Read Ngomba Mɑ́lɛ́kúshi 16 Bible Online

Mɑ́lɛ́kúshi 16 - Ngomba bible

Mɑ́lɛ́kúshi 16

¹Lɛ́Ꞌ-nji-pɑyúdɑ ɛ̂yɑ́ ɡɛ ńdɛɛ, Mɑlíyɑ-Mɑkdɑlɑ pɔ́p Sɑlɔmɛ́ɛ, ŋ́ɡɛ Mɑlíyɑ mɑ́ pɛ́ Jɑ̂k, ɡʉ ńzúu[18] lɑmɛ́ndɑɑ nɛlɔk ńzɔ́Ꞌ pfú-Yɛ́su.

²Njí kiɛ, tɛ mɔ́nɛm pɔ́ ɛ́sɑ́Ꞌ, pɔ́p mʉ́ʉ ŋ́ɡʉ nɛ́ zʉꞋ-nɛshi. Ɛ́ ḿbɔ́ nduŋmbi lɛ́Ꞌ nǔu ŋɡɑplɑ́Ꞌ.

³Pɔ́p kɑ pɔ́ ńnɛn, ḿbɔ́ ḿbíkŋɛ tsɛtsɛt pɔ́p ŋɡɔ: «Tɛ wɔ̌ ɡʉ ŋ́kúu zúꞋu ŋ́kiimɛ mɑ́mɑ́ ŋɡɔꞋ ntsu-nɛshi ŋ́ɡɑ́ mbɔ̌ pɔ́p ɔɔ?»

⁴Ŋ́ɡʉ tɛ ŋ́kúu zúꞋu, ńjʉ́ɔ, mbɔ pɛ́ lɑ́Ꞌ ɛ́fú ntsu-nɛshi ŋ́kiimɛ mɑ́mɑ́ ŋɡɔꞋ ɛ̂yɑ́.

⁵Pɔ́p jɛ́Ꞌ ŋ́kúu tsɛt nɛshi, ńjʉ́ɔ wɛcɔ́ mɔ́ɔsuu nɑ́ŋ nǔu ɡúŋ-pɔ́ tʉʉ, ḿmɑꞋ fúfú ndẅí. Pɔ́p jʉ́ɔ wɛ́ ḿbɔ́k tɛꞋ.

⁶Lɑ́, ɑ cú mbɔ̌ pɔ́p ŋɡɔ: «Kɔɔ pʉʉ pɔ́k, pʉʉ lɔɔ Yɛ́su mɔ́ɔ-Nɑ̌zɑlɛt ẅí pɛ́ kɑ kẅiinɛ wɛ́ nǔu tʉ́ mbɑ́ŋtɛ pɑ́ŋtɛ́nɛ lɑ́? A zẅíimɛ nǔu nɛvú, ɑ kɑ́ pɛ́t zɑ́Ꞌnɛ pɔ́. Pʉʉ jʉ́ɔ, yɔ zʉꞋ yí pɛ́ kɑ nɔŋnɛ pfú yɛ́ zúꞋu.

⁷Pʉʉ ɡʉ ŋkɔ̂ɔnɛ ɛ́sẅíi ɡɑŋku Yɛ́su mbɑ mbɔ̌ Pyɛ̂ ŋɡɔ ɑ piitɛ Ŋɡɑlilɛɛ, ḿbɔ́ ńzẅíꞋlɛ wʉ́ʉ pɑꞋ ɑ kɑ sẅíinɛ wʉ́ʉ ŋɡɔ pʉʉ ɡʉ ńdɑ́Ꞌ ńjʉ́ɔ wɛ́ zúꞋu lɑ́.»

⁸Pɑŋɡɛ́ ɛ̂pɑ́ ɡɔ́ɔ ḿbuu ḿbɔ́k pɔ́knɛ, ńcẅɛt ŋ́kʉɔ, ńtɛplɛ tɛ ḿbɔɔ pɛn ŋ́kuꞋ nɛcú nu mbɔ̌ ŋu pɔ́, mbɔ cʉɔꞌ ɡẅɛɛ wɔ́p. [

⁹[19]Yɛ́su kɑ zẅíimɛ nǔu nɛvú, mbɑꞋmbɑꞋɑ́ nduŋmbi lɛ́Ꞌ nǔu ŋɡɑplɑ́Ꞌ, ḿbiitɛ ńnyɛt mbʉʉ yɛ mbɔ̌ Mɑlíyɑ-Mɑkdɑlɑ wɑ́ ẅi mɛzẅikŋɛ kɛpɔŋ sɑɑmbɑ́ kɑ ɡẅɛɛnɛ wɛ́ ḿbɔ́ ḿbúunɛ wɛ́ lɑ́; Yɛ́su cẅɛ́ɛ wɛ́ mbɔ̌ pɔ́p lɑ́.

¹⁰A ɡɔ́ɔ ŋ́kɛ́ ŋ́ɡʉ ḿbɛ́ɛtɛ ɛ́sẅíi ɡɑŋku-Yɛ́su. Pɔ́p ḿbɔ́ tsɛt nɛmʉk, ḿbɔ́ ŋ́kíi.

