Read Ngomba Mɑ́lɛ́kúshi 3 Bible Online

Mɑ́lɛ́kúshi 3 - Ngomba bible

Mɑ́lɛ́kúshi 3

¹Yɛ́su ɡɛ ḿbɛn ŋ́ɡʉ tsɛt yɛcɔ́ ndɑ́-cúꞌlɛ-pɑyúdɑ, wɛcɔ́ ŋu pɔ́ yɛ́ ndɑ́ ɛ̂yɑ́, mbɔ pɔ́ yɛ́ kɑ pfú.

²Pɛcɔ́ pʉɔ pɔ́ zúꞋu, ḿbɔ́ ńdʉŋtɛ wɛ́ nɛjʉ́ɔ kɛ ɑ ɡʉ ŋ́ɡɛ ŋu ɛ̂wɑ́ fíitɛ lɛ́Ꞌnji ɛ̂yɑ́ ɔɔ, pɔ́p fú nǔu, ɛ́fɛn wɛ́ mbɔ̌ pɑŋɑkntsɑŋ.

³A cú mbɔ̌ pfúpɔ́ ɛ̂wɑ́ ŋɡɔ: «Lɔ sɛ́ ńtɔ́ ńtʉ́ʉ mbi,

⁴Yɛ́su cú mbɔ̌ pʉɔ ɛ̂pɑ́ ŋɡɔ Pʉʉ sẅíi wɑ́ɑ: Nɛpʉ́ʉ nɛkŋɛ pɛ́Ꞌɛ ńcú ŋɡɔ pɛ́ ɡɛ kʉ̈ɔ́ lɛ́Ꞌnji? Ŋɡɔ pɛ́ ɡɛ nu sʉ́Ꞌnɛ kɛ nu kɛpɔŋ? Ŋɡɔ pɛ́ ɡɛ ŋu luk kɛ pɔ ŋɡɔ pɛ́ jẅí wɛ́?» Sɑ̌ɑ ŋu wɔp pɔɔ tsɔ́p.

⁵Yɛ́su mɑꞋ mík ńdɔk ńdíŋɛ wɔ́p wɛ́mɔ́Ꞌ wɛ́mɔ́Ꞌ, ńzɑ́ŋ lɔ́ŋ, mbʉʉ yɛ pɔ́ citɛ mbíꞋ tʉʉ tú yɔ́p, ɑ cú mbɔ̌ ŋu mbɛ́ɛnɛ ɛ̂wɑ́ ŋɡɔ: «Sɛn pɔ́ yú!» A sɛn. Pɛ́ jʉ́ɔ ɛ́ tɛntɛ.

⁶Pɑfɑlísɑy ɡɔ́ɔ ɛ́fú ndɑ́-cúꞌlɛ ńcẅɛt, ŋ́ɡʉ pɔ́p pʉɔ-Ɛlɔ̂dɛ cúꞋlɛ nɛlɔɔ shʉ́ pɑꞋ pɔ́p ɡʉ ŋ́ɡɛ lɑ́ ńjẅí Yɛ́su.

⁷Yɛ́su pɔ́p ɡɑŋku pɛ́ ɡɛ ɛ́fú zúꞋu ŋ́ɡʉ nɛ́ mbʉʉ mɑ́mɑ́ mí-Ŋɡɑlilɛɛ. Nɔɔ-lɑ́Ꞌ tɛ ńzɑ́ɑ cʉ́ɔ nzʉʉ yɛ́, ɛ́fú ɡúŋ-pɑk-ŋɡɔŋ-Ŋɡɑlilɛɛ mbɑ ɡúŋ-pɑk-ŋɡɔŋ-Judɛ̂,

⁸tɛ mbɑ tʉ́sɔŋ-Yɛlúsɑlɛm. Pɛcɔ́ fú yɔ́p ɡúŋ-pɑk-ŋɡɔŋ-Idumɛ́ɛ, pɛcɔ́ fú tɛ mbɑ njʉ́n-ŋki-Juudɛŋ, ŋ́ɡɛ pʉɔ pi pɔ́p nɑ́ŋ ḿbɑ́ɑtɛ tʉ́sɔŋ-Tîi pɔ́p tʉ́sɔŋ-Sidɔŋ. Pɔ́p tɔ́ pɔ́Ꞌɔ, nɛjʉ́ɔ wɛ́, mbíꞌŋɡɔ pɔ́p kɑ pɔ́ ńzúꞋ mbɑ kʉ̈ɔ́ lɑ́ yi ɑ ɡɛnɛ.

