Read Ngomba Mɑ́lɛ́kúshi 11 Bible Online

Mɑ́lɛ́kúshi 11 - Ngomba bible

Mɑ́lɛ́kúshi 11

¹Yɛ́su pɔ́p ɡɑŋku pɛ́ ɡʉ tɛ ḿbɔ́ ŋ́kúu Yɛlúsɑlɛm, ḿbɛ́t ḿbɔ́ pɔ nɛpɑt-Mbɛtfɑjɛ́ pɔ́p Mbɛtɑni, zʉꞋ-nɛŋkɔꞋ-mɛtʉ́-mɛɡwɛ́t-ɔliivɛ, Yɛ́su túu ɡɑŋku pɛ́ pɛ́pɑ́,

²ńcú mbɔ̌ pɔ́p ŋɡɔ: «Pʉʉ ɡʉ tsɛt lɑ́Ꞌ yɑ́ yi ɛ́ mbi pʉʉ lɑ́. Pʉʉ ɡʉ ŋ́kúu zúꞋu, ńjʉ́ɔ mɔ́ɔ-njɑkɑ́ɑshi ẅi pɛ́ lɑ́Ꞌnɛ ńcʉŋɛ, ɑ pɔ́ ẅi ŋu ŋkɑɑ mɔ ndǔ nɑ́ŋ, pʉʉ kíɛꞋ, ńdɔk ńtɔ́.

³Pʉʉ lɑɑ ḿbɔ́ ŋ́kíɛꞋ ŋu píkŋɛ wʉ́ʉ ŋɡɔ: Pʉʉ kíɛꞋ njɑkɑ́ɑshi wɑ́ ńdɔk ŋ́ɡʉ nɛ́ ɡɔ́, pʉʉ pʉ̈ɔt ŋɡɔ: Tsɑpʉɔ lɑ́Ꞌnɛ ḿbɔ́ ńtsɑ́ɑ, ɑ kɛ́ lɑ́ɑtɛ, ḿbɑꞋ zɑ́Ꞌnɛ.»

⁴Gɑŋntúu ɛ̂pɑ́ ɡʉ ŋ́kúu zúꞋu, ńjʉ́ɔ njɑkɑ́ɑshi, mbɔ pɛ́ lɑ́Ꞌ ńcʉŋɛ wɛ́ ntsumbuꞋú, mbʉʉ-sɛ̂ndúŋ, pɔ́p kíɛꞋ wɛ́.

⁵Pɛcɔ́ pʉɔ pi pɔ́p ḿbɔ́nɛ zúꞋu píkŋɛ wɔ́p ŋɡɔ: «Pʉʉ kíɛꞋ njɑkɑ́ɑshi wɑ́ ńdɔk ŋ́ɡʉ nɛ́ ɡɔ́?»

⁶Pɔ́p pʉ̈ɔt pɑꞋ Yɛ́su lɑ́Ꞌnɛ ńcú mbɔ̌ pɔ́p. Pɛ́ nɑ́ wɔ́p pɔ́p lɔk ŋ́ɡʉ.

⁷Pɔ́p lɔk njɑkɑ́ɑshi ɛ̂wɑ́ ńtɔ́, ŋ́ɡɔ ŋ́ɡɑ́ wɛ́ mbɔ̌ Yɛ́su, ńzɑ́p mɛndẅí-fɑ́k mɔ́p ŋkwɛn yɛ́, Yɛ́su kɔꞋ ńnɑ́ŋ ndǔ,

⁸ḿbɔ́ ńdɔk ńnɛn, pʉɔ tɛ ńzɑ́ɑ sɑŋtɛ mɛndẅí-fɑ́k mɔ́p sɛ̂ndúŋ. Pɛcɔ́ pʉɔ fɑktɛ yɔ́p pɔ mɛfu-tʉ́ ŋkɑꞋ, ńdɔk ńtɔ́ ńzɑ́Ꞌ wɛ́.

⁹LɑꞋ pɔ́ mbi, ḿbɔ́ nzʉʉ yɛ́ ńzɔp ŋɡɔ: «Wûuẅíi[11] mbɔ́tnɛ pɔ́ mbɔ̌ ŋu ẅí, ɑ tɔ́nɛ nǔu lík-Tsɑpʉɔ.

