpɛn ńjʉ́ɔ zʉꞋ, ńcʉ́ɔ nzʉʉ Yɛ́su pɔ́p pɛ́pɔ́p ɡʉ.