Read Ngomba Mɑ́lɛ́kúshi 5 Bible Online

Mɑ́lɛ́kúshi 5 - Ngomba bible

Mɑ́lɛ́kúshi 5

¹Yɛ́su pɔ́p ɡɑŋku pɛ́ túu ŋki tɛ ŋ́kúu nǔu yɛcɔ́ njʉ́n, ɛ́ pɔ́ ŋɡɔŋ-pʉɔ-Ŋɡɑlɑzɑnî,

²ḿbɔ́ ɛ́fú tsɛt kɑnúꞋ ńcẅɛt, wɛcɔ́ ŋu ɡɔ́ɔ ńcẅɛt ńtɔ́ mbi yɛ́, ɛ́fú mvuꞋ-mɛŋɡɔꞋ, ɛ́ pɔ́ zʉꞋ yi pɛ́ tẅíinɛ pɛpfú zúꞋu, ḿbɔ́ ŋu, mbɔ zẅikŋɛ kɛpɔŋ kɑ ɡẅɛɛ wɛ́, ḿbɔ́ ḿbúunɛ wɛ́.

³A kɑ pɔ́ ńtswɛ́ pɔ mvuꞋ-mɛŋɡɔꞋ ɛ̂mɑ́, ŋu pɛn ḿbɔɔ ɡú ẅi ɛ́ lɑɑ ḿbɔ́ ɑ pɛn ŋ́kuꞋ nɛkút wɛ́ pɔ́, tɛ mbɑ nɛ́ cɛ̂n pɔ́.

⁴A pɔ́, mbɔ pɛ́ kɑ zɛɛ ńníꞋ kɔꞋ mɛku yɛ́, ńdɔk cɛ̂n ŋ́kút mbɔ́ mɛ́, ɑ ḿbʉ̈ɔ́Ꞌtɛ kɔꞋ, ńzɑ́Ꞌtɛ mɛcɛ̂n tɛ wɛcɔ́ ŋu pɔɔ pɛn ŋ́kuꞋ nǔu wɛ́ pɔ́.

⁵A pɔ́ nɛnɛm, kɛ nɛtúꞋ ɔɔ, ḿbɔ́, ɛ́fú mvuꞋ-mɛŋɡɔꞋ ŋ́ɡʉ ndǔ nɛŋkɔ́Ꞌ ŋ́ɡíɛt, ḿbɔ́ ńdɔk mɛpɑk-mɛŋɡɔꞋ ŋ́ɡwɑt mbʉʉ yɛ.

⁶A tʉ́ʉ ŋɡɑ sɛsɑ, ńjʉ́ɔ Yɛ́su pɔ́Ꞌɔ, ńnɑ́ɑtɛ wɛ́ ńtɔ́ ńnɔɔ mɛku wɛ́,

⁷ńdɔk ŋɡi tɛnnɛ ŋ́ɡíɛt ŋɡɔ: «Yɛ́su mɔ́ɔ-Sɛ́ ẅi ɑ piꞋnɛ mbɑ kʉ̈ɔ́ lɑ́, ɔ cẅɛ́ɛ kʉ̈ɔ́ mbɔ̌ mɔ? Sɛ́sẅíi, n dɔk lík-Sɛ́ ḿbuꞋ mbɔ́ mbɔ̌ wu ŋɡɔ, ɔ pɑ́ɑ nɛníꞋ wɑ́ɑ tsɛt ŋɡʉ̈ɔ́Ꞌ?»

⁸Ŋu ɛ̂wɑ́ kɑ ɡɔ́ ńcú pɔ́Ꞌɔ, ɛ́ pɔ́, mbɔ Yɛ́su cú mbɔ̌ mɛzẅikŋɛ kɛpɔŋ ŋɡɔ pɔ́p fú nǔu wɛ́ ńcẅɛt.

⁹Yɛ́su píkŋɛ ŋu ɛ̂wɑ́ ŋɡɔ: «Lík yú ŋɡɔ wɔ̌?» A pʉ̈ɔt mbɔ̌ wɛ́ ŋɡɔ: «Lík yɑ́ɑ ŋɡɔ mɛnu, mbíꞌŋɡɔ pɛk mɛzẅikŋɛ kɛpɔŋ ńzɑ́ɑ zɑ́ɑnɛ,»

¹⁰ńniitɛ ḿbuꞋ mbɔ́ mbɔ̌ Yɛ́su ŋɡɔ: «Sɛ́sẅíi, kɔɔ ɑ zuŋ mɛsɛ́ ɛ̂mɑ́ tɛ pɔ́p fú lɑ́Ꞌ ɛ̂yɑ́ ŋ́ɡʉ.»