¹⁰Mbɔ́tnɛ pɔ́ mbɔ̌ ŋu ẅí ɑ tɔ́nɛ ńjʉ́ nɛfɔɔ-tɑ́t wɛkŋɛ, fɔɔ Ndɑvît. Wúuẅíi pɔ́ mbɔ̌ Sɛ́ tɛ tʉ́nɛ́pú!»

¹¹Yɛ́su kúu Yɛlúsɑlɛm, ŋ́ɡʉ zʉꞋ-nɔŋpɔꞋ, ḿbɔ́ ŋ́kɑ́t, ńjʉ́ɔ mbɑ kʉ̈ɔ́ lɑ́ yi pɛ́ ŋ́ɡɔ ɛ́ zúꞋu ŋ́ɡɛ. Pɔ́p ɡɑŋku pɛ́ ntsɔ̌ppɑ́ nɛ́ nɛɡɛ́m ɡɔ́ɔ ḿbɛn nzʉʉ nɛ́ Mbɛtɑni, mbíꞌŋɡɔ ɛ́ kɑ ɡɔ́ ḿbɔ́, mbɔ zɑꞋ lɛɛ.

¹²Njí ɡɛ ŋ́kiɛ, pɔ́p pɔ́ ɛ́fú Mbɛtɑni ḿbɛn, njí zɑ́ŋ Yɛ́su.

¹³A mɑꞋ mík, ńjʉ́ɔ tʉ́-ŋɡɛ̌m, mɛfu mɛ́ pɔ́ mɛfɛ́, ɑ ɡʉ nɛtsɛ́n nú ŋ́ɡɔ kɛ ɑ ɡʉ ńjʉ́ɔ ntɑ́ɑ nǔu ɔɔ, ŋ́kúu zúꞋu, ńjʉ́ɔ ɛ́ pɔ́ pɔ ndɑꞋ mɛfu. Ɛ́ zɛɛ ŋ́ɡɔ ḿbɔ́ ɛ́ pɔɔ ŋkɑ́ yi ŋɡɛ̌m zɛ́mnɛ pɔ́.

¹⁴A cú mbɔ̌ tʉ́ ɛ̂yɑ́ ŋɡɔ: «Ŋu kɛ́ lɑ́Ꞌ ḿbɛn ńjʉ́ mɛntɑ́ɑ mú pɔ́, ŋ́ɡɔ ńcú, ɡɑŋku pɛ́ pɔ́ ńzúꞋ.»

¹⁵Pɔ́p ɡʉ tɛ ŋ́kúu Yɛlúsɑlɛm, Yɛ́su ɡʉ zʉꞋ-nɔŋpɔꞋ, ńzɛ nɛtɑ́k pʉɔ pi pɔ́p zúꞋu ɛ́fɛn yúu pɔ́p pɑzúu, ńtsʉ́ʉ mɛkúu-mɛtɑ́ɑ-pɑkúp ŋkɑ́p ḿmɑꞋ sɛ́, ŋ́kɛm mɛŋkɔꞋ-pɑfɛn pɛpuutɛ,

¹⁶ńtɔꞋ tɛ wɛcɔ́ tɑꞋ ŋu pɔɔ pɛn ńtíi yúu ńdɔk ńdɛɛ zʉꞋ-nɔŋpɔꞋ pɔ́,

¹⁷ńzɛ nɛzíꞋ wɔ́p nɛ́ yúu ŋɡɔ: «Kɛ ŋɡɔ Sɛ́ kɑ cú tsɛt ŋwɑꞋnɛ yɛ́ ŋɡɔ: pɛ́ ɡʉ ńdɑ́Ꞌ ɛ́fúŋ ndɑ́ yɑɑ ŋɡɔ ndɑ́ yi ŋɡɔŋ nɛ́ ŋɡɔŋ cɛꞋlɛ́nɛ Sɛ́ zúꞋu. Lɑ́ pʉʉ kɑ shɔt ńdɔk ŋ́ɡɛ ŋkɑɑ-pɛtsɔ́ŋ.»

