Read Ngomba Mɑ́lɛ́kúshi 14 Bible Online

Mɑ́lɛ́kúshi 14 - Ngomba bible

Mɑ́lɛ́kúshi 14

¹Ɛ́ ɡɛ ḿbɔ́ ńtsʉ́Ꞌ ńjɑ́k lɛ́Ꞌ pɛ́pɑ́ pɛ́ jʉ́ ndínɑ ẅí pɛ́ kɑ pɔ́ ɛ́fúŋ nɛ́ Pɑ́skɑ, ḿbɔ́ mɛlɛ́Ꞌ mi pɛ́ kɑ pɔ́ ŋ́kwɛ́t mbɛlɛ̂ɛt kɛ́ fɛntɛ. Pɛtɑ́tndɑ́-pɑnɔŋpɔꞋ pɔ́p pɑkyɛ́Ꞌtɛ nɛpʉ́ʉ-Mɔ̌sɛ̂ɛ pɔ́ ńdɔɔ shʉ́ pɑꞋ pɔ́p ɡʉ ɛ́sɔ́ ŋ́ɡẅɛɛ Yɛ́su, ńjẅí wɛ́,

²ŋ́kwɑŋɛ tsɛtsɛt pɔ́p ŋɡɔ: «Ɛ́ kɑ́ pɔŋ ŋɡɔ ɛ́ pɔ́ nǔu lɛ́Ꞌ ndínɑ pɔ́, ḿbɔ́k lɑ́Ꞌ nɛtɑ́k zʉꞋ.»

³Yɛ́su ɡɛ ḿbɔ́ Mbɛtɑni, ndɑ́-Símɔ̂ŋ ẅí pɛ́ kɑ pɔ́ ɛ́fúŋ wɛ́ ŋɡɔ ŋɡɑŋkɑꞋ pɑ́p, ńnɑ́ŋ sɛ́ ḿbɔ́ ŋ́kwɛ́t yúu, wɛcɔ́ mɑŋɡɛ́ kúu yɛ́ ndɑ́, ŋ́ɡẅɛɛ tɔ́Ꞌlɛ yɛcɔ́ lɑmɛ́ndɑɑ sʉ́Ꞌnɛ yí pɛ́ kɑ lɔknɛ yɛcɔ́ tú-nɛɡíi[17] ŋ́ɡɛ ɛ́ pɛn ńcʉ̈ɔ́k ŋkɑ́p tɛꞋ. A lɔk ńtɔ́, ńtʉ́ʉ nɛjɔ́ŋ Yɛ́su, ńtsɔ́Ꞌ tɔ́Ꞌlɛ ɛ̂yɑ́, ńtswɛtɛ lɑmɛ́ndɑɑ nǔu tú-Yɛ́su.

⁴Pɛcɔ́ pʉɔ pi pɔ́p ḿbɔ́nɛ zúꞋu jʉ́ɔ ɛ́ pʉ́k wɔ́p, pɔ́p sẅíitɛ ńcú ŋɡɔ: «A zɛɛ ḿbʉ́ʉpɛ yɔ lɑmɛ́ndɑɑ mɛlɑ́Ꞌ kʉ̈ɔ́?

⁵Pɛ́ lɑ́Ꞌ ḿbɔ́ pɛꞋnɛ ɛ́fɛn, mbɔ pɛ́ cẅɛ́ɛ mbɑ mɛndɛniyɛ ŋkʉ yɛ́tɑ́t tɛ ŋ́ɡɑ́ mbɔ̌ pɛpúŋ.» Ńcú pɑꞋɑ, ńzɛ nɛcútɛ ntɛ́ mɑŋɡɛ́ ɛ̂wɑ́.

⁶Lɑ́ Yɛ́su cú ŋɡɔ: «Pʉʉ nɑ́ wɛ́, pʉʉ sẅíitɛ mɛlɑ́Ꞌ kʉ̈ɔ́? A ɡɛ pɔ nu sʉ́Ꞌnɛ nǔu mɔ.

⁷Pʉʉ ɡʉ ḿbɔ́ ŋ́ɡẅɛɛ pɛpúŋ pɔ ŋkɑ́ tsʉʉ, ḿbɔ́ yi pʉʉ lɑɑ ŋ́kɔŋ pɔ ŋkɑ́ kʉ̈ɔ́ lɑ́, pʉʉ ɡɛ nu sʉ́Ꞌnɛ nǔu pɔ́p. Lɑ́ ŋ́ɡʉ nǔu mɔ, mbɔ pɛkŋɛ kɛ́ pɔ́ pɔ ŋkɑ́ tsʉʉ pɔ́.

