Read Ngomba Mɑ́lɛ́kúshi 2 Bible Online

Mɑ́lɛ́kúshi 2 - Ngomba bible

Mɑ́lɛ́kúshi 2

¹Ɛ́ lɛɛ mɛcɔ́ mɛlɛ́Ꞌ, Yɛ́su pɛn ḿbɛn Kɑpɛɛnɑwûm. Pɛ́ zúꞋ ŋɡɔ ɑ ndɑ́,

²lɑ́Ꞌ pûu ńcúꞋlɛ zúꞋu tɛ nɛtík ku pɔɔ pɛn ḿbɔ́ ɡú pɔ́, tɛ mbɑ ntsundɑ́, ɑ zɛ nɛsẅíi wɔ́p nɛ́ nu-Sɛ́.

³Pɛcɔ́ pʉɔ lɔk ŋɡɑŋkẅíꞋlɛ ńtɔ́ ńjʉ́ɔ wɛ́, mbɔ mbɛ́ɛnɛ yɛ́nɛ́kwɑ tsɛtsɛt pɔ́p lʉ̈ɔ́ŋɛ wɛ́.

⁴Lɑ́Ꞌ pɛn ńzɑ́ɑ zɑ́ɑnɛ, tɛ pɔ́p pɔɔ kuꞋ nɛnyɛt wɛ́ mbɔ̌ Yɛ́su pɔ́, ńtsɔ́Ꞌ zʉꞋ ndǔ tú-ndɑ́, ńdʉŋtɛ zʉꞋ yi Yɛ́su zúꞋu, ɛ́fú zúꞋu ŋ́kɔk ŋɡɔɔ wɔp nɛ́ pɑ́ŋtɛ wɛ ńtík mbi yɛ́.

⁵A jʉ́ɔ ntɛ́ yi mbɛ́ɛnɛ ɛ̂yɑ́ lɔknɛ ńzɑ́p tʉ́m nǔu wɛ́, ńcú mbɔ̌ ŋɡɑŋkẅíꞋlɛ ŋɡɔ: «Mɔ́ɔ wɑɑ, pɛ́ likŋɛ mɛnu kɛpɔŋ mú ŋ́ɡɑ́ mbɔ̌ wu.»

⁶Pɛcɔ́ pɑkyɛ́Ꞌtɛ nɛpʉ́ʉ-Mɔ̌sɛ̂ɛ nɑ́ŋ zúꞋu ńzúꞋ, ŋ́kwɑŋɛ tú pɔ́p ŋɡɔ:

⁷«ŋu wɔ sẅiŋɛ ŋɡɔ́ku lɑ́ɑ! A zɔɔtɛ Sɛ́. Sɛ́ zɛ́nɛjʉ́ kuꞋnɛ nɛlikŋɛ mɛnu kɛpɔŋ ŋu.»

⁸Yɛ́su ɡɔ́ɔ ńjí yúu mi pɔ́p sɛ́ ŋ́kwɑŋɛ, ḿbíkŋɛ wɔ́p ŋɡɔ: «Pʉʉ ɡɛ pɑꞋɑ ŋ́ɡẅɛɛ yɑ́ ntɛ́ kwɑŋɛ tú pʉʉ?

⁹Pʉʉ jʉ́ɔ yʉ́ʉ ŋɡɔ ɛ́ zɑŋɛ pɔ nɛcú mbɔ̌ ŋɡɑŋkẅíꞋlɛ ŋɡɔ pɛ́ likŋɛ mɛnu kɛpɔŋ mɛ́, kɛ pɔ nɛcú ŋɡɔ ɑ lɔ sɛ́ ńtíi kúu wɛ́ ńdɔk ŋ́ɡʉ?