¹¹Ɛ́ kɑ ɡɔ́ ḿbɔ́, yɛcɔ́ kɑt-mɛnjínɑɑ pɔ́ zúꞋu, ndǔ nɛŋkɔ́Ꞌ ḿbɔ́ ŋ́kɑ́t ńdɔɔ yúu ŋ́kwɛ́t.

¹²Mɛzẅikŋɛ kɛpɔŋ puꞋ mbɔ́ mbɔ̌ Yɛ́su ńcú ŋɡɔ: «Gɛ pɛk kúu pɔ nǔu mɛnjínɑɑ mɔ.»

¹³Yɛ́su pɛ́m, mɛzẅikŋɛ kɛpɔŋ ɡɔ́ɔ ŋ́kɛ́ ɛ́fú nǔu ŋu ɛ̂wɑ́, ńcẅɛt ŋ́kúu nǔu mɛnjínɑɑ. Kɑt-mɛnjínɑɑ tɑ́kŋɛ ɛ́fú ndǔ nɛŋkɔ́Ꞌ ḿbʉ̈ɔtnɛ ŋki, ńnɔ́ ŋki ḿpfútɛ. Pɔ́p kɑ pɔ́ yúu ntsɑ́Ꞌ yɛ́pɑ́.

¹⁴Pʉɔ pi pɔ́p kɑ pɔ́ ńtsiinɛ mɛnjínɑɑ jʉ́ɔ pɔ́Ꞌɔ, ŋ́kʉɔ, ŋ́ɡʉ ńdɔk nu yi pɔ́p jʉ́ɔnɛ, ɛ́sɑt tʉ́sɔŋ, tɛ mbɑ lɑ́Ꞌ. LɑꞋ kɔꞋ, ńtɔ́ ńjʉ́ɔ yúu mi ɛ́ ɡɛnɛ,

¹⁵ŋ́ɡʉ tɛ ŋ́kúu nɛjɔ́ŋ Yɛ́su, ńjʉ́ɔ ŋu ẅí mɛzẅikŋɛ kɛpɔŋ kɑ pɔ́ nǔu wɛ́ tɛ ńzɑ́ɑ zɑ́ɑnɛ lɑ́, ɑ nɑ́ŋ ḿmɑꞋ mɛndẅí, mbɔ jínu yɛ́ pɛn, pɔ́p pɔ́k tɛꞋ.

¹⁶Pɛcɔ́ pʉɔ pɔ́ zúꞋu, mbɔ pɔ́p lɑ́Ꞌ ńjʉ́ɔ yúu mi ɛ́ ɡɛnɛ ŋu ɛ̂wɑ́ mbɑ mɛnjínɑɑ. Pɔ́p pɔ́ ḿbɛ́ɛtɛ ɛ́sẅíi pʉɔ pinɛ pɔ́p tɔ́nɛ nzʉʉ.

¹⁷Pɛ́ zúꞋ, ńzɛ puꞋ mbɔ́ mbɔ̌ Yɛ́su ŋɡɔ ɑ fú lɑ́Ꞌ pɔ́p ŋ́ɡʉ.

¹⁸Yɛ́su sɛ́ ŋ́kúu tsɛt kɑnúꞋ pɑꞋ ɑ ɡʉ ńtsʉ́ꞌ ŋ́ɡʉ yɛ́ ɡʉnɛ, ŋu wɑ́ ẅi ɑ fíitɛ́nɛ lɑ́, puꞋ mbɔ́ mbɔ̌ wɛ́ ŋɡɔ ɑ pɛ́m, pɔ́p mɛ́ ɡʉ.

¹⁹Yɛ́su lʉꞋ, ńcú mbɔ̌ wɛ́ ŋɡɔ: «Pɛn nɛ́ njɛ́Ꞌ wu, ŋ́kẅɛ́ɛtɛ pʉɔ pú, ɛ́sẅíi wɔ́p nɛ́ mɑ́ nu sʉ́Ꞌnɛ yí Tsɑpʉɔ ɡɛnɛ nǔu ɡu, ɛ́sẅíi wɔ́p pɑꞋ ɑ tsɑ́ɑnɛ mɛjʉ́ŋ mú.»

²⁰Ŋu ɛ̂wɑ́ ɡɔ́ɔ ŋ́kɛ́ ŋ́ɡʉ, ŋ́ɡɔ́ ńnɛn tsɛt mɛlɑ́Ꞌ ɛ̂mɑ́ tsʉʉ, ḿbɔ́ ɛ́sẅíi nu yi Yɛ́su lɑ́Ꞌnɛ ŋ́ɡɛ nǔu wɛ́. Pʉɔ tsʉʉ zúꞋ ɛ́ kʉꞋnɛ wɔ́p tɛꞋ. Pɛ́ fúŋ yîyɑ́ pɑk-lɑ́Ꞌ ŋɡɔ Mɛtʉ́sɔŋ-Nɛɡɛ́m.