⁹Yɛ́su jʉ́ɔ pɔ́Ꞌɔ, ńcú mbɔ̌ ɡɑŋku pɛ́ ŋɡɔ, pɔ́p niitɛ mɔ́ɔmɔ kɑnúꞋ, ɑ kúu tsɛtú, ḿbɔ́k lɑ́Ꞌ nɛfyɛ́t wɛ́.

¹⁰Ɛ́ ɡɔ́ ḿbɔ́, mbɔ ɑ ɡɛ pʉɔ tɛ ńzɑ́ɑ fíitɛ, tɛ pʉɔ tsʉʉ pi ɡɔɔ m̄bɔ́nɛ nǔu pɔ́p nɑ́ɑtɛ wɛ́, ńzɑ́p mbɔ́ nǔu wɛ́.

¹¹Pʉɔ pi mɛzẅikŋɛ kɛpɔŋ kɑ pɔ́ ḿbúunɛ wɔ́p kɑ pɔ́ tɛ ńjʉ́ɔ wɛ́, ńnɔɔ mɛku wɛ́, ńdɔk ŋɡi tɛnnɛ ńcú ŋɡɔ: «Ɔ Mɔ́ɔ Sɛ́.»

¹²Lɑ́ ɑ pɔ́ ńtɔꞋ wɔ́p tɛ ḿbʉ́ʉ tɛꞋ ŋɡɔ pɔ́p pɑ́ɑ nɛɡɛ pɛ́ jí ŋu ẅí ɑ jʉ́.

¹³Ɛ́ pɔ́ yɛcɔ́ lɛ́Ꞌ,Yɛ́su kɔꞋ ndǔ nɛŋkɔ́Ꞌ, ɛ́fúŋ pʉɔ pi ɑ ńtsɔ́Ꞌnɛ wɔ́p. Pɔ́p tɔ́,

¹⁴ɑ ɡʉ tsɛtsɛt pɔ́p ńtsɔ́Ꞌ pʉɔ ntsɔ̌ppɑ́ nɛ́ nɛɡɛ́m, nɛpɔ́ yi pɔ́p pɛ́pɔ́p ɡʉnɛ ńtsʉ́ꞌ ḿbɔ́, ḿbɛn ńcẅi lík yɔ́p ŋɡɔ ɡɑŋntúu, nɛnɑ́ŋ ńtúu wɔ́p pɔ́p cẅi Ŋkʉʉ Sʉ́Ꞌnɛ-Sɛ́,

¹⁵ḿbɛn ŋ́kuꞋ nɛzuŋ mɛzẅikŋɛ kɛpɔŋ mi ɛ́ púunɛnɛ pʉɔ. (

¹⁶Pʉɔ ntsɔ̌ppɑ́ nɛ́ nɛɡɛ́m pinɛ ɑ kɑ tsɔ́Ꞌnɛ pʉ́ɔ: Yɔ ḿbɔ́ Símɔ, ɑ cẅi lík yɛ́ ŋɡɔ Pyɛ̂,)

¹⁷yɔ pɔ́ Jɑ̂k pɔ́p mɔ́ɔmɑ́ wɛ Jɑ̂ŋ, pɔ́p pɔ́ mbɔ́ŋkʉ̈ɔ́ Zɛbɛ́dɛ̂. Yɛ́su cẅi lík yɔ́p ŋɡɔ Mbwɑnɛ̂ɡɛ́s, ɛ́ lɔk ńcú ŋɡɔ, pɔ́ɔ-nɛfɑŋ ni ɛ́ kwɛnɛ́nɛ.