⁸Mɑŋɡɛ́ wɔ ɡɛ yɛ́ yúu mi ɑ kuꞋnɛ nɛɡɛ, ńzɑ́Ꞌ njí ńdɔk lɑmɛ́ndɑɑ ńzɔ́Ꞌ wɑ́ɑ, lɑ pɛ́ tɑ́ɑ ńníꞋ wɑ́ɑ tsɛt nɛshi.

⁹Ɛ sẅíi wʉ́ʉ, kwɑꞋ nɛ́nẅín, mbɑ ɡɔ́ lɑ́ yi pɛ́ ɡʉ ńdɑ́Ꞌ cẅi Ŋkʉʉ Sʉ́Ꞌnɛ wɑ́ɑ ndǔmbí, pɛ́ ɡʉ ńdɑ́Ꞌ ḿbɛn ḿbɔ́ ńcú yúu mi mɑŋɡɛ́ wɔ ɡɛnɛ ńdɔk ŋ́kẅíitɛ wɛ́.»

¹⁰Ŋ́ɡɔ́ ḿbɔ́ wɛcɔ́ tɑꞋ ŋu nǔu pʉɔ-Yɛ́su ntsɔ̌ppɑ́ nɛ́ nɛɡɛ́m, lík yɛ́ pɔ́ Jẅidɑ Iskɑlyɔt pɛn ŋ́ɡʉ ńjʉ́ɔ mɑ́nzɔŋ-pɛtɑ́tndɑ́-pɑnɔŋpɔꞋ, pɔ́p pɛpɔ́p kwɑŋɛ pɑꞋ ɑ ɡʉ ŋ́ɡɛ lɑ́ ɛ́fɛn Yɛ́su mbɔ̌ pɔ́p.

¹¹Pɔ́p zúꞋ, ɛ́ pɔŋ wɔ́p, tɛ pɔ́p pʉ́ wɛ́ nɛ́ ŋkɑ́p yi pɔ́p ɡʉ ŋ́ɡɑ́ mbɔ̌ wɛ́. Jẅidɑ ɡɔ́ɔ ŋ́kɛ́ ńzɛ nɛkwɑŋɛ ŋkɑ́ yi ɑ ɡʉ ɛ́fɛn Yɛ́su mbɔ̌ pɔ́p tɛ yɛcɔ́ lɔ́Ꞌ pɔɔ cẅɛt.

¹²Nduŋmbi lɛ́Ꞌ ndínɑ-Mbɛlɛ̂ɛt kɛ́ fɛntɛ pɔ́ tɛ ŋ́kuꞋ, ḿbɔ́ lɛ́Ꞌ yi pɛ́ ɡwɑtnɛ mɛnjinjɔ ńdɔk ńjʉ́ ndínɑ-Pɑ́skɑ, ɡɑŋku-Yɛ́su píkŋɛ wɛ́ ŋɡɔ: «Ɔ kɔŋ ŋɡɔ pɛk ɡʉ ɡɔ́ ńniitɛ zʉꞋ, ɔ jʉ́ Pɑ́skɑ zúꞋu?»

¹³A túu ɡɑŋku pɛ́ pɛ́pɑ́, ńcú mbɔ̌ pɔ́p ŋɡɔ: Pʉʉ ɡʉ tʉ́sɔŋ, pʉʉ ɡʉ ŋ́kúu zúꞋu, ńjʉ́ɔ ŋu mbɛ́ɛnɛ, ɑ ɡẅɛɛ tʉ́ɔ-ŋki, pʉʉ cʉ́ɔ nzʉʉ yɛ́,

¹⁴tɛ ɑ kúu ndɑ́, pʉʉ kúu yʉ́ʉ, ńcú mbɔ̌ ŋɡɑŋndɑ́ ŋɡɔ: «Ndɛ cú ŋɡɔ pɛk píkŋɛ wú ŋɡɔ lûmndɑ́ ẅi pɔ́p ɡɑŋku pɛ́ ɡʉ ńjʉ́ Pɑ́skɑ zúꞋu, ɛ́ wɛ́t ɔɔ?»

¹⁵A ɡʉ ńnyɛt wʉ́ʉ nɛ́ mɑ́mɑ́ lûmndɑ́, ndǔ ndɛ̂k wɛ tʉ́. Tɛ mbɔ pɛ́ ńdɑ́Ꞌmɔ́ ńniitɛ sʉ́Ꞌnɛ, ɛ́ zʉꞋ yí pʉʉ ɡʉ niitɛ pɛ́kŋɛ yúu ndínɑ zúꞋu.