¹⁸Pɛtɑ́tndɑ́-pɑnɔŋpɔꞋ pɔ́p pɑkyɛ́Ꞌtɛ nɛpʉ́ʉ-Mɔ̌sɛ̂ɛ ɡɛ ńzúꞋ, ńzɛ nɛlɔɔ shʉ́ pɑꞋ pɔ́p ɡʉ ŋ́ɡɛ lɑ́ ńjẅí wɛ́. Pɔ́p kɑ pɔ́ ḿbɔ́k ŋɡɔ nu yɛ́ ɡʉ ńjʉ́ lɑ́Ꞌ, mbíꞌŋɡɔ lɑ́Ꞌ tsʉʉ kɑ pɔ́ ŋ́ɡʉ̈ɔꞋtɛ yúu mi ɑ kɑ pɔ́ ńzíꞋ pʉɔ.

¹⁹Ɛ́ ɡɛ ḿbɔ́ ntsuŋkẅɛ́Ꞌ, Yɛ́su pɔ́p ɡɑŋku pɛ́ pɛn ɛ́fú tʉ́sɔŋ ńcẅɛt.

²⁰Pɔ́p ɡɛ ḿbɔ́ mbɑꞋmbɑꞋɑ́ ḿbɔ́ ńdɛɛ, ńjʉ́ɔ, mbɔ tʉ́-ŋɡɛ̌m ɛ̂yɑ́ zúu tɛ ŋ́kúu nǔu mɛŋɑŋ mɛ́.

²¹Pyɛ̂ líŋɛ tʉ́ ɛ̂yɑ́, kẅíitɛ yúu mi ɛ́ kɑ lɛɛnɛ, ńcú mbɔ̌ Yɛ́su ŋɡɔ: «Tɑ̌ɑ wɛk, jʉ́ɔ pɑꞋ tʉ́ yɑ́ yi ɔ kɑ níꞋnɛ ndɔɔ nǔu lɑ́ zúunɛ tɛ ḿmɛ.»

²²Yɛ́su tsɔ́Ꞌ mbɔ̌ pɔ́p ŋɡɔ: Pʉʉ zɑ́p tʉ́m yʉ́ʉ nǔu Sɛ́.

²³Ɛ sẅíi wʉ́ʉ, kwɑꞋ nɛ́nẅín, ŋu wʉʉ lɑɑ ńcú mbɔ̌ nɛŋkɔ́Ꞌ ŋɡɔ fú zɑꞋɑ, ŋ́ɡʉ ńtʉ́ʉ tsɛt ŋki kɛ́ ndẅiklɛ, ńcú kɛ́ pɔ́ ḿmʉꞋlɛ, ńzɑ́p tʉ́m nǔu Sɛ́, mbɔ Sɛ́ ɡʉ ḿbɛ́m ɛ́ pɔ́ pɔ́Ꞌɔ.

²⁴Yúu mi ɛ́ ɡɛnɛ lɑ́ ɛ sẅíi wʉ́ʉ ŋɡɔ: Kʉ̈ɔ́ lɑ́ yi pʉʉ sɛ́ ńcɛꞋlɛ Sɛ́ ńdɔ́ɔ, pʉʉ pɛ́m ŋɡɔ pʉʉ ńdɑ́Ꞌmɔ́ ŋ́ɡẅɛɛ, Sɛ́ ɡɑ́ mbɔ̌ pʉʉ.

²⁵Ŋkɑ́ yi ɔ sɛ́ ńcɛꞋlɛ Sɛ́ lɑ́, ḿbɔ́ yi ŋu fɑɑnɛ nu mbɔ̌ wu, ɔ likŋɛ ŋ́ɡɑ́ mbɔ̌ ŋɡɑŋ. Ɛ́ lɛɛ pɔ́Ꞌɔ, lɑ́ Tɑ̌ɑ wʉʉ ẅí ɑ tʉ́nɛ́pú, likŋɛ mʉ́ʉ mɛfɑɑnɛ ŋ́ɡɑ́ mbɔ̌ pʉʉ.