¹⁸Yɛ́su pɛn ńtsɔ́Ꞌ Ndɛlɛ́yɑ, pɔ́p Filîp, ŋ́ɡɛ Pɑtɛlɛmî nɛ́ Mɑtʉ̈ɔ, pɔ́p Tɔ́mɑ́shi, ŋ́ɡɛ Jɑ̂k mɔ́ɔ-Alfɛ̂, ŋ́ɡɛ Tɑdɛ́ɛ nɛ́ Símɔ nzɔŋlɑ́Ꞌ,

¹⁹ḿbɛn ŋ́ɡɛ Jẅidɑ Iskɑlyɔt ẅi ɑ kɑ ńtɑ́ɑnɛ ɛ́fɛn Yɛ́su.

²⁰Ŋ́ɡɛ pɔ́Ꞌɔ, Yɛ́su kúu ndɑ́, lɑ́Ꞌ pɛn ńcúꞋlɛ ńzɑ́ɑ zɑ́ɑnɛ tɛ pɔ́p ɡɑŋku pɛ́ pɔɔ jʉ́ɔ mbɑ ŋkɑ́ tɛ ŋ́kwɛ́t yúu pɔ́.

²¹Pʉɔ-tsɛ́nndɑ́ pɛ́ Yɛ́su zúꞋ yɔ nu, ńdɔ sɛ́, ńcʉ́ɔ sɛ̂ndúŋ pɑꞋ pɔ́p ɡʉ ŋ́ɡʉ ŋ́ɡẅɛɛ wɛ́, ḿbɔ́ ŋ́kwɑŋɛ ŋɡɔ tú yɛ́ ɡɑ́ɑnɛ.

²²Mbɔ pɛcɔ́ pɑkyɛ́Ꞌtɛ nɛpʉ́ʉ-Mɔ̌sɛ̂ɛ lɑ́Ꞌ ɛ́fú Yɛlúsɑlɛm ńcúŋ ńtɔ́, ńcú yɔ́p ŋɡɔ: «Mbɛlzɛ́búl tɑ́tndɑ́ mɛzẅikŋɛ kɛpɔŋ pɔ́nɛ nǔu wɛ́. Ḿbɛn ḿbɔ́ ńcú ŋɡɔ: A lɔk pɔ mɛtʉʉ mɛ́ lɑ ńdɔk ńzuŋ mɛzẅikŋɛ kɛpɔŋ.»

²³Yɛ́su fúŋ wɔ́p pɔ́p tɔ́, ɑ sɑk nɛkɛt mbɔ̌ pɔ́p ŋɡɔ: «Lɑ́ ɛ́ nɛ́nẅín ŋɡɔ ɛ́ lɑɑ ḿbɔ́ Sɑ́ttɑ shɔtnɛ ńzuŋ túmbʉʉ yɛ́ ŋɡɔ kʉ̈ɔ́?

²⁴Pʉɔ tɑꞋ lɑ́Ꞌ lɑɑ ɛ́shɔtnɛ ńdʉ́ɔꞋ ntsɔ tsɛtsɛt pɔ́p, mbɔ yîyɑ́ lɑ́Ꞌ ɡʉ ḿbɛ́.

²⁵Pʉɔ tɑꞋ tsɛ́nndɑ́ pɛn ḿmɑꞋ fyɑkŋɛ tsɛtsɛt pɔ́p, mbɔ yîyɑ́ tsɛ́nndɑ́ ɡʉ tɑ́kŋɛ.

²⁶Sɑ́ttɑ lɑɑ ɛ́shɔtnɛ ńdʉ̈ɔꞋ túmbʉʉ yɛ́, kɛ fyɑkŋɛ pɔ́nɛ tsɛt nɛ́ nɛfɔɔ ɔɔ, mbɔ nɛfɔɔ nɛ́ ɛ̂nɑ́ kɛ́ ɡɛ ńtʉ́ʉ pɔ́, mbɔ yɛ́ nu ɡʉ ḿmɛ.