¹⁶Gɑŋku pɛ́ ɡʉ tɛ ŋ́kúu tʉ́sɔŋ, ńjʉ́ɔ mbɑ kʉ̈ɔ́ lɑ́ pɔ́ pɑꞋ Yɛ́su lɑ́Ꞌnɛ ńcú. Pɔ́p niitɛ yúupɛjʉ́-Pɑ́skɑ zúꞋu.

¹⁷Ɛ́ ɡɛ ḿbɔ́ ntsuŋkẅɛ́Ꞌ, Yɛ́su pɔ́p pʉɔ pɛ́ ntsɔ̌ppɑ́ nɛ́ nɛɡɛ́m cúꞋlɛ zúꞋu.

¹⁸Ńnɑ́ŋ sɛ́, ńzɛ nɛjʉ́ yúu. Yɛ́su cú ŋɡɔ: «Ɛ sẅíi wʉ́ʉ, kwɑꞋ nɛ́nẅín, wɛcɔ́ tɑꞋ ŋu tsɛtsɛt pʉʉ ɡʉ fɛn wɑ́ɑ, tɛ ḿbɔ́ pɔ ŋu ẅí pɛknɛ tɛmtɛ kɑ́ŋ.»

¹⁹Pɔ́p zúꞋ, ńtɛmtɛ ḿmʉk. Mbɑ wɔ̌ lɑ́ nǔu pɔ́p pɔ́ ḿbíkŋɛ Yɛ́su ŋɡɔ: «Mbɔ ɑ pɔ́ mɔ?»

²⁰Yɛ́su cú mbɔ̌ pɔ́p ŋɡɔ: «Ɛ sẅíi wʉ́ʉ ŋɡɔ ɑ wɛcɔ́ tɑꞋ ŋu tsɛtsɛt pʉʉ ntsɔ̌ppɑ́ nɛ́ nɛɡɛ́m, tɛ pɛkŋɛ tɛmtɛnɛ kɑ́ŋ.

²¹Mɔ́ɔ-Ŋu ɡʉ ḿpfú, ɛ́ pɔ́ pɑꞋ pɛ́ kɑ cúnɛ tsɛt ŋwɑꞋnɛ-Sɛ́, lɑ́, nduu kɛpɔŋ ŋu ẅí ɑ ɛ́fɛn Mɔ́ɔ-Ŋu. Mbi ḿbɔ́ pɑꞋ pɛ́ ŋkɑɑ ŋ́ɡʉ ḿbí wɛ́ pɔ́.»

²²Pɔ́p pɛpɔ́p pɔ́ ńjʉ́ yúupɛjʉ́, Yɛ́su pɛ́ɛ mbɛlɛ̂ɛt, ŋ́ɡɑ́ pɑ́Ꞌlɑ́ mbɔ̌ Sɛ́, ḿbʉ̈ɔ́Ꞌtɛ ŋ́ɡɔ ŋ́ɡɑ́ mbɔ̌ pɔ́p, ńcú ŋɡɔ: «Pʉʉ kɔ. Yɔ mbɑp-mbʉʉ yɑ́ɑ.»

²³Ḿbɛn ńtíi ntúꞋ-mɛluꞋ, ŋ́ɡɑ́ pɑ́Ꞌlɑ́ mbɔ̌ Sɛ́, ŋ́ɡɑ́ mbɔ̌ pɔ́p, pɔ́p tɛmtɛ ńnɔ́ pɔ́p pɛtsʉʉ.

²⁴A cú mbɔ̌ pɔ́p ŋɡɔ: «Yɔ mɛci mɑ́ɑ, ɛ́ mɛci mi Sɛ́ lɔknɛ ŋ́ɡwɑt kɑɑ, ɛ́ tswɛtnɛ nǔu tú-pʉɔ tɛ ńzɑ́ɑ.

²⁵Ɛ sẅíi wʉ́ʉ, kwɑꞋ nɛ́nẅín, ŋ kɛ́ lɑ́Ꞌ ḿbɛn ńnɔ́ mɛluꞋ pɔ́, tɛ ńdɑ́Ꞌ ńtsʉ́ꞌ ńnɔ́ pɔ mɛ́ fí tsɛt ŋɡɔŋ-nɛfɔɔ-Sɛ́.»