²⁶[Pʉʉ lɑɑ ŋ́kɛ́ mbɔɔ likŋɛ mɛfɑɑnɛ pɛcɔ́ pʉɔ pɔ́, mbɔ Tɑ̌ɑ wʉʉ ẅí ɑ tʉ́nɛ́pú kɛ́ likŋɛ mʉ́ʉ ɡúu pɔ́.]

²⁷Yɛ́su pɔ́p ɡɑŋkupɛ́ pɛn ŋ́ɡʉ tɛ ŋ́kúu Yɛlúsɑlɛm, ɑ kúu zʉꞋ-nɔŋpɔꞋ, ḿbɔ́ nɛntɛ, pɛtɑ́tndɑ́-pɑnɔŋpɔꞋ pɔ́p pɑkyɛ́Ꞌtɛ nɛpʉ́ʉ-Mɔ̌sɛ̂ɛ mbɑ pɛkɛ́m-lɑ́Ꞌ kẅɛ́Ꞌlɛ ńtɔ́,

²⁸ḿbíkŋɛ wɛ́ ŋɡɔ: «Ɔ lɔk lík wɔ̌ ŋ́ɡɛ mɔnɛ mɛnu? Wɔ̌ túunɛ wú nɛɡɛ yîyɑ́ yúu?»

²⁹Yɛ́su pɑꞋ mbɔ̌ pɔ́p ŋɡɔ: «Pʉʉ tsʉꞋ mbɑ mɔ yɑ́ɑ, m bíkŋɛ wʉ́ʉ nɛ́ tɑꞋ nu wɛ́mɔ́Ꞌ, pʉʉ pʉ̈ɔt lɑ́ ɛ sẅíi wʉ́ʉ kwɑꞋ nɛ́ ŋu ẅí ɑ kɑ túunɛ wɑ́ɑ nɛɡɛ mɔnɛ mɛnu.

³⁰Jɑ̂ŋ ẅí ɑ kɑ pɔ́ ńnuꞋ pʉɔ ŋki kɑ pɔ́ pɛꞋnɛ, Sɛ́ túunɛ wɛ́ nɛfɑꞋ mîmɑ́ mɛfɑꞋ kɛ pʉɔmɛsɔŋ? Pʉʉ sẅíi wɑ́ɑ.»

³¹Pɔ́p zúꞋ, ŋ́kwɑŋɛ tsɛtsɛt pɔ́p ŋɡɔ: «Pɛkŋɛ lɑɑ ŋɡɔ: Sɛ́ kɑ túunɛ wɛ́, mbɔ ɑ ɡʉ ḿbíkŋɛ wɛkŋɛ ŋɡɔ: Tɛ mɛlɑ́Ꞌ kʉ̈ɔ́ pɛkŋɛ ŋ́kɑɑ pɛ́m nu yí Jɑ̂ŋ kɑ pɔ́ ńcú pɔ́ ɔɔ?

³²Lɑ́ ḿbɛn ŋ́kɛ́ ńcú ŋɡɔ pʉɔmɛsɔŋ, mbɔ hɛ̂ɛ!» Pɔ́p kwɑŋɛ kɛ́kɑ́ŋ, mbíꞌŋɡɔ pɔ́p kɑ pɔ́ ḿbɔ́k lɑ́Ꞌ, ɛ́ zɛɛ ŋ́ɡɔ ḿbɔ́, pʉɔtsʉʉ pɔ́ ŋ́kwɑŋɛ ŋɡɔ Jɑ̂ŋ kɑ pɔ́ kwɑꞋ ŋɡɛ́mndʉ̈ɔꞋ-Sɛ́.

³³Pɔ́p kwɑŋɛ pɔ́Ꞌɔ, ńtsʉꞋ ńtsɔ́Ꞌ pɔ ŋɡɔ: «Pɛk kɑ́ jí.» Yɛ́su cú mbɔ̌ pɔ́p ŋɡɔ, ɛ́ lɑɑ ḿbɔ́ pɔ́Ꞌɔ, mbɔ mbɑ mɔ yɑ́ɑ, ŋ kɛ́ sẅíi wʉ́ʉ nɛ́ ŋu ẅí n dɔknɛ lík yɛ́ ŋ́ɡɛ mɔnɛ mɛnu pɔ́.