²¹Yɛ́su lɔk kɑnúꞋ ńtúu ŋki tɛ ŋ́kúu nǔu yɛcɔ́ njʉ́n. Mɑ́mɑ́ nɔɔ-lɑ́Ꞌ cúꞋlɛ nɛjɔ́ŋ yɛ́. A pɛ́t ḿbɔ́ pɔ mbʉʉ-ŋki,

²²wɛcɔ́ ŋu tɔ́, lík yɛ́ pɔ́ ŋɡɔ Yɑyɛ́lɔ, ɑ pɔ́ wɛcɔ́ tɑꞋ nǔu pɛlʉ́m tsɛt ndɑ́-cúꞌlɛ-pɑyúdɑ, ḿbɔ́ tɛ ńjʉ́ɔ Yɛ́su, ŋ́ɡɔ́ɔ ńnɔɔ mɛku yɛ́,

²³ḿbúꞋ mbɔ́ ŋɡɔ: «Sɛ́sẅíi mɔ́ɔ wɑɑ wɛ mɑŋɡɛ́ tsʉꞋ ḿbɔ́ pɔ ntsu-nɛvú, tɔ́, ńzɑ́p mbɔ́ mú nǔu wɛ́, ɑ fíitɛ ńduk.»

²⁴Yɛ́su pɛ́m, pɔ́pmɛ́ cʉ́ɔ sɛ̂ndúŋ ḿbɔ́ ŋ́ɡʉ, lɑ́Ꞌ pɔ́ sɛ̂ndúŋ tɛꞋ, ḿbɔ́ ɛ́fyɛ́t Yɛ́su.

²⁵Wɛcɔ́ mɑŋɡɛ́ pɔ́ yɛ́ tsɛtsɛt, ḿbɔ́ ŋ́ɡɔɔ, ŋ́ɡẅɛɛ ɡɔɔ mɑ́sɔ́ɔ, mbɔ ɛ́ ɡɑ́nɛ wɛ́ ɡɑ́nɛnɛ ŋɡuꞋ ntsɔ̌ppɑ́ nɛ́ nɛɡɛ́m.

²⁶Mbɔ ɑ kɑ nɛn mɔ́ njɛ́Ꞌ-ɡɑŋfu tɛ ŋ́kɑ́ɑ, ḿbʉ́ʉpɛ yɛ ŋkɑ́p tɛ ɛ́ mɛ, ŋ́kɛ́ ḿbɔɔ fíitɛ, tɛ ńtsʉꞋ pɔ́Ꞌɔ, ɡɔɔ kẅiꞋ kẅiꞋnɛ.

²⁷A kɑ zúꞋ pɑꞋ pɛ́ cúnɛ ŋɡɔ Yɛ́su sɛ́ ŋ́ɡɛ pʉɔ fíitɛ, ɑ nɑꞋtɛ ɛ́fú nzʉʉ ńtɔ́ ŋ́ɡẅɛɛ ndẅí-Yɛ́su,

²⁸ḿbɔ́ ńcú tʉ́m yɛ́ ŋɡɔ: «N dɑɑ ŋ́ɡẅɛɛ pɔ ndɑꞋ ndẅí-Yɛ́su, mbɔ ŋ ɡʉ fíitɛ,»

²⁹ŋ́ɡɔ́ɔ ŋ́ɡẅɛɛ, ɡɔɔ yɛ́ ɡɔ́ɔ ńzɑ́Ꞌnɛ, ɑ pɛn ńzúꞋ, mbɔ ɑ fíitɛ.

³⁰Yɛ́su ɡɔ́ɔ ńzúꞋ pɑꞋ mɛcɔ́ mɛtʉʉ cẅɛtnɛ mbʉʉ yɛ́, ɛ́shɔtnɛ ńdíŋɛ lɑ́Ꞌ, ḿbíkŋɛ ŋɡɔ: «Wɔ̌ kuunɛ ndẅí yɑɑ?»

³¹Gɑŋku pɛ́ pʉ̈ɔt ŋɡɔ: «Ɔ jʉ́ɔ lɑ́Ꞌ pɔ́ ɛ́fyɛ́t wú ndɛn wɔ, ɔ pɛn ḿbíkŋɛ ŋɡɔ wɔ̌ kuunɛ ndẅí yu ɔɔ?»

³²Yɛ́su shɔtnɛ mbʉʉ yɛ ḿbɔ́ ḿbɑ́tɛ, ńdɔɔ nɛjí ŋu ẅí ɑ kuunɛ wɛ́.