²⁶Pɔ́p pɛpɔ́p ɡɔ́ɔ ŋ́kɛ́ ńzɔp mɛŋki ńdɔk ŋ́ɡúꞋlɛ Sɛ́. Ŋkɑ́ kuꞋ, pɔ́p cẅɛt, ŋ́ɡʉ nɛ́ ndǔ nɛŋkɔ́Ꞌ-mɛtʉ́-mɛɡwɛ́t-ɔliivɛ.

²⁷Pɔ́p pɔ́ ŋ́ɡʉ, Yɛ́su cú mbɔ̌ pɔ́p ŋɡɔ: «Pʉʉ pɛtsʉʉ ɡʉ ḿmɛꞋ wɑ́ɑ, ŋ́kʉɔ. Ɛ́ lɔk ḿbuutɛ pɑꞋ pɛ́ kɑ ŋwɑꞋnɛnɛ ŋɡɔ Sɛ́ cú ŋɡɔ: “Mɔ, ŋ ɡʉ ńdɑ́Ꞌ ńjẅí mbyɛ́p mbí, mɛnjinjɔ mɛ́ sɑt tɛt.”»

²⁸Yɛ́su pɛn ńcú ŋɡɔ: «Ŋ ɡʉ ŋ́ɡɛ ḿbɔ́ tɛ zẅíimɛ nǔu nɛvú, ḿbiitɛ Ŋɡɑlilɛɛ ńzẅíꞋlɛ wʉ́ʉ.»

²⁹Pyɛ̂ cú mbɔ̌ wɛ́ ŋɡɔ: «Pɛcɔ́ pʉɔ lɑɑ ḿmɛꞋ wú ŋ́kʉɔ pɛtsʉʉ, m bɔɔ wú mɛꞋ.»

³⁰Yɛ́su tsɔ́Ꞌ mbɔ̌ wɛ́ ŋɡɔ: «Lɑ́ ŋ kɛ́ ɛ́sẅíi wú, kwɑꞋ nɛ́nẅín, mɔ̂ŋkʉ̈ɔ́Ꞌ ɡʉ ŋ́ɡɛ ŋ́ɡɔ ɑ tɔ́ŋ tɔ́ŋnɛ nɛtúꞋ lɔ́Ꞌnɛ ŋkɑ́ yɛ́pɑ́, mbɔ ɔ muŋɛ wɑ́ɑ ŋkɑ́ yɛ́tɑ́t.»

³¹Pyɛ̂ pɛn ḿbɑ́Ꞌ mbɔ̌ wɛ́ kwɑꞋ nɛ́ mɛtʉʉ ŋɡɔ: «Pɛ́ lɑɑ ńzɛɛ ńtɛmtɛ wûu ḿbɔ́ ńdɔk ŋ́ɡʉ pɔ nɛjẅí, m bɔɔ wú muŋɛ.» Pɛcɔ́ ɡɑŋku pɛ́ pɛtsʉʉ pɛn ńcú yɔ́p pɔ pɔ́Ꞌɔ.

³²Yɛ́su pɔ́p ɡɑŋku pɛ́ ɡʉ tɛ ŋ́kúu yɛcɔ́ zʉꞋ yí pɛ́ fúŋnɛ ŋɡɔ Ŋɡɛ̂tsɛ́mɑnɛ́, ɑ cú mbɔ̌ pɔ́p ŋɡɔ: «Pʉʉ nɑ́ŋ zɑ́Ꞌnɛ, ŋ ɡʉ ńcɛꞋlɛ Sɛ́.»

³³Ńcú pɔ́Ꞌɔ, ɛ́fɑk Pyɛ̂, ŋ́ɡɛ Jɑ̂k pɔ́p Jɑ̂ŋ, pɔ́p pɛpɔ́p ɡʉ. A zɛ nɛzúꞋ pɑꞋ cʉɔꞌ ɡẅɛɛnɛ wɛ́, nɛvú kwɛ́t wɛ́,

³⁴ńcú mbɔ̌ pɔ́p ŋɡɔ: «Tʉ́m yɑ́ɑ pɑꞋɑ ḿbɔ́ ḿmʉk pɔ nǔu ntɛ́ yi ḿbɔ́ m pfú pfúnɛ. Pʉʉ nɑ́ŋ zɑ́Ꞌnɛ, ḿbɑ́ɑ ŋu nɛmɛꞋ mbʉʉ yɛ ńdɛ́.»