¹⁰Ŋ ɡʉ ŋ́kɛ́ ńnyɛt wʉ́ʉ ŋɡɔ, Mɔ́ɔ-Ŋu ɡẅɛɛnɛ nɛlikŋɛ mɛnu kɛpɔŋ-pʉɔmɛsɔŋ.» Yɛ́su píkŋɛ pɑ́Ꞌɑ, ńcú mbɔ̌ ŋɡɑŋkẅíꞋlɛ ŋɡɔ:

¹¹«Lɔ sɛ́ ńtíi pɑ́ŋtɛ wu ńdɔk ŋ́ɡʉ nɛ́ njɛ́Ꞌ yu.»

¹²Pɔ́ꞌɔ lɑ́, ɑ ɡɔ́ɔ ńdɔ sɛ́ ńtíi pɑ́ŋtɛ wɛ, ńdɔk ḿbɔ́ ŋ́ɡʉ, lɑ́Ꞌ pɔ́ ńdíŋɛ, tɑ́ɑ lík mbɑ wɔ̌ lɑ́ cẅɛt, ɛ́ pɔ́ ŋ́kʉꞋnɛ wɛ́. Pɔ́p pɔ́ ŋ́ɡúꞋlɛ Sɛ́ ńcú ŋɡɔ: «Pɛk ŋkɑɑ mɔ zɛɛ ńjʉ́ɔ yɔ ntɛ́ nu pɔ́!»

¹³Yɛ́su kɑ pɛn ḿbɛn nzʉʉ ɡúŋ-nɛtʉŋ-ŋki-Ŋɡɑlilɛɛ. LɑꞋ pɔ́ ńtɔ́ ŋ́kẅɛ́ɛtɛ wɛ́, ɑ pɔ́ ńzíꞋ wɔ́p nɛ́ nu-Sɛ́.

¹⁴A pɔ́ ńnɛn, ńjʉ́ɔ Lɛ́vi mɔ́ɔ-Alfɛ̂, ɑ nɑ́ŋ zʉꞋ yi ɑ kɑ pɔ́ ńcẅɛ́ɛ ntsup pʉɔ-Lɔ́mɑ zúꞋu. Yɛ́su cú mbɔ̌ wɛ́ ŋɡɔ: «Tɔ́ pǔu tsʉ́Ꞌnɛ ńnɛn.» Lɛ́vi lɔ sɛ́ ńcʉ́ɔ nzʉʉ yɛ́.

¹⁵Yɛ́su pɔ́p ɡɑŋku pɛ́ ɡɛ ŋ́ɡʉ njɛ́Ꞌ-Lɛ́vi nɛjʉ́ yúu. Pɔ́p pʉɔ tɛ ńzɑ́ɑ pɔ́ ńjʉ́ yúu, nɛzɑ́ɑ wɔp pɔ́ pɑcẅɛ́ɛ ntsup, tɛ mbɑ pʉɔ pínɛ Pɑyúdɑ kɑ pɔ́ ɛ́fúŋ wɔ́p ŋɡɔ pʉɔ kɛpɔŋ, mbíꞋŋɡɔ ntɛ́ pʉɔ ɛ̂pɑ́ ḿbɔ́ nzʉʉ Yɛ́su tɛꞋ.

¹⁶Pɛcɔ́ Pɑkyɛ́Ꞌtɛ nɛpʉ́ʉ-Mɔ̌sɛ̂ɛ pi pɔ́p ḿbɔ́nɛ tsɛtsɛt pʉɔ-fɑlísɑy, jʉ́ɔ pɑꞋ Yɛ́su pɔ́p pʉɔ ɛ̂pɑ́ sɛ́ ńjʉ́ yúu, ḿbíkŋɛ ɡɑŋku pɛ́ ŋɡɔ: «Ɛ́ ɡɛ ŋɡɔ́ku lɑ pʉʉ pɛ́ ntɛ́ pʉɔ pɔ tɛmtɛ kɑ́ŋ ńjʉ́ yúu?»

