Read Ngomba Mɑ́lɛ́kúshi 15 Bible Online

Mɑ́lɛ́kúshi 15 - Ngomba bible

Mɑ́lɛ́kúshi 15

¹Njí ɡɛ ḿbɔ́ ŋ́kiɛ, pɛtɑ́tndɑ́-pɑnɔŋpɔꞋ, pɔ́p pɛkɛ́m mbɑ pɑkyɛ́Ꞌtɛ nɛpʉ́ʉ-Mɔ̌sɛ̂ɛ, pɔ́p pɑsɑ́Ꞌlɑ́Ꞌ pɛtsʉʉ mʉ́ʉ mbɑꞋmbɑꞋɑ́, ŋ́ɡɛ cúꞋlɛ, ŋ́kút Yɛ́su, ńdɔk wɛ́ ŋ́ɡʉ ŋ́ɡɑ́ mbɔ̌ Pilɑtɔ.

²Pilɑtɔ píkŋɛ wɛ́ ŋɡɔ: «Ɔ fɔɔ-pɑyúdɑ?» Yɛ́su tsɔ́Ꞌ mbɔ̌ wɛ́ ŋɡɔ: «Ɔ cú pɔ́Ꞌɔ.»

³Pɛtɑ́tndɑ́-pɑnɔŋpɔꞋ pɔ́ ńtík mɛnu tú-Yɛ́su tɛ ɛ́ zɑ́ɑ zɑ́ɑnɛ.

⁴Pilɑtɔ pɛn ḿbíkŋɛ wɛ́ ŋɡɔ: «Ɔ nɑꞋ nɑꞋnɛ?» Ɔ kɑ́ pɔ́ ńzúꞋ ndɛn mɛnu mí pɛ́ cúnɛ nǔu ɡu pɔ́ kɛ?

⁵Yɛ́su pɔɔ tsɔ́p, ɛ́ kʉꞋnɛ Pilɑtɔ tɛꞋ.

⁶Ɛ́ kɑ pɔ́ ḿbɔ́ lɛ́Ꞌ ndínɑ-Pɑ́skɑ, Pilɑtɔ tsɔ́Ꞌ ŋɡɑŋtsɑ́ŋ ẅi lɑ́Ꞌ píkŋɛnɛ wɛ́.

⁷Ɛ́ ɡɔ́ ḿbɔ́ ŋkɑ́ yîyɑ́, wɛcɔ́ ŋu pɔ́ ndɑ́tsɑ́ŋ, pɛ́ fúŋ wɛ́ ŋɡɔ Pɑnɛpɑ́ɑshi, pɔ́p pɛcɔ́ pʉɔ pɛ́ pɔ́ zúꞋu, mbɔ pɔ́p pɛpɔ́p kɑ mɑꞋ vɑꞋ tʉ́sɔŋ, tɛ ńjẅí ŋu.

⁸Lɑ́Ꞌ ɡʉ ńjʉ́ɔ Pilɑtɔ, ńzɛ nɛpíkŋɛ wɛ́ ŋɡɔ ɑ ɡɛ pɑ́Ꞌ ɑ kɑ pɔ́ ńtswɛ́ ŋ́ɡɛ ŋkɑ́-ndínɑ.

⁹Pilɑtɔ tsɔ́Ꞌ mbɔ̌ pɔ́p ŋɡɔ: «Pʉʉ kɔŋ ŋɡɔ n nɑ́ fɔɔ-pɑyúdɑ?»

¹⁰A kɑ pɔ́ ńcú pɔ́Ꞌɔ, mbíꞌŋɡɔ, ɑ kɑ pɔ́ ńjí ŋɡɔ pɛtɑ́tndɑ́-pɑnɔŋpɔꞋ kɑ kɔꞋ pɔ lɔ́ŋ nǔu Yɛ́su lɑ́ ńdɔk wɛ́ ńtɔ́ ɛ́fɛn mbɔ̌ wɛ́.

¹¹Pɛtɑ́tndɑ́-pɑnɔŋpɔꞋ zúꞋ ɑ cú pɔ́Ꞌɔ, pɔ́p tsʉ́ʉnɛ lɑ́Ꞌ ŋɡɔ pɔ́p píkŋɛ ŋɡɔ Pilɑtɔ cẅɛɛtɛ pɔ Pɑnɛpɑ́ɑshi ŋ́ɡɑ́ mbɔ̌ pɔ́p.