³⁵Ńcú pɔ́Ꞌɔ, ńnɑꞋ ŋ́ɡʉ mbi, ḿvu sɛ́ ḿbɔ́ ńcɛꞋlɛ Sɛ́ ńcú ŋɡɔ kɛ ɛ́ lɑɑ ḿbɔ́ ɑ pɑꞋnɛ yɔ ŋkɑ́ kɛpɔŋ ɔɔ, ɑ pɑꞋnɛ,

³⁶ḿbɔ́ ńcú ŋɡɔ: «Pɑɑpɑ́ɑ, Tɑ̌ɑ mɔ, yɛcɔ́ nu kɑ́ tsɑ wú pɔ́. PɑꞋnɛ yɔ ŋɡʉ̈ɔ́Ꞌ yi ɛ́ tɔ́nɛ nǔu mɔ lɑɑ. Lɑ́, kɔɔ ɡɛ pɔ wɑɑ nɛkɔŋtɛ, ɡɛ pɔ wu.»

³⁷Yɛ́su ńcɛꞋlɛ Sɛ́ pɔ́Ꞌɔ, ḿbɛn nzʉʉ nɛjɔ́ŋ ɡɑŋku pɛ́, ńjʉ́ɔ pɔ́p pɔ́ ńdɛ́ lɛ́nɛ. A cú mbɔ̌ Pyɛ̂ ŋɡɔ: «Símɔ, ɔ lɛ́ ɔɔ? Ɔ fɑ́ɑ mbɔɔ kuꞋ nɛnɑ́Ꞌ sʉk fɛlɔ́k mbɑ nǔu tɑꞋ nɛm pɔ́ kɛkʉ̈ɔ́?

³⁸Kɔɔ pʉʉ pɛn ńdɛ́, pʉʉ cɛꞋlɛ Sɛ́ ḿbɔ́k mɛnu-njí nɛkwɑꞋnɛ wʉ́ʉ pʉʉ fɑɑnɛ nu. Tʉ́m-ŋu tɛntɛ tɛꞋ, lɑ́ mbʉʉ pɔ́t pɔ́tnɛ,»

³⁹ḿbɛn ɛ́fú nɛjɔ́ŋ pɔ́p ŋ́ɡʉ cɛꞋlɛ Sɛ́, ńcú pɔ yúu mi ɑ lɑ́Ꞌnɛ ńzɛɛ ńcú.

⁴⁰Ŋ́ɡɛ ḿbɛn ḿbɛn nzʉʉ, ńjʉ́ɔ pɔ́p pɛ́t ńdɛ́ lɛ́nɛ, mbíꞌŋɡɔ ɛ́ kɑ ɡɔ́ ḿbɔ́, mbɔ fɛlɔ́k ɡẅɛɛ wɔ́p tɛꞋ. Pɔ́p jʉɔmɛ, ḿbɔɔ pɛn ńjí nu yí pɔ́p ɡʉ ɛ́sẅíi wɛ́ pɔ́.

⁴¹A ɡʉ, ŋ́ɡɛ ḿbɛn ńtɔ́ nǔu mbɑ́ɑtɛ ŋkɑ́ yɛ́tɑ́t, ńcú mbɔ̌ pɔ́p ŋɡɔ: «Pʉʉ tsuŋ ńdɛ́, ńjẅiitɛ sʉ́Ꞌnɛ. Ɛ́ zɑ́pmɛ. Ŋkɑ́ pɑꞋnɛ, mbɔ ɛ́ kuꞋ. Pɛ́ ɡʉ ɛ́fɛn Mɔ́ɔ-Ŋu mbɔ̌ pʉɔ kɛpɔŋ.

⁴²Pʉʉ lɔ sɛ́ pɛkŋɛ ɡʉ. Ŋu ẅí ɑ fɛnnɛ wɑ́ɑ mbɔ̌ pɔ́p pʉ́ɔlɑ́ ɑ tɔ́nɛ.»

⁴³Yɛ́su pɛ́t ńcú cúnɛ, Jẅidɑ ẅí ɑ wɛcɔ́ tɑꞋ nǔu pʉɔ pɛ́ ntsɔ̌ppɑ́ nɛ́ nɛɡɛ́m tɔ́. LɑꞋ pɔ́ nzʉʉ yɛ́ tɛ ńzɑ́ɑ, ŋ́ɡẅɛɛ mɛníi-ntsɔ pɔ́p pɛsʉʉ, ḿbɔ́ pʉɔ pi pɛtɑ́tndɑ́-pɑnɔŋpɔꞋ pɔ́p pɑkyɛ́Ꞌtɛ nɛpʉ́ʉ-Mɔ̌sɛ̂ɛ, mbɑ pɛkɛ́m-lɑ́Ꞌ túunɛ.