²⁷Mbɑ wɛcɔ́ ŋu kɑ́ pɔ́ ɡú ẅi ɛ́ lɑɑ ḿbɔ́, ɑ pʉ́ɔꞋ ndɑ́-ŋu ntʉʉ, ńtíi yúu pɛ́ kɛ́ pɔ́ yi ɑ piitɛ ŋ́kút wɛ́ pɔ́. A piitɛ tɛ ŋ́kút wɛ́, ŋ́kuꞋ nɛkúu ndɑ́, ńtíi yúu pɛ́ tsʉʉ.

²⁸Ŋ kɛ́ ɛ́sẅíi wʉ́ʉ, kwɑꞋ nɛ́nẅín, ɛ́ lɑɑ ḿbɔ́ Sɛ́ lɑ́Ꞌ ńdikŋɛ mɛnu kɛpɔŋ pʉɔmɛsɔŋ tsʉʉ ŋ́ɡɑ́ mbɔ̌ pɔ́p, tɛ mbɑ mɛsẅíŋɛ tsʉʉ mi pɔ́p lɔknɛ ńzɔɔtɛ wɛ́.

²⁹Lɑ́, ŋu lɑɑ ńzɔɔtɛ Zẅikŋɛ Lɛ́ɛnɛ́nɛ, mbɔ yɛcɔ́ nɛlɑ́Ꞌ ńdikŋɛ ŋ́ɡɑ́ mbɔ̌ ŋɡɑŋ kɛ́ pɛn ḿbɔ́ ɡú pɔ́, mbíꞌŋɡɔ ɑ ɡɛ pɔ́Ꞌɔ, nu kɛpɔŋ ɛ̂yɑ́ ɡɔ́ŋ tú yɛ́ kɛ́ lɑ́Ꞌ ḿmɛ.»

³⁰Yɛ́su kɑ pɔ́ ńcú mbɔ̌ pɔ́p pɔ́Ꞌɔ, mbíꞌŋɡɔ pɔ́p cú ŋɡɔ mɛtʉʉ mɛ́ fú pɔ mbɔ̌ zẅikŋɛ kɛpɔŋ.

³¹Ŋ́ɡɔ́ ḿmɛkŋɛ, mɑ́ pɛ́ Yɛ́su pɔ́p pɔ́ɔpɛ́mɑ́ pɛ́ tɔ́, ńtʉ́ʉ ntsundɑ́, ńtúu ŋu ŋɡɔ ɑ ɡʉ ɛ́fúŋ wɛ́ ŋ́ɡɑ́ mbɔ̌ pɔ́p.

³²LɑꞋ nɑ́ŋtɛ Sɛ́, ńtʉ̈ɔ́Ꞌlɛ Yɛ́su ńníꞋ sɔŋ, pɛ́ cú mbɔ̌ wɛ́ ŋɡɔ: «Pɛ́ cú ŋɡɔ mɑ́ wu pɔ́p pɔ́ɔpɛ́mɑ́ pú píi ḿbɔ́ ńdɔɔ wú.»

³³A tsɔ́Ꞌ ŋɡɔ, kwɑꞋ mɑ́mɑ́ wɑɑ wɔ̌, kwɑꞋ pɔ́ɔpɛ́mɑ́ pɑ́ɑ pɔ́ pɛ́ wɔ̌?

³⁴Ńcú pɔ́Ꞌɔ, ɛ́shɔtnɛ ńdíŋɛ pʉɔ pi pɔ́p tʉ̈ɔ́Ꞌtɛnɛ wɛ́ ńníꞋ sɔŋ, ńcú ŋɡɔ: «KwɑꞋ mɑ́mɑ́ wɑɑ pɔ́p kwɑꞋ pɔ́ɔpɛ́mɑ́ pɑ́ɑ pʉ́ɔlɑɑ pɔ́p nɑ́ŋtɛ́nɛ.»

³⁵Jínɛ ŋɡɔ ŋu lɑɑ ŋ́ɡɛ yúu mi Sɛ́ sɛ́ ŋ́kɔŋ, mbɔ ŋɡɑŋ mɑ́mɑ́ wɑɑ, mbɔ mɔ́ɔmɑ́ mɔ, wɛ ŋu mbɛ́ɛnɛ mbɑ wɛ mɑŋɡɛ́.