¹²Pilɑtɔ pɛn ḿbíkŋɛ lɑ́Ꞌ ŋɡɔ: «Tɛ pʉʉ pɑ́Ꞌɑ ŋ́kɔŋ ŋɡɔ ŋ ɡɛ pɔ ŋɡɔ́ku nǔu ŋu ẅí pʉʉ fúŋnɛ ŋɡɔ fɔɔ-pɑyúdɑ ɔɔ?»

¹³Lɑ́Ꞌ pɛn ńtɛmtɛ ŋ́ɡɑ́ ɡwɑ́t, ńcú ŋɡɔ: «Kẅii wɛ́ nǔu tʉ́ mbɑ́ŋtɛ pɑ́ŋtɛ́nɛ.»

¹⁴Pilɑtɔ píkŋɛ wɔ́p ŋɡɔ: «KwɑꞋ nu kɛpɔŋ yí ɑ ɡɛnɛ ɛ́ kʉ̈ɔ́?» Lɑ́, lɑ́Ꞌ pɛn ŋ́kẅiꞋ ŋ́ɡɑ́ ɡwɑ́t ŋɡɔ: «Kɛ́ ŋ́kẅii wɛ́ kẅiinɛ!»

¹⁵Pilɑtɔ jʉ́ɔ ŋɡɔ ɑ ɡʉ ŋ́ɡɛ yúu mi ɛ́ pɔŋnɛ lɑ́Ꞌ, ńtsɔ́Ꞌ Pɑnɛpɑ́ɑshi ndɑ́tsɑ́ŋ ńnɑ́, ḿbɛn ŋ́ɡɛ pɛ́ lɔk ŋɡwɑɑ ńtswɑ́ɑ Yɛ́su. A ɡɑ́ wɛ́ ŋɡɔ pɛ́ lɔk wɛ́ ŋ́ɡʉ ŋ́kẅii nǔu tʉ́ mbɑ́ŋtɛ pɑ́ŋtɛ́nɛ.

¹⁶Pɑlʉ̈ɔꞋntsɔ lɔk Yɛ́su ŋ́ɡʉ ŋ́kúu zɑ́n, ńcúꞋlɛ pɛcɔ́ ɡɑ́ŋku pɔ́p pɛ́tsʉʉ.

¹⁷Pɔ́p mɑꞋ ndẅí-nɛfɔɔ nǔu Yɛ́su, ḿbɛn ńdɔk mɛnzɔ́ŋ ḿbɑ́Ꞌ cɔꞋ, ɛ́sɔ tú yɛ́ ŋɡɔ ɑ fɔɔ,

¹⁸ŋ́ɡɔ́ɔ ŋ́kɛ́ ńzɛ nɛcɛꞋlɛ wɛ́, ḿbɔ́ ńcú ŋɡɔ: «Pɛ́ ɡɛ́mtɛ fɔɔ-pɑyúdɑ!»

¹⁹Ḿbɔ́ ńdɔk kɛkɑꞋ ńtswɑ́ɑ tú yɛ́, ḿbɔ́ ńtẅik mɛ́tɛ́ nǔu wɛ́, pɛcɔ́ pʉɔ ɡɔ́ ḿbɔ́ ńtɔ́ ŋ́kẅíꞋlɛ sɛ́, pɛcɔ́ pɔ́ ŋ́ŋɔ́Ꞌnɛ mbi yɛ́, ŋ́ɡɛ́mtɛ wɛ́.

²⁰Pɔ́p zɔɔtɛ wɛ́ tɛ ŋ́kɑɑ, ɛ́fú nǔu wɛ́ ɛ́sɔt ndẅí-nɛfɔɔ, ḿmɑꞋ kwɑꞋ mɛ́ mɛndẅí nǔu wɛ́, ńdɔk wɛ́ ɛ́fú zúꞋu ńcẅɛt ŋ́ɡʉ. Nɛɡʉ ŋ́kẅii wɛ́ nǔu tʉ́ mbɑ́ŋtɛ pɑ́ŋtɛ́nɛ.