⁴⁴Ɛ́ ɡɔ́ ḿbɔ́, mbɔ ŋɡɑŋmɛnɑŋ kɑ sẅíi wɔ́p pɑꞋ ɑ ɡʉ ŋ́ɡɛ lɑ́ pɔ́p lii Yɛ́su. Yîyɑ́ lii pɔ́ ŋɡɔ: A lɑɑ ńcɛꞋlɛ ŋu, ḿmɑ́ɑ wɛ́, pɔ́p jí ŋɡɔ ɑ jʉ́, ŋ́ɡɔ́ɔ ŋ́ɡẅɛɛ wɛ́, ḿbɛn ńniitɛ ŋ́ɡẅɛɛ wɛ́ sʉ́Ꞌnɛ lɑ́ ńdɔk ŋ́ɡʉ.

⁴⁵Jẅidɑ pɔ́ tɛ ńtɔ́ tɛ ŋ́kúu nɛjɔ́ŋ Yɛ́su, ńcú ŋɡɔ: «Ndɛ, n cɛꞋlɛ,» ŋ́ɡɔ́ɔ ḿmɑ́ɑ wɛ́.

⁴⁶Pɛcɔ́ pʉɔ ɡɔ́ɔ ŋ́kɛ́ ŋ́ɡẅɛɛ Yɛ́su.

⁴⁷Wɛcɔ́ tɑꞋ nǔu pʉɔ pi pɔ́p pɛ́ Yɛ́su kɑ pɔ́nɛ, sɔŋ níi-ntsɔ, ḿmɑꞋ nɛlɔk ŋ́kʉ́ɔꞋ ɡɑŋfɑꞋ-tɑ́tndɑ́-pɑnɔŋpɔꞋ, ɛ́ kẅɛ́ɛtɛ nɛtúutɛ nɛ́, ńzwɑ́.

⁴⁸Yɛ́su píkŋɛ pʉɔ ɛ̂pɑ́ ŋɡɔ: «Pʉʉ ɡɔ́ ńtɔ́ ɡẅɛɛ wɑ́ɑ, ŋ́ɡẅɛɛ mɛníi-ntsɔ pɔ́p pɛsʉʉ pɑꞋ ŋkɑ́ yi pʉʉ ɡẅɛɛ ntsɔ́ŋ pɑꞋɑ ŋɡɔ́ku?

⁴⁹Ŋ kɑ pɔ́ lɛ́Ꞌ tsʉʉ, ḿbɔ́ pɔ tsɛtsɛt pʉʉ zʉꞋ-nɔŋpɔꞋ, ḿbɔ́ ńzíꞋ pʉɔ nɛ́ nu-Sɛ́. Pʉʉ kɛ́ mbɔɔ wɑ́ɑ ɡẅɛɛ. Lɑ́, yɔ nu tɔ́ ńdɔk ŋ́ɡɛ yúu mi pɛ́ kɑ ŋwɑꞋnɛnɛ tsɛt ŋwɑꞋnɛ-Sɛ́ puutɛ.»

⁵⁰Gɑŋku pɛ́ jʉ́ɔ pɑꞋ pɛ́ ɡẅɛɛnɛ wɛ́, ńtɛmtɛ ḿmɛꞋ wɛ́ pɛ́tsʉʉ ŋ́kʉɔ.

⁵¹Tɛ ɛ́ tsʉꞋ pɔ wɛcɔ́ mɔ́ɔsuu, ɑ cʉ́ɔ nzʉʉ yɛ́, mbɔ ɑ lɔk pɔ ndɑꞋ pɔ́-ndẅí ŋ́kɑ́tɛ mbʉʉ yɛ. Pɛ́ ɡẅɛɛ wɛ́.

⁵²A fú mbɔ̌ pɔ́p ɛ́swɛnɛ, ḿmɛꞋ ndẅí yɛ ŋ́kʉɔ kɛ́ mɑꞋ ndẅí.

⁵³Pɔ́p lɔk Yɛ́su ŋ́ɡʉ nɛ́ ntɔ́Ꞌ-nɔŋpɔꞋ wɛ ɡwɛ́. Mbɔ pɛtɑ́tndɑ́-pɑnɔŋpɔꞋ, pɔ́p pɛkɛ́m-lɑ́Ꞌ pɔ́p pɑkyɛ́Ꞌtɛ nɛpʉ́ʉ-Mɔ̌sɛ̂ɛ lɑ́Ꞌ ńtɛmtɛ ńcúꞋlɛ zúꞋu.