¹⁷Yɛ́su zúꞋ, ɛ́sɑk nɛkɛt mbɔ̌ pɔ́p ŋɡɔ: «Mbɔ ŋu pɔɔ pɔ́ sʉ́Ꞌnɛ ŋ́ɡʉ ńdɔɔ ŋɡɛmɛfu pɔ́, ŋu ɡɔɔ lɑ ńdɔɔ wɛ́. Mɔ ŋkɑɑ tɔ́ pɔ nɛfúŋ pʉɔ pi pɔ́p kwɑŋɛ ŋɡɔ pɔ́p pʉɔ sʉ́Ꞌnɛ ŋɡɔ pɔ́p pɛn mbɔ̌ Sɛ́ pɔ́. Ŋ kɑ tɔ́ ntɛ́ pɔ ɡɑŋmɛfɑɑnɛ.»

¹⁸Ɛ́ kɑ pɔ́ yɛcɔ́ lɛ́Ꞌ, ɡɑŋku-Jɑ̂ŋ Mbɑptíshi pɔ́p Pɑfɑlísɑy pɔ́ ŋ́kɔŋ kɔŋnɛ ńnɑ́ŋ njí, ńcɛꞋlɛ Sɛ́. Pɛcɔ́ pʉɔ tɔ́ ḿbíkŋɛ Yɛ́su ŋɡɔ: «Gɑŋku-Jɑ̂ŋ Mbɑptíshi pɔ́p pɛ́ Pɑfɑlísɑy kɔŋ kɔŋnɛ ńnɑ́ŋ nji, ńcɛꞋlɛ Sɛ́. Pú pɛn ŋ́kɛ́ ḿbɔɔ ŋ́ɡɛ yɔ́p pɔ́Ꞌɔ pɔ́, mɛlɑ́Ꞌ kʉ̈ɔ́?»

¹⁹Yɛ́su tsɔ́Ꞌ mbɔ̌ pɔ́p ŋɡɔ: «Tɛ ɛ́ lɑɑ ḿbɔ́ pɛ́ ɡʉ ńnʉŋ nɛlúŋ-lɑ́ɑndɑ́-ŋu, ɑ pɛ́t ńnɑ́ŋ nɑ́ŋnɛ, pʉɔ pi pɛ́ lɑ́Ꞌnɛ ɛ́fúŋ nɑ́ŋ nji ŋɡɔ́ku? Pɔ́p pɛpɔ́p lɑɑ ḿbɛ́t ńnɑ́ŋ nɑ́ŋnɛ, mbɔ pɔ́p ɡʉ ŋ́kɛ́ ŋ́kwɛ́t pɔ yúu.

²⁰Lɑ́ pɛ́ ɡʉ ńdɑ́Ꞌ ɛ́fú mbɔ̌ pɔ́p yɛcɔ́ lɛ́Ꞌ ɛ́sɑ́Ꞌ wɛ́, pɔ́p ɡɔ́ɔ ŋ́kɛ́ ńnɑ́ŋ nji ŋkɑ́ ɛ̂yɑ́.»

²¹Ḿbɛn ńdɔk sɑknɛkɛt ńcú ŋɡɔ: «Mbɔ ŋu pɔɔ lɔk yúu-ndẅí fí, ńdɔk ńtsɛ́t nɛpʉ́ nǔu ndɛn ndẅí pɔ́. Ŋu lɑɑ ŋ́ɡɛ pɔ́Ꞌɔ, mbɔ yúu-ndẅí fí ɡʉ ŋ́kẅiꞋ ɛ́sɑ ndɛn ndẅí, nɛpʉ́ kẅiꞋ ŋ́ɡúꞋ.»