¹¹Pɔ́p zúꞋ ŋɡɔ ɑ zẅíimɛ nǔu nɛvú tɛ Mɑlíyɑ jʉ́ɔ wɛ́ ɑ pɔ́ pɔ ntʉʉ, pɔ́p pɔɔ pɛ́m.

¹²A kɑ ɡɛ pɔ́Ꞌɔ, ḿbɛn ńnyɛt mbʉʉ yɛ nǔu yɛcɔ́ ntɛ́, mbɔ̌ pɛcɔ́ ɡɑŋku pɛ́ pɛ́pɑ́, pɔ́p pɔ́ sɛ̂ndúŋ ḿbɔ́ ŋ́ɡʉ nɛ́ tsɛt lɑ́Ꞌ.

¹³Pɔ́p jʉ́ɔ wɛ́ pɔ́Ꞌɔ, ḿbɛn nzʉʉ ɛ́sẅíi pɛcɔ́ pʉɔ, pɔ́p pɛn ŋ́kɛ́ mbɔɔ yɔ́p pɛ́m.

¹⁴Ŋ́ɡɔ́ ńdẅiklɛYɛ́su ɡɛ ḿbɛn ńnyɛt mbʉʉ yɛ mbɔ̌ ɡɑŋku pɛ́ ntsɔ̌pmɔꞋ nɛ́ nɛɡɛ́m pɛ́tsʉʉ. Pɔ́p pɔ́ ndɑ́ ŋ́kwɛ́t yúu. A kɑkŋɛ wɔ́p nǔu pɑ́Ꞌ pɔ́p lɑ́Ꞌ mbɔɔ pɛ́m, ḿbɛn ńdʉꞋ mbɑ nɛpɛ́m nu ntsu-pʉɔ pí ɑ zẅíimɛ́nɛ ńnyɛt mbʉʉ yɛ mbɔ̌ pɔ́p pɔ́.

¹⁵Ŋ́ɡɔ́ɔ ŋ́kɛ́ ńcú mbɔ̌ pɔ́p ŋɡɔ: «Pʉʉ ɡʉ zʉꞋ tsʉʉ ndǔ mbí, ńcẅi Ŋkʉʉ Sʉ́Ꞌnɛ mbɔ̌ mbɑ wɛ́t ŋumɛsɔŋ lɑ́ kɛ́ vuꞋ wɛcɔ́.

¹⁶Ŋu ẅí ɑ pɛ́mnɛ, pɛ́ nuꞋ wɛ́ ŋki, Sɛ́ ɡɛ ɑ luk. Ŋu ẅí ɑ lʉꞋnɛ nɛpɛ́m, ɑ ɡʉ ńdɑ́Ꞌ ḿvu ntsɑŋ.

¹⁷Pʉɔ pí pɔ́p pɛ́mnɛ nu yɑ́ɑ, ɡʉ ńdɑ́Ꞌ ŋ́ɡɛ mɛŋkʉꞋnɛ mɛnu: pɔ́p ɡʉ ńdɑ́Ꞌ ńdɔk lík yɑ́ɑ ńzuŋ mɛzẅikŋɛ kɛpɔŋ mi ɛ́ púunɛ́nɛ pʉɔ, pɔ́p ɡʉ ńdɑ́Ꞌ ńcú mɛsẅíŋɛ mi pɔ́p ŋkɑɑ zíꞋ,

¹⁸pɔ́p ńdɑ́Ꞌ ńdɔk mbɔ́ mɔ́p ŋ́ɡẅɛɛ nɔ́, ḿbɔ́ yi pɔ́p lɑɑ ńjʉ́ mɛcɔp, yɛcɔ́ yúu pɔɔ wɔ́p ɡɛ, pɔ́p ɡʉ ńdɑ́Ꞌ ńzɑ́p mbɔ́ mɔ́p nǔu ɡɑŋɡɔɔ pɔ́p fíitɛ.»

¹⁹Tsɑpʉɔ Yɛ́su kɑ cú mbɔ̌ pɔ́p tɛ ḿbɔ́tnɛ ńnɑ́ŋ, Sɛ́ ŋɑ́Ꞌ wɛ́ ńdɔk ŋ́kɔ́Ꞌ nɛ́ tʉ́nɛ́pú. A nɑ́ŋ nǔu ɡúŋ-pɔ́ yɛ́ yi tʉʉ.

²⁰Gɑŋku-Yɛ́su fú zúꞋu, ŋ́ɡʉ, ńzɛ nɛsẅíi nu-Sɛ́ zʉꞋ tsʉʉ. Tsɑpʉɔ pɔ́ ńdíŋɛ wɔ́p, ńcẅɛ́lɛ́ wɔ́p, ńtɔ́ɔtɛ wɔ́p, pɔ́p ɡɛ mɛŋkʉꞋnɛ mɛnu, mi ɛ́ nyɛtnɛ ŋɡɔ sẅiŋɛ yɔ́p fú mbɔ̌ Sɛ́.]