²¹Pɔ́p kɑ pɔ́ ńdɔk wɛ́ ŋ́ɡʉ, ḿbuutɛ wɛcɔ́ ŋu, ɑ fúnɛ nɛ́ tɛt, lík yɛ́ pɔ́ ŋɡɔ Símɔ, ɑ pɔ́ ŋu ẅí ɑ kɑ fúnɛ tʉ́sɔŋ-Silɛ̂nɛ ńtɔ́, ḿbɔ́ tɑ̌ɑ pɛ́ Lɑksɑ́ndɑ pɔ́p Lẅifẅis. Pɑlʉ̈ɔꞋntsɔ ɡẅɛɛ wɛ́, ńdɔk tʉʉ ɛ́fyɛ́t wɛ́ ŋɡɔ ɑ tíi tʉ́ mbɑ́ŋtɛ pɑ́ŋtɛ́nɛ-Yɛ́su.

²²Pɔ́p lɔk Yɛ́su ŋ́ɡʉ nɛ́ zʉꞋ yí pɛ́ fúŋnɛ ŋɡɔ ŋɡɔlŋɡɔ́tɑ, ńdɔk ńcú nǔu sẅíŋɛ-pɑyúdɑ ŋɡɔ: «ZʉꞋ kɑ́ɑtú.»

²³Pɔ́p kúu zúꞋu, ńdɔɔ nɛɡɑ́ mɛluꞋ mí pɛ́ lɔknɛ yɛcɔ́ fu yi pɛ́ fúŋnɛ ŋɡɔ mîi ɛ́fɛntɛ mbɔ̌ wɛ́, ɑ lʉꞋ nɛnɔ́.

²⁴Pɔ́p kẅii wɛ́ nǔu tʉ́ mbɑ́ŋtɛ pɑ́ŋtɛ́nɛ, ḿbɛ́ɛ mɛndẅí mɛ́, ḿmɑꞋ ńtíitɛ ńdɔk ŋ́ɡɑptɛ ŋ́ɡɑ́ yɛ́ mbɑ wɔ̌ lɑ́.

²⁵Pɔ́p kɑ pɔ́ ŋ́kẅii wɛ́ nǔu tʉ́ mbɑ́ŋtɛ pɑ́ŋtɛ́nɛ pɔ́Ꞌɔ, nǔu nɛm yɛ́nɛ́pfuꞋú mbɑꞋmbɑꞋɑ́.

²⁶Pɛ́ kɑ ŋwɑꞋnɛ yúu mi ɑ fɑɑnɛ́nɛ, ŋ́kiɛtnɛ nǔu tʉ́ mbɑ́ŋtɛ pɑ́ŋtɛ́nɛ. Ɛ́ cú ŋɡɔ fɔɔ-pɑyúdɑ.

²⁷Pɔ́p kɑ pɛn ŋ́kẅii pɛcɔ́ pɛtsɔ́ŋ pɛ́pɑ́ nǔu mɛtʉ́ mbɑ́ŋtɛ pɑ́ŋtɛ́nɛ. Tɑ́Ꞌ pɔ́ nǔu ɡúŋ-pɔ́-Yɛ́su yi tʉʉ, wɛcɔ́ pɔ́ nǔu ɡúŋ-pɔ́ ŋkẅɛpmɛ.

²⁸Ɛ́ lɔk ḿbuutɛ pɑꞋ ŋwɑꞋnɛ-Sɛ́ kɑ cúnɛ ŋɡɔ: «Pɛ́ ɛ́sɑ́ŋ wɛ́ tsɛtsɛt pɛfút.»

²⁹Pɑlɛɛ sɛ̂ndúŋ kɑ pɔ́ ńnẅɛtnɛ wɛ́ ɡúu, ḿmɑꞋ lʉ́m ḿbɔ́ ńcú ŋɡɔ: «Gu ẅí ɔ ŋ́kɛm zʉꞋ-nɔŋpɔꞋ ńdɔk lɛ́Ꞌ lɑ́Ꞌ pɛ́tɑ́t ŋ́kút,

³⁰kwɑꞋ ɡu zɛɛ cẅɛ́ɛ tú yú, ɛ́fú nǔu tʉ́ mbɑ́ŋtɛ pɑ́ŋtɛ́nɛ ḿpfúu lɑ́.»

³¹Pɛtɑ́tndɑ́-pɑnɔŋpɔꞋ pɔ́p pɑkyɛ́Ꞌtɛ nɛpʉ́ʉ-Mɔ̌sɛ̂ɛ, pɔ́ ńzɔɔtɛ Yɛ́su ɡúu, ɛ́shɔtnɛ ńcú tsɛtsɛt pɔ́p ŋɡɔ: «A kɑ ɡɛ pɛcɔ́ pʉɔ luk, lɑ́ ɑ kɑ́ kuꞋ nɛcẅɛ́ɛ yɛ́ tú mbɔ̌ nɛvú pɔ́.