⁵⁴Pyɛ̂ cʉ́ɔ nzʉʉ Yɛ́su, lɑ́ ŋ́kɛ́ ḿbɔ́ pɔ ŋɡɑ sɛsɑ, ŋ́ɡʉ yɛ́ tɛ ńdɛɛ ŋ́kúu tɛtɑ́ɑ-nɔŋpɔꞋ wɛ ɡwɛ́, ńnɑ́ŋ yɛ́ sɛ́ mbʉʉ múk ẅi pɑpyɛ́p zʉꞋ-nɔŋpɔꞋ lɑ́Ꞌnɛ ńniitɛ pɔ́p pɛpɔ́p pɔ́ ńzɔ́k.

⁵⁵Pɛtɑ́tndɑ́-pɑnɔŋpɔꞋ pɔ́p pɑsɑ́Ꞌlɑ́Ꞌ tsʉʉ pɔ́ ńdɔɔ nu yí pɛ́ ɡʉ ńzɑ́p tú-Yɛ́su lɑ́ ńdɔk ŋ́ɡɛ pɛ́ jẅí wɛ́, ŋ́kɛ́ ḿbɔɔ ḿbɔ́ ńjʉ́ɔ pɔ́.

⁵⁶Pʉɔ tɛ ńzɑ́ɑ tík mɛnu tú yɛ́ tɛꞋ. Pɛ́ pɛ́ɛtɛ tɛꞋ, ɛ́ kɛ́ mbɔɔ puutɛ.

⁵⁷Pɛcɔ́ pʉɔ lɔ yɔ́p sɛ́, ńtík sɔ́ɔ tú yɛ ńcú ŋɡɔ: «Pɛk kɑ zúꞋ ɑ cú ŋɡɔ:

⁵⁸A ɡʉ ńdɑ́Ꞌ ŋ́kɛm zʉꞋ-nɔŋpɔꞋ yí pʉɔmɛsɔŋ kɑ lɔknɛ mbɔ́ mɔ́p ŋ́kút, ńdɔk lɛ́Ꞌ pɛtɑ́t ŋ́kút wɛ ndɛꞋ, tɛ ɛ́ pɔɔ pɛn ḿbɔ́ yi pʉɔmɛsɔŋ lɔknɛ mbɔ́ mɔ́p ŋ́kút pɔ́.»

⁵⁹Tɛ mbɑ pɔ́Ꞌɔ, tɑꞋ ntsu kɛ́ mbɔɔ tsɛtsɛt pɔ́p cẅɛt.

⁶⁰NɔŋpɔꞋ wɛ ɡwɛ́ lɔ sɛ́ tsɛtsɛt lɑ́Ꞌ, ḿbíkŋɛ Yɛ́su ŋɡɔ: «Ɔ nɑ́Ꞌ nɑꞋnɛ? Ɔ kɑ́ pɔ́ ńzúꞋ mɛnu mí pɛ́ cúnɛ nǔu wu lɑ́ pɔ́ kɛ?»

⁶¹Yɛ́su nɑ́Ꞌ nɑꞋnɛ, mbɔɔ tsɔ́p. NɔŋpɔꞋ wɛ ɡwɛ́ cú mbɔ̌ wɛ́ ŋɡɔ: «Ɔ Nzɑ́Ꞌŋkʉ wí Sɛ́ kɑ kɑꞋnɛ, mɔ́ɔ-Sɛ́?»

⁶²Yɛ́su tsɔ́Ꞌ ŋɡɔ: «Mɔ jʉ́. Pʉʉ ɡʉ ŋ́ɡɛ ńjʉ́ɔ Mɔ́ɔ-Ŋu nɑ́ŋ nǔu ɡúŋ-pɔ́ tʉʉ-Sɛ́ ẅi yɛcɔ́ nu wɛ́ kɑ́ tsɑ. Ḿbɛn ńjʉ́ɔ ɑ fú tsɛt lɑ́ɑ tʉ́nɛ́pú ńtɔ́.»

⁶³NɔŋpɔꞋ wɛ ɡwɛ́ zúꞋ pɔ́Ꞌɔ, ɛ́sɑtɛ mɛndẅí mɛ́, ńcú ŋɡɔ: «Pɛkŋɛ pɛn ńdɔɔ pɔ yɛ́tɛ́ ntɛ́ ńcẅɛ́ɛntɑ́ŋ

⁶⁴Pʉʉ zúꞋ pɑꞋ ɑ kɑŋnɛ kɔꞋ-Sɛ́ pɑꞋɑ, ŋ́kwɑŋɛ yʉ́ʉ ŋɡɔ kʉ̈ɔ́?» Pʉɔ tsʉʉ cú ŋɡɔ: «A pɔ́ pɔ ŋu ẅí ɛ́ lɑɑ ḿbɔ́ pɛ́ jẅí wɛ́ jẅínɛ.»