³³Mɑŋɡɛ́ ɛ̂wɑ́ tsʉꞋ ŋ́ɡwɛt ɡwɛtnɛ, mbíꞌŋɡɔ ɑ kɑ jí yúu mi ɛ́ lɛɛnɛ nǔu wɛ́, ŋ́ɡɔ́ɔ ŋ́kɛ́ ńtɔ́, ńnɔɔ mɛku-Yɛ́su, ɛ́sẅíi wɛ́ kwɑꞋ nu yí ɛ́ lɛɛnɛ tsʉʉ.

³⁴Yɛ́su cú mbɔ̌ wɛ́ ŋɡɔ: «Mɔ́ɔ wɑɑ, pɑꞋ ɔ zɑ́pnɛ tʉ́m yú nǔu mɔ lɑ́, ɔ fíitɛ, ɡʉ nɛ́ mbɔ́tnɛ, ɡɔɔ yú mɛ.»

³⁵Yɛ́su pɛ́t ńcú nu mbɔ̌ mɑŋɡɛ́ ɛ̂wɑ́ cúnɛ, pɛcɔ́ ntɑ́Ꞌ-pʉɔ fú njɛ́Ꞌ-Yɑyɛ́lɔ, ńtɔ́ ɛ́sẅíi wɛ́ ŋɡɔ mɔ́ɔ nɛ ńdɑ́Ꞌmɔ́ ḿpfú, ŋɡɔ kɔɔ ɑ pɛn ḿbɑ́klɛ Ndɛ.

³⁶Yɛ́su zúꞋ pɑꞋ ŋkɑ́ yi ɑ kɑ́ zúꞋ lɑ́, ńcú mbɔ̌ Yɑyɛ́lɔ ŋɡɔ: «Kɔɔ pɔ́k, zɑ́p pɔ tʉ́m yú nǔu mɔ.»

³⁷Yɛ́su pɔ́p Yɑyɛ́lɔ pɔ́ ŋ́ɡʉ, Yɛ́su pɔɔ pɛ́m ŋɡɔ wɛcɔ́ ŋu cʉ́ɔ nzʉʉ pɔ́p pɔ́, ndɑꞋ Pyɛ̂ ŋ́ɡɛ Jɑ̂k pɔ́p mɔ́ɔmɑ́ wɛ Jɑ̂ŋ.

³⁸Pɔ́p ɡʉ tɛ ŋ́kúu ndɑ́-Yɑyɛlɔ, Yɛ́su jʉ́ɔ pɛ́ pɔ́ zúꞋu ḿbɔ́ ḿbɑ́klɛ zʉꞋ, pʉɔ pɔ́ ńdɑɑ, pɛcɔ́ pɔ́ ŋ́ɡíɛt.

³⁹Yɛ́su kúu ndɑ́ ńcú mbɔ̌ pɔ́p ŋɡɔ: «Pʉʉ pɑ́klɛ zʉꞋ, ńdɑɑ ndɛn wɑ́ mɛlɑ́Ꞌ kʉ̈ɔ́? Mɔ́ɔ kɑ́ pfú, ɑ lɛ́ lɛ́nɛ.»

⁴⁰Pɔ́p zúꞋ, ŋ́ɡwɛ wɛ́ ɡwɛnɛ. A ɡɛ pʉɔ tsʉʉ fú ndɑ́ ńcẅɛt, tɛ ɛ́ tsʉꞋ ndɑꞋ Tɑ́-mɔ́ɔ pɔ́p mɑ́mɔ́ɔ, ŋ́ɡɛ ɡɑŋku pɛ́ ɛ̂pɑ́. Pɔ́p pɛpɔ́p kúu tsɛt lûmndɑ́, zʉꞋ yi mɔ́ɔ nɔɔnɛ zúꞋu.

⁴¹Yɛ́su ɡẅɛɛ pɔ́-mɔ́ɔ, ńcú mbɔ̌ wɛ́ ŋɡɔ: «Tɑlítɑ kum,» ńdɔk ńcú ŋɡɔ: «Mɔ́ɔ mɑŋɡɛ́, lɔ sɛ́.»

⁴²Mɔ́ɔ ɡɔ́ɔ ḿbʉꞋ mbʉʉ yɛ, ńdɔ sɛ́ ńzɛ nɛnɛn. Pɔ́p jʉ́ɔ ɛ́ kʉꞋnɛ wɔ́p tɛꞋ. Mɔ́ɔ kɑ pɔ́ mɔ́ɔ ŋɡuꞋ ntsɔ̌ppɑ́ nɛ́ nɛɡɛ́m.

⁴³Yɛ́su tɔꞋ wɔ́p ŋɡɔ pɔ́p pɑ́ɑ nɛɡɛ tɛ wɛcɔ́ ŋu ndɛꞋ jí yúu mi ɛ́ ɡɛnɛ, ḿbɛn ńcú ŋɡɔ pɛ́ ɡɑ́ yúu ɑ jʉ́.