³²Nzɑ́Ꞌŋkʉ wí Sɛ́ kɑ kɑꞋnɛ, fɔɔ-pɑíslɑyɛ̂l, fú nǔu tʉ́ mbɑ́ŋtɛ pɑ́ŋtɛ́nɛ ŋkɔ̂ɔnɛ ḿpfúu, pɛk jʉ́ɔ, ńzɑ́p tʉ́m yʉ́k nǔu wɛ́.» Pʉɔ pínɛ pɛ́ kɑ tɛmtɛ́nɛ wɔ́p pɛpɔ́p ŋ́kẅii nǔu mɛtʉ́ mbɑ́ŋtɛ pɑ́ŋtɛ́nɛ kɑ pɛn ḿbɔ́ ńzɔɔtɛ yɔ́p wɛ́ zɔɔtɛnɛ.

³³Tẅɛp kɑ pɔ́ tɛ ŋ́kuꞋ, zʉꞋ tsʉʉ tsɛt ŋɡɔŋ puu sʉ́ʉ, tɛ ńdɑ́Ꞌ ŋ́kúu nǔu nɛm yɛ́tɑ́t mbɔ́tnjí.

³⁴Ɛ́ pɔ́ nǔu nɛm yɛ́tɑ́t ɛ̂yɑ́, Yɛ́su kíi nɛ́ ŋɡi tɛnnɛ ńcú ŋɡɔ: «Ɛlɔyí, Ɛlɔyí lɑmɑ sɑbɑtɑnîi,» ńdɔk ńcú ŋɡɔ: «Sɛ́ wɑɑ, Sɛ́ wɑɑ, ɔ mɛꞋ wɑ́ɑ mɛlɑ́Ꞌ kʉ̈ɔ́?»

³⁵Pɛcɔ́ pʉɔ pi pɔ́p ḿbɔ́nɛ zúꞋu, zúꞋ ńcú ŋɡɔ: A pʉ́ɔlɑ́ ḿbɔ́ ɛ́fúŋ Ɛlíyɑlɑ́!

³⁶Wɛcɔ́ tɑ́Ꞌ ŋu nǔu pɔ́p kʉ̈ɔ́ ŋ́ɡʉ ńtsɛp ŋkutsɑ́ɑ nǔu cícɔ́k mɛluꞋ, ɛ́sɔ́klɛ nǔu tú-kɛkɑꞋ, ńcɑklɛ ńníꞋ ntsu-Yɛ́su, ŋɡɔ ɑ fíitɛ, ḿbɔ́ ńcú ŋɡɔ: «Pʉʉ tsʉ́Ꞌ pɛkŋɛ jʉ́ɔ kɛ Ɛlíyɑ ɡʉ ńtɔ́, ɛ́fú nǔu tʉ́ mbɑ́ŋtɛ pɑ́ŋtɛ́nɛ ŋ́kɔk wɛ́ ɔɔ.»

³⁷Lɑ́, Yɛ́su kíi nɛ́ ŋɡi tɛnnɛ, ńcʉ́ɔ.

³⁸Tʉ́m-Yɛ́su cʉ́ɔ pɔ́Ꞌɔ, ndẅí yi pɛ́ kɑ lɔknɛ ŋ́kʉŋ yɛcɔ́ zʉꞋ tsɛt ndɑ́ yi ɛ́ zʉꞋ-nɔŋpɔꞋ, fú tʉ́ ɛ́sɑ́ɑnɛ tɛ ŋ́kúu sɛ́.

³⁹Tɑ́tndɑ́-pɑlʉ̈ɔ́Ꞌ ntsɔ ẅi ɑ kɑ tʉ́ʉnɛ ḿbɔ́ ńdíŋɛ tʉ́ mbɑ́ŋtɛ pɑ́ŋtɛ́nɛ-Yɛ́su, jʉ́ɔ ntɛ́ yi ɑ lɔknɛ ńcʉ́ɔ, ńcú ŋɡɔ: «Ŋu wɔ ḿbɔ́ kwɑꞋ mɔ́ɔ-Sɛ́.»