⁶⁵Pɛcɔ́ pʉɔ zɛ nɛtẅik mɛ́tɛ́ nǔu wɛ́, ŋ́kút shʉ́ wɛ́, ḿbɔ́ ńtswɑ́ɑ wɛ́, ńcú mbɔ̌ wɛ́ ŋɡɔ: «Lɔk nu-ŋɡɛ́mndʉ̈ɔꞋ-Sɛ́ wu ɛ̂wɑ́, ŋ́kyɛꞋ ŋu ẅí ɑ tswɑ́ɑnɛ wú.» Pɑpyɛ́p zʉꞋ pɔ́ ńtswɑ́ɑ mɛtúutɛ́ mɛ́.

⁶⁶Pyɛ̂ nɑ́ŋ tɛtɑ́ɑ, wɛcɔ́ tɑꞋ nǔu pɑŋɡɛ́ pi pɔ́p kɑ pɔ́ ɛ́fɑꞋ ntɔ́Ꞌ-nɔŋpɔꞋ wɛ ɡwɛ́ tɔ́.

⁶⁷Pyɛ̂ pɔ́ ńzɔ́k múk, ɑ tsuŋ ńdíŋɛ wɛ́ tɛ ńcú mbɔ̌ wɛ́ ŋɡɔ: «Mbɑ ɡu ɡúu, pʉʉ Yɛ́su-Nɑ̌zɑlɛt wɑ́ kɑ pɔ́nɛ ńnɛn.»

⁶⁸Pyɛ̂ muŋɛ, ńcú ŋɡɔ: «Mɔ, ŋ kɑ́ jí, m bɛn ŋ́kɛ́ ḿbɔɔ ńzúꞋ yúu mi ɔ lɔɔ nɛcú pɔ́,» ɛ́fú tɛtɑ́ɑ, ŋ́ɡʉ nɛ́ ntsuŋkɑ́Ꞌ, [mɔ̂ŋkʉ̈ɔ́Ꞌ tɔ́ŋ.]

⁶⁹Mɑŋɡɛ́ ɛ̂wɑ́ ɡɛ ḿbɛn ńjʉ́ɔ wɛ́, ńzɛ nɛsẅíi pʉɔ pi pɔ́p pɛpɔ́p ḿbɔ́nɛ zúꞋu ŋɡɔ: «Ŋu wɑ́, ɑ wɛcɔ́ ŋu wɔp.»

⁷⁰Pyɛ̂ pɛn ḿmuŋɛ muŋɛ́nɛ. Pɛ́ nɑ́Ꞌ ńnɑ́ŋ, pʉɔ pi pɔ́p ḿbɔ́nɛ zúꞋu, pɛn ńcú yɔ́p mbɔ̌ Pyɛ̂ ŋɡɔ: «Ɛ́ kɑ́ pɔ́ nu lɔɔnɛ lɔɔnɛ́nɛ pɔ́, ɔ wɛcɔ́ ŋu wɔp. Ɔ zɛɛ ḿbɔ́ yú ŋu-Ŋɡɑlilɛɛ.»

⁷¹Pyɛ̂ cú tɛ ŋ́kɑɑ Sɛ́ ŋɡɔ: «Sɛ́ jẅí wɑ́ɑ, zɑŋ yɑ́ɑ, ŋ kɑ́ pɔ́ ńjí ŋu ẅí pʉʉ kẅíinɛ lík yɛ́ pɔ́.»

⁷²Lɑ́ mɔ̂ŋkʉ̈ɔ́Ꞌ ɡɔ́ɔ ḿbɛn ńtɔ́ŋ, ɛ́ lɔk ḿbɔ́ ŋkɑ́ yɛ́pɑ́. Pyɛ̂ ɡɔ́ɔ ŋ́kẅíitɛ pɑꞋ Yɛ́su lɑ́Ꞌnɛ ńcú mbɔ̌ wɛ́ ŋɡɔ: «Mɔ̂ŋkʉ̈ɔ́Ꞌ ɡʉ ŋ́ɡɛ ŋ́ɡɔ ɑ tɔ́ŋ tɔ́ŋnɛ ŋkɑ́ yɛ́pɑ́, mbɔ ɔ muŋɛ wɑ́ɑ ŋkɑ́ yɛ́tɑ́t.» Pyɛ̂ ɡɔ́ɔ ɛ́fú tɛtɑ́ɑ ńcẅɛt, ńdɑɑ.