²²Ḿbɛn ŋɡɔ: «Pɛ́ lɑɑ ḿbɔ́ ŋ́ɡʉ ńdẅɛꞋ mɛluꞋ tsɛt[2] kɑ́Ꞌlɛ-ŋɡup, mbɔ pɛ́ kɛ́ níꞋ mɛluꞋ mi pɛ́ pɛ́t ńtsɔ́Ꞌ tsɛt ndwɛn kɑ́Ꞌlɛ pɔ́. Pɛ́ lɑɑ ŋ́ɡɛ pɔ́Ꞌɔ mbɔ mɛluꞋ fí ɡʉ ɛ́fɔꞋ ɛ́sɑ́ɑ ndwɛn kɑ́Ꞌlɛ, pɛ́ ɡɔ́ ḿbɛ́ mɛluꞋ ḿbɛ́ kɑ́Ꞌlɛ. Ɛ́ sɛ́ ḿbíkŋɛ ŋɡɔ pɛ́ níꞋ mɛluꞋ fí pɔ tsɛt kɑ́Ꞌlɛ fí.»

²³Ɛ́ ɡɛ ḿbɔ́ yɛcɔ́ lɛ́Ꞌnji-pɑyúdɑ, Yɛ́su pɔ́p ɡɑŋku pɛ́ pɔ́ ńdɛɛ tsɛt ŋkɑ́Ꞌ-mɛsɑ́ŋntsʉ́ʉ, ɡɑŋku pɛ́ zɛ nɛsẅɛ mɛsɑŋntsʉ́ʉ ɛ̂mɑ́.

²⁴Pɛcɔ́ pɑfɑlísɑy jʉ́ɔ, ńcú mbɔ̌ wɛ́ ŋɡɔ: «Líŋɛ yú lɑ́ ńjʉ́ɔ! Gɑŋku pú ɡɛ yúu mi nɛpʉ́ʉ nɛkŋɛ tɔꞋ nɛɡɛ nǔu lɛ́Ꞌnji mɛlɑ́Ꞌ kʉ̈ɔ́?»

²⁵A tsɔ́Ꞌ mbɔ̌ pɔ́p ŋɡɔ: «Pʉʉ ŋkɑɑ mɔ́ fúŋ zʉꞋ-ŋwɑꞋnɛ-Sɛ́ yi ɛ́ lɛꞋlɛ́nɛ yúu mi fɔɔ Ndɑvît kɑ ɡɛnɛ pɔ́ kɛ? N cú pɑꞋ ŋkɑ́ yi nji kɑ zɑ́ŋnɛ wɛ́, nu tsɑ wɔ́p pʉɔ pɛ́.

²⁶Ɛ́ ḿbɔ́ ŋkɑ́ yîyɑ́, Abiyɑtɑɑ pɔ́ tɑ́tndɑ́-pɑnɔŋpɔꞋ, Ndɑvît kúu ndɑ́-nɔŋpɔꞋ, ḿbɛ́ɛ mbɛlɛ̂ɛt yi pɛ́ ɡɑ́nɛ mbɔ̌ Sɛ́, ŋ́kwɛ́t tɛ ŋ́ɡɑ́ yɛ́ pʉɔ pɛ́, lɑ́ nɛpʉ́ʉ nɛkŋɛ píkŋɛ ŋɡɔ ndɑꞋ pɑnɔŋpɔꞋ kwɛ́tnɛ. Lɑ́, fɔɔ Ndɑvît kɑ pɛ́ɛ ŋ́kwɛ́t tɛ ŋ́ɡɑ́ yɛ́ ɡɑŋku pɛ́.»

²⁷Yɛ́su pɛn ńcú mbɔ̌ pɔ́p ŋɡɔ: «Sɛ́ kɑ ɡɛ lɛ́Ꞌnji ńdɔk ńcẅɛ́lɛ́ ŋumɛsɔŋ. A ŋ́kɑɑ pɔ́ ŋ́ɡɛ ŋumɛsɔŋ ŋ́ɡɑ́ mbɔ̌ lɛ́Ꞌnji pɔ́.

²⁸Ɛ́ pɔ́Ꞌɔ lɑ́, Mɔ́ɔ-Ŋu zɛɛnɛ ŋ́ɡẅɛɛ nɛcú yúu mi ɛ́ lɑɑ ḿbɔ́ pɛ́ ɡɛ tɛ mbɑ nǔu lɛ́Ꞌnji-pɑyúdɑ.»