⁴⁰Pɛcɔ́ pɑŋɡɛ́ kɑ tʉ́ʉ yɔ́p pɔ ŋɡɑ sɛsɑ ḿbɔ́ ńdíŋɛ. Mɑlíyɑ-Mɑkdɑlɑ pɔ́p Sɑlɔmɛ́ɛ, ŋ́ɡɛ Mɑlíyɑ mɑ́ pɛ́ Jɔsɛ́ɛ ḿbɛn ḿbɔ́ wɛ Jɑ̂ŋ wɛ mbɑ́ɑtɛ pɔ́ tsɛtsɛt pɔ́p,

⁴¹ḿbɔ́ pɑŋɡɛ́ pi pɔ́p kɑ cʉ́ɔnɛ nzʉʉ Yɛ́su, ŋkɑ́ yi ɑ kɑ pɔ́nɛ Ŋɡɑlilɛɛ, ńnɛn ńcẅɛ́lɛ́ wɛ́. Pɛcɔ́ pɑŋɡɛ́ pɔ́ pi pɔ́p pɛ́ Yɛ́su pɛ́tsʉʉ kɑ tɛmtɛ́nɛ ŋ́kɔ́Ꞌ tɛ ŋ́kúu Yɛlúsɑlɛm.

⁴²Ɛ́ ɡɛ ḿbɔ́ ntsuŋkẅɛ́Ꞌ, wɛcɔ́ ndʉ́m tɔ́. Lík yɛ́ pɔ́ ŋɡɔ Yɔsɛ̂p. A pɔ́ ŋu-Alimɑtɛ̂ɛ. A kɑ pɔ́ ŋu tsɛtsɛt pɑsɑ́Ꞌlɑ́Ꞌ, ḿbɔ́ ŋu pɛ́ ɡɛ mɛkuꞋ mɛ́ tɛꞋ. A nɑ́ŋ yɛ́ ḿbɔ́ ḿbyɛ́p ŋɡɔŋ-nɛfɔɔ-Sɛ́. Pɑ́Ꞌ ɛ́ kɑ ɡɔ́ ḿbɔ́ lɛ́Ꞌ-nɛniitɛ mbʉʉ lɑ́ lɛ́Ꞌnji-pɑyúdɑ zɛ mbɔ́tnjí ɛ̂wɑ́ lɑ́, Yɔsɛ̂p ɛ̂wɑ́ sʉk, ŋ́ɡʉ ńjʉ́ɔ Pilɑtɔ, ńdɔ́ɔ pfú-Yɛ́su nɛɡʉ ńdẅɛꞋ.

⁴³

⁴⁴Pilɑtɔ zúꞋ ŋɡɔ Yɛ́su ńdɑ́Ꞌmɔ́ ḿpfú, ḿmɑɑ tɛꞋ, ɛ́fúŋ tɑ́tndɑ́-pɑlʉ̈ɔ́Ꞌntsɔ, ḿbíkŋɛ wɛ́ ŋɡɔ ɛ́ nɛ́nẅín, mbɔ Yɛ́su pfú ɔɔ?

⁴⁵A sẅíi wɛ́ ŋɡɔ ɑ ńdɑ́Ꞌmɔ́ ḿpfú. Pilɑtɔ ɡɔ́ɔ ŋ́kɛ́ ḿbɛ́m ŋɡɔ Yɔsɛ̂p ɡʉ ŋ́kíɛꞋ pfú-Yɛ́su.

⁴⁶Yɔsɛ̂p ɡʉ ńzúu pɔ́-ndẅi, ŋ́ɡʉ nǔu tʉ́ mbɑ́ŋtɛ pɑ́ŋtɛ́nɛ, ŋ́kɔk pfú-Yɛ́su ńdɔk ndẅí ɛ̂yɑ́ ŋ́kɑ́tɛ wɛ́, ńtíi ńdɔk ŋ́ɡʉ, ńníꞋ tsɛt nɛshi ní pɛ́ kɑ sʉ́Ꞌnɛ nǔu mɑ́mɑ́ ŋɡɔꞋ, ḿbɛn ńtsʉ́ʉ yɛcɔ́ ŋɡɔꞋ ńdɔk ńjʉ́ɔꞋ ntsu-nɛshi ɛ̂nɑ́.

⁴⁷A kɑ ɡɔ́ ńníꞋ pfú-Yɛ́su zúꞋu, Mɑlíyɑ Mɑkdɑlɑ, pɔ́p Mɑlíyɑ mɑ́ pɛ́ Jɔsɛ́ɛ pɔ́ ńjʉ